បាយជាអាហារសំខាន់របស់មនុស្សច្រើននាក់។ ក្រុមអ្នកស្រាវជ្រាវពីសាកលវិទ្យាល័យHarvard ខាងផ្នែកសុខាភិបាលសាធារណៈនៅក្នុងរដ្ឋ Massachusetts បានចេញផ្សាយសេចក្តីរាយការណ៍មួយអំពី‘បាយ’។ សេចក្តីរាយការណ៍បង្ហាញថា ការទទួលទានបាយស បង្កើនគ្រោះថ្នាក់នៃជម្ងឺទឹកនោមផ្អែមប្រភេទទី២។ ក៏ប៉ុន្តែ ទទួលទានបាយសម្រូបបែរជាកាត់បន្ថយគ្រោះថ្នាក់នៃជម្ងឺនោះទៅវិញ។
អង្គការសុខភាពពិភពលោកនិយាយថា មនុស្សជាង ២២០លាននាក់នៅពាសពេញពិភពលោក មានជម្ងឺទឹកនោមផ្អែម។ ជម្ងឺទឹកនោមផ្អែមប្រភេទទី២ កើតមានដោយមកពីរាងកាយមិនអាចប្រើជាតិស្កឲ្យអស់ ដែលរាងកាយបានផលិតទាំងប៉ុន្មាន។
បុរសជាង ៣ម៉ឺន ៩ពាន់នាក់ និងស្ត្រីជាង ១៥ម៉ឺន ៧ពាន់នាក់បានចូលរួមនៅក្នុងការសិក្សានេះ។ អ្នកទាំងនោះត្រូវបានសួរអំពីអាហារដែលគេទទួលទាន អំពីសកម្មភាពប្រចាំថ្ងៃរបស់ពួកគេ និងអំពីជម្ងឺណាដែលពួកគេមានពីមុនមក។
ការសិក្សាបានរកឃើញថា មនុស្សណាដែលទទួលទានបាយស លើសពី៥ដងក្នុងមួយអាទិត្យ មានការកើនគ្រោះថ្នាក់នៃការកើតជម្ងឺទឹកនោមផ្អែមប្រភេទទី២ ដល់ទៅ ១៧ភាគរយ។ ប៉ុន្តែចំពោះអ្នកទទួលទានបាយអង្ករសម្រូបលើសពី ២ដងក្នុងមួយអាទិត្យវិញ មានការកាត់បន្ថយគ្រោះថ្នាក់ដល់ទៅ ១១ភាគរយនៃការកើតជម្ងឺទឹកនោមផ្អែម។
អង្ករសម្រូបជាគ្រាប់អង្ករដែលមានទ្រង់ទ្រាយពីធម្មជាតិរបស់វា។ អង្ករសជាអង្ករសម្រិតពីអង្ករសម្រូប គឺជាអង្ករដែលកិនស្រិតយ៉ាងសស្អាត អស់កន្ទក់រលីង នៅសល់តែសាច់គ្រាប់អង្ករខាងក្នុងតែប៉ុណ្ណោះ។ អង្ករសជាញឹកញាប់ត្រូវបានបន្ថែមគ្រឿងដើម្បីជំនួសអាហារូបត្ថម្ភខ្លះដែលបាត់បង់ពេលសម្រិត។
លោក ជី ស៊ុន ជាអ្នកនិពន្ធនាំមុខនៃសេចក្តីរាយការណ៍នេះ។ លោកនិយាយថា សំបកអង្ករសម្រូបធ្វើឲ្យយឺតដល់ការរំលាយអាហាររបស់រាងកាយ គឺរំលាយជាតិប្រូតេអ៊ីនហៅ enzyme ទៅជាម្សៅ។ នេះមានន័យថា ការបរិភោគអង្ករសម្រូបបញ្ចេញជាតិស្កចូលទៅក្នុងឈាមយឺតជាងអង្ករសម្រិត។ ប្រភេទម្ហូបអាហារដែលបញ្ចេញជាតិស្កលឿនចូលទៅក្នុងឈាម ត្រូវបានគេភ្ជាប់ទៅនឹងគ្រោះថ្នាក់ខ្ពស់នៃការកើតជម្ងឺទឹកនោមផ្អែមប្រភេទទី២។ តែគេមិនទាន់ហេតុផលពិតប្រាកដនៅឡើយទេ ។
លោកវេជ្ជបណ្ឌិត ស៊ុន និយាយថា អង្ករដែលកិនឲ្យនៅត្រឹមតែជាអង្ករសម្រូបមានឱជារសច្រើនជាងអង្ករដែលសម្រិតខ្លាំង។ លោកមានប្រសាសន៍ថា ការប្រើអង្ករស្រូវសាលីដែលមិនសម្រិតឬអង្ករស្រូវបាឡេ ដើម្បីជំនួសអង្ករសម្រិត អាចបន្ទាបគ្រោះថ្នាក់នៃការកើតជម្ងឺទឹកនោមផ្អែមប្រភេទទី២ បាន៣៦ភាគរយ។ លោក ស៊ុន និយាយថា នៅពេលណាដែលគេអាចធ្វើបាន មនុស្សគួរប្តូរពីបាយសនិងធាតុ Carbohydrate ផ្សេងៗទៀត ទៅបរិភោគបាយស្រូវសាលីសម្រូបជាជំនួសវិញ។
ទោះជាយ៉ាងណា អង្ករសម្រូបទុកមិនបានយូរដូចជាអង្ករសម្រិតទេ ពីព្រោះដោយមកពីជាតិប្រេងនៃកន្ទក់ដែលមិនទាន់សម្រិត។ ករណីនេះធ្វើឲ្យអង្ករសម្រូបមិនសូវអាចប្រើបាននៅក្នុងសហគមន៍ក្រីក្រ។ វិជ្ជាស្ថានស្រាវជ្រាវអង្ករអន្តរជាតិកំពុងធ្វើការដើម្បីបង្កើតអង្ករសឬអង្ករសម្រិតម្យ៉ាងដែលជាតិម្សៅរបស់អង្ករត្រូវបានបញ្ចេញដោយយឺតៗ៕៚
ប្រែសម្រួលដោយ នុច សារីតា
