សេតវិមានបានបញ្ជាក់ថា ខ្លួននឹងមិនសហការជាមួយនឹងអ្វីដែលខ្លួនហៅថាជាការស៊ើបអង្កេតដើម្បីចោទប្រកាន់ទម្លាក់លោកប្រធានាធិបតី Donald Trump ពីតំណែង ដែល «ខុសនឹងច្បាប់រដ្ឋធម្មនុញ្ញ» នោះទេ។
មេធាវីសេតវិមានលោក Pat Cipollone បានផ្ញើលិខិត ៨ ទំព័រមួយច្បាប់ទៅកាន់ថ្នាក់ដឹកនាំខាងគណបក្សប្រជាធិបតេយ្យនៃរដ្ឋសភា ដែលក្នុងនោះមានទាំងប្រធានរដ្ឋសភាអ្នកស្រី Nancy Pelosi ផងដែរ។ អ្នកស្រី Pelosi កំពុងស្វែងរកថាតើលោក Trump មានបានរំលោភច្បាប់ឬក៏អត់ នៅពេលដែលលោកបានជំរុញឲ្យប្រទេសអ៊ុយក្រែនស៊ើបអង្កេតលើបេក្ខជនប្រធានាធិបតីខាងគណបក្សប្រជាធិបតេយ្យលោក Joe Biden។
លោក Cipollone បានចោទប្រកាន់សមាជិកខាងគណបក្សប្រជាធិបតេយ្យថាបានរំលោភលើ «ភាពត្រឹមត្រូវដែលជាមូលដ្ឋាន និងនីតិវិធីដែលផ្ដល់ឲ្យដោយរដ្ឋធម្មនុញ្ញ»។
លោកបាននិយាយថា គណបក្សប្រជាធិបតេយ្យមិនបានផ្ដល់ឱកាសឲ្យលោក Trump ចោទសួរសាក្សី និងមើលភស្តុតាងដែលគណបក្សប្រជាធិបតេយ្យកំពុងប្រើដើម្បីសម្រេចលើថាតើលោកគួរតែត្រូវគេចោទប្រកាន់ទម្លាក់ពីតំណែងឬក៏យ៉ាងណានោះទេ។
លោក Cipollone បានសរសេរដូច្នេះថា៖ «រឿងទាំងអស់នេះរំលោភលើរដ្ឋធម្មនុញ្ញ នីតិរដ្ឋ និងរាល់ច្បាប់ពីមុនៗ»។ លោកបានបន្ថែមថា ការស៊ើបអង្កេតនេះគឺគ្មានមូលដ្ឋាន មានលក្ខណៈប្រកាន់បក្ខពួក និងជាការប៉ុនប៉ងដើម្បីច្រានចោលលទ្ធផលនៃការបោះឆ្នោតប្រធានាធិបតីសហរដ្ឋអាមេរិកកាលពីឆ្នាំ ២០១៦។
ប្រសិនបើសមាជិករដ្ឋសភាភាគច្រើនអនុម័តលើបទចោទនៃការចោទប្រកាន់លោក Trump នេះ នោះព្រឹទ្ធសភាដែលដឹកនាំដោយគណបក្សសាធារណរដ្ឋនឹងបើកសវនាការកាត់ទោស ដែលនៅពេលនោះក្រុមមេធាវីរបស់លោក Trump នឹងមានឱកាសអាចការពារលោក Trump បានក្នុងសវនាការ៕
