ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ការ​ថែទាំ​សុខភាព​ទទួល​ការ​យក​ចិត្ត​ទុកដាក់​សារ​ជា​ថ្មី​នៅ​វៀតណាម


រូបឯកសារ៖ ទិដ្ឋភាពនៃអគារខ្ពស់ស្កឹមស្កៃនៅទីក្រុងហូជីមិញ ប្រទេសវៀតណាម កាលពីថ្ងៃទី២១ ខែកុម្ភៈ ឆ្នាំ២០១៧។

ក្រៅពី​សម្តេច​សង្ឃ Dalai Lama ព្រះសង្ឃ​វៀតណាម​ព្រះនាម Thich Nhat Hanh អាច​ជា​អ្នក​បូជា​ព្រះពុទ្ធសាសនា​ដ៏​មាន​ប្រជាប្រិយភាព​ជាង​គេ​បង្អស់​នៅ​ក្នុង​ពិភពលោក។ ព្រះ​សង្ឃ​រូប​នេះ ត្រូវបាន​លោក Martin Luther King Jr តែងតាំង​ឲ្យ​ជា​បេក្ខជន​សម​នឹង​ទទួល​បាន​ពាន​រង្វាន់​សន្តិភាព Nobel Peace Prize ហើយ​ត្រូវបាន​ទស្សនាវដ្តី Time magazine ដ៏​ល្បី​របស់​អាមេរិក ចាត់​ទុក​ថា​ជា «ព្រះសង្ឃ​ដែល​បង្រៀន​មនុស្ស​នៅ​ជុំវិញ​ពិភពលោក​អំពី​ការ​គ្រប់គ្រង​សតិ​អារម្មណ៍‍‍»។

បន្ទាប់​ពី​រស់នៅ​ក្រៅ​ប្រទេស​អស់​រយៈពេល​ជា​ច្រើន​ទសវត្សរ៍ ព្រះសង្ឃ Thich Nhat Hanh បាន​វិល​ត្រឡប់​ទៅ​ប្រទេស​វៀតណាម​វិញ ស្របពេល​ដែល​ប្រទេស​មួយ​នេះ​ចាប់​ផ្តើម​យក​ចិត្ត​ទុក​ដាក់​អំពី​ការ​ថែទាំ​សុខភាព​ផ្លូវកាយ​និង​ផ្លូវ​ចិត្ត។

ប្រទេស​វៀតណាម​ដ៏​ជឿន​លឿន​ កំពុង​តែ​ទទួល​បាន​ការ​រីក​ចំរើន​ខ្លាំង​ខាង​សេដ្ឋកិច្ច ដែល​មិន​ធ្លាប់​កើត​មាន​ពី​មុន ដោយ​គេ​ឃើញ​មាន​សំណង់​អគារ​ខ្ពស់​ស្កឹមស្កៃ​ជា​ច្រើន រថយន្ត​ទំនើប​ពាសពេញ​ដង​ផ្លូវ និង​ប្រជាពលរដ្ឋ​ជាង ១០០​លាន​នាក់ ដែល​និយម​ប្រើប្រាស់​ទូរស័ព្ទ​ទំនើប។

ការ​ផ្លាស់ប្តូរ​ដ៏​ឆាប់​រហ័ស​ទាំង​អស់​នេះ ក៏​កំពុង​ជំរុញ​ឲ្យ​ប្រជាពលរដ្ឋ​វៀតណាម​មួយ​ចំនួន​ងាក​ទៅ​រក​ពេល​វេលា ដែល​ពួកគេ​អាច​ចំណាយ​ពេល​ជាមួយ​ធម្មជាតិ និង​តាំង​សមាធិ ទៅ​តាម​ទំនៀមទម្លាប់​នៃ​ការ​ប្រតិបត្តិ​ព្រះពុទ្ធ​សាសនា និង​ប្រពៃណី​វៀតណាម។

ទំនៀម​ទម្លាប់​នេះ​មាន​លក្ខណៈ​ស្រដៀង​គ្នា​នឹង​វិធីសាស្ត្រ​នៃ​ «ការ​ថែ​ទាំ​សុខភាព‍» ដ៏​ពេញ​និយម​នៅ​បណ្តា​ប្រទេស​លោក​ខាង​លិច ជាពិសេស​នៅ​តំបន់​បច្ចេកវិទ្យា Silicon Valley នៅ​រដ្ឋ​កាលីហ្វ័រញ៉ា សហរដ្ឋ​អាមេរិក ដែល​មនុស្ស​នៅ​ទីនោះ​និយម​ចំណាយ​ពេល​សម្រាក​ពី​ការងារ​ដោយ​មិន​ធ្វើ​អ្វី​ទាំង​អស់ និង​អនុវត្ត​ការ​មិន​បរិភោគ​សាច់​ជា​ច្រើន​ខែ ដើម្បី​រំសាយ​ភាព​តានតឹង​បង្ក​ឡើង​ដោយ​សារ​បច្ចេកវិទ្យា​ទំនើប។

ព្រះសង្ឃ​វៀតណាម​ព្រះនាម Thich Nhat Hanh នៅក្នុងពិធីព្រះពុទ្ធសាសនាមួយ នៅប្រទេសវៀតណាម កាលពីឆ្នាំ២០១៩។
ព្រះសង្ឃ​វៀតណាម​ព្រះនាម Thich Nhat Hanh នៅក្នុងពិធីព្រះពុទ្ធសាសនាមួយ នៅប្រទេសវៀតណាម កាលពីឆ្នាំ២០១៩។

វៀតណាម​មាន​ព្រះសង្ឃ​ព្រះនាម Thich Nhat Hanh ដែល​បាន​ផ្តល់​ដំណោះស្រាយ​ដល់​មនុស្ស​ក្នុង​ពិភពលោក​នា​សតវត្សរ៍​ទី ២១ ក្នុង​ការ​រក្សា​ភាព​ស្ងប់​ក្នុង​ចិត្ត តាម​រយៈ​ការ​និពន្ធ​សៀវភៅ​ដែល​ក្នុង​នោះ​រួម​មាន​សៀវភៅ​ដែល​មាន​ចំណង​ជើង​ថា Silence ដែល​មាន​ន័យ​ថា «ភាព​ស្ងប់ស្ងាត់‍» និង​សៀវភៅ How to Sit ដែល​មាន​ន័យ​ថា «របៀប​អង្គុយ‍»។ ដូច្នេះ វា​សាក​សម​ដែល​ពលរដ្ឋ​នៅ​វៀតណាម​ចាប់ផ្តើម​ចង់​បាន​ពេល​វេលា​ដើម្បី​រក្សា​ភាព​ស្ងប់​ក្នុង​ចិត្ត ជាពិសេស​ក្រោយពេល​ដែល​ប្រទេស​មួយ​នេះ​បាន​ចំណាយ​ពេល​ជា​ច្រើន​ឆ្នាំ​នៅក្នុង​ការ​ប្រកួត​ប្រជែង​ដើម្បី​ក្លាយ​ជា​ប្រទេស​មូលធន​និយម។

នៅពេល​ដែល​ពលរដ្ឋ​កាន់តែ​ច្រើន​ចាប់ផ្តើម​ស្វែងរក​ពេល​វេលា​ដើម្បី​រក្សា​ភាព​ស្ងប់​ក្នុង​ចិត្ត ក្រុមហ៊ុន​ជាច្រើន​បាន​និង​កំពុង​ផ្តល់​សេវាកម្ម​នានា​ដើម្បី​រក​ប្រាក់​ចំណេញ​ពី​តម្រូវការ​ថ្មី​នេះ។ ក្រុមហ៊ុន Heritage Line ប្រចាំ​ទីក្រុង​ហូជីមិញ ផ្តល់​សេវា​ធ្វើ​ដំណើរ​តាម​កប៉ាល់​បែប​ទំនើប​នៅ​ក្នុង​ប្រទេស​វៀតណាម និង​មីយ៉ាន់ម៉ា។ ក្រុមហ៊ុន​នេះ​បាន​ឲ្យ​ដឹង​ថា ខ្លួន​នឹង​ផ្តល់​សេវា​ធ្វើ​ដំណើរ​តាម​កប៉ាល់​ «ដោយ​ផ្តោត​លើ​ការ​ថែទាំ​សុខភាព‍»។ កប៉ាល់​ឈ្មោះ Ylang ធ្វើ​ដំណើរ​ពី​តំបន់​ឆ្នេរ Lan Ha Bay ភាគខាង​ជើង​ប្រទេស​វៀតណាម ដោយ​មាន​កម្មវិធី​រៀន​ហាត់​តៃជី និង​កម្មវិធី​រៀន​តាំង​សមាធិ​ដោយ​គោះ​ផ្ទិល​ស្ព័ន។

លោក Andreas Schroetter នាយក​ផ្នែក​លក់​និង​ទីផ្សារ​នៃ​ក្រុមហ៊ុន Heritage Line បាន​ឲ្យ​ដឹង​ថា តំបន់​ឆ្នេរ Lan Ha Bay៖ «មាន​សម្រស់​ស្រស់​ស្អាត​ដូច​ឆ្នេរ Ha Long Bay‍» នៅ​ភាគឦសាន​ប្រទេស​វៀតណាម​ដែរ ប៉ុន្តែ​ភាព​ស្ងប់ស្ងាត់ និង​ភាព​ដាច់​តែ​ឯង បាន​ធ្វើ​ឲ្យ​តំបន់​ឆ្នេរ​នេះ​ក្លាយ​ជា​ទិសដៅ​សម្រាប់​ការ​សម្រាក​លំហែកាយ​ដ៏​ពិសេស​មួយ‍»។

លោក​បាន​បន្ថែម​ទៀត​ថា៖ «ដូច្នេះ​ហើយ​បាន​ជា​យើង​យល់​ថា នេះ​អាច​ជា​ឱកាស​ដ៏​អស្ចារ្យ​មួយ​ដែល​កប៉ាល់ Ylang នឹង​ផ្តល់​សេវា​ខាង​ផ្នែក​ថែ​ទាំ​សុខភាព​នេះ‍»។

ពលរដ្ឋ​វៀតណាម​មាន​បំណង​សម្រាក​ពី​ភាព​មមាញឹក​ ភាពទាន់​សម័យ​ក្នុង​ទីក្រុង និង​ជាតិ​ពុល​ក្នុង​ក្រុង ដោយ​ទៅ​ហាត់​យូហ្គា​ក្រោយ​ពី​ចេញ​ធ្វើការ​នៅ​ការិយាល័យ Nike ក្នុង​ទីក្រុង​ហូជីមិញ និង​ការ​ចំណាយ​ពេល​ស្នាក់នៅ​តាម​តង់ នៅ​ក្បែរ​ទីក្រុង Vung Tau។

តម្រូវការ​ថ្មី​នេះ​មាន​លក្ខណៈ​ខុស​គ្នា​ខ្លះ ហើយ​ក៏​ត្រូវបាន​ជំរុញ​ឡើង​ដោយ​ភាពទាន់​សម័យ​ ដែល​កើត​មាន​ឡើង​នៅ​ក្នុង​ប្រទេស​មួយ​នេះ​ ដែល​កំពុង​អភិវឌ្ឍ​យ៉ាង​រហ័ស។ ក្រោយ​ពី​សង្គ្រាម​រវាង​សហរដ្ឋ​អាមេរិក​និង​វៀតណាម ប្រទេស​វៀតណាម​ពោរពេញ​ដោយ​ភាព​ក្រីក្រ​នៅ​ឡើយ ហើយ​នៅ​ឯកា​ពី​ប្រទេស​ជា​ច្រើន​នៅ​ជុំវិញ​ពិភពលោក។

ក្រោយ​មក សហរដ្ឋ​អាមេរិក​បាន​លុប​ចោល​ទណ្ឌកម្ម​ផ្នែក​សេដ្ឋកិច្ច​លើ​ប្រទេស​វៀតណាម​នៅ​ដើម​ទសវត្សរ៍​ ១៩៩០ ហើយ​វៀតណាម​បាន​ក្លាយ​ជា​រដ្ឋ​សមាជិក​មួយ​នៃ​អង្គការ​ពាណិជ្ជកម្ម​ពិភពលោក​នៅ​ទសវត្សរ៍​ ២០០០ ហើយ​នៅ​អំឡុង​ទសវត្សរ៍​ ២០១០ វៀតណាម​បាន​រីកចំរើន​ខាង​សេដ្ឋកិច្ច​យ៉ាង​ខ្លាំង។ អ្នក​ដែល​បាន​ផ្លាស់​ទៅ​រស់នៅ​តាម​ទីក្រុង រក​ប្រាក់​ចំណេញ​បាន​រាប់លាន ហើយ​ពួកគេ​ខ្លះ​បាន​ចាប់ផ្តើម​នឹក​ទំនៀមទម្លាប់​បុរាណ​របស់​ខ្លួន។

លោកស្រី Nguyen Thi Phuong Thao បាន​ក្លាយ​ជា​មហាសេដ្ឋី​ប្រាក់​រាប់​ពាន់លាន​ដុល្លារ ស្ត្រី​ដំបូង​គេ​បង្អស់​នៅ​វៀតណាម តាម​រយៈ​អាជីវកម្ម​ក្រុមហ៊ុន​អាកាសចរណ៍ VietJet របស់​លោក​ស្រី។ ក៏ប៉ុន្តែ ស្របពេល​ជាមួយ​គ្នា​នោះ លោក​ស្រី​ក៏​បាន​លើក​កម្ពស់​កត្តិនាម​សាធារណៈ​របស់​លោក​ស្រី តាមរយៈ​សកម្ម​ភាព​មនុស្ស​ធម៌ និងសកម្មភាព​ថែទាំ​សុខភាព​ផ្លូវ​ចិត្ត។ ដោយ​បង្ហោះ​រូបថត​បង្ហាញ​ពី​ការ​ធ្វើ​ដំណើរ​របស់​លោក​ស្រី​ទៅកាន់​ទីវត្ត​អារាម។

សំណង់គេហដ្ឋានថ្មីៗនៅខេត្ត Nghe An ប្រទេសវៀតណាម ថ្ងៃទី២៩ តុលា ឆ្នាំ២០១៩។
សំណង់គេហដ្ឋានថ្មីៗនៅខេត្ត Nghe An ប្រទេសវៀតណាម ថ្ងៃទី២៩ តុលា ឆ្នាំ២០១៩។

ដូចគ្នា​នឹង​តំបន់​បច្ចេកវិទ្យា Silicon Valley នៅ​សហរដ្ឋ​អាមេរិក គេ​នៅ​មិន​ច្បាស់​នៅ​ឡើយ​ទេ ថា​តើ​តម្រូវការ​ថ្មី​នៃ​ការ​ថែទាំ​សុខភាព​ផ្លូវកាយ​និង​ផ្លូវ​ចិត្ត​របស់​ប្រទេស​វៀតណាម គឺ​ជា​យុទ្ធសាស្ត្រ​ផ្នែក​ទីផ្សារ​ ហើយ​ថា​តើ​នេះ​គឺជា​តម្រូវការ​ចង់បាន​ដ៏​ពិតប្រាកដ​របស់​ពលរដ្ឋ​វៀតណាម ក្នុង​ការ​កាត់បន្ថយ​ផល​អវិជ្ជមាន​ដល់​សុខភាព ​ដែល​បង្ក​ឡើង​ដោយ​ការ​រីក​ចំរើន​ផ្នែក​ឧស្សាហកម្ម និង​ដោយ​សារ​«ភាព​មមាញឹក‍»​ ឬ​យ៉ាងណា។

ជា​ផ្នែក​មួយ​នៃ​យុទ្ធសាស្ត្រ​ផ្នែក​ទីផ្សារ កន្លែងកម្សាន្ត​មួយ​នៅ​តំបន់​ឆ្នេរ Cam Ranh Bay បាន​ផ្សព្វផ្សាយ​កម្មវិធី​បង្ហាត់​យូហ្គា និង​បច្ចេកទេស​ដក​ដង្ហើម។ ក្រៅ​ពី​នេះ អ្នក​ថត​រូប​ដ៏​ល្បី​ឈ្មោះ​ម្នាក់ រក​ប្រាក់​កម្រៃ​ដោយ​បង្កើត​កម្មវិធី​មួយ​ដែល​រួម​មាន​ការ​ថតរូប​ព្រះសង្ឃ​តាំង​សមាធិ និង​ការ​តាំង​សមាធិ​ជាមួយ​ព្រះសង្ឃ​នៅ​ទីក្រុង Hue ដែល​ជា​ទីក្រុង​បុរាណ​មួយ​របស់​វៀតណាម និង​ជា​ទីក្រុង​ដែល​ព្រះសង្ឃ Thich Nhat Hanh កំពុង​រស់នៅ។ បន្ថែម​លើ​នេះ ក្រុមហ៊ុន​ក្រៅ​ប្រទេស​មួយ​បាន​យក​បន្ទប់​មួយ​ទុក​សម្រាប់​ការ​តាំង​សមាធិ នៅក្នុង​ការិយាល័យ​របស់​ខ្លួន​ប្រចាំ​ទីក្រុង​ហូជីមិញ។

តម្រូវការ​ដក​ខ្លួន​ពី​ការ​រស់នៅ​បែប​ទំនើប​បាន​បង្កើត​ទីផ្សារ​លក់​អគារ​សម្រាប់​លំហែកាយ​នៅ​វៀតណាម ជាពិសេស​នៅ​តាម​តំបន់​ឆ្ងាយ​ពី​ទីក្រុង​ធំៗ ដូចជា​ទីក្រុង​ដាណាង និង​កោះ Phu Quoc ជាដើម។ ការ​ផ្គត់ផ្គង់​អគារ​សម្រាប់​លំហែ​កាយ​បាន​កើន​ដល់​ទៅ ២៣៩ភាគរយ ក្នុង​មួយ​ឆ្នាំ គឺ​ពីឆ្នាំ ២០១៦ ដល់​ឆ្នាំ ២០១៧ ដោយ​បង្ក​ឲ្យ​មាន​ការ​ផ្គត់ផ្គង់​ហួស​កំណត់ ដែល​បណ្តាល​ឲ្យ​ទីផ្សារ​នេះ​ធ្លាក់​ចុះ​នាពេល​ថ្មីៗនេះ។ នេះ​បើ​យោង​តាម​អ្នកស្រី Nguyen Trong Thuc អ្នក​គ្រប់គ្រង​ជាន់ខ្ពស់​ប្រចាំ​ក្រុមហ៊ុន​ CBRE Hotels នៅ​វៀតណាម។

ស្រប​ពេល​ជាមួយ​គ្នា​នេះ អ្នកស្រី Hong Phuc អ្នក​សរសេរ​អត្ថបទ​ទស្សនៈ​ឲ្យ​សារព័ត៌មាន VnExpress បារម្ភ​ថា​តើ វៀតណាម​អាច​ «រក្សា​របៀប​រស់នៅ​របស់​ខ្លួន‍» រួម​ទាំង​អត្តសញ្ញាណ​របស់​ខ្លួន​ជា​មនុស្ស​«​រួសរាយ​រាក់ទាក់‍» និង «ស្មោះត្រង់‍» ដើម្បី​ការពារ​ខ្លួន​ពី «​ផល​អវិជ្ជមាន​នៃ​ភាពទាន់​សម័យ» បាន​ដែរ​ឬ​យ៉ាង​ណា។

នៅ​ក្នុង​អត្ថបទ​ថ្មី​មួយ​ អ្នកស្រី Hong Phuc បាន​សួរ​ថា៖ «តើ​យើង​អាច​រក​វិធី​មួយ​ដើម្បី​រក្សា​លក្ខណៈ​សម្បត្តិ​ដ៏​ពិសេស​របស់​យើង​បាន​ដែរ​ឬ​ទេ ស្រប​ពេល​ដែល​សំណង់​អគារ​ធ្វើ​ពី​ថ្ម កញ្ចក់ និង​ដែក បំពាក់​ដោយ​ម៉ាស៊ីន​ត្រជាក់​នៅ​ក្នុង​ក្រុង ​មាន​ភាព​រដិប​រដុប​នៅ​ឡើយ​នោះ?

ប្រែសម្រួលដោយ ទែន សុខស្រីនិត

តួលេខនៃករណីឆ្លងជំងឺកូវីដ១៩

XS
SM
MD
LG