ភ្ជាប់​ទៅ​គេហទំព័រ​ទាក់ទង

ទស្សនកិច្ច​ផ្លូវ​រដ្ឋ​របស់​ចិន​នៅ​អាមេរិក​មាន​ភាព​វិជ្ជមាន​

  • Jim​ Stevenson​

លោក​ប្រធានាធិបតី​ចិន ហ៊ូ ជិនតៅ និង លោក​ប្រធានាធិបតី​សហរដ្ឋ​អាមេរិក​ បារ៉ាក់ អូបាម៉ា។

ប្រតិកម្ម​ចំពោះ​ទស្សនកិច្ច​ផ្លូវ​រដ្ឋ​របស់​លោក​ប្រធានាធិបតីចិន​ ហ៊ូ​ ជិន​តៅ​ មាន​ភាព​វិជ្ជមាន​ទាំង​នៅក្នុង​សរអា​ និង​នៅ​ក្នុង​ប្រទេស​ចិន​ តែ​មាន​ហេតុផល​ខុស​ពី​គ្នា។

ទស្សនកិច្ច​របស់​លោក ហ៊ូ​ ជិនតៅ​ ទៅ​កាន់​សេតវិមាន​ មានផ្សព្វផ្សាយយ៉ាង​ល្អិត​ល្អន់​នៅ​ក្នុង​បណ្តាញ​ព័ត៌មាន​របស់​ប្រទេស​ចិន​ ដោយ​មាន​អេក្រង់​ទូរទស្សន៍​សាធារណៈ​នៅ​ក្នុង​រដ្ឋធានី​បញ្ចាំង​ផ្សាយ​ទស្សនកិច្ច​របស់​លោក​ និង​រូប​ថត​របស់​លោក​ប្រធានាធិបតី​ បារ៉ាក់​ អូបាមា​ និង​លោក​ប្រធានាធិបតី​ ហ៊ូ​ មាន​ផ្តិត​នៅ​លើ​ទំព័រ​ទី​មួយ​ គ្រប់​សារព័ត៌មាន​ធំៗ​ទាំង​អស់។

នៅ​ថ្ងៃ​ពុធ​ លោក​ ហ៊ូ​ បាន​នៅ​ស្ងៀមអំពី​បញ្ហា​រូបិយប័ណ្ណ​ចិន​ដែល​មាន​តម្លៃ​ថោក​ពេក​ ហើយ​ពី​ដំបូង​មិន​បាន​ឆ្លើយ​សំណួរ​របស់​អ្នក​យក​ព័ត៌មាន​ម្នាក់​អំពីបញ្ហាសិទ្ធិ​មនុស្ស​ទេ។​ ក្រោយ​មក​ទើប​លោក​ ហ៊ូ​ មាន​ប្រសាសន៍​ថា ​លោក​មិន​បាន​ឮ​ច្បាស់​ដោយ​មក​ពី​មាន​បញ្ហា​បក​ប្រែ​ភាសា​ រួច​លោក​បាន​សារភាព​ថា​ប្រទេស​ចិន​មាន​កិច្ច​ការ​ច្រើនដែល​ត្រូវ​ធ្វើ​ ដើម្បីធ្វើ​ឲ្យ​ស្ថានភាព​សិទ្ធិ​មនុស្ស​របស់​ខ្លួន​បាន​ប្រសើរ​ឡើង។

អ្នក​នាំ​ពាក្យ​សេតវិមាន​ លោក​ រ៉បឺត​ ហ្គិបស៍​ បាន​ថ្លែង​នៅ​ថ្ងៃ​ព្រហស្បតិ៍​ថា​ នៅ​ពេល​ដែល​លោក​ប្រធានាធិបតី​ អូបាមា មាន​ការ​ពេញ​ចិត្ត​ដោយ​បាន​ឮ​អត្ថាធិប្បាយ​របស់​លោក​ ហ៊ូ​ សរអា​និង​តាម​មើល​សកម្មភាព​ដើម្បី​គាំទ្រ​អត្ថាធិប្បាយ​នេះ។ លោក​បន្ត​ថា៖

«ការ​ទទួល​ស្គាល់​ថា​ លោក​អ្នក​នឹង​ធ្វើ​ឲ្យ​ស្ថានភាព​ប្រសើរ​ឡើង​ ជា​ផ្នែក​មួយនៃ​បញ្ហា។​ ក៏​ប៉ុន្តែ​ជា​ផ្នែក​តូច​មួយ​ បើ​ប្រៀប​ធៀប​ទៅ​នឹង​កិច្ច​ការ​ដែល​លោក​អ្នក​ត្រូវ​ធ្វើ​ ដើម្បី​ឲ្យ​មាន​ការ​ជឿន​លឿន។​ នេះ​ជា​ចំណុច​ដែល​យើង​នឹង​តាម​មើល»។

បញ្ហា​សិទ្ធិ​មនុស្ស​ត្រូវ​បានគេ​សង្កេត​ឃើញ​ខុស​គ្នា​នៅ​តាម​ផ្លូវ​នៃ​ទី​ក្រុង​ប៉េកាំង​ ដោយ​មាន​នាង​ ឆិន​ យីសៀន​ និស្សិត​មហាវិទ្យាល័យម្នាក់​ បញ្ចេញ​ទស្សនៈ​របស់​នាង​យ៉ាង​ដូច្នេះ។ នាង​និយាយ​ថា៖

«ពួក​គេ​គ្រាន់​តែ​ប្រើ​រឿង​នេះ​ជា​លេស​មួយ​ដើម្បី​រិះគន់​ប្រទេស​ចិន។​ សរអា​ចេញ​ផ្សាយ​សេចក្តី​រាយការណ៍​ជា​សកល​មួយ​អំពី​សិទ្ធិ​មនុស្ស​ជា​រៀង​រាល់​ឆ្នាំ​ ក៏​ប៉ុន្តែ​មិន​ដែល​និយាយ​អំពី​ខ្លួន​ឯង​នៅ​ក្នុង​សេចក្តី​រាយការណ៍​នោះ​ទេ។​ រួច​មួយ​ថ្ងៃ​ក្រោយ​មក​ ប្រទេស​ចិន​ចេញ​សេចក្តី​រាយការណ៍​ស្រដៀង​គ្នា​មួយ ​ពី​សរអា​វិញ។​ ខ្ញុំ​គិត​ថា​សិទ្ធិ​មនុស្ស​នៅ​ក្នុង​ប្រទេស​ទាំង​អស់មាន​ភាព​ប្រសើរ​ជាង​មុន ក៏​ប៉ុន្តែ​នៅ​មាន​កំហុស។​ ភាព​មិន​ដូច​គ្នា​នេះ​គឺ​ជៀស​មិន​រួច​ទេ»។

អ្នក​នាំ​ពាក្យ​សេតវិមាន​ រ៉បឺត​ ហ្គិបស៍​ ក៏​បាន​និយាយ​ដែរ​ថា​ មាន​ការ​ជឿន​លឿន​នៅក្នុង​បញ្ហា​សន្តិសុខ​ និង​មធ្យោបាយ​ប្តូរ​តម្លៃ​ប្រាក់​ យ័ន​ យោង​តាម​ទី​ផ្សារ។ លោក​ហ្គិបស៍​មាន​ប្រសាសន៍​ថា៖

«ជំហាន​បន្ទាប់​គឺ​ ប្រទេស​ចិន​ត្រូវ​ចាត់​វិធានការ និង​បន្ត​ចាត់​វិធានការ​ឲ្យ​បាន​លឿន​ជា​ង​មុន ​ដើម្បី​ដំឡើង​តម្លៃ​រូបិយប័ណ្ណ​របស់​ខ្លួន»។

ជា​ថ្មី​ម្តង​ទៀត​នៅ​ក្រុង​ប៉េកាំង​ អ្នក​ស្រុក​ដូច​ជា​ គួ​ សៅគិន​ បាន​គាំទ្រ​ប្រធានាធិតី​របស់​គេ​ ហើយ​បញ្ចេញ​ទស្សនៈ​ផ្សេង​ អំពី​បញ្ហា​អត្រា​ប្តូរ​ប្រាក់។​ សៅគិន​បន្ត​ថា៖

«សរអា​កំពុង​ជំរុញ​ឲ្យ​មាន​ការ​ដំឡើង​អត្រា​ប្តូរប្រាក់​ រ៉ិនមិនប៊ី​ (renminbi)​ ហៅ​ យ័ន​ ដើម្បី​ហេតុផល​អត្តទត្ថភាព។​ គេ​មិន​ខ្វល់​ពី​អ្នក​ដទៃ​ទៀត​ទេ។​ គេ​គ្រាន់​តែ​ចង់ត្រួតត្រា ហើយ​ឲ្យ​អ្នក​ឯ​ទៀត​ធ្វើ​តាម។​ គ្មាន​អ្នក​ណា​ស្តាប់​លោក​អ្នក​ទេ​ បើ​សិន​ជា​លោក​អ្នក​ធ្វើ​កិច្ច​ការ​ ដែលធ្វើ​ឲ្យ​ខូច​ខាត​ដល់​ប្រយោជន៍​ជាតិ​របស់​អ្នក​ដទៃ​ទៀត​នោះ»។

ទោះ​ជាយ៉ាង​ណា​ក៏​ដោយ​ទស្សនកិច្ច​នេះ​ត្រូវភាគី​ទាំង​សង្ខាង​ព៌ណនា​ថា​ជា​ជំហាន​វិជ្ជមាន​ ហើយ​នៅ​ប្រទេស​ចិន​ អ្នក​នាំ​ពាក្យ​ក្រសួង​ការ​បរទេស​ លោក​ ហុង​ ឡេ​ (Hong Lei)​ បាន​បន្ទរ​ទស្សនៈ​ជាវិជ្ជមាន​នេះ។​ លោក​ឡេ ថ្លែង​ថា៖

«លោក​ប្រធានាធិបតី​ ហ៊ូ​ បាន​ធ្វើ​កិច្ច​ចរចាប្រកប​ជោគជ័យ​ជា​មួយ​លោក​ប្រធានាធិបតី​ អូបាម៉ា។​ ភាគី​ទាំង​ពីរ​បាន​យល់​ព្រម​ធ្វើ​ការដើម្បី​ស្ថាបនា​ភាព​ជា​ដៃ​គូ​រវាង​ចិន​និង​អាមេរិក​ ដើម្បី​ជា​ផល​ប្រយោជន៍​ទៅ​វិញ​ទៅ​មក​ និង​ជា​ការ​គោរព​គ្នា​ទៅ​វិញ​ទៅ​មក​ ជា​និន្នាការ​មួយ​ក្នុងពេល​ឥឡូវ​នេះ»។

បញ្ហា​ពាណិជ្ជកម្ម​និង​សន្តិសុខបាន​ធ្វើ​ឲ្យ​ទំនាក់ទនង​រវាង​ចិន​និង​សរអា​មាន​ភាព​ធ្ងន់​ធ្ងរ​ក្នុង​ពេល​មួយ​ឆ្នាំ​កន្លង​ទៅ​នេះ។​ ក៏​ប៉ុន្តែ​នៅ​ក្នុង​ទស្សនកិច្ច​របស់​លោក​ប្រធានាធិបតី ហ៊ូ​ ប្រទេស​ទាំង​ពីរ​បាន​សម្រេច​កិច្ច​ព្រម​ព្រៀង​មួយ​សម្រាប់​ទំនិញ​នាំ​ចេញ​របស់​សរអា ​ដែល​មាន​តម្លៃទឹក​ប្រាក់​ ៤៥​ពាន់​លាន​ដុល្លារ៕

ប្រែ​សម្រួល​ដោយ​ កែរ​ យ៉ាន

XS
SM
MD
LG