សភាពាណិជ្ជកម្មអាមេរិកប្រចាំតំបន់អាស៊ីប៉ាស៊ីហ្វិក (AmChams of Asia Pacific)ឬហៅកាត់ថាAAP លើកឡើងថាសហរដ្ឋអាមេរិកចាំបាច់ត្រូវតែដើរតួនាទីដឹកនាំខាងផ្នែកវិនិយោគលើហេដ្ឋារចនាសម្ព័ន្ធក្នុងតំបន់អាស៊ីអាគ្នេយ៍ ដើម្បីអត្ថប្រយោជន៍សន្តិសុខជាតិអាមេរិកផងនិងការអភិវឌ្ឍក្នុងតំបន់នេះផង។
ប្រធានAAP ដែលមានមូលដ្ឋានក្នុងប្រទេសសិង្ហបុរី លោក Steven Okun ដែលបានដឹកនាំប្រតិភូពាណិជ្ជកម្មតំបន់អាស៊ីប៉ាស៊ីហ្វិកមកបំពេញទស្សនកិច្ចនៅរដ្ឋធានីវ៉ាស៊ីនតោនជាលើកដំបូងក្នុងរយៈពេលជាង២ឆ្នាំនៃការឆ្លងរាតត្បាតជំងឺកូវីដ១៩ បានថ្លែងនៅក្នុងបទសម្ភាសន៍តាមទូរស័ព្ទជាមួយវីអូអេខ្មែរនៅថ្ងៃពុធនេះថាភាពជាអ្នកដឹកនាំរបស់សហរដ្ឋអាមេរិកផ្នែកពាណិជ្ជកម្មនិងវិនិយោគនេះ ក៏នឹងធ្វើឲ្យតំបន់អាស៊ីអាគ្នេយ៍ទាំងមូលមានការរីកចម្រើនទាំងខាងសេដ្ឋកិច្ចនិងសន្តិសុខផងដែរ។
«តំបន់អាស៊ីអាគ្នេយ៍គឺជាមុខមាត់ដ៏សំខាន់បំផុតមួយសម្រាប់សហរដ្ឋអាមេរិកបើមើលពីជ្រុងគោលនយោបាយការបរទេស ពីព្រោះតំបន់នេះគឺជាទីតាំងដ៏សំខាន់បំផុតមួយបើមើលពីជ្រុងភូមិសាស្ត្រយុទ្ធសាស្ត្រ ពីជ្រុងវិនិយោគ ពីជ្រុងពាណិជ្ជកម្ម ដែលទាំងសហរដ្ឋអាមេរិកទាំងចិនសុទ្ធតែចូលប្រឡូកដូចគ្នា»។
សហរដ្ឋអាមេរិកនិងចិនដែលជាប្រទេសមហាអំណាចសេដ្ឋកិច្ចលេខ១និងលេខ២លើពិភពលោកបច្ចុប្បន្ននេះ បានប្រកួតប្រជែងគ្នាយ៉ាងស្វិតស្វាញទាំងខាងសេដ្ឋកិច្ចនិងភូមិសាស្ត្រនយោបាយ ដើម្បីដណ្តើមឥទ្ធិពលគ្នានៅក្នុងតំបន់អាស៊ីអាគ្នេយ៍។ ប៉ុន្តែ អ្នកវិភាគមួយចំនួនមើលឃើញថាការប្រជែងឥទ្ធិពលគ្នារវាងមហាអំណាចទាំងពីរក្នុងតំបន់នេះ មិនទាន់មានលក្ខណៈប្រកួតដោយស្មើភាពគ្នានៅឡើយទេ។
លោក Steven Okun បានប្រសាសន៍ថាថ្មីត្បិតតែប្រទេសនីមួយៗក្នុងតំបន់នេះ មាននិន្នាការឬតម្រូវការផ្សេងគ្នាខ្លះក៏ដោយ ក៏ពួកគេទាំងអស់មិនចង់ងាកទៅគាំទ្រឬប្រឆាំងនឹងមហាអំណាចណាមួយទេ។
«ប្រទេសទាំងអស់នៅតំបន់អាស៊ីអាគ្នេយ៍ មិនចាំបាច់ត្រូវជ្រើសរើសរវាងសហរដ្ឋអាមេរិកឬចិននោះទេ។ ពួកគេចង់តែរកស៊ីនិងប្រឡូកជាមួយប្រទេសមហាអំណាចទាំងពីរ»។
បច្ចុប្បន្ន សមាគមប្រជាជាតិអាស៊ីអាគ្នេយ៍ហៅកាត់ថាអាស៊ានមានសមាជិក១០ប្រទេសគឺសិង្ហបុរី ថៃ ឥណ្ឌូណេស៊ី ម៉ាឡេស៊ី ហ្វីលីពីន ព្រុយណេ មីយ៉ាន់ម៉ា វៀតណាម ឡាវ និងកម្ពុជាដែលដើរតួនាទីជាប្រធានឆ្លាស់វេននៃប្លុកនេះនៅឆ្នាំ២០២២។
លោក Steven Okun និយាយថាភាពជាអ្នកដឹកនាំរបស់សហរដ្ឋអាមេរិកនៅក្នុងតំបន់អាស៊ីអាគ្នេយ៍ មិនមែនសំដៅគ្រាន់តែទៅលើផ្នែកភូមិសាស្ត្រនយោបាយនិងយោធានោះទេ តែវាក៏សំដៅទៅដល់ផ្នែកសេដ្ឋកិច្ចនិងពាណិជ្ជកម្មដែលសហគមន៍ជំនួញអាមេរិកមានតួនាទីត្រូវបំពេញផងដែរនៅក្នុងទំនាក់ទំនងទ្វេភាគីរវាងសហរដ្ឋអាមេរិកនិងកម្ពុជា ក៏ដូចជាប្រទេសសមាជិកអាស៊ានផ្សេងទៀត។
ក្នុងដំណើរទស្សនកិច្ចរយៈពេល៣ថ្ងៃក្នុងរដ្ឋធានីវ៉ាស៊ីនតោន ចាប់ពីថ្ងៃទី១៨ដល់២០ខែកក្កដានេះប្រតិភូពាណិជ្ជកម្មអាមេរិកប្រចាំតំបន់អាស៊ីប៉ាស៊ីហ្វិកនេះ បានជួបជាមួយមន្ត្រីរដ្ឋបាលលោកប្រធានាធិបតីអាមេរិក Joe Biden រួមមានលោក Kurt Campbell នាយកកិច្ចការតំបន់ឥណ្ឌូប៉ាស៊ីហ្វិកនៃក្រុមប្រឹក្សាសន្តិសុខជាតិ និងអ្នកស្រី Sarah Bianchi អនុប្រធានតំណាងពាណិជ្ជកម្មសហរដ្ឋអាមេរិក និងក្រុមអ្នកតាក់តែងច្បាប់មួយចំនួននៃសភាសហរដ្ឋអាមេរិកមកពីគណបក្សសាធារណរដ្ឋនិងគណបក្សប្រជាធិបតេយ្យផងដែរ៕
