ភ្ជាប់​ទៅ​គេហទំព័រ​ទាក់ទង

ស្ថានភាព​ស្រ្តី​សហរដ្ឋអាមេរិក​កក្នុង​ឆ្នាំ​២០១១


ស្រ្តី​នៅ​ក្នុង​សហ​រដ្ឋ​អាមេរិកនឹង​​អាចត្រូវ​បាន​ដាក់​ចូល​ក្នុង​​គោល​នយោ​បាយ និង​ការ​ផ្តួច​ផ្តើម​ទាំង​ឡាយ​ក្នុង​ការ​ជួយ​ស្រ្តី​ឲ្យ​ធ្វើ​ដំណើរ​ទៅ​មុខ​។

របាយ​ការណ៍​ដែល​មាន​ចំណង​ជើង​ថា «ស្ត្រី​នៅក្នុង​សហ​រដ្ឋ​អា​មេ​រិក៖ សន្ទស្សន៍នៃ​សុខមាល​ភាពផ្នែក​សង្គម​ និង​សុខ​ភាព» ផ្តល់​ការ​ពិនិត្យ​មើល​វិធាន​ការ​នៃជីវិត​របស់​ស្ត្រី​ម្នាក់។

លោក​ស្រី​រឺបិកា ប្ល៊ែងក៍ (Rebecca Blank) អនុ​រដ្ឋ​មន្រ្តី​ក្រសួងសេដ្ឋ​កិច្ច មាន​ប្រសាសន៍​ថា៖

«វា​គឺ​ជា​របាយ​ការណ៍​របស់​រដ្ឋា​ភិ​បាល​សហ​ព័ន្ធលើក​ទី​មួយ​ដ៏ទូលំទូលាយ​នៅ​ក្នុង​ផ្នែក​នេះ ចាប់​តាំង​ពី​លោក​ប្រធា​នា​ធិបតី ឃែនណឺឌី (Kennedy) បាន​តែង​តាំង​អេលៀនន័រ រ៉ូសាវែលត៍ (Eleanor Roosevelt) នៅ​ដើម​ទស​វត្ស​រ៍​ឆ្នាំ​១៩៦០ ឲ្យ​ធ្វើ​របាយ​ការណ៍​មួយស្តីអំពី​ស្រ្តី​។»

លោក​ស្រី​បន្ត​ទៀត​ថា​ របាយ​ការណ៍​ថ្មី​នេះ​ គ្រប​ដណ្តប់ចំណុច​ចម្បងៗ​ចំនួនប្រាំ​នៃ​ជីវិត​របស់​ស្ត្រី។ លោក​ស្រី​ប្ល៊ែងក៍​ថ្លែង​ថា៖

«របាយ​ការណ៍​នេះ​រូម​បញ្ចូលទិន្ន​ន័យ​ ដែល​ផ្តោត​ទៅ​លើ​គ្រួ​សារ ការ​អប់​រំ ចំណូល ​ការ​ងារ​សុខ​ភាព ឧក្រិដ្ឋ​កម្ម និង​អំពើ​ហិង្សា ហើយ​ពិត​ជា​បាន​គូស​បញ្ជាក់​និន្នាការនៃ​អ្វី​ដែល​កំពុង​កើត​ឡើងចំពោះ​ជី​វិត​របស់​ស្ត្រី​នៅ​ជុំ​វិញ​ចំណុចទាំ​ង​អស់​នោះ កាល​ពី២០​ទៅ​៣០​ឆ្នាំ​មុន»។

លោក​ស្រី ប្ល៊ែងក៍ មាន​ប្រសាសន៍​ថា ការ​ចង​ក្រង​ទិន្ន​ន័យ​ពី​ស្ថាប័ន​រដ្ឋា​ភិ​បាល​សហព័ន្ធ​ជា​ច្រើន បាន​បង្ហាញ​ទាំងនិន្នាការវិជ្ជ​មាន ​និង​អវិជ្ជ​មាន។ ​ស្រ្តី​មិន​សូវ​ក្លាយ​ជា​ជនរង​គ្រោះ​ដោយ​សារ​ឧក្រិដ្ឋ​កម្ម​ហិង្សា ដែល​រួម​ទាំង​អំពើ​មនុស្ស​ឃាត​ ដូចកាល​ពី​អតីតកាលនោះ​ទេ។ ស្រ្តី​មិន​ងាយ​រៀប​ការ និង​មាន​កូន​តិច​ជាង​កាល​ពីអតីត​កាល។ ស្ត្រី​មាន​ចំនួន​៥១​ភាគ​រយ​នៃ​ប្រជា​ពល​រដ្ឋ​ទូ​ទៅ​ និង​៥៧​ភាគ​រយ​នៃ​ជន​ជាតិ​អាមេរិ​ក​ដែល​មាន​អាយុ​លើ៦៥​ឆ្នាំជា​ស្ត្រី។ ស្រ្តី​ប្រឈមនឹង​បញ្ហា​សុខ​ភាព ដូច​ជា​ជំងឺ​សន្លាក់ ជំងឺខ្លាញ់​ក្នុងក្បាល​ពោះ និង​បាក់ទឹក​ចិត្តច្រើនជាង​បុរស និងប្រឈមនឹង​ជំងឺ​បេះ​ដូង និង​ជំងឺ​ទឹក​នោម​ផ្អែមតិច​ជាង​បុរស។ របាយ​ការណ៍បានគូសបញ្ជាក់ការ​រីកចម្រើនគួរឲ្យ​កត់សម្គាល់នៅក្នុងផ្នែក​អប់​រំ។ លោក​ស្រី​ប្ល៊ែង​បន្ត​ទៀត​ថា៖

«មាន​ដំណឹង​ល្អ​នៅ​ក្នុង​របាយ​ការណ៍​នេះ ដែល​បាន​បង្ហា​ញ​ថា អត្រា​នៃ​ការ​អប់​រំ​របស់​ស្រ្តីមាន​ការ​កើន​ឡើង​លឿន​ជាង​អត្រា​នៃ​ការ​អប់​រំ​របស់​បុរស។ តាម​ពិត​ ប្រសិន​បើ​អ្នក​សម្លឹង​មើល​ទៅ​ស្ត្រី​វ័យ​ក្មេងៗ ពួ​ក​គេ​បាន​បញ្ចប់​ការ​សិក្សា​ពីមហាវិទ្យា​ល័យ នៅ​ក្នុង​អត្រាខ្ពស់​ជាង​បុរស​វ័យ​ក្មេង នា​ពេល​បច្ចុ​ប្បន្ន​ នៅ​ក្នុង​សហ​រដ្ឋ​អាមេរិក។ ប្រការ​នេះ​គឺ​ពិត​សម្រាប់​គ្រប់​ជាតិ​សាសន៍​ទាំង​អស់ គឺ​មិន​មែន​ត្រឹម​តែ​ស្ត្រី​ស្បែក​ស​នោះ​ទេ»។

ប៉ុន្តែ វ៉ាឡឺរី ដ្យាររ៉ែត្ត (Valerie Jarrett) គឺជា​ប្រធាន​នៃ​ក្រុម​ប្រឹក្សា​សេត​វិមានស្តី​អំពី​ស្ត្រី​និង​ក្មេង​ស្រី ថ្លែង​ថា ការ​ជឿន​លឿន​នៅ​ក្នុង​ការ​អប់​រំ​របស់​ស្រ្តី​ មិន​មែនបង្ហាញ​ពី​សមភាពនៃ​ប្រាក់​ចំណូលនៅ​ក្នុង​កន្លែង​ធ្វើ​ការ​ងារ​នោះ​ទេ។ លោក​ស្រី​បន្តថា៖

«មូល​ហេតុ​មួយ​គឺ​ថា​ ស្រ្តី​មិន​បាន​ចូល​ធ្វើ​នៅ​ក្នុង​ប្រភេទ​ការ​ងារ​ ដែល​អាច​ទទួល​បាន​ប្រាក់​ចំណូល​ខ្ពស់»។

វ៉ាឡឺរី ចារ៉ែតត៍ (Valerie Jarrett) បាន​ប្រាប់​ព័ត៌​មានអេប៊ីស៊ី ថា លោក​ប្រធានា​ធិបតី​ អូបាម៉ា ចង់​លុប​បំបាត់​ចោល​គម្លាត​ប្រាក់​បៀ​វត្សន៍​នេះ។ លោក​ស្រី​និយាយថា៖

«ដូច្នេះ ចាប់​តាំងពី​ដើមដំបូង​នៃ​រដ្ឋ​បាល​របស់​លោកមក​ លោក​ប្រធានា​ធិបតី​មាន​កិច្ច​ខិត​ខំ​ប្រឹង​ប្រែង​ក្នុង​ការ​ជំរុញ​ស្រ្តី​ និង​ក្មេង​ស្រី​ឲ្យ​ចូល​ធ្វើ​ការ​ងារ​ទាក់​ទង​នឹង​វិទ្យា​សាស្រ្ត បច្ចេកវិជ្ជាវិស្វកម្ម​ និង​គណិត​វិទ្យា»។

យោង​តាម​ លី​ អាន ដឺ រឺស (Lee Ann De Reus) ​សា​ស្រ្តា​ចារ្យ​រង​ផ្នែកការសិក្សា​អំពី​ស្ត្រី​នៅ​ឯ​សាកល​វិទ្យា​ល័យ​រដ្ឋ​ផិនស៊ីល​វីញ៉ា អាលទូណា (Penn State Altoona) មាន​ហេតុផលផ្សេងៗ​ទៀត​ផង​ដែរ ​ចំពោះ​ការ​ទទួល​បាន​ប្រាក់​បៀ​វត្សរ៍មិន​ស្មើ​គ្នា។

«នៅ​ពេល​ដែល​ស្ត្រី​ទទួល​យក​តួនាទី​មួយ ពួកគេ​ជា​ញឹក​ញយ​មិន​ចរ​ចា​ទាម​ទារ​ប្រាក់​បៀវត្សរ៍ពី​ដំបូង​ ដូចបុរសទេ។ របាយ​ការណ៍​នេះ​ក៏​បាន​បង្ហា​ញ​ផង​ដែរ​ថា នៅ​ពេល​ដែល​ស្រ្តី​ទទួល​បាន​ការ​ងារ​មួយ ពួក​គេ​មិន​ចរចាទាមទារ​តម្លើង​ប្រាក់​បៀវត្សរ៍​ដូច​បុរស​ទេ។ មាន​ស្រ្តី​ជា​ច្រើន​ដែល​ធ្វើ​ការ​ពាក់​កណ្តាល​ម៉ោង។ ​ស្រ្តី​នៅ​តែ​ព្យាយាម​ធ្វើឲ្យ​មាន​តុល្យ​ភាព​រវាង​គ្រួ​សារ​ និង​ការងារ​ក្នុង​លក្ខ​ណៈ​មួយ​ដែល​បុរស​មិន​បាន​ធ្វើ​។ ផ្នែក​មួយ​នៃ​បញ្ហា​នេះ គឺ​ជា​អ្វី​ដែល​យើង​គិត​អំពី​តួ​នាទី​មួយ​របស់​បុរសនៅ​ក្នុង​សង្គម​ និង​អ្វី​ដែល​យើង​គិត​អំពី​តួ​នាទី​មួយ​របស់​ស្ត្រី​នៅ​ក្នុង​សង្គម»។

សាស្រ្តា​ចារ្យ ដឺ រឺស មាន​ប្រសាសន៍​ថា លោក​ស្រី​សង្ឃឹម​ថា របាយ​ការណ៍​ស្តី​អំពី​ស្រ្តី​នៅ​សហ​រដ្ឋ​អាមេរិក​នឹង​គូស​បញ្ជាក់​ថា​តើ​បញ្ហា​ដែល​ស្រ្តី​កំពុង​តែ​ប្រឈ​មុខ​នា​ពេល​បច្ចុ​ប្បន្ន មាន​ផល​ប៉ះ​ពាល់​ទៅ​លើក្មេងៗ​ ក្រុម​គ្រួ​សារ និង​សង្គម​ជាតិ​ទាំង​មូល​ដោយ​របៀប​ណា។ សាស្រ្តាចារ្យ ដឺ រឺស បន្តថា៖

«ចំណុច​សំខាន់​គឺ​ថា យើង​ទាំង​អស់​គ្នា​ឈ្នះ។ ប្រទេស​ជាតិ​ឈ្នះ​ នៅ​ពេល​ដែល​យើង​ថែ​ទាំ​ប្រជា​ពល​រដ្ឋ​បាន​ល្អ។ ខ្ញុំ​គិត​ថា របាយ​ការណ៍​នេះ​បាន​ចង្អុល​បង្ហាញ​ថា យើង​នឹង​ធ្វើ​កិច្ច​ការ​បាន​ល្អ​ប្រសើរ ក្នុង​នាម​ជា​ប្រទេស​មួយ ហើយ​អនា​គត​របស់​យើង​នឹង​ប្រសើរជាង​មុន ប្រសិនបើ​យើង​ចាប់​ផ្តើម​យក​ចិត្ត​ទុក​ដាក់​ទៅ​លើតម្រូ​វ​ការទាំង​ឡាយ​របស់ស្ត្រី។ វា​នឹង​ផ្តល់​ប្រយោជន៍​ដល់​យើង​ទាំង​អស់​គ្នា»។

ក្រុម​អ្នក​និពន្ន​សង្ឃឹម​ថា ព័ត៌​មាន​ដែល​ពួក​គេ​ប្រមូល​បាន​នៅ​ក្នុង​របាយ​ការណ៍​ស្តី​អំពី​ស្រ្តី​នៅ​ក្នុង​សហ​រដ្ឋ​អាមេរិកនឹងអាចត្រូវ​បាន​ដាក់​ចូល​ក្នុងគោល​នយោ​បាយ និង​ការ​ផ្តួច​ផ្តើម​ទាំង​ឡាយ​ក្នុង​ការ​ជួយ​ស្រ្តី​ឲ្យ​ធ្វើ​ដំណើរ​ទៅ​មុខ​នឹង​ក្នុង​ការ​រៀប​ចំ​ក្មេង​ស្រី​ឲ្យ​មានជី​វិត​មួយ ដែល​ប្រសើរជាង​អ្វី​ដែល​ម្តាយ​ និង​ជីដូន​របស់​ពួក​គេ​ធ្លាប់មាន៕

ប្រែសម្រួល​ដោយ ឌី ខាំបូលី

XS
SM
MD
LG