សហរដ្ឋអាមេរិកកំពុងបង្កើនកិច្ចប្រឹងប្រែងដើម្បីតាមដានវីរុសកូរ៉ូណាវិវត្តថ្មីជាច្រើន ដែលកំពុងលេចចេញជារូបរាង ខណៈវីរុសនេះបន្តរាតត្បាតទូទាំងសកលលោក។ នេះបើតាមមន្ត្រីសុខាភិបាលម្នាក់ដែលបាននិយាយ កាលពីថ្ងៃអាទិត្យ។
អ្នកស្រីវេជ្ជបណ្ឌិត Rochelle Walensky នាយកមជ្ឈមណ្ឌលប្រយុទ្ធនឹងជំងឺឆ្លង (CDC) របស់សហរដ្ឋអាមេរិក បាននិយាយនៅក្នុងកិច្ចសម្ភាសន៍មួយកាលពីថ្ងៃអាទិត្យថា ផែនការនោះគឺឃ្លាំមើល «ផលប៉ះពាល់នៃវីរុសវិវត្តថ្មីទាំងនោះលើវ៉ាក់សាំង និងការព្យាបាលរបស់យើងដែរ»។
អ្នកស្រីវេជ្ជបណ្ឌិតបានមានប្រសាសន៍ទៀតថា មជ្ឈមណ្ឌល CDC បានសហការជាមួយវិទ្យាស្ថានសុខាភិបាលជាតិរដ្ឋបាលស្បៀងអាហារនិងឱសថ (FDA) និងក្រសួងការពារជាតិអាមេរិកនៅក្នុងការតាមដានវីរុសកូរ៉ូណាវិវត្តថ្មីនោះ។
ព័ត៌មាននោះមានឡើងខណៈដែលពិភពលោកមានការឆ្លងជំងឺកូវីដ១៩ ដល់ជិត ១០០លានករណី និងអ្នកស្លាប់ជាង ២លាននាក់ នេះបើតាមសាកលវិទ្យាល័យ Johns Hopkins។
ក្នុងខណៈនេះដែរ ប្រធានាធិបតីប្រទេសម៉ិកស៊ិកលោក Andres Manuel Lopez Obrador បានក្លាយជាមេដឹកនាំពិភពលោកចុងក្រោយបំផុត ដែលបានប្រកាសថា លោកបានធ្វើតេស្តឃើញមានជំងឺកូវីដ១៩។
លោកប្រធានាធិបតី ដែលមានអាយុ៦៧ឆ្នាំរូបនេះ បានសរសេរនៅលើ Twitter កាលពីថ្ងៃអាទិត្យថា៖ «ខ្ញុំសោកស្តាយនឹងជម្រាបអស់លោកអ្នកថា ខ្ញុំបានឆ្លងជំងឺកូវីដ១៩។ រោគសញ្ញាខ្ញុំស្រាល ក៏ប៉ុន្តែ ខ្ញុំកំពុងធ្វើការព្យាបាលរួចហើយ»។
ប្រទេសម៉ិកស៊ិកបានបញ្ជាក់ថា ខ្លួនមានការឆ្លងជំងឺកូវីដ១៩ជាង ១,៧លានករណី និងមនុស្សស្លាប់ជាង ១៤៩.០០០នាក់ ដែលជាចំនួនស្លាប់ខ្ពស់ជាងគេទី៤ នៅក្នុងពិភពលោក បន្ទាប់ពីសហរដ្ឋអាមេរិក ប្រេស៊ីល និងឥណ្ឌា៕
