ជាមួយរយៈពេលតែប៉ុន្មានសប្តាហ៍ទៀតដែលកម្មវិធីយានអវកាសចម្លងរបស់ ស.រ.អ. នឹងចូលនិវត្តន៍ ទីភ្នាក់ងារ NASA បានធ្វើខសន្យាជាមួយក្រុមហ៊ុនអវកាសឯកជនដើម្បីអភិវឌ្ឍយានអវកាសអាមេរិកាំងជំនាន់ថ្មីសម្រាប់ដឹកពួកអ្នកអវកាសទៅកាន់ស្ថានីយ៍អវកាសអន្តរជាតិ។កាលពីថ្ងៃព្រហស្បតិ៍ទី២៨ខែមេសា ទីភ្នាក់ងារអវកាសស.រ.អ. បានបង្ហាញក្រុមហ៊ុនបួនក្នុងបណ្តាក្រុមហ៊ុនទាំងនេះនៅក្នុងការនិយាយត្រួសៗមួយនៅក្នុងរដ្ឋធានីវ៉ាស៊ីនតោន។
នៅក្រោយការបង្ហោះយានអវកាសចម្លង Endeavour ចេញពីជ្រោយ Canaveral រដ្ឋ Florida ដែលមានកំណត់ធ្វើនៅពេលឆាប់ៗខាងមុខនេះ ទីភ្នាក់ងារ NASA មានកំណត់នឹងបញ្ជូនបេសកកម្មតែមួយទៀតទៅកាន់ស្ថានីយ៍អវកាសអន្តរជាតិ។ ក្នុងខែមិថុនា យានអវកាសចម្លង Atlantis នឹងត្រូវបង្ហោះជាលើកចុងក្រោយបង្អស់ដោយបញ្ចប់កម្មវិធីដែលមានរយៈពេល៣០ឆ្នាំមកហើយដែលមានសារៈសំខាន់ជាចាំបាច់សម្រាប់ការកសាងនិងកិច្ចប្រតិបត្តិការរបស់ស្ថានីយ៍អវកាសអន្តរជាតិ។
ដោយរង់ចាំការបញ្ចប់កម្មវិធីនេះ កាលពីពេលថ្មីៗនេះទីភ្នាក់ងារ NASA បានផ្តល់កិច្ចសន្យាមានទឹកប្រាក់២៧០លានដុល្លារឱ្យដល់ក្រុមហ៊ុនអវកាសស.រ.អ. បួនដើម្បីជួយពួកគេឱ្យអភិវឌ្ឍយានអវកាសដែលនឹងដឹកពួកអ្នកអវកាសនិងទំនិញទៅកាន់ស្ថានីយ៍អវកាស។
លោក Mark Sirangelo ជាអ្នកចាត់ចែងកម្មវិធីនៃក្រុមហ៊ុន Sierra Nevada មានមូលដ្ឋាននៅក្នុងរដ្ឋ Colorado។ក្រុមហ៊ុននេះកំពុងអភិវឌ្ឍយានអវកាសមួយមានឈ្មោះថា Dream Chaser ដែលបានត្រូវរចនាជាដំបូងជាយានជំនិះជួយសង្គ្រោះមួយសម្រាប់យានអវកាសចម្លង។
យានអវកាសនេះបានត្រូវរចនាទ្បើងសម្រាប់ដឹកមនុស្ស៧នាក់ទៅកាន់និងមកពីតារាវិថីទាបនៃផែនដី។ លោក Sirangelo បាននិយាយថាការអភិវឌ្ឍយានអវកាសថ្មីនេះផ្អែកលើការជឿនលឿននៃការធ្វើដំណើររបស់មនុស្សក្នុងអវកាសដែលបានត្រូវសម្រេចដោយកម្មវិធីយានអវកាសចម្លង។
«យានជំនិះរបស់យើងផ្អែកភាគច្រើនលើជោគជ័យ ជ័យជំនះ ឧបសគ្គ ការឈឺចាប់ដែលមាននៅក្នុងកម្មវិធីយានអវកាសចម្លង។យើងមិនអាចនៅទីនេះបានទេប្រសិនបើមនុស្សទាំងនោះមិនបានធ្វើអ្វីដែលពួកគេបានធ្វើ»។
ពួកមន្ត្រីក្រុមហ៊ុននិយាយថានឹងត្រូវចំណាយពេលបីឬបួនឆ្នាំទៀតនៅមុនពេលមានយានអវកាសមួយគ្រឿងសម្រាប់ដឹកពួកអវកាសយានិកទៅកាន់ស្ថានីយ៍អវកាស។នៅពេលជាមួយគ្នានេះ ស.រ.អ. ទិញការធ្វើដំណើរ១២លើកតាមយានអវកាសតែមួយគត់ដែលមានប្រតិបត្តិការក្នុងពិភពលោកដែលអាចធ្វើដំណើរទៅកាន់និងមកពីតារាវិថីរបស់ផែនដី -គឺយានអវកាស Soyuz របស់ប្រទេសរុស្ស៊ី។
លោក Garrett Reisman ជាអ្នកចាត់ចែងកម្មវិធីសម្រាប់សាជីវកម្ម Space Exploration Technologies ហៅកាត់ថា SpaceX ដែលអភិវឌ្ឍបន្ទប់អ្នកបើកយានអវកាស Dragon។លោក Reisman ថ្លែងថាជាការចាំបាច់ដែលស.រ.អ. ត្រូវមានទម្រង់ឯករាជ្យមួយនៃការដឹកជញ្ជូនក្នុងអវកាស។
«យើងកំពុងឋិតក្នុងភាពជាដៃគូមួយជាមួយប្រទេសរុស្សីនិងប្រទេសឯទៀតៗនៅលើស្ថានីយ៍អវកាស។យើងមិនមែនជាដៃគូល្អទេប្រសិនបើយើងគ្មានសមត្ថភាពរបស់យើងផ្ទាល់។ ដូច្នេះខ្ញុំយល់ថាយើងទាំងអស់គ្នាប្តេជ្ញាធ្វើឱ្យរួញភាពឃ្លាតពីគ្នានេះឱ្យបានឆាប់រហ័ស ប្រកបដោយប្រសិទ្ធិភាពនិងសុវត្ថិភាពតាមដែលយើងអាចធ្វើបាន»។
ក្រុមហ៊ុន SpaceX មានកំណត់នឹងបង្ហោះយានអវកាសគ្មានមនុស្សបើកទៅកាន់ស្ថានីយ៍អវកាសនៅដំណាច់ឆ្នាំនេះ។
ប្រែសម្រួលដោយ ឈឹម សុមេធ
