នៅមុនយុទ្ធនាការរកសំឡេងឆ្នោតសម្រាប់អាណត្តិទី២នៅឆ្នាំ២០២៤ ប្រធានាធិបតីសហរដ្ឋអាមេរិក លោក Joe Biden កំពុងផ្សព្វផ្សាយថា គោលនយោបាយរបស់លោក ដើម្បី «ពង្រីកសេដ្ឋកិច្ចពីក្រោមឡើងលើ និងពីកណ្តាលទៅក្រៅ» បានទទួលជោគជ័យក្នុងការទប់ទល់នឹងអតិផរណា ហើយបានកាត់បន្ថយភាពអត់ការងារធ្វើ។
នៅក្នុងសុន្ទរកថាមួយកាលពីថ្ងៃពុធនៅក្នុងទីក្រុង Chicago ដើម្បីលើកស្ទួយទស្សនៈសេដ្ឋកិច្ចដែលសេតវិមានបានហៅថា «សេដ្ឋកិច្ច Biden» ឬ Bidenomics នោះ លោកប្រធានាធិបតីបានសរសើរអ្វីដែលលោកបានហៅថា ជាការលូតលាស់សេដ្ឋកិច្ចយ៉ាងខ្ពស់បំផុតមួយ ក្នុងចំណោមសេដ្ឋកិច្ចនាំមុខក្នុងពិភពលោកទាំងឡាយ តាំងពីមានការរាតត្បាតជំងឺកូវីដមក។
លោកបានថ្លែងថា៖ «យើងបានបន្ថែមការងារជាង១៣លានក្នុងរយៈពេល២ឆ្នាំ ដែលជាចំនួនច្រើនជាងប្រធានាធិបតីណាទាំងអស់បានធ្វើក្នុងរយៈពេល៤ឆ្នាំ»។
លោកបានសង្ខេបរបៀបវារៈសេដ្ឋកិច្ចរបស់លោក ជាសរសរស្តម្ភចំនួន៣៖ ធ្វើការវិនិយោគឈ្លាសវៃក្នុងប្រទេសអាមេរិក អប់រំនិងពង្រឹងអ្នកធ្វើការអាមេរិកាំងដើម្បីបង្កើនអ្នកចំណូលកណ្តាលនិងបង្កើនការប្រកួតប្រជែងគ្នាដើម្បីបន្ថយការចំណាយ និងជួយក្រុមហ៊ុនតូចៗ។
នៅមុនការថ្លែងសុន្ទរកថារបស់លោក ក្រុមជំនួយការរបស់លោក បាននាំគ្នាលើកតម្កើងផែនការសេដ្ឋកិច្ចរបស់លោក ដោយបានចង្អុលអំពីការបន្ថយល្បឿននៃអតិផរណា និងអត្រាគ្មានការងារធ្វើដែលស្ថិតនៅក្រោម៤ភាគរយ តាំងពីខែកុម្ភៈមក។
ក៏ប៉ុន្តែមកទល់នឹងពេលនេះ ពលរដ្ឋអាមេរិកាំងមិនយល់ស្របចំពោះសុទិដ្ឋិនិយមរបស់រដ្ឋបាលលោក Biden ទេ។ ការស្ទង់មតិថ្មីបំផុតរបស់ Ipsos បង្ហាញថា អត្រាគាំទ្រលោក Biden ស្ថិតនៅក្រោម៤០ភាគរយដដែល។ សេដ្ឋកិច្ចនៅតែជារឿងមួយដែលជាការព្រួយបារម្ភជាងគេ ហើយមនុស្សភាគច្រើនមានទុទ្ទិដ្ឋិនិយមចំពោះមាគ៌ារបស់ប្រទេសជាតិ ដែលជារឿងមួយដែលគណបក្សសាធារណរដ្ឋតែងតែគូសបញ្ជាក់៕
