កាលីហ្វ័រនីញ៉ា៖ តែប៉ុន្មានថ្ងៃប៉ុណ្ណោះ ក្រោយពីការបាញ់ប្រហារទៅលើតំណាងរាស្រ្តរដ្ឋអារីហ្សូណា ដែលធ្វើឲ្យលោកស្រីរងរបួសយ៉ាងធ្ងន់ធ្ងរក្នុងពេលដែលលោកស្រីបានទៅជួបប្រជុំជាមួយអ្នកបោះឆ្នោតក្នុងមណ្ឌលរបស់លោកស្រីនោះ សមាជិកសភាអាមេរិកខ្លះបានចេញទៅស្វាគមន៍អ្នកបោះឆ្នោតនៅក្នុងមណ្ឌលបោះឆ្នោតរបស់ខ្លួន។ ក្នុងចំណោមការជួបប្រជុំក្នុងតំបន់ជាច្រើននោះ មានការដង្ហែប្រារព្ធកេរ្តិ៍តំណែលរបស់មេដឹកនាំសិទ្ធិពលរដ្ឋដែលត្រូវបានគោរពយ៉ាងជ្រាលជ្រៅរបស់ប្រទេស គឺលោកម៉ាធីន លូធឺរ ឃីង ជូញៀរ (Martin Luther King Junior) ដែលត្រូវបានឃាតករបាញ់សម្លាប់កាលពីជាង៤០ឆ្នាំមុន។ ស្រ្តីតំណាងរាស្រ្តមួយរូប និងក្រុមមន្រ្តីសាធារណៈដទៃទៀតដែលបានចូលរួមក្នុងពិធីដង្ហែ បានឆ្លុះបញ្ចាំងអំពីសាររបស់លោកឃីង នៅក្រោយពេលការបាញ់ប្រហារនៅរដ្ឋអារីហ្សូណា។
ក្រុមតន្រី្តប្រចាំវិទ្យាល័យបានប្រគុំនៅតាមផ្លូវនានាក្នុងទីក្រុងឡូស អិនចឹឡេស(Los Angeles) ដែលជាការប្រារព្ធជាទូទៅនៅថ្ងៃដែលសហរដ្ឋអាមេរិកបានកំណត់ថា ជាទិវាបុណ្យប្រារព្ធដល់លោកម៉ាធីន លូធឺរ ឃីង ជូញៀរ និងសាររបស់លោកស្តីពីអហិង្សា។ សមាជិកសភារដ្ឋកាលីហ្វ័រញ៉ា ដែលបានចូលរួមក្នុងពិធីដង្ហែនោះដែរ បានលើកដៃគ្រវីស្វាគមន៍ទៅអ្នកបោះឆ្នោតក្នុងមណ្ឌលរបស់ខ្លួនដែលឈរតម្រៀបគ្នានៅតាមផ្លូវ។
ពិធីដង្ហែនោះបានធ្វើឡើងតែប្រមាណជាងមួយសប្តាហ៍ប៉ុណ្ណោះ ក្រោយពីការបាញ់ប្រហារនៅរដ្ឋអារីហ្សូណា ដែលបានសម្លាប់មនុស្ស៦នាក់ និងរបួស១៣នាក់ ដែលក្នុងនោះក៏មានលោកស្រីតំណាងរាស្រ្តខាងគណបក្សប្រជាធិបតេយ្យ ហ្កាប្រ៊ីអ៊ែល ហ្គីហ្វឺដ (Gabrielle Giffords) ផងដែរ។ លោកស្រីកំពុងតែទទួលការព្យាបាលសង្គ្រោះជីវិតនៅក្នុងមន្ទីរពេទ្យនៅឡើយ។
ក៏ប៉ុន្តែ លោកស្រី ជូឌី ឈូ (Judy Chu) សមាជិកតំណាងរាស្រ្តរដ្ឋកាលីហ្វ័រញ៉ាខាងគណបក្សប្រជាធិបតេយ្យថ្លែងថា ថ្វីបើមានការបាញ់ប្រហារនៅរដ្ឋអារីហ្សូណាក៏ដោយ ការចូលរួមព្រឹត្តិការណ៍ដូចនេះគឺជាផ្នែកដ៏សំខាន់នៃការងាររបស់មន្រ្តីសាធារណៈ។
«ខ្ញុំពិតជាគិតថា យើងមិនអាចអនុញ្ញាតឲ្យហេតុការណ៍ដូចនោះបញ្ឈប់មិនឲ្យយើងចូលរួមក្នុងការអនុវត្តលិទ្ធិប្រជាធិបតេយ្យនោះទេ។ ខ្ញុំគិតថា យើងមិនគួរអនុញ្ញាតឲ្យហេតុការណ៍នោះបញ្ឈប់អ្នកណាម្នាក់ឡើយ ជាពិសេស ពួកយើងដែលត្រូវបានប្រជាពលរដ្ឋជ្រើសរើសនោះ ត្រូវចេញទៅទីនោះ ហើយដោះស្រាយជាមួយសាធារណៈ។ ឥឡូវនេះ វាជាការណ៍ពិតណាស់ ដែលយើងត្រូវធ្វើកិច្ចការទាំងនោះ ដោយប្រយ័ត្នប្រយែងជាងមុន»។
លោកស្រីឈូមានប្រសាសន៍ថា សមាជិកសភាជាច្រើនបានប្តេជ្ញាថា នឹងជួបប្រជុំគ្នាជាសាធារណៈជាមួយប្រជាពលរដ្ឋដែលខ្លួនតំណាង ហើយធ្វើការអភិវឌ្ឍគោលការណ៍សន្តិសុខថ្មីផងដែរ។
មេដឹកនាំនយោបាយ និងសង្គមស៊ីវិលតែងតែប្រឈមនឹងគ្រោះថ្នាក់ តែប្រហែលជាគ្មាននរណាប្រឈមនឹងគ្រោះថ្នាក់ជាងលោកម៉ាធីន លូធឺរ ឃីង ជាសកម្មជនមួយរូប ដែលនិយាយចេញយ៉ាងខ្លាំងនូវសារមួយអំពីសមភាពក្នុងសង្គម។
«ខ្ញុំមានសុបិនមួយសម្រាប់កូនទាំង៤របស់ខ្ញុំថា នៅថ្ងៃណាមួយ ពួកគេនឹងរស់នៅក្នុងប្រទេសមួយ ដែលមិនវាយតម្លៃពួកគេតាមរយៈពណ៌សម្បុរស្បែក តែតាមរយៈបុគ្គលិកលក្ខណៈរបស់ពួកគេវិញ»។
លោកហឺប វ៉េសសិន (Herb Wesson) សមាជិកក្រុមប្រឹក្សាក្រុងឡូស អេនចឹឡេស មានប្រសាសន៍ថា ពាក្យសម្តីរបស់លោកឃីងនៅតែល្បីខ្ទរខ្ទារ។
«សាររបស់គាត់មានន័យថា ជានិច្ចកាល គេត្រូវវាយតម្លៃមនុស្សទៅតាមលទ្ធភាពរបស់ពួកគេ មិនមែនតាមរយៈពណ៌សម្បុរស្បែករបស់ពួកគេទេ ហើយថា មនុស្សទាំងអស់ ដោយគ្មានលើកលែង នឹងត្រូវទទួលបានយុត្តិធម៌ស្មើៗគ្នា។ ហើយខ្ញុំគិតថា បើសិនគាត់មានជីវិតរហូតមកដល់ថ្ងៃនេះ គាត់នឹងមានមោទនភាពណាស់។ ក៏ប៉ុន្តែ គាត់ក៏នឹងប្រាប់យើងដែរថា យើងនៅមានកិច្ចការជាច្រើនទៀតដែលត្រូវធ្វើ។ អ្វីដែលលោកអ្នកត្រូវធ្វើ គឺពិនិត្យមើលហេតុការណ៍ដែលបានកើតឡើងនៅធូសុន (Tucson) រដ្ឋអារីហ្សូណា (Arizona)នោះ លោកអ្នកនឹងឃើញថា យើងនៅមានកិច្ចការជាច្រើនទៀតដែលត្រូវធ្វើ»។
លោកម៉ាធីន លូធឺរ ឃីងត្រូវបានឃាតករបាញ់សម្លាប់នៅទីក្រុងមេមហ្វីស (Memphis) រដ្ឋទិនណេសស៊ី (Tennessee) ទីដែលលោកបានទៅគាំទ្រកូដកម្មរបស់កម្មករអនាម័យ។ លោកអាលវីន ធឺនណឺរ (Alvin Tuner) ជាកម្មករម្នាក់ក្នុងចំណោមកម្មករដែលបានធ្វើកូដកម្ម ហើយលោកបានឮសុន្ទរកថាចុងក្រោយរបស់លោកឃីង។ លោកថា សន្ទរកថានោះបំផុសគំនិតខ្លាំងណាស់។
«ប្រាកដណាស់ នោះជារឿងក្រៀមក្រំ គឺសុន្ទរកថាដ៏ល្បីរបស់លោក។ លោកបានថ្លែងថា លោកមើលឃើញដែនដីមួយ ដែលប្រកបដោយក្តីសង្ឃឹមថា នឹងមានភាពស្មើគ្នាក្នុងសង្គម តែលោកថា លោកប្រហែលជាមិនអាចទៅដល់ដែនដីនោះជាមួយយើងទេ»។
នេះ ជាពាក្យសម្តីរបស់លោកឃីងនៅក្នុងសន្ទរកថាដ៏ល្បីនោះ។
«ខ្ញុំគ្រាន់តែចង់បំពេញទៅតាមព្រះហឫទ័យរបស់ព្រះប៉ុណ្ណោះ ហើយព្រះអង្គបានអនុញ្ញាតឲ្យខ្ញុំឡើងទៅលើកំពូលភ្នំមួយ ហើយខ្ញុំបានមើលឃើញដែនដីមួយ ដែលប្រកបដោយក្តីសង្ឃឹមថា នឹងមានភាពស្មើគ្នាក្នុងសង្គម។ ខ្ញុំប្រហែលជាមិនអាចទៅដល់ដែនដីនោះជាមួយអ្នកទេ។ ក៏ប៉ុន្តែនៅរាត្រីនេះ ខ្ញុំចង់ឲ្យអ្នកដឹងថា យើង ក្នុងនាមជាប្រជាពលរដ្ឋ នឹងទៅដល់ដែនដីនោះ»។
ក្រុមមន្រ្តីក្នុងតំបន់និយាយថា សាររបស់លោកអំពីការសន្ទនាមានលក្ខណៈគោរពគ្នា និងការចូលរួមដោយសន្តិភាព គឺសមស្របសម្រាប់ពេលបច្ចុប្បន្ននេះជាងពេលណាៗទាំងអស់៕
ប្រែសម្រួលដោយលី ម៉ូរីវ៉ាន់