ភ្ជាប់​ទៅ​គេហទំព័រ​ទាក់ទង

កិច្ច​ប្រឹង​ប្រែង​ដើម្បី​ព្យាបាល​ជម្ងឺ​ដែល​គេ​មិន​សូវ​ចាប់់​អារម្មណ៍​ មាន​ការ​ជឿន​លឿន​ តែ​ត្រូវ​ការ​ប្រាក់​យ៉ាង​ច្រើន​បន្ថែម​ទៀត​និង​ជំនួយ​ពី​ខាង​ក្រៅ

  • Nico Colombant

បុរសស៊ីឈ្នួលធ្វើការនៅសាធារណៈរដ្ឋអាហ្វ្រិកកណ្តាលម្នាក់នេះ នៅ​តែ​មក​ធ្វើការ​បើ​ទោះ​ជា​គាត់​កំពុង​តែ​មាន​ជម្ងឺ​ rive​r blindess​ ក៏ដោយ។

នាយក​វិជ្ជាស្ថាន Sabin​ Vaccine​ Institute លោក Peter​ Hotez បាននិយាយ​ថា ជម្ងឺ​ប្រទេស​ក្តៅ​ទាំង​ឡាយ​ដែល​គេ​មិន​សូវ​ចាប់់​អារម្មណ៍​ បាន​ទទួល​ការ​យក​ចិត្ត​ទុក​ដាក់​តិច​ ពីព្រោះ​ជម្ងឺ​ទាំង​នេះ​មិន​សម្លាប់មនុស្ស​ដូច​ជា​ជម្ងឺ​គ្រុន​ចាញ់​ ជម្ងឺ HIV/AIDS ឬ​ជម្ងឺ​របេង​ទេ។​ ប៉ុន្តែ​លោក​បាន​និយាយ​ថា​ ជម្ងឺ​ទាំង​នេះ​ដូច​ជា​ជម្ងឺ River​ blindness ដែល​កើត​ពី​ប៉ារាស្ហ៊ីត​នៅ​ក្នុង​សត្វ​ល្បោម​និង​សត្វ​រុយ​ខ្មៅ​ នៅ​ក្បែរទឹក​ទន្លេ​នៃ​ប្រទេស​អាហ្វ្រិក​ ជម្ងឺ​ដែល​កើត​ពី​ប៉ារាស្ហ៊ីត​ដូច​ជា​ព្រូន​មូល​ ព្រូន​ទំពក់​ និង​ព្រូន​វែង​នោះ​ ជា​ជម្ងឺ​សំខាន់សំរាប់​ការ​ព្យាបាល​ដែរ។​ លោក Hotez បាន​រៀប​រាប់​ជម្ងឺ​ទាំង​នេះ​ថា ​ជា​ពពួក​ជម្ងឺ​ដែល​ធ្វើ​ឲ្យ​ពិការ​ដល់​ប្រជាជន​ក្រីក្រ​បំផុត​របស់​ពិភព​លោក។

“តាមអនុភាព​របស់​វា​ ជម្ងឺ​ប្រទេស​ក្តៅ​ដែល​គេ​មិន​ចាប់់​អារម្មណ៍​ទាំង​នេះ​ ដែល​ធ្វើ​ឲ្យ​មនុស្ស​ពិការ​រាំរ៉ៃ​យូរ​នោះ​ ជា​លទ្ធផល​មិន​ចេញ​មុខ​ដោយ​ពិត​ប្រាកដ​មួយ​ដែល​នាំ​ឱ្យមនុស្ស​រយ​កោដិ​នាក់​ មិន​អាច​គេច​ចេញ​ពី​ភាព​ក្រី​ក្រ​បាន”។

លោក Hotez បាន​មាន​ប្រសាសន៍​ថា​ ការ​ស្រាវ​ជ្រាវ​បាន​បង្ហាញ​ថា ​ជម្ងឺ​ទាំង​នេះ​ធ្វើ​ឲ្យ​រេញ​ដល់​ការ​លូតលាស់​ បណ្តាល​ឲ្យ​បាត់​បង់​ការ​ចង​ចាំ​ និង​បន្ទាប​ការ​ឈ្លាសវៃ​របស់​កុមារ​ដែល​កើត​ជម្ងឺ​ទាំង​នេះ។

“ទាំងអស់​នេះ​ពុំ​មែន​គ្រាន់​តែ​ជា​បញ្ហា​សុខភាព​នាំ​មុខ​របស់​ពិភព​លោក​ដែល​ថា​ វា​ជា​រឿង​ទូទៅ​នោះ​ទេ​ ប៉ុន្តែ​វា​ក៏​ជា​បញ្ហា​នាំ​មុខ​គេ​នៃ​ការ​សិក្សា​អប់រំ​របស់​ពិភព​លោក​ផងដែរ។​ ឥឡូវ​នេះ​ យើង​ដឹង​ថា​មាន​ភស្តុតាង​ពិត​ប្រាកដដែល​បង្ហាញ​ថា ​ជម្ងឺ​ព្រូន​ដែល​កើត​មាន​រាំរ៉ៃ​នៅ​ក្នុង​កូន​ក្មេង​ កាត់​បន្ថយ​ប្រាក់​ចិញ្ចិម​ជីវិត​ទៅ​អនាគតរបស់​លោក​អ្នក​ដល់​ទៅ​ជិតពាក់​កណ្តាល”។

លោក Hotez បាន​និយាយ​ថា​ លោក​ពេញ​ចិត្ត​ចំពោះ​ថវិកា​ដែល​ផ្តល់​ទៅ​ឲ្យ​ទី​ភ្នាក់​ងារ​ សរអ ​សំរាប់​ការ​អភិវឌ្ឍន៍​អន្តរជាតិ​ហៅ USAID ដើម្បី​ប្រយុទ្ធ​ទល់​នឹងជម្ងឺ​ទាំង​នេះដែលកំពុង​កើន​ឡើង​ ប៉ុន្តែ​ចាំ​បាច់​ត្រូវ​មាន​ថវិកា​បន្ថែម​ទៀត។

លោក​បាន​ថ្លែង​ថា ​ក្រុម​ប្រទេស​នៅ​ទ្វីប​អឺរ៉ុប​ ក្រុម​អ្នក​ធ្វើ​អំណោយ​ទាន​ឯកជន​ និង​ប្រទេស​ចិន​ ក៏​គួរ​ជួយ​បន្ថែម​ដែរ។

លោក​ស្រី Christy​ Hanson មន្ត្រី​នៃ​ក្រសួង USAID បាន​និយាយ​ថា​ ការិយាល័យ​ជម្ងឺ​ឆ្លង​ដែល​លោក​ស្រី​ដឹក​នាំ​នោះ​ កំពុង​ស្វែង​រក​ប្រាក់​១៥៥​លាន​ដុល្លារ​សំរាប់​ថវិកា​លើក​ក្រោយ ​ដើម្បីប្រឈម​ទល់​នឹង​ជម្ងឺ​ប្រទេស​ក្តៅ​ទាំង​ឡាយ​ដែល​គេ​មិន​ចាប់់​អារម្មណ៍។

“យើង​មិន​និយាយ​ថា ​ជម្ងឺ​ទាំង​នេះ​នឹង​អាច​បំបាត់​ឲ្យ​អស់​ទៅ​ជា​រហូត​នោះ​ទេ។​ យើង​កំពុង​ព្យាយាម​បន្ថយ​ជម្ងឺ​ទាំង​នេះ​ក្នុង​កម្រិត​មួយ​ដែល​អាច​គ្រប់​គ្រង​បាន​ គឺ​ថា​យើង​នឹង​គ្មានក្មេង​ដែល​ចិញ្ចឹម​មិន​ធំ​ធាត់​ល្អ​ ពីព្រោះ​តែ​មាន​ព្រូន​នៅ​ក្នុង​ពោះ​របស់​គេ​នោះ​ទេ​ ប៉ុន្តែ​យើង​នឹង​ដាក់​ប្រព័ន្ធ​ឃ្លាំ​មើល​ច្រើន​ ហើយ​និង​ធ្វើ​ឲ្យ​ប្រាកដ​ថា​ សាលារៀន​នានា​នៅ​បន្ត​ការ​ព្យាបាល​របស់​ខ្លួន។​ យើង​នឹង​កាត់​បន្ថយ​ជម្ងឺ​ទាំង​នេះ​ មិន​ឲ្យ​នៅ​ជា​ករណី​នៃ​គ្រា​មាន​អាសន្ន​ត​ទៅ​ទៀត​ទេ”។

ដើម្បី​ធ្វើ​សង្គ្រាម​ឱ្យ​មាន​ប្រសិទ្ធិភាព​មួយ​ប្រឆាំង​នឹង​ជម្ងឺ​ទាំង​នេះ​ លោកស្រី Hanson បាន​និយាយ​ថា ​ចាំបាច់​ត្រូវ​មាន​ថវិកា​លើស​ពី​មួយ​រយ​កោដិ​ដុល្លារ​សំរាប់​រយៈ​ពេល​ប្រាំ​ឆ្នាំ​ខាងមុខ។

ក្រសួង USAID កំពុង​ធ្វើការ​ជា​មួយ​រដ្ឋាភិបាល​និង​អង្គការ​ក្រៅ​រដ្ឋាភិបាល​ទាំងឡាយ​នៅ​ក្នុង​ប្រទេស​ដែល​មាន​ជម្ងឺ​ដូចគ្នា​ និង​ក្រុមហ៊ុន​ធ្វើ​ឱសថ​ សរអ ​ផង​ដែរ​ ដើម្បី​ផ្តល់​ការព្យាបាល​ដោយ​ឱសថ​ឱ្យ​មាន​ប្រសិទ្ធិភាព។

លោកស្រី Hanson បាន​កត់​សំគាល់​ជោគជ័យ​នា​ពេល​ថ្មីៗ​នៅ​ក្នុង​ការ​កាត់​បន្ថយ​ជា​អាទិ៍​ខ្លះៗ​នូវ​ជម្ងឺ​ទាំង​នេះ​ នៅ​ក្នុង​ប្រទេស Ghana​ Uganda និង Sierra Leone។

មាន​ជម្ងឺ​ប្រទេស​ក្តៅ​ដែល​គេ​មិន​ចាប់់​អារម្មណ៍​ទាំង​នេះ​ជា​ច្រើន​ ប៉ុន្តែ​លោក Ken Gustasen នាយក​នៃ​ក្រុម Global​ Health​ Partnerships ជា​មួយ​ក្រុមហ៊ុន​ធ្វើ​ឱសថ Merck បាន​និយាយ​ថា​ ជា​ការសំខាន់​ដែល​គេ​ធ្វើការ​ជា​មូលដ្ឋានក្នុង​មួយ​ករណី​ម្តងៗ។

លោក​បាន​រៀបរាប់​អំពី​ការ​ចាប់ផ្តើម​រក​ផ្លូវ​ព្យាបាល​ដោយ​ឱសថ​ ដើម្បី​ប្រយុទ្ធ​និង​ជម្ងឺ River​ blindness ដែល​កើត​ពី​ប៉ារាស្ហ៊ីត​នៅ​ក្នុង​សត្វ​ល្បោម​និង​សត្វ​រុយ​ខ្មៅ​ នៅក្នុង​ប្រទេស​អាមេរិក​ខាងត្បូង​ ដូចជា​ប្រទេស Colombia និង​ ប្រទេស Ecuador។

“កន្លែង​ច្រើន​ជាង​៤០​ភាគរយ​នៃ​តំបន់​ដែល​ពី​មុន​មាន​ជម្ងឺ​ឆ្លង​នៅ​ក្នុង​ប្រទេសអាមេរិក​ឡាទីន​ ឥឡូវ​នេះ​លែង​មាន​ការ​ឆ្លង​ជម្ងឺ​ទៀត​ហើយ” ។

ជម្ងឺ River​ blindness ដែលកើត​ពី​ប៉ារាស្ហ៊ីត​នៅ​ក្នុង​សត្វ​ល្បោម​និង​សត្វ​រុយ​ខ្មៅ​ ដែល​បាន​ចម្លង​ទៅ​មនុស្ស​តាម​រយៈ​សត្វ​រុយ​ខ្មៅ​ខាំ​ ហើយ​បណ្តាល​ឲ្យ​មាន​រមាស់​តិចៗ​ ឱ្យ​ខូច​ស្បែក​ និង​ឱ្យ​មាន​ជម្ងឺ​ភ្នែក។

ក្រុម​អ្នក​ប្រជុំ​បាន​និយាយ​ថា​ នា​បច្ចុប្បន្ន​នេះ​ ការ​ចាប់ផ្តើម​ធ្វើ​ការ​ព្យាបាល​ដោយ​ឱសថ​កំពុង​មាន​ប្រសិទ្ធិភាព​ខ្លាំង​ជាង​គេ​ ហើយ​ការស្រាវជ្រាវ​បង្ហាញ​ថា ​វិធានការ​អនាម័យ​ទាំងឡាយ​មាន​ប្រសិទ្ធិភាពតិចតួច​ណាស់​ ដើម្បី​កាត់​បន្ថយ​ជម្ងឺ​ប្រទេសក្តៅ​ដែល​គេ​មិន​ចាប់់​អារម្មណ៍​ទាំងឡាយនោះ៕

ប្រែ​សម្រួល​ដោយ​ នុច​ សារីតា

XS
SM
MD
LG