មន្ត្រីការពារជាតិអាមេរិកម្នាក់និយាយថា យោធាអាមេរិកបានរកឃើញសាកសពបុគ្គលិកយោធាអាមេរិកពីរនាក់ដែលត្រូវបានស្លាប់កាលពីថ្ងៃច័ន្ទនៅពេលយន្តហោះយោធារបស់ពួកគេបានធ្លាក់នៅអាហ្វហ្គានីស្ថាន។
យន្ដហោះ ដែលជួយកងទ័ពក្នុងការប្រាស្រ័យទាក់ទងនិងចែករំលែកព័ត៌មានសម្ងាត់នៅសមរភូមិនោះ បានធ្លាក់ចុះនៅក្នុងតំបន់ដែលគ្រប់គ្រងដោយពួកតាលីបង់នៃខេត្ត Ghazni។
មន្ត្រីការពារជាតិអាមេរិកម្នាក់ដែលសុំមិនបញ្ចេញឈ្មោះ បានប្រាប់វីអូអេកាលពីថ្ងៃអង្គារថា កិច្ចប្រឹងប្រែងយកសាកសពមកវិញត្រូវបានរារាំងដោយអាកាសធាតុមិនល្អនិងសណ្ឋានដី។ មន្ត្រីរូបនោះបាននិយាយថា គ្មានផ្សេងជិះយន្តហោះ E-11A ដែលបំពាកប្រព័ន្ធស៊ើបការណ៍នៅសមរភូមិនេះទេ។
លោក Khaled Wardek ស្នងការប៉ូលិសខេត្ត Ghazni បាននិយាយថា កម្លាំងសន្តិសុខអាហ្វហ្គានីស្ថានបានជួយកម្លាំងសហរដ្ឋអាមេរិកនៅពេលដែលពួកគេទៅយកអដ្ឋិធាតុពីកន្លែងយន្តហោះធ្លាក់កាលពីថ្ងៃអង្គារ។ មន្ត្រីយោធាអាមេរិកបាននិយាយថា គ្មានការចង្អុលបង្ហាញថាយន្ដហោះនេះធ្លាក់ដោយសារសត្រូវបាញ់ទេ គឺផ្ទុយពីការអះអាងរបស់ពួកតាលីបង់ដែលថា ពួកគេបានបាញ់ទម្លាក់យន្ដហោះនោះ។
មន្ត្រីការពារជាតិអាមេរិកបានច្រានចោលនូវការឃោសនារបស់ប្រព័ន្ធផ្សព្វផ្សាយអ៊ីរ៉ង់ដែលអះអាងថា មន្រ្តីជាន់ខ្ពស់ CIA ដែលពាក់ព័ន្ធការវាយប្រហារតាមអាកាសសម្លាប់លោក Qassem Soleimani មេបញ្ជាការកងទ័ពឆ្មាំបដិវត្តន៍អ៊ីរ៉ង់ជិះយន្តហោះនោះហើយបានស្លាប់នៅក្នុងការធ្លាក់យន្តហោះនោះ៕
