ភ្ជាប់​ទៅ​គេហទំព័រ​ទាក់ទង

អ្នក​តាក់តែង​ច្បាប់​ស.រ.អ.​សួរ​ថា​តើ​រដ្ឋាភិបាល​ប៉ាគីស្ថាន​ដឹង​អ្វី​ខ្លះ​អំពី​ទី​កន្លែង​លាក់ខ្លួន​របស់​ អូសាម៉ា​ប៊ិន​ឡាដិន


លោក​ភីទ័រ​ ឃិង​ ​មក​ពី​គណបក្ស​សាធារណរដ្ឋ​ ​ពី​រដ្ឋ​ញូយ៉ក​

ក្រុម​អ្នក​តាក់តែង​ច្បាប់​ស.រ.អ.​កំពុងតែ​សួរ​ថា​ តើហេតុ​អ្វី​បាន​ជា​អូសាម៉ា​ប៊ិន​ឡាដិន(Osama bin Laden) ​មេដឹកនាំ​ពួក​ភេរវជន​អាល់ខេដា​ អាច​រស់​នៅ​ក្នុង​បរិវេណ​សំណង់​ការពារ​នៅ​ក្នុង​ទីក្រុង​មួយ​នៅ​រស់​នៅ​ក្នុង​ប្រទេស​ប៉ាគីស្ថាន​ក្នុង​រយ:ពេល​៦​ឆ្នាំ​ដោយ​គ្មាន​សមាជិក​ខ្លះ​នៃ​រដ្ឋាភិបាល​ប៉ាគីស្ថាន​ ភ្នាក់​ងារ​ស៊ើប​ការណ៍​សម្ងាត់​ឬ​យោធា​ដឹង​ នោះ?។​ អ្នក​តាក់តែង​ច្បាប់​ខ្លះ​ និយាយ​ថា​ ទំនាក់​ទំនង​របស់​ ស.រ.អ.​ជា​មួយ​ប្រទេស​ ប៉ាគីស្ថាន ស្ថិត​នៅ​ត្រង់​ចំណុច​សំខាន់​ត្រូវពិចារណា​មើល។

លោក Leon Panetta នាយក​នៃ​ទី​ភ្នាក់ងារ​ស៊ើប​ការណ៍​សម្ងាត់​សេអ៊ីអា​ថ្លែង​ប្រាប់​សមាជិក​សភា​នៅ​ក្នុង​កិច្ច​ប្រជុំ​សម្ងាត់​ នៅ​ថ្ងៃ​អង្គារ​ អំ​ពី​ព័ត៌មាន​លម្អិត ពី​ការ​លុក​លុយរបស់​ក្រុម​ កុម្ម៉ង់ដូ​ Navy SEALs ដែល​បណ្ដាល​ឲ្យ ​អូសាម៉ា​ប៊ិន​ឡាដិន​ស្លាប់។​ ក្រោយ​ កិច្ច​ប្រជុំ​សម្ងាត់​ លោក​ Peter King ​មក​ពី​គណបក្ស​សាធារណរដ្ឋ​ ​ពី​រដ្ឋ​ញូយ៉ក​នឹង​ជានាយក​ផ្នែក​សន្ដិសុខ​មាតុភូមិ​នៃ​រដ្ឋសភា​ ប្រាប់​អ្នក​យក​ព័ត៌មានថា​ រដ្ឋបាល​លោក​អូបាម៉ា​ហើយ​និង​សភាជាតិ​ ចាំបាច់​វាយ​តម្លៃ​មើល​ម្ដង​ទៀត​នូវ​ទំនាក់​ទំនង​របស់​រដ្ឋាភិបាល​ទី​ក្រុង​វ៉ាស៊ីនតោន​ជា​មួយ​ប្រទេស​ប៉ាគីស្ថាន។

«ការណ៍​ដែល​ bin Laden ​ស្ថិត​នៅ​ក្បែរ​បណ្ឌិត​សភា​យោធា ​នៅ​ក្បែរ​ទីស្នាក់ការ​ទីភ្នាក់ងារ​ស៊ើបការ​សម្ងាត់​របស់​ប៉ាគីស្ថាន​ និង​ការណ៍​ដែល​ bin Laden​ រស់នៅ​ក្នុង​តំបន់​អ្នកមាន​ ដែល​ក្នុង​ចំណោម​នោះ​ រួម​មាន​មន្ត្រី​យោធា​ និង​ មន្ត្រី​ស៊ើបការ​សម្ងាត់​ចូល​និវត្ត​ជា​ច្រើននាក់​ផងនោះ​ ធ្វើ​ឲ្យ​មាន​ការ​ពិបាក​ជឿថា​អ្នក​ ខ្លះ​នៅ​ក្នុង​រដ្ឋាភិបាល​ប៉ាគីស្ថាន​ ទោះ​ជា​ខាង​យោធា​ក្តី ​ឬ ​ខាង​ស៊ើបការ​សម្ងាត់ក្តី​ មិន​បាន​ដឹង​ថា​ bin Laden​ រស់នៅ​ទីនោះ»។

សមាជិក​សភា​ King និយាយ​ថា​ ទំនាក់​ទំនង​របស់​ស.រ.អ.​ ជា​មួយ​ប្រទេស​ប៉ាគីស្ថាន​ មាន​បញ្ហា​ពី​ពេល​មុនៗ​ ក៏​ប៉ុន្ដែ​ឥឡូវ​នេះ​ ស្ថិត​នៅ​ត្រង់​ចំណុច​សំខាន់​ត្រូវ​ពិចារណា​មើល។

«ទំនាក់​ទំនង​នេះ​ពិត​ជា​មាន​សារៈ​សំខាន់​ណាស់​ ប៉ុន្តែ​ទំនាក់​ទំនងនេះ​បាន​ផ្លាស់​ប្តូរ​ហើយ​ ចាប់​តាំង​ពី​ថ្ងៃ​អាទិត្យ​មក។​ ដូច្នេះ​វា​និង​ជា​ផ្នែក​មួយ​នៃ​ការចចារ​ និង​ កិច្ច​ប្រជុំ​រវាង​រដ្ឋាភិបាល​ប៉ាគីស្ថាន​ និង​ រដ្ឋបាល​លោក Obama ​និង​ សភា​អាមេរិក»។

អ្នក​តាក់តែង​ច្បាប់​ខ្លះ​ទៀត​ចោទ​សួរ​សំណួរ​ដូច​គ្នា​នេះ​អំពី​អ្វី​ខ្លះ​ដែល​រដ្ឋាភិបាល​ប៉ាគីស្ថាន ​បាន​ដឹង​អំពី​ទី​កន្លែង​ពួន​របស់​ប៊ិនឡាដិន។​ នៅ​ឯ​សវនាការ​របស់​គណ:កម្មធិការ​សន្ដិសុខ​មាតុភូមិ​ដែល​កំណត់​ធ្វើមុន​នេះ​ នៅ​ថ្ងៃ​អង្គារ​ អំពី​ការ​គម្រាម​មក​លើ​ស.រ.អ.​ ដែល​ចេញ​មក​ពី​ប្រទេស​ប៉ាគីស្ថាន​ លោក​ស្រី​ Jackie Speier​ សមាជិកា​សភា ​មក​ពី​គណបក្ស​ប្រជាធិបតេយ្យ​ ពី​រដ្ឋ​កាឡីហ្វញ៉ា​និយាយ​ដូច្នេះ​ថា។

«Bin Laden មិន​មែន​ត្រូវ​គេ​រក​ឃើញ​នៅ​ក្នុង​រូង​ភ្នំ​ទេ។ ផ្ទះ​របស់​គាត់​ស្ថិតនៅ​ប្រហែល​៣​គីឡូម៉ែត្រ​ ពី​បណ្ឌិត​សភា​យោធា​ជាន់ខ្ពស់​មួយ​នៃប្រទេស​ប៉ាគីស្ថាន។ ដូច្នេះ​យើង​ត្រូវ​តែ​ចោទ​សួរ​ថា​តើ​ហេតុអ្វី​បានជា​គាត់​អាច​លាក់​ខ្លួន​នៅ​កណ្តាល​វាល​ បាន​យូរ​ម្លេះ?»។

លោក​ Patrick Meehan​ សមាជិក​សភា​ មក​ពី​គណបក្ស​សាធារណ:រដ្ឋ​ ពី​រដ្ឋ​ប៉ិនស៊ីវេញ៉ា​ សួរ​ថា​តើ​ការណ៍​ដែល​ Bin Laden​ អាច​ជ្រក​កោន​នៅ​ទី​នោះ​ក្នុង​រយ:​ពេល​៦​ឆ្នាំ​ ជា​សូចនា​បង្ហាញ​នូវ​ការ​បែកបាក់​ ឬ​ការ​ឃប់​ឃិត​ពី​ក្នុង​បណ្ដា​សមាជិក​ខ្លះៗ​នៃ​យោធា​ប៉ាគីស្ថាន​ឬ​សេវាស៊ើបការណ៍​សម្ងាត់៕

ប្រែ​សម្រួលដោយ​ កង ស៊ីវន

XS
SM
MD
LG