ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

និយោជកថា អ្នកកាសែត​អាមេរិក​ដែល​ត្រូវ​ឃាត់​ខ្លួន​ក្នុង​ប្រទេស​មីយ៉ាន់ម៉ា​ត្រូវ​ជាប់​ពន្ធនាគារ​១១ឆ្នាំ


រូបឯកសារ៖ នៅក្នុង​រូប​ដែល​មិន​បាន​បញ្ជាក់​ថ្ងៃ​ថត​ដែល​ត្រូវ​បាន​បញ្ចេញ​នៅ​ថ្ងៃទី៤ ខែមិថុនា ឆ្នាំ២០២១ ដោយ​មាន​ការអនុញ្ញាត​ពី​គ្រួសារ Fenster បង្ហាញ​អ្នកកាសែត​អាមេរិក គឺ​លោក Danny Fenster ដែល​កំពុង​ធ្វើការ​នៅ​ទីក្រុង New Iberia រដ្ឋ Louisiana សហរដ្ឋ​អាមេរិក។

តុលាការ​របប​យោធា​មីយ៉ាន់ម៉ា នៅ​ថ្ងៃ​សុក្រនេះ បាន​កាត់ទោស​អ្នក​កាសែត​អាមេរិកាំង​ម្នាក់​ឱ្យ​ជាប់​ពន្ធនាគារ១១​ ឆ្នាំ​ ក្រោម​ការ​ចោទ​ប្រកាន់ថា​ បាន​ជួបជុំ​គ្នាដោយ​ខុស​ច្បាប់ ​ការ​ញុះញង់​ប្រឆាំង​នឹង​យោធា ​និង​ការ​បំពាន​ច្បាប់​ទិដ្ឋាការ។ ​ នេះ បើតាម​ទីភ្នាក់ងារ​ព័ត៌មាន ​AFP ​ដែល​ដកស្រង់​សម្តី​និយោជក​របស់អ្នកកាសែត​នេះ។​

របប​យោធា​ បាន​គាបសង្កត់​សារ​ព័ត៌មាន​ចាប់តាំង​ពី​ឡើង​កាន់​អំណាច​ក្នុង​រដ្ឋ​ប្រហារ​ខែ​កុម្ភៈ ​ដោយ​ចាប់​ខ្លួន​អ្នក​កាសែត​រាប់សិប​នាក់​ដែល​រិះគន់​ការ​បង្រ្កាប​របស់​យោធា​លើ​អ្នក​ប្រឆាំង ​ដោយ​បាន​សម្លាប់​មនុស្ស​ជាង ១,២០០​នាក់។ នេះបើ​យោងតាម​ក្រុម​ឃ្លាំមើល​ក្នុង​ស្រុក។ ​លោក​ Danny Fenster ​ដែល​បាន​ធ្វើការ​ឱ្យ​កាសែត​ក្នុង​ស្រុក​ឈ្មោះ​ Frontier មីយ៉ាន់ម៉ា ប្រហែល​មួយ​ឆ្នាំ​ ត្រូវបាន​ចាប់ខ្លួន​កាលពី​ខែ​ឧសភា​ ខណៈលោក​ព្យាយាម​ចាកចេញ​ពី​ប្រទេស ​មក​ជួបជុំ​គ្រួសារ​នៅសហ​រដ្ឋ​អាមេរិក។​

សារ​ព័ត៌មាន​នេះ បាន​និយាយ​នៅក្នុង​សេចក្តី​ថ្លែង​ការណ៍​មួយ​ថា៖ «កាសែត​ Frontier មីយ៉ាន់ម៉ា ខកចិត្ត​យ៉ាងខ្លាំង​ចំពោះ​ការ​សម្រេច​ចិត្ត​នៅ​ថ្ងៃនេះ​ក្នុង​ការ​កាត់ទោស​នាយក​គ្រប់គ្រង​របស់​កាសែត ​គឺ​លោក​ Danny Fenster​ តាម​ការ​ចោទ​ប្រកាន់​ចំនួន ៣ ​និង​កាត់​ទោស​ដាក់​ពន្ធនាគារ​សរុប​ចំនួន ១១​ឆ្នាំ»។ ​

លោក ​Fenster​ ដែល​ត្រូវ​បាន​ឃុំខ្លួន​នៅ​ក្នុង​ពន្ធនាគារ​ Insein ​នៅ​ទីក្រុង​រ៉ង់ហ្គូន​ចាប់តាំង​ពីលោកត្រូវ​បាន​ឃាត់ខ្លួន​នោះ ​ក៏​ប្រឈម​នឹង​ការ​ចោទ​ប្រកាន់​ពីបទ​បះបោរ ​និង​ភេរវកម្ម ​ដែល​អាច​ធ្វើឱ្យ​លោកជាប់​ពន្ធនាគារ​មួយ​ជីវិត។​

កាសែត ​Frontier Myanmar ​បាន​និយាយ​ថា៖ «មនុស្ស​គ្រប់គ្នា​នៅ​កាសែត​នេះ​ អន់ចិត្ត​ និង​ខកចិត្ត​យ៉ាងខ្លាំង​ចំពោះសាលក្រមនេះ។ ​យើង​គ្រាន់​តែ​ចង់​ឃើញ ​លោក​Danny ​ត្រូវ​បាន​ដោះ​លែង​ឲ្យ​បាន​ឆាប់​តាម​ដែល​អាច​ធ្វើ​ទៅ​បាន​ ដើម្បីឱ្យលោកទៅ​ផ្ទះ​ដើម្បី​ជួបជុំគ្រួសារ​របស់​លោក»៕

អ្នកនាង Nike Ching នៃវីអូអេ រួមចំណែក​នៅក្នុង​សេចក្តី​រាយការណ៍​នេះ។​

XS
SM
MD
LG