កំណើនការងារអាមេរិកកើនយឺតជាងការរំពឹងទុកក្នុងខែកក្កដា ខណៈគ្មានការងារធ្វើកើនដល់៤,៣%។ ការណ៍នេះធ្វើឲ្យមានភាពភ័យខ្លាចកាន់តែខ្លាំងថាទីផ្សារការងារកំពុងដាំក្បាលចុះហើយអាចធ្វើឲ្យសេដ្ឋកិច្ចងាយធ្លាក់ចុះ។ នេះបើយោងតាមទីភ្នាក់ ងារសារព័ត៌មាន Reuters ដែលបានរាយការណ៍នៅថ្ងៃទី២សីហា។
ការិយាល័យស្ថិតិការងារនៃក្រសួងការងារអាមេរិកបាននិយាយក្នុងរបាយការណ៍ការងារដែលគេតាមមើលយ៉ាងដឹតដល់កាលពីថ្ងៃសុក្រថាចំនួនការងារកើន១១ម៉ឺន៤ពាន់កាលពីខែមុន ក្រោយពីកើនឡើងបាន១៧ម៉ឺន៩ពាន់កាលពីខែមិថុនា។
ក្រុមសេដ្ឋវិទូដែលត្រូវស្ទង់មតិដោយទីភ្នាក់ងារសារព័ត៌មានReutersបានព្យាករណ៍ចំនួនការងារឡើងដល់១៧ម៉ឺន៥ពាន់ ក្រោយពីការរាយការណ៍ថាបានកើន២០ម៉ឺន៦ពាន់កាលពីខែមិថុនា។ ការប៉ាន់ប្រមាណស្ថិតនៅចន្លោះពី៧ម៉ឹនដល់២២ម៉ឺន៥ពាន់។
ព្យុះកំបុតត្បូង Beryl ដែលបានផ្តាច់ភ្លើងនៅរដ្ឋ Texasនិងបោកបក់លើផ្នែកខ្លះនៅរដ្ឋ Louisiana ក្នងអំឡុងសប្តាហ៍ស្ទង់មតិពីចំនួនការងារនេះ ទំនងជារួមចំណែកដល់ការកើនឡើងនូវចំនួនការងារតិចជាងការរំពឹងទុកនេះ។
ទីផ្សារការងារកំពុងកើនយឺត ដោយសារការជួលបុគ្គលមានតិចតួច មិនមែនដោយ សារការបញ្ឈប់បុគ្គលទេ នៅពេលដែលអត្រាការប្រាក់កើនខ្ពស់នៅឆ្នាំ២០២២និង២០២៣ ធ្វើឲ្យតម្រូវការធ្លាក់ចុះ។ ទិន្នន័យរដ្ឋាភិបាលក្នុងសប្តាហ៍នេះ បង្ហាញថាការជួលបុគ្គលិកថ្មីបានធ្លាក់ចុះដល់រយៈ៤ឆ្នាំនៅក្នុងខែមិថុនា៕
