សហរដ្ឋអាមេរិកបានចូលរូមជាមួយពួកសម្ព័ន្ធមិត្តក្នុងទ្វីបអឺរ៉ុប និងក្រុមសិទ្ធិមនុស្សក្នុងការស្វាគមន៍ការចាប់ខ្លួន រ៉ាតកូ ម៉្លាឌិក (Ratko Mladic) ក្នុងប្រទេស សឺប៊ី កាលពីថ្ងៃព្រហស្បតិ៍ពីបទប្រព្រឹត្តឧក្រិដ្ឋកម្មសង្គ្រាមក្នុងតំបន់បាល់កង់។ ពួកអ្នកជំនាញកិច្ចការតំបន់បាល់កង់និយាយថាពួកគេសង្ឃឹមថា បន្ទាប់ពីការចាប់ខ្លួនជននេះនឹងមានកំណែទម្រង់សេវាកម្មសន្តិសុខនៃប្រទេសសឺប៊ី ដែលមានសមាជិកខ្លះប្រហែលជួយផ្តល់កន្លែងជ្រកកោនឱ្យម៉្លាឌិក។
ប្រតិកម្មរបស់សហរដ្ឋអាមេរិកបានត្រូវនាំមុខដោយលោកប្រធានាធិបតីបារ៉ាក់ អូបាម៉ា ដែលនៅក្នុងសេចក្តីថ្លែងការណ៍ជាលាយល័ក្ខអក្សរមួយបានអបអរសាទរដល់រដ្ឋាភិបាលសឺប៊ីរបស់លោកប្រធានាធិបតី បូរីស តាឌីក (Boris Tadic) ចំពោះអ្វីដែលលោកបានហៅថា «កិច្ចខិតខំប្រឹងប្រែងប្រកបដោយការប្តេជ្ញា» របស់ខ្លួនដើម្បីធ្វើឱ្យប្រាកដប្រជាថា ម៉្លាឌិក បានត្រូវរកឃើញនិងនាំទៅកាត់ទោស។
លោកអូបាម៉ាបានហៅការចាប់ខ្លួនជននេះថា ជាថ្ងៃដ៏សំខាន់មួយសម្រាប់ក្រុមគ្រួសារនៃជនរងគ្រោះនៃអំពើរបស់ម៉្លាឌិក សម្រាប់ប្រទេស សឺប៊ី ប្រទេសបូស្នី សហរដ្ឋអាមេរិក និងសម្រាប់យុត្តិធ៌មអន្តរជាតិ។
ម៉ា្លឌិក ដែលជាមេបញ្ជាការយោធានៃក្រុម សឺប បូស្នី (Serbe Bosnie) បានដឹកនាំកងកម្លាំង សឺប ក្នុងការសម្លាប់រង្គាលកាលពីឆ្នាំ១៩៩៥នូវបុរស និងកុមារា អ៊ីស្លាម បូស្នី ៨០០០នាក់នៅ ស្រឺប្រឺនីកា (Srebrenica) ដែលជាឧប្បត្តិហេតុដ៏អប្រិយបំផុតក្នុងសង្គ្រាមក្នុងតំបន់បាល់កង់។
លោក ម៉ាក ថូន័រ (Mark Toner) អ្នកនាំពាក្យរងស្តីទីនៃក្រសួងការបរទេសសហរដ្ឋអាមេរិកបាននិយាយថា ការចាប់ខ្លួនជននេះទោះជាបានត្រូវពន្យាពេលក៏ដោយ ក៏បង្ហាញថាយុត្តិធ៌មអន្តរជាតិមានប្រសិទ្ធិភាព។ លោកថ្លែងថា៖
«នេះជាការព្រមានមួយដល់ជនទាំងទ្បាយនៅក្នុងពិភពលោកដែលយកជនស៊ីវិលស្លូតត្រង់គ្មានទោសពៃរ៍ជាទីដៅនៃការវាយប្រហារ។នេះជាការព្រមានថា ពួកគេគ្មានកន្លែងលាក់ខ្លួនទេ។ ក៏ប៉ុន្តែសម្រាប់ជនដែលបានរងទុក្ខវេទនាដោយសារឧក្រិដ្ឋកម្មដ៏អាក្រក់របស់គាត់ ដោយមានរួមបញ្ចូលការសម្លាប់ប្រល័យពូជសាសន៍នៅ ស្រឺប្រឺនីកាផង ការណ៍នេះផ្តល់ឱ្យពួកគេនូវកម្រិតខ្លះនៃការបញ្ចប់។ ជាថ្មីម្តងទៀត វាជាការមានសារៈសំខាន់ដែលប្រទេស សឺប៊ី បានដោះស្រាយជាមួយបុគ្គលនេះ ហើយវាបង្ហាញអំពីការរួមបញ្ចូលគ្នាក្នុងទ្វីបអឺរ៉ុប»។
ការចាប់ខ្លួន ម៉្លាឌិក ដែលត្រូវបានចោទប្រកាន់ពីបទសម្លាប់ប្រល័យពូជសាសន៍ និងឧក្រិដ្ឋកម្មសង្គ្រាមដោយតុលាការឧក្រិដ្ឋកម្មអន្តរជាតិសម្រាប់អតីតប្រទេស យូហ្គោស្លាវី (Yougoslavie) ហៅកាត់ថា ICTY ត្រូវបានស្វាគមន៍ថា ជា «ជំហានធំមួយឆ្ពោះទៅកាន់យុត្តិធ៌មដោយអង្គការលើកលែងទោសអន្តរជាតិ (Amnesty International)។
អង្គការឃ្លាំមើលសិទ្ធិមនុស្ស (Human Rights Watch) បាននិយាយថាការចាប់ខ្លួនជននេះបង្ហាញថា គ្មាននរណាម្នាក់អាចគេចផុតពីអំណាចនៃច្បាប់ទេ។
លោក រីឈដ ឌិគ័រ (Richard Dicker) ជានាយកនៃកម្មវិធីយុត្តិធ៌មអន្តរជាតិរបស់អង្គការឃ្លាំមើលសិទ្ធិមនុស្សនេះដែលមានមូលដ្ឋានក្នុងបូរីញូយ៉ក។ លោកបានហៅ ម្ល៉ាឌិក ថា ជា «គំរូឥតខ្ចោះនៃអំពើឃោរឃៅ» នៅក្នុងសង្គ្រាមនៃតំបន់បាល់កង់។ លោក ឌិគ័រ ថ្លែងថា «គ្មានការសង្ស័យទ្បើយ» ថា ម៉្លាឌិក មានបណ្តាញគាំទ្រនៅក្នុងប្រទេស សឺប៊ី ហើយលោកបានសម្តែងការគោរពដល់សពលោកនាយករដ្ឋមន្ត្រី សឺប៊ី ហ្ស៊ោរ៉ាន់ ឌ្យិនឌ្យិក (Serbie Zoran Djindjic) ដែលត្រូវបានធ្វើឃាតក្នុងឆ្នាំ២០០៣ ចំពោះការដែលលោកបានចាប់ផ្តើមយុទ្ធនាការមួយប្រឆាំងនឹងពួកអ្នកប្រព្រឹត្តឧក្រិដ្ឋកម្មសង្គ្រាមនិងពួកអ្នកគាំទ្រពួកគេ។
លោកបាននិយាយប្រាប់វីអូអេថា នៅពេលនេះពួកជាតិនិយម ស៊ើប (Serbe) និយមជ្រុលបាន «បាត់បង់អនុភាព» ក្នុងក្រុង ប៊ែលហ្ក្រាដ (Belgrade) ហើយ។ លោកថ្លែងថា លោកសង្ឃឹមថានៅក្រោយការចាប់ខ្លួន ម្ល៉ាឌិក រដ្ឋាភិបាលលោក ថាឌិក (Tadic) អាចដឹកនាំប្រទេសសឺប៊ី ឱ្យវិលត្រទ្បប់ទៅកាន់ពិភពសហគមន៍អឺរ៉ុបវិញ។
ប្រែសម្រួលដោយ ឈឹម សុមេធ
___________________________________________________________
