រដ្ឋាភិបាលសហរដ្ឋអាមេរិក នៅថ្ងៃចន្ទនេះ បានសម្តែងកង្វល់របស់ខ្លួនចំពោះការចាប់ខ្លួនបុរសពីរនាក់កាលពីសប្តាហ៍មុន ក្រោយពីពួកគេបានចូលរួមរំឭកខួបបីឆ្នាំនៃឃាតកម្មលើលោកបណ្ឌិត កែម ឡី អ្នកវិភាគនយោបាយនិងសង្គមដ៏ល្បីល្បាញមួយរូបរបស់ប្រទេសកម្ពុជា។
នៅក្នុងសេចក្តីថ្លែងការណ៍មួយតាមសារអេឡិកត្រូនិកឬអ៊ីម៉ែល ដែលវីអូអេទទួលបាននៅថ្ងៃនេះ ស្ថានទូតសហរដ្ឋអាមេរិកបានគូសបញ្ជាក់ថា៖ «សហរដ្ឋអាមេរិក មានការព្រួយបារម្ភចំពោះការណ៍ដែលរដ្ឋាភិបាលបន្តប្រើការចោទប្រកាន់ដែលគ្មានមូលដ្ឋាន ហើយមានលក្ខណៈនយោបាយដើម្បីយាយីពលរដ្ឋរបស់ខ្លួន ដែលរួមមានការចាប់ខ្លួនមនុស្សមួយចំនួននាពេលថ្មីៗនេះ ដែលធ្វើការគោរពដល់វិញ្ញាណក្ខន្ធរបស់លោក កែម ឡី ដោយសន្តិវិធី»។
ស្ថានទូតសហរដ្ឋអាមេរិកគូសបញ្ជាក់ថា ប្រជាពលរដ្ឋកម្ពុជាគ្រប់រូប «គួរតែអាចអនុវត្តសិទ្ធិរបស់គេ ក្នុងការបញ្ចេញទស្សនៈរបស់ពួកគេដោយសេរី និងក្នុងការធ្វើការប្រមូលផ្តុំគ្នាដោយសន្តិវិធី»។ ក្នុងសារដដែលនេះស្ថានទូតសហរដ្ឋអាមេរិករំឭកថា៖ «យើងតែងតែបានអំពាវនាវឲ្យរដ្ឋាភិបាលកម្ពុជាដកចេញនូវការរឹតត្បិតនយោបាយដ៏ហួសហេតុ ទៅលើមនុស្សទាំងអស់នៅក្នុងប្រទេសកម្ពុជា ដោះលែងអ្នកជាប់ពន្ធនាគារទាំងឡាយណា ដែលត្រូវបានឃុំខ្លួនតាមអំពើចិត្ត ឬទាំងខុសច្បាប់ ហើយប្រកាន់ខ្ជាប់នូវសិទ្ធិមនុស្សនិងសេរីភាពជាមូលដ្ឋាន»។
កាលពីសប្តាហ៍មុន សាលាដំបូងរាជធានីភ្នំពេញចោទប្រកាន់បុរសពីរនាក់គឺលោក គង់ រ៉ៃយ៉ា និងលោក សួង នាគព័ន្ធ ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ ដោយសារពួកគេបានចូលរួមរំឭកខួបគម្រប់បីឆ្នាំនៃការបាញ់សម្លាប់លោកកែម ឡី។ បទចោទដែលអាចឲ្យបុរសទាំងពីរនាក់នេះប្រឈមនឹងការជាប់ពន្ធនាគារពី៦ខែដល់២ឆ្នាំ ប្រសិនបើតុលាការរកឃើញ ថាពួកគេមានពិរុទ្ធភាពនោះ។ បុរសជាប់ចោទទាំងពីររូបបច្ចុប្បន្នកំពុងស្ថិតក្នុងការឃុំឃាំងនៅពន្ធនាគារព្រៃស។
លោក ជិន ម៉ាលីន អ្នកនាំពាក្យក្រសួងយុត្តិធម៌ បានការពារវិធានការរបស់អាជ្ញាធរក្នុងការចាប់ខ្លួនបុរសទាំងពីរ ដោយថ្លែងតបទៅកាន់សហរដ្ឋអាមេរិកវិញដោយលើកឡើងថា៖
«ជាការល្អសហរដ្ឋអាមេរិកគួរតែធ្វើការផ្តល់នូវជំនួយផ្នែកច្បាប់ ប្រសិនបើខ្លួនយល់ឃើញថា អ្នកទាំងអស់នោះមិនបានប្រព្រឹត្តនូវកំហុសតាមអ្វីដែលគេចោទ ដើម្បីការពារអ្នកទាំងអស់នោះតាមផ្លូវតុលាការ ជាការប្រសើរជាង។ ឬមួយក៏ជួយប្រាប់ ណែនាំទៅអង្គការចាត់តាំងដែលនៅពីក្រោយសកម្មភាពទាំងអស់នោះ ឲ្យបញ្ឈប់ជាបន្ទាន់នូវសកម្មភាពទាំងឡាយណា ដែលប្រកបដោយចេតនាទុច្ចរិត និងមានការញុះញង់ ដើម្បីបង្កឲ្យមានអស្ថិរភាព ឬក៏ភាពវឹកវរនៅក្នុងសង្គម បាទ»។
អ្នកស្រី រ៉ូណា ស្មីត (Rhona Smith) អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា បានអធិប្បាយក្រោយការចាប់ខ្លួនលោក គង់ រ៉ៃយ៉ា និងលោក សួង នាគព័ន្ធ ថា «ការរឹតត្បិតលើសេរីភាពក្នុងការជួបប្រជុំ និងការបញ្ចេញមតិ ត្រូវតែកំណត់ព្រំដែន និងកំណត់និយមន័យឲ្យបានច្បាស់លាស់ ហើយឥរិយាបថ ឬសេចក្តីថ្លែងការណ៍គាំទ្រដល់ឥស្សរជនសាធារណៈ មិនគួរស្ថិតនៅក្នុងដែនកំណត់បែបនេះឡើយ»។
ចំណែកក្រុមអង្គការសមាគមក្នុងស្រុកចំនួន៨៧ រួមមានអង្គការការពារសិទ្ធិមនុស្សលីកាដូ (Licadho) និងសមាគមការពារសិទ្ធិមនុស្សអាដហុក (Adhoc) ស្នើសុំឱ្យដោះលែងលោក គង់ រ៉ៃយ៉ា និងលោក សួង នាគព័ន្ធ ឱ្យបានឆាប់រហ័សដោយគ្មានលក្ខខណ្ឌ ព្រមទាំងទម្លាក់ចោលការចោទប្រកាន់ទាំងអស់លើអ្នកទាំងពីរ។
យ៉ាងណាក៏ដោយ លោក សំ សុគង់ មេធាវីការពារក្តីលោក គង់ រ៉ៃយ៉ា និងលោក សួង នាគព័ន្ធ បានប្រាប់ VOA ថា លោកនឹងដាក់ពាក្យស្នើសុំទៅកាន់សាលាដំបូងរាជធានីភ្នំពេញ ដើម្បីឲ្យកូនក្តីរបស់លោកស្ថិតនៅក្រៅឃុំជាបណ្តោះអាសន្ន ក្នុងសប្តាហ៍នេះ៕
