ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រុម​អ្នក​ជំនាញ​ដេញដោល​គ្នា​អំពី​ការ​រើបឡើង​នៃ​សេដ្ឋកិច្ចអាមេរិក


លោក​ Robert Reich ទី​ប្រឹក្សា​​សេដ្ឋកិច្ច​នឹង​ជា​អតីត​រដ្ឋមន្ដ្រី​ក្រសួង​ការ​ងារ​ នៅ​ថ្ងៃ​ទី​៧​ខែ​វិច្ឆកា​ឆ្នាំ​២០០៨​។
លោក​ Robert Reich ទី​ប្រឹក្សា​​សេដ្ឋកិច្ច​នឹង​ជា​អតីត​រដ្ឋមន្ដ្រី​ក្រសួង​ការ​ងារ​ នៅ​ថ្ងៃ​ទី​៧​ខែ​វិច្ឆកា​ឆ្នាំ​២០០៨​។

ការ​កើន​ឡើង​នូវ​អត្រាគ្មាន​ការងារ​ធ្វើ​នៅ​ពេល​ថ្មីៗ​នេះ​នៅ​ស.រ.អ.​ បាន​ធ្វើឲ្យ​ការ​ជជែក​ដេញ​ដោល​គ្នា​មាន​សកម្មភាព​ជា​ថ្មី​ អំពី​ការ​លូតលាស់​យឺតៗ​នៃសេដ្ឋកិច្ច​សហរដ្ឋអាមេរិក​ ហើយនឹង​អ្វី​ដែល​គេ​អាច​ធ្វើ​បាន​ ដើម្បី​ពង្រីក​សេដ្ឋកិច្ច​ ហើយ​នឹង​បង្កើត​ការងារ​ដែល​គេ​ត្រូវ​ការ​ជា​ទី​បំផុត។

ជា​ប្រវត្ដិសាស្ដ្រ​ ការ​ស្ដារ​សេដ្ឋកិច្ច​ស.រ.អ.​មាន​សន្ទុះ​នៅ​ទី​បំផុត។ ក៏​ប៉ុន្ដែ មួយ​ឆ្នាំ​កន្លះក្រោយ​ពី​ងើប​ចេញពីដំណើរ​មិន​ចំរើន​ទៅ​មុខ​យ៉ាង​ជ្រៅជាទី​បំផុត​នៃ​យុគ​ក្រោយ​សង្គ្រាម​លោក​លើក​ទី​ពីរ​ សេដ្ឋកិច្ច​ស.រ.អ.​ កំពុង​តែ​រីក​ក៏​ប៉ុន្ដែ​តិច​តួច​ណាស់។​ ហើយ​ទោះ​បីការ​លូតលាស់​បន្ដិច​បន្ទួច​នេះ​ក៏​អាច​មាន​ដំណើរ​រអាក់​រអួល​ដែរ។

ព័ត៌មាន​ថា​អត្រា​នៃ​ការ​គ្មាន​ការងារធ្វើ​ឡើង​ហួស​៩​ភាគរយ​កាល​ពី​ខែ​មុន​ បាន​បង្កើន​ការ​ភ័យ​ខ្លាច​របស់​អ្នក​សេដ្ឋ​សាស្ដ្រ​ថា​ ដំណើរ​សេដ្ឋកិច្ច​មិន​ចំរើន​ទៅ​មុខ​អាច​មាន​ជា​បន្ដ​បន្ទាប់​ក្នុង​រយ:​ពេល​ប៉ុន្មាន​ឆ្នាំ​ខាង​មុខ​នេះ។

យោង​តាម​លោក Robert Reich ដែល​កាន់​តំណែង​ជា​រដ្ឋ​មន្ដ្រី​នៃ​ក្រសួង​ការងារ​នៅ​ក្នុង​រដ្ឋបាល​លោក​ Clinton ការ​ដែល​សេដ្ឋកិច្ច​គ្មាន​ការ​រីក​ចំរើន​របស់​ស.រ.អ. មិន​លំបាក​ពន្យល់​ទេ។

«បញ្ហា​ចំបង​ស្ថិត​នៅ​ខាង​ផ្នែក​សេចក្ដី​ត្រូវ​ការ។ សេដ្ឋកិច្ច​សហរដ្ឋអាមេរិក​៧០​% គឺ​ជា​សកម្មភាព​របស់​អតិថិជន។ ហើយ​ អតិថិជន ទទួល​ផល​ប៉ះ​ទង្គិច​ស្មើ​គ្នា​នឹង​ការ​ត្រូវ​រថយន្ដ​ truck​ ជល់​ដូច្នោះ​ដែរ។ តម្លៃ​ផ្ទះ​ចុះ​យ៉ាង​ច្រើន​លើស​លប់។ ប្រាក់​បៀវត្សរ៍​សម្របសម្រួល​តាម​អតិផរណា​កំពុង​តែ​ធ្លាក់​ចុះ។ ការងារ​របស់​គេ​កំពុង​តែ​បាត់​បង់។ នៅ​ក្នុង​កាល: ទេស: នេះ​ អតិថិជន ​មិន​ចាយ​វាយ​ប្រាក់​ទេ។ ហើយ​បើ​គេ​មិន​ចាយ​វាយ​ប្រាក់​ទេ​នោះ​ការ​ងារ​ក៏​មិន​ត្រូវ​បាន​ង្កើត​ដែរ»។

លោក Reich ថ្លែង​នៅ​ក្នុង​កម្មវិធី​ This Week នៃ​ទូរទស្សន៍ ABC ។ លោក​គាំទ្រ​កម្មវិធី​សង្គ្រោះ​បន្ថែមរបស់​សហព័ន្ធ​ ដើម្បី​ជំរុញ​សកម្មភាព​សេដ្ឋកិច្ច។

លោក​ Richard Shelby ​សមាជិក​សភា​មក​ពី​គណបក្ស​សាធារណ:រដ្ឋ​ ពី​រដ្ឋ Alabama ​មិន​យល់​ស្រប​នឹង​លោក​ Reich សោះ។

«ជា​មូលដ្ឋាន​ កម្មវិធី​សង្គ្រោះ​មិន​ដំណើរ​ការ​ទេ។ យើង​បាន​សាក​ល្បង​ហើយ។ខ្ញុំ​យល់​ថា​អ្វី​ដែល​យើងត្រូវ​តែ​ធ្វើ គឺ​បង្កើត​ស្ថាន​ភាព​ឲ្យ​សេដ្ឋកិច្ច​លូត​លាស់​ ពោល​គឺ​ការ​កែ​ទម្រង់​ពន្ធ​ដារ​ ការ​លើក​ទឹក​ចិត្ដ​ឲ្យ​មាន​ផលិតផល។ ផ្សារ​លក់​ដូរ​ធ្វើ​ឲ្យ​សេដ្ឋកិច្ច​លូត​លាស់។ យើង​បាន​ធ្វើ​ឲ្យ​រដ្ឋាភិបាល​រីក​ធំ​ឡើង​ ក៏​ប៉ុន្ដែ​យើង​មិន​បាន​ធ្វើ​ឲ្យ​សេដ្ឋកិច្ច​លូត​លាស់​ទេ»។

ក៏​ប៉ុន្ដែ​ លោក​ Reich​ អតីត​ រដ្ឋ​មន្ដ្រី​នៃ​ក្រសួង​ការងារទទូច​ថា​កាលណា​វិស័យ​ឯកជន​មិន​ចំរើន​ទៅ​មុខ​ រដ្ឋាភិបាល​គួរ​តែ​ធ្វើ​អន្ដរាគម។

«កាល​ណា​អតិថិជន​ហើយនឹង​អ្នក​វិនិយោគ​ឯកជន​ មិន​ចាយ​វាយ​ប្រាក់​ នោះ​រដ្ឋាភិបាលត្រូវ​តែ​បំពេញ​ចន្លោះ​នោះ។ យើង​បាន​ធ្វើ​ដូច្នេះ​អស់​រយ:​ពេល៧៥​ឆ្នាំ​កន្លង​មក​ហើយ»។

ក្នុង​អាណត្ដិ​លោក​ប្រធានាធិបតី​ ប៉ារ៉ាក់​អូបាម៉ា​ ​កម្មវិធី​សង្គ្រោះ​របស់​សហព័ន្ធ​ចំនួន​ ៨០០​ ពាន់​លាន​ដុល្លារ​ ត្រូវ​បាន​អនុម័តិ​ ការ​កាត់​ពន្ធដារ​ត្រូវ​បាន​បន្ដ​ ហើយ​ចំនួន​ប្រាក់​កាត់​ចេញ​ពី​ប្រាក់​បៀ​វត្សរ៍​ ដើម្បី​យក​ទៅ​ដាក់​ទុក​ក្នុង​មូលធន​សម្រាប់​ប្រាក់​សន្ដិសុខ​សង្គម​ សម្រាប់​អ្នក​ចូល​និវត្ដ​ ត្រូវ​បាន​បន្ថយ​ជា​បណ្ដោះ​អាសន្ដ។ បន្ថែម​ទៅ​លើ​នេះ​ទៀត​ ធនាគារ​កណ្ដាល​នៃ​ស.រ.អ.​ បាន​រក្សា​ទុក​អត្រាការ​ប្រាក់ឲ្យ​នៅ​ទាបដែល​មិន​ធ្លាប់​មាន​ជា​ប្រវត្ដិសាស្ដ្រ​មក​ហើយ​ ហើយ​បាន​រក​វិធី​នានា​ ដើម្បីបូម​ប្រាក់​បញ្ចូល​ទៅ​ក្នុង​សេដ្ឋកិច្ច​ដែល​មាន​វិប័ត្ដិ។ សមាជិក​ព្រិទ្ធសភា​ Shelby​ និយាយថា​ គ្មាន​ជម្រើស​ច្រើន​ដែល​រដ្ឋាភិបាល​សហព័ន្ធ​ដែល​មាន​បំណុល​ច្រើន​លើស​លប់​ អាច​ឬ​គួរ​តែ​ធ្វើ​ទេ​ហើយ​ថា​កម្មវិធី​សង្គ្រោះថ្មី បើ​ត្រូវ​បាន​ដាក់​ស្នើ ​នឹង​មិន​ត្រូវ​សភាជាតិ​អនុម័តិ​ទេ។

លោក​ប្រធានាធិបតី​ អូប៉ាម៉ា​ ​បាន​សុំ​ឲ្យ​មាន​ការ​អត់ធ្មត់ដោយ​ទទូច​ថា​សេដ្ឋកិច្ច​ត្រូវ​ការ​ពេលវេលា​ដើម្បីស្ដារ​ឡើង​វិញ​ពី​ការ​មិន​រីក​ចំរើន​ទៅ​មុខ​យ៉ាង​ជ្រាល​ជ្រៅ​ហើយ​នឹង​វិប័ត្ដិ​ហិរញ្ញវត្ថុនៅ​ឆ្នាំ​២០០៨។​ បេក្ខជន​ឈរ​ឈ្មោះ​សម្រាប់​តំណែង​ប្រធានាធិបតី​មក​ពី​គណបក្ស​សាធារណ:រដ្ឋ ដែល​ចង់​ប្រណាំងប្រជែង​ជា​មួយ​លោក​ អូប៉ាម៉ា​ ​នៅ​ក្នុង​ការ​បោះ​ឆ្នោត​នៅ​ឆ្នាំ​ក្រោយ​ ប្រកាស​យ៉ាង​ឆាប់​រហ័ស​ពេក​ថា​ អ្វី​ដែល​គេ​ពិត​ជា​ត្រូវ​ការ​នោះ​គឺ​ថ្នាក់​មេដឹក​នាំ​សេដ្ឋកិច្ច​ថ្មី៕

ប្រែ​សម្រួល​ដោយ​ កង ស៊ីវន

XS
SM
MD
LG