យោធាសហរដ្ឋអាមេរិកបានប្រាប់ឲ្យដឹងថា ខ្លួនបានទម្លាក់គ្រាប់បែកមានកម្លាំងដ៏ខ្លាំងបំផុតដែលមិនមែនជាគ្រាប់បែកបរិមាណូកាលពីថ្ងៃព្រហស្បតិ៍ម្សិលមិញទៅលើរូងក្រោមដីរបស់ក្រុមរដ្ឋឥស្លាមនៅក្នុងស្រុក Achin នៃខេត្ត Nangarhar នៅជិតព្រំដែនជាមួយប្រទេសប៉ាគីស្ថាន។
គ្រាប់បែកនោះហៅកាត់ថា MOAB មានគ្រឿងផ្ទុះចំនួន១១តោន។ ផ្អែកលើអក្សរកាត់របស់គ្រាប់បែកនោះ កងទ័ពអាកាសសហរដ្ឋអាមេរិក មានឈ្មោះហៅក្រៅថា មហាគ្រាប់បែក ឬ «Mother of All Bombs»។
លោក Adam Stumpអ្នកនាំពាក្យក្រសួងការពារប្រទេសសហរដ្ឋអាមេរិក បាននិយាយថា នេះជាការប្រើប្រាស់គ្រាប់បែកលើកទី១ នៅក្នុងស្ថានភាពសមរភូមិបែប នេះ។
លោក Sean Spicer អ្នកនាំពាក្យសេតវិមាន បានប្រាប់ពួកអ្នកយកព័ត៌មាននៅក្នុងរដ្ឋធានីវ៉ាស៊ីនតោនថា លោកមិនបានដឹងថា តើលោកប្រធានាធិបតី ដូណាល់ ត្រាំ ផ្តល់ការយល់ព្រមឲ្យមានចំណាត់ការខាងយោធា ឬ ទេ។
លោកឧត្តមសេនីយ៍ John Nicholsonមេបញ្ជាការកងទ័ពសហរដ្ឋអាមេរិកនៅក្នុងប្រទេសអាហ្វហ្គានីស្ថានបាននិយាយថា គ្រាប់បែកនោះបានត្រូវទម្លាក់នៅក្នុងការឆ្លើយតបទៅនឹងការកើនឡើងនូវការប្រើប្រាស់ត្រង់សេនិងរូងក្រោមដីរបស់ក្រុមរដ្ឋឥស្លាមដើម្បីការពារខ្លួន។
ក្រសួងការពារប្រទេសសហរដ្ឋអាមេរិក មិនបានប្រាប់ឲ្យដឹងថាតើទីតាំងដ៏រឹងមាំរបស់ក្រុមរដ្ឋឥស្លាមរងការខូចខាតដល់កម្រិតណា ឬ ថាតើមានមនុស្សស្លាប់និងរងរបួសប៉ុន្មាននាក់ទេ៕
ប្រែសម្រួលដោយ លោក ជឹង ប៉ូជីន
