ភ្ជាប់​ទៅ​គេហទំព័រ​ទាក់ទង

សមាជិក​ព្រឹទ្ធ​សភា​សហរដ្ឋ​អាមេរិក​​ធ្វើ​ទស្សនកិច្ច​​នៅ​ប្រទេស​ចិន


លោក​ ហារី​ រីដ (Harry Reid) មេដឹកនាំ​សំឡេង​​ភាគ​ច្រើន​នៅ​ព្រឹទ្ធសភា (ឆ្វេង) ត្រូវ​ស្វាគមន៍​ដោយ​រដ្ឋមន្ត្រី​ការបរទេស​ចិន លោក យ៉ាង ជីឈី (Yang Jiechi) នៅ​ក្រសួង​ការបរទេស​ចិន​នៅ​ទី​ក្រុង​ប៉េកាំង​កាល​ពី​ថ្ងៃ​ពុធ​ទី​២០​ខែ​មេសា​ឆ្នាំ​២០១១។

គណៈប្រតិភូ​សមាជិក​ព្រឹទ្ធសភា​សហរដ្ឋ​អាមេរិក​ដែល​បាន​ទៅ​ធ្វើ​ទស្សនកិច្ច​នៅ​ចិន​បាន​ជួប​ប្រជុំ​ជាមួយ​មេដឹកនាំ​ថ្នាក់​ខ្ពស់​នៅ​ក្នុង​រដ្ឋធានី​ចិន។

លោក​ ហារី​ រីដ (Harry Reid) មេដឹកនាំ​សំឡេងភាគ​ច្រើន​នៅ​ព្រឹទ្ធសភា​កំពុង​ដឹកនាំ​គណៈប្រតិភូ​មួយ​ដែល​មាន​សមាជិក​ព្រឹទ្ធសភា​៩​នាក់។

កាល​ពី​ថ្ងៃ​ព្រហស្បតិ៍ទី​២៦​ខែ​មេសា​ ក្រុម​នេះ​ជួប​ជា​មួយ​លោក​ ស្ស៊ី ជីនពីង (Xi Jinping) អនុប្រធានាធិបតី​ចិន​ និង​ប្រធាន​រដ្ឋសភា​ចិន​ គឺ​លោក វូ បានងហ្គួ (Wu Bangguo) នៅ​ទីក្រុង​ប៉េកាំង។

មាន​ព័ត៌មាន​លម្អិត​បន្ដិច​បន្ដួច​លេច​ចេញ​មក​អំពី​ការ​ជួប​ប្រជុំ​គ្នា​នេះ​ ក៏​ប៉ុន្ដែ​ទំនាក់​ទំនង​សេដ្ឋកិច្ច​ជារឿង​មួយ​ដែល​មាន​នៅ​ក្នុង​របៀបវារ:។ អ្នក​នាំ​ពាក្យ​នៃ​ក្រសួង​ការបរទេស​ចិន​ លោក​ ហុង ឡេ (Hong Lei) គូស​សង្កត់​ថា​ ទំនាក់​ទំនង​ល្អ​រវាង​សហរដ្ឋ​អាមេរិក​និង​ចិន​មាន​សារ:សំខាន់​ជាង​នៅ​ពេល​វេលាណា​ទាំង​អស់។

លោក​ ហុង​ និយាយ​ថា​ ទំនាក់ទំនង​សេដ្ឋកិច្ច​រវាង​សហរដ្ឋ​អាមេរិក​និង​ចិន​មិន​ត្រឹម​តែ​មាន​ផល​ប៉ះ​ពាល់​ដល់​ប្រទេស​ទាំង​ពីរ​ប៉ុណ្ណោះ​ទេ​ តែ​ថែម​ទាំង​មាន​ផល​ប៉ះពាល់​ដល់​ពិភពលលោក​ទៀត​ផង។

បញ្ហា​មួយ​ទៀត​ដែល​គេ​រំពឹង​ថា នឹង​ត្រូវ​លើក​យក​ទៅ​ពិភាក្សា​គ្នា​គឺ​សិទ្ធិ​មនុស្ស​ដែល​នឹង​ផ្តោត​ទៅ​លើ​សេចក្ដី​ព្រួយ​បារម្ភ​របស់​សហរដ្ឋ​អាមេរិក​អំពី​ការ​បង្ក្រាប​របស់​ចិន​ទៅ​លើ​អ្នក​ប្រឆាំង។

អ្នក​នាំ​ពាក្យ​ចិន​រូប​នេះ​ទទួល​ស្គាល់​ថា​ រដ្ឋាភិបាល​ទី​ក្រុង​ប៉េកាំង​និង​រដ្ឋាភិបាល​ទី​ក្រុង​វ៉ាស៊ីនតោន​ខ្វែង​គំនិត​គ្នា​ ទោះ​បី​លោក​មិន​បាន​និយាយ​អំពី​រឿង​សិទ្ធិ​មនុស្ស​ក៏​ដោយ។

លោក​ ហុង​ ឲ្យ​ដឹង​ថា​ ប្រទេស​ទាំង​ពីរ​មាន​ប្រវត្ដិសាស្ដ្រ​និងវប្បធ៌ម​ខុស​គ្នា​ ហើយ​ថា​ ប្រទេស​ទាំង​ពីរ​នេះ​មាន​ដំណាក់កាលអភិវឌ្ឍន៍​សេដ្ឋកិច្ច​ខុស​គ្នា។ លោក​កំពុង​តែ​សុំ​ឲ្យ​សហរដ្ឋអាមេរិកពង្រឹង​ការ​ប្រាស្រ័យ​ទាក់ទង​គ្នា​ បង្កើន​ការ​យល់ដឹង​របស់​ខ្លួន​អំពី​ប្រ​ទេស​ចិន​ ហើយ​ជៀស​វាង​កុំ​ឲ្យ​យក​បញ្ហា​សេដ្ឋកិច្ច​មក​ធ្វើ​ជា​រឿង​នយោបាយ។

កាល​ពី​ថ្ងៃ​ពុធ​ទី​២០​ខែ​មេសា សមាជិក​ព្រឹទ្ធ​សភា​អាមេរិក​បាន​ជួប​ជាមួយ​ក្រុម​មេដឹកនាំ​ចិន​ថ្នាក់​ខ្ពស់​ មាន​រួម​ទាំង​លោក​ឧបនាយករដ្ឋមន្ដ្រី​ វ៉ាង ជីសាន (Wang Qishan) និង​ប្រធាន​ធនាគារ​កណ្ដាល​លោក​ ស៊ូ សាវឈុន (Zhou Xiaochun)។ អស់លោក​ក៏​បាន​ជួប​លោក​ ចន ហាន់ត៍ស្មែន (Jon Huntsman)​ ផង​ដែរ​ ដែល​ជា​ឯកអគ្គរដ្ឋទូត​សហរដ្ឋ​អាមេរិក​ ដែល​នឹង​ចេញ​ពី​ប្រទេស​ចិន​នៅ​ដំណាច់​ខែ​នេះ។

ក្រុម​អ្នក​តាក់តែង​ច្បាប់​អាមេរិក​ក៏បាន​គ្រោងនឹង​អញ្ជើញ​ទៅ​មើល​ផង​ដែរ​នូវ​ទី​កន្លែង​គម្រោង​ថាមពល​ស្អាតនៅ​ទី​ក្រុង​ ចេងឌូ (Chengdu) និង​ ស៊ីអាន (Xi’an)៕

ប្រែ​សម្រួលដោយ​ កង ស៊ីវន

XS
SM
MD
LG