ពួកមន្ត្រីអាហ្វហ្គានីស្ថានក្នុងមូលដ្ឋានបាននិយាយថា ការវាយប្រហារតាមអាកាសដោយស.រ.អា.បានសម្លាប់ដោយចៃដន្យចំណាប់ខ្មាំងអាហ្វហ្គានីស្ថាន ៧នាក់នៅកន្លែងលាក់ខ្លួនមួយរបស់ពួកតាលីបាន នៅក្នុងខេត្ត Kunduz នាប៉ែកខាងជើងប្រទេស។
ពួកមន្ត្រីទាំងនេះបាននិយាយប្រាប់វីអូអេផ្នែកផ្សាយជាភាសាអាហ្វហ្គានីស្ថានថាយុទ្ធជនតាលីបានមួយចំនួនក៏បានត្រូវសម្លាប់ដែរនៅក្នុងការវាយប្រហារតាមអាកាសកាលពីយប់ថ្ងៃអាទិត្យនោះ។ ពួកអ្នកស្រុកក្នុងមូលដ្ឋានបាននិយាយប្រាប់វីអូអេបញ្ជាក់ថា ប្រាកដជាមានមនុស្សស្លាប់នៅក្នុងការវាយប្រហារនោះមែន។
សាកសពនៃពួកចំណាប់ខ្មាំងទាំងនេះដែលបានត្រូវសម្លាប់ដែលគេមានជំនឿថាជាអតីតទាហានរដ្ឋាភិបាលអាហ្វហ្គានីស្ថាន បានត្រូវដឹកទៅកាន់មន្ទីរពេទ្យមួយនៅក្នុងក្រុង kunduz កាលពីថ្ងៃចន្ទ។
មន្ត្រីម្នាក់នៃក្រសួងការពារប្រទេសស.រ.អា.បាននិយាយប្រាប់វីអូអេថា ពួកមន្ត្រីស.រ.អា.បានដឹងអំពីការចោទប្រកាន់ស្តីពីការស្លាប់នៃពួកជនស៊ីវិល ក៏ប៉ុន្តែមិនទាន់មានសេចក្តីរាយការណ៍ល្អិតល្អន់ថែមទៀតទេ។
លោកឧត្តមសេនីយ៍ត្រី Charles Cleveland នាយអគ្គសេនាធិការរងខាងគមនាគមន៍នៃបេសកកម្មដឹកនាំដោយអង្គការអូតង់ក្នុងប្រទេសអាហ្វហ្គានីស្ថាន បាននិយាយថា៖ «យើងកំពុងធ្វើការជាមួយសមភាគីអាហ្វហ្គានីស្ថានរបស់យើងដើម្បីពិនិត្យមើលអំពីបញ្ហានេះ»។
កាលពីពេលមុននេះ ក្រសួងមហាផ្ទៃអាហ្វហ្គានីស្ថនា បាននិយាយថាមេបញ្ជាការតាលីបានសំខាន់ម្នាក់បានស្លាប់ជាមួយយុទ្ធជន៦នាក់របស់គាត់នៅក្នុងការវាយប្រហារតាមអាកាសមួយ ក៏ប៉ុន្តែមិនបាននិយាយយោងដល់ការស្លាប់នៃពួកជនស៊ីវិលនៅក្នុងការវាយប្រហារនោះទេ៕
