ភ្ជាប់​ទៅ​គេហទំព័រ​ទាក់ទង

អគ្គស្នង​ការ​​អ.ស.ប.​ទទួល​បន្ទុក​ជន​ភៀសខ្លួន​ព្រមាន​អំពី​ការធ្វើ​មាតុភូមិ​និវត្តន៍​ជន​ភៀសខ្លួន​ភូមា


ភ្នាក់ងារ​នគរបាល​ថៃ​នាំ​មុខ​ជនភៀសខ្លួន​ភូមា​នៅ​​ស្រុក​ Mae Sot ស្ថិត​នៅ​តាម​ព្រំ​ដែន​ភូមា​និង​ប្រទេស​ថៃ​​ឲ្យ​ឆ្លង​កាត់​ទៅ​ក្នុង​ស្រុក​ ​Myawaddi ​។​

អគ្គស្នងការ​អង្គការ​សហ​ប្រជាជាតិ​ទទួល​បន្ទុក​ជន​ភៀសខ្លួន​និង​ក្រុម​អង្គការ​សិទ្ធិ​មនុស្ស​ បាន​បង្កើន​ការព្រួយ​កង្វល់​អំពី​សេចក្តី​រាយការណ៍​ថា​ប្រទេស​ថៃ​កំពុង​មាន​ផែនការ​ធ្វើ​មាតុភូមិ​និវត្ត​ជនភៀសខ្លួន​ភូមា​ដែល​កំពុង​រស់​នៅ​ជំរំ​នានា​ក្នុង​ប្រទេស​ថៃ។ ​ក្រុម​អង្គការ​សិទិ្ធ​មនុស្ស​និយាយ​ថា​ជម្លោះ​និង​ការ​រំលោភ​សិទ្ធិ​មនុស្ស​កំពុង​បន្ត​មាន​នៅឡើយ​នៅក្នុង​ប្រទេស​ភូមា​នៅ​ក្នុង​តំបន់​មួយ​ដែល​មាន​គ្រាប់មីន​នៅ​ពាសពេញ​មកពី​ការប្រយុទ្ធ​គ្នា​អស់​រាប់​ទសវត្សរ៍។អគ្គស្នងការ​អង្គការ​សហ​ប្រជាជាតិ​ទទួល​បន្ទុក​ជនភៀសខ្លួន​ (UNHCR) ​បាន​ស្វាគមន៍​ដោយ​ការប្រុង​ប្រយ័ត​នូវ​សេចក្តី​រាយការណ៍​ថា​ថៃ​មាន​ផែនការ​ធ្វើ​មាតុភូមិ​និវត្ត​ជនភៀស​ខ្លួន​ភូមា​ដែល​កំពុង​រស់នៅ​ក្នុង​ជំរំ​នានា​តាម​បណ្តោយ​ព្រំដែន​ភាគ​ខាងលិច​ជាមួយ​ប្រទេស​ភូមា។

ពាក្យ​ចចាម​អារ៉ាម​នៃ​ផែនការ​ធ្វើ​មាតុភូមិ​និវត្ត​ជនភៀស​ខ្លួន​កើតឡើង​បន្ទាប់​ពី​ជំនួប​រវាងនាយក​រដ្ឋមន្រ្តី​ Abhisit​ Vejjajiva​ ហើយនឹង​ប្រធាន​សន្តិ​សុខ​ជាតិ​របស់​លោក។ បញ្ហា​នេះ​ក៏​បាន​ត្រូវ​លើកឡើង​ក្នុងពេល​នៃ​ការពិភាក្សា​ក្រៅ​ផ្លូវ​ការរ​វាង​រដ្ឋ​មន្រ្តី​ក្រសួង​ការបរទេស​ថៃ​ Kasit ​Piromya​ និង​រដ្ឋមន្រ្តី​ក្រសួង​ការ​បរទេស​ភូមា​ Wunna ​Muang​ Lwin ។

ប៉ុន្តែ​ លោកស្រី​Kitty ​McKinsey​ អ្នក​នាំពាក្យ​ជាន់ខ្ពស់​ប្រចាំ​តំបន់​របស់អគ្គស្នងការអង្គការ​សហ​ប្រជាជាតិ​ទទួល​បន្ទុក​ជន​ភៀសខ្លួន​ និយាយ​ថា​មាតុភូមិ​និវត្តន៍​របស់​ជនភៀស​ខ្លួន​ភូមា ​ដែល​កើតមាន​ឡើង​នៅ​ពេល​ខាងមុខ​គួរតែ​កើត​មានឡើង​នៅពេល​មាន​ស្ថានភាព​ប្រកប​ដោយ​សុវត្ថិ​ភាព។

«នេះ​ជា​ដំណើរការ​ដែល​មាន​រយៈពេល​វែង​ឆ្ងាយ​ហើយ​ខ្ញុំ​កត់​សំគាល់​ថា​សូម្បី​តែ​មន្រ្តីរដ្ឋាភិបាល​ថៃ​ក៏​មិន​បានដាក់​កាលបរិច្ឆេទ​ រយៈពេល​ កាលកំណត់​ដែរ។ ដូច្នេះ​ការបិទ​ជំរំ​ជនភៀសខ្លួន​ក៏​ជា​គោល​បំណង​របស់​យើង​ដែរ។ យើង​មិន​ដែល​និយាយ​ថា​មនុស្ស​ទាំងអស់​នោះ​ គួរតែ​រស់នៅ​ក្នុង​ប្រទេស​ថៃ​ជារៀងរហូត​នោះ​ទេ។ គ្មាន​នរណា​ម្នាក់​ចង់​ធ្វើ​ជា​ជនភៀស​ខ្លួន​មួយ​ជីវិត​នោះ​ទេ»។

លោកស្រី​ McKinsey​ និយាយ​ទៀត​ថា​ ការវិល​ត្រឡប់​របស់​ជនភៀសខ្លួន​ គួរតែ​ពាក់ព័ន្ធ​នឹង​ការឃ្លាំ​មើល​ពី​សំណាក់​អន្តរជាតិ​ហើយនឹង​ធ្វើ​ឲ្យប្រាកដ​ប្រជា​ថា​គ្រាប់​មីន​ត្រូវ​បាន​បោសសំអាត​ហើយ​ការវិល​ត្រឡប់​របស់​ជនភៀសខ្លួន​ទាំង​នោះ​ ធ្វើ​ឡើង​ដោយ​ការស្ម័គ្រ​ចិត្ត។

មាន​ជនភៀស​ខ្លួន​ភូមា​ប្រហែល​១​សែន​៤​ម៉ឺន​នាក់​ ភាគច្រើន​ជនជាតិ​ភាគតិច​ការ៉ែន​ នៅ​ក្នុង​ជំរំ​ចំនួន​៩ ។ ពួកគេ​បាន​រត់គេចខ្លួន​ពីជម្លោះ​ក្នុង​ប្រទេស​បន្ទាប់​ពី​ការប្រយុទ្ធ​គ្នា​ជាមួយ​រដ្ឋាភិបាល​កណ្តាល។ មនុស្សខ្លះ​ បាន​រស់នៅ​ក្នុង​ជំរំ​អស់​រយៈពេល​២០​ឆ្នាំ។

មន្រ្តី​រដ្ឋាភិបាល​ថៃ​ បាន​ធ្វើការ​ចចារ​ជាមួយ​រដ្ឋាភិបាល​ថ្មី​នៃ​ប្រទេស​ភូមា​ពី​ការបិទ​ជំរំ​នេះ។​ប៉ុន្តែ ​ក្រុម​អង្គការ​សិទ្ធិ​មនុស្ស​និយាយ​ថា​ស្ថានភាព​នៅ​ខាងក្នុង​ប្រទេស​ភូមា​នៅតែ​មិន​មាន​សុវត្ថិភាព​នៅ​ឡើយ។

លោក​ ​Jack ​Dunford ​នាយក​ប្រតិបត្តិ​នៃ​សមាគម​ព្រំដែន​ថៃ​និង​ភូមា​ដែល​ជា​អង្គការ​ជំនួយដែល​ផ្តល់​ការ​ថែទាំ​ដល់​ជនភៀស​ខ្លួន​ និយាយ​ថា​ការប្រយុទ្ធ​កំពុង​បន្ត​មាន​ឡើង​នៅក្នុង​ប្រទេស​ភូមា​ហើយ​ការធ្វើ​មាតុភូមិ​និវត្ត​របស់​ជនភៀសខ្លួនអាច​ប្រឈមមុខ​ពី​ការរំលោភ​សិទ្ធិ​មនុស្ស។

«យើង​ទាំងអស់​គ្នា​សង្ឃឹម​ថា ​ជន​ភៀសខ្លួន​អាច​ធ្វើ​មាតុភូមិ​និវត្តន៍​ទៅ​អនាគត។ យើង​ទាំងអស់​គ្នា​ចង់ឃើញ​ការបិទ​ជំរំ​ទាំង​នោះ។ ប៉ុន្តែ ​ភ័ស្តុតាង​ប្រាប់​ឲ្យ​ដឹង​ថា​ស្ថានភាព​ពិតប្រាកដ​ក្នុង​ប្រទេស​ភូមា​ភាគខាង​កើត​មិន​បាន​ល្អប្រ​សើរ​ទេ។ ជម្លោះ​និង​ការរំលោភ​សិទ្ធិ​មនុស្ស​បន្ត​ធ្វើឲ្យ​មាន​ជនភៀស​ខ្លួន​កាន់​តែ​ច្រើន​ឡើង​នៅ​ពេលបច្ចុប្បន្ន​ជាជាង​បង្កើត​ឲ្យមាន​ស្ថានភាព​ដែល​ជនភៀស​ខ្លួន​អាច​វិល​ត្រឡប់​ទៅ​មាតុភូមិ​វិញ»។

លោកស្រី ​Debbie ​Stothardt ​ជា​អ្នកនាំពាក្យ​អង្គការ​សិទ្ធិ​មនុស្ស ​Alternative​ ASEAN ​Network ​និយាយ​ថា​សមាគម​ប្រជាជាតិ​អាស៊ី​អាគ្នេយ៍​ ដែល​ក្នុងនោះ​ប្រទេស​ភូមា​ជា​សមាជិក​ មាន​កាតព្វកិច្ច​នៅក្រោម​ច្បាប់​អន្តរជាតិ​ដើម្បី​បញ្ចៀស​ការរំលោភ​សិទ្ធ​មនុស្ស។

«តាម​ការពិត​គឺ​ថា​មនុស្ស​ទាំង​អស់នោះ​ ត្រូវ​គេរុញ​ឲ្យចូល​ក្នុង​ស្ថានភាព​ដែល​ពួកគេ​ នឹង​ត្រូវ​រងគ្រោះ​ដោយសារ​ឧក្រិដ្ឋកម្ម​សង្គ្រាម​និង​ប្រឆាំង​មនុស្ស​ជាតិ​កាន់តែ​ខ្លាំង​ឡើង។ ហើយ ​សហគមន៍​អន្តរជាតិ ​ជាពិសេស​ប្រទេស​ក្នុង​សមាគម ASEAN​ ចាំបាច់​យល់​ថា​កាតព្វកិច្ច​របស់​ពួកគេ​នៅក្រោម​ច្បាប់​អន្តរជាតិ។ ពួកគេ​កំពុង​ប្រើប្រាស់​ការបោះឆ្នោត​ក្នុង​ប្រទេស​ភូមា​ជា​លេស​ដើម្បី​រុញ​ច្រាន​មនុស្ស​ទាំងអស់​នោះ​ឲ្យធ្លាក់​ចូល​ក្នុង​ផ្លូវ​ប្រកប​ដោយ​គ្រោះថ្នាក់​ដែល​ជា​ការមិន​ត្រឹមត្រូវ​ទាល់តែ​សោះ»។

ក្រុម​អង្គការ​សិទ្ធិ​មនុស្ស​ប្រាប់​ឲ្យដឹង​ថា​រដ្ឋាភិបាល​ថៃ​ ក៏​កំពុង​ស្ថិត​នៅ​ក្រោមការ​គាប​សង្កត់​ពី​ប្រទេស​ម្ចាស់​ជំនួយ​ខ្លះ​ដែល​និយាយ​ថា​ រដ្ឋាភិបាល​ជាប់ឆ្នោត​ថ្មី​ៗ​នេះ​នៅក្នុង​ប្រទេស​ភូមា​កត់​សម្គាល់​ការផ្លាស់​ប្តូរស្ថានភាព​នយោបាយ​នៅ​ខាងក្នុង​ប្រទេស​ភូមា ។ ប៉ុន្តែ​ ក្រុម​អង្គការ​សិទ្ធិមនុស្ស ​និយាយ​ថា​ទោះបី​មាន​សភា​ជាប់​ឆ្នោត​របស់​ភូមា​ក៏ដោយ​ ពួក​យោធា​នៅតែ​មាន​អំណាច​ដ៏​ច្រើន​លើសលុប​ហើយ​កំពុង​ធ្វើ​សេចក្តី​សម្រេច​នយោបាយ​ពី​ក្រោយ​ឆាក។

ប្រែ​សម្រួល​ដោយ​ជឹង​ ប៉ូជីន

XS
SM
MD
LG