រដ្ឋធានីវ៉ាស៊ីនតោន៖ ក្រសួងការបរទេសថៃបាននិយាយឱ្យដឹងកាលពីថ្ងៃពុធថាអង្គការយូណេស្កូគួរស្វះស្វែងរកការអនុញ្ញាតពីប្រទេសថៃជាមុនសិនមុនពេលចុះទៅកាន់តំបន់ប្រាសាទព្រះវិហារដោយព្រមានថាតំបន់បេតិកភណ្ឌនោះនៅមានស្ថានការណ៍តានតឹងផ្នែកយោធានៅឡើយ។ នេះជាការអះអាងរបស់លោក Thani Thongphakdi អ្នកនាំពាក្យក្រសួងការបរទេសក្នុងសេចក្តីប្រកាសព័ត៌មានដែលវីអូអេសំឡេងសហរដ្ឋអាមេរិកទទួលបាន។
លោកបានបញ្ជាក់ថា៖«វាអាចជារឿងមិនសមរម្យទេសម្រាប់អង្គការយូណេស្កូក្នុងការចុះវាយតម្លៃអំពីប្រាសាទព្រះវិហារក្នុងពេលនេះខណៈដែលស្ថានការណ៍ តាមបណ្តោយព្រំដែនកម្ពុជាថៃនៅមានភាពតានតឹង ហើយទស្សនកិច្ចនេះអាចធ្វើឲ្យស្ថានការណ៍កាន់តែស្មុគស្មាញ»។
នៅក្នុងសេចក្តីប្រកាសព័ត៌មានដែលវីអូអេសំឡេងសហរដ្ឋអាមេរិកផ្នែកខេមរភាសាទទួលបានកាលពីថ្ងៃអង្គារលោកស្រី Irina Bokova អគ្គនាយិកាអង្គការយូណេស្កូបានអំពាវនាវឲ្យមានភាពស្ងប់ស្ងាត់និងបញ្ឈប់ការវាយប្រយុទ្ធគ្នានៅក្បែរប្រាសាទព្រះវិហារជាបេតិកភណ្ឌពិភពលោក។ លោកស្រីបានបញ្ជាក់ថា៖
«ខ្ញុំមានបំណងបញ្ជូនក្រុមបេសកកម្មមួយក្រុមដើម្បីចុះទៅកាន់តំបន់
ប្រាសាទព្រះវិហារដ៏ឆាប់បំផុតតាមដែលអាចធ្វើទៅបានដើម្បីវាយតម្លៃប្រាសាទរបស់កម្ពុជា»។
លោកស្រី Bokova បានបញ្ជាក់បន្ថែមទៀតថាជម្លោះយោធារវាងកម្ពុជា-ថៃប៉ុន្មានថ្ងៃមកនេះមានការស្លាប់ជាច្រើនហើយរួមទាំងការខូចខាតដល់រម្មណីយដ្ឋានប្រាសាទផងដែរ។
ក៏ប៉ុន្តែលោក Thani Thongphakdi នៃក្រសួងការបរទេសថៃវិញបានបញ្ជាក់ថា
«ដោយសារតែអង្គការយូណេស្កូទទួលខុសត្រូវអំពីបញ្ហាវប្បធម៌ អង្គការយូណេស្កូគួរអនុវត្តកិច្ចការរបស់ខ្លួនក្នុងការត្រួតពិនិត្យនិងអភិរក្សរម្មណីយដ្ឋានបុរាណនៅពេលដែលស្ថានការណ៍វិលត្រឡប់ទៅក្នុងសភាពធម្មតាសិន»។ ទោះជាយ៉ាងណាក៏ដោយការសម្រេចចិត្តរបស់អង្គការយូណេស្កូបានកើតឡើង ក្រោយពេលដែលកម្ពុជាស្នើសុំឲ្យមានអន្តរាគមន៍ជាបន្ទាន់ពីអង្គការយូណេស្កូ ជាមួយសារលិខិតផ្លូវការដែលរៀបរាប់ពីស្ថានការណ៍ខូចខាតដល់ប្រាសាទដែលកម្ពុជាបានចោទថាដោយសារគ្រឿងសញ្វវុធធុនធ្ងន់របស់ថៃកាលពីថ្ងៃទី៦ខែកុម្ភៈ។
លោកផៃ ស៊ីផានអ្នកនាំពាក្យទីស្តីការគណៈរដ្ឋមន្ត្រីបានអះអាងថាបានអះអាង កាលពីថ្ងៃច័ន្ទថាកម្ពុជាបានស្នើឲ្យមានវត្តមានកងកម្លាំងយោធាអ.ស.បជាអ្នកសង្កេតការណ៍នៅតំបន់ប្រាសាទព្រះវិហារដើម្បីការពារបេតិកភណ្ឌពិភពលោកក្រែងកើតមានការវាយប្រហារពីប្រទេសថៃថ្ងៃក្រោយទៀត។
«អាស្រ័យហេតុដូច្នេះដើម្បីធានាបាននូវតម្លាភាព នូវប្រសិទ្ធភាពហើយនឹងទំនុក ចិត្ត យើងត្រូវការអញ្ជើញឲ្យកងកម្លាំងសន្តិសុខផ្នែកសង្កេតការណ៍របស់ អ.ស.បដែលជាទាហានមួយបានចូលមករួមជាមួយការងារនេះដើម្បីធានានូវសុវត្តិភាពប្រាសាទនិងដល់ក្រុមការងារយូណេស្កូ។
ក្រុមប្រឹក្សាសន្តិសុខអ.ស.បដែលមានភារកិច្ចដោះស្រាយជម្លោះយោធានិងសន្តិសុខពិភពលោកគ្រោងនឹងជួបប្រជុំនៅថ្ងៃច័ន្ទខាងមុខក្រោយពីប្រទេសទាំងពីរ កម្ពុជានិងថៃបានចោទប្រកាន់គ្នាទៅវិញទៅមកពីការរំលោភបំពានបូរណភាពទឹកដី។
ប្រទេសថៃដែលទាមទារការចរចាទ្វេរភាគីនោះមិនពេញចិត្តនឹងការដាក់ប្រាសាទព្រះវិហារចូលក្នុងបញ្ជីបេតិកភណ្ឌពិភពលោកទេដោយទាមទារឲ្យមានការគ្រប់គ្រងរួមនៅទីតាំងរម្មណីយដ្ឋានឬដីក្បែរបរិវេណប្រាសាទដែលថៃចាត់ទុកថាជាទឹកដីរបស់ខ្លួនដែលកម្ពុជាចោទប្រកាន់ថៃថាបានគូសផែនទីជាឯកតោភាគីក្នុងគោលបំណងកាន់កាប់តំបន់នោះ។ កងយោធាទាំងពីបានឈប់វាយប្រហារគ្នា៣ថ្ងៃហើយក្រោយពីបានវាយប្រហារ គ្នាកាលពីថ្ងៃ៤ដល់ថ្ងៃ៧ កុម្ភៈដោយសារទំនាស់ព្រំដែន។ តែភាគីទាំងពីនៅត្រៀមលក្ខណៈប្រុងប្រយ័ត្នខ្ពស់រៀងខ្លួន៕
