អង្គការសហប្រជាជាតិបាននិយាយកាលពីថ្ងៃព្រហស្បតិ៍ ទី ២ ខែឧសភាថា សង្រ្គាមនៅតំបន់ហ្កាហ្សាបានធ្វើឱ្យការអភិវឌ្ឍនៅទីនោះដើរថយក្រោយ ៤០ ឆ្នាំ ហើយការកសាងតំបន់ហ្កាហ្សាឡើងវិញនឹងត្រូវចំណាយរាប់ពាន់លានដុល្លារក្នុងរយៈពេលជាច្រើនឆ្នាំ។
លោក Abdallah Al Dardari នាយកការិយាល័យកម្មវិធីអភិវឌ្ឍន៍ អ.ស.ប.ប្រចាំតំបន់នៃរដ្ឋអារ៉ាប់ បាននិយាយថា៖ «កម្មវិធីស្តារដំបូងៗពេលរយៈពេល ៣ ឆ្នាំ ដើម្បីនាំប្រជាជនប៉ាឡេស្ទីនរាប់សែននាក់ត្រឡប់ទៅកន្លែងស្នាក់នៅបណ្តោះអាសន្នក្នុងទីតាំងដើមរបស់ពួកគេ ដោយមានការគាំទ្រសហគមន៍ដ៏ទូលំទូលាយនឹងត្រូវចំណាយចន្លោះពី ២ ទៅ ៣ ពាន់លានដុល្លារ។ បើយោងតាមការប៉ាន់ស្មានរបស់យើង ការកសាងហ្កាហ្សាឡើងវិញជារួមនាពេលបច្ចុប្បន្ននេះត្រូវចំណាយយ៉ាងហោចណាស់ចន្លោះពី ៤០-៥០ពាន់លានដុល្លារ»។
លោក Dardari បាននិយាយទៅកាន់អ្នកសារព័ត៌មានពីទីក្រុង Amman ប្រទេសហ្ស៊កដានី ជាកន្លែងដែលលោកធ្វើបច្ចុប្បន្នភាពរបាយការណ៍របស់កម្មវិធីអភិវឌ្ឍន៍ អ.ស.ប.ស្តីពីផលប៉ះពាល់សេដ្ឋកិច្ចសង្គមដោយសារសង្គ្រាមរវាងអ៊ីស្រាអែល និងក្រុមហាម៉ាស់ ដែលជិតឈានដល់រយៈពេលប្រាំពីរខែនៅថ្ងៃទី ៣០ ខែមេសា។
ជម្លោះនេះបានធ្វើឱ្យជនជាតិប៉ាឡេស្ទីនស្លាប់យ៉ាងច្រើនដោយមនុស្សជាង ៣ម៉ឺន ៤ពាន់នាក់ បានស្លាប់ និងជិត ៧ម៉ឺន ៨ពាន់នាក់ បានរងរបួស។ នេះបើយោងតាមក្រសួងសុខាភិបាលនៃតំបន់ហ្កាហ្សារបស់ក្រុមហាម៉ាស។ នៅពាក់កណ្តាលខែមេសា កម្មវិធីអភិវឌ្ឍន៍ អ.ស.ប. និយាយថា ចំនួនអ្នកស្លាប់និងរបួសមានយ៉ាងហោចណាស់ ៥% នៃប្រជាជននៅហ្កាហ្សា។
ក្នុងអំឡុងការវាយប្រហារភេរវកម្មថ្ងៃទី ៧ ខែតុលា នៅក្នុងប្រទេសអ៊ីស្រាអែល មនុស្សយ៉ាងហោច
ណាស់១.២០០ នាក់ត្រូវបានសម្លាប់ និង ២៥០ នាក់ ត្រូវចាប់ពង្រាត់។ ជាង ៣០ នាក់ ក្នុងចំណោមអ្នកដែលជាប់ឃុំឃាំងត្រូវបានគេជឿថាបានស្លាប់ហើយ។
ការប្រយុទ្ធគ្នាបានកម្ទេចតំបន់ហ្កាហ្សាភាគច្រើន ដោយបានបំផ្លាញលំនៅឋានប្រមាណ ៣៧ ម៉ឺនខ្នង និង ៩% នៃអចលនទ្រព្យពាណិជ្ជកម្ម។ កម្មវិធីអភិវឌ្ឍន៍ អ.ស.ប. និយាយថា សូម្បីក្នុងការស្តារលឿនបំផុតក៏ត្រូវចំណាយពេល ១៦ ឆ្នាំគឺរហូតដល់ឆ្នាំ ២០៤០ ដើម្បីសាងសង់ឡើងវិញនូវផ្ទះដែលត្រូវបានបំផ្លាញ ដោយមិនចាំបាច់ជួសជុលផ្ទះដែលខូចខាតនោះទេ។ របាយការណ៍បាននិយាយថា ប្រសិនបើពេលវេលានៃការកសាងឡើងវិញអនុវត្តតាមលំនាំដូចគ្នាពេលបន្ទាប់ពីសង្រ្គាមឆ្នាំ ២០១៤ និង ២០២១ រវាងក្រុមហាម៉ាស់ និងអ៊ីស្រាអែល គេត្រូវការពេលប្រហែល ៨០ ឆ្នាំដើម្បីសាងសង់ឡើងវិញផ្ទះដែលត្រូវបានបំផ្លាញ។
ការវិលទៅកម្រិតឆ្នាំ ១៩៨០
លោក Dardari បាននិយាយថា ការអភិវឌ្ឍនៅក្នុងតំបន់ហ្កាហ្សារយៈពេល៤០ឆ្នាំ ត្រូវបាត់បង់ ដែលស្មើនឹងការវិនិយោគជិត ៥០ ពាន់លានដុល្លារ។
លោកបានមានប្រសាសន៍ថា៖ «នោះមានន័យថា កម្រិតនៃការអប់រំ និងអក្ខរកម្មនឹងរងផលប៉ះពាល់យ៉ាងខ្លាំងនៅពេលបញ្ចប់ជម្លោះនេះ។ ប៉ុន្តែតាមការវិភាគរបស់យើងអ្វីដែលធ្ងន់ជាងនេះ គឺថា ផលប៉ះពាល់នៃជម្លោះនេះនឹងនៅជាមួយយើងរយៈពេលយូរ លុះត្រាតែយើងដោះស្រាយឱ្យបានឆាប់រហ័ស សាលារៀនបណ្តោះអាសន្ន ការថែទាំសុខភាពបណ្តោះអាសន្ន ជំនួយផ្លូវចិត្តសង្គមដល់ប្រជាជន និងផ្តល់សេវាមូលដ្ឋានឡើងវិញ ដូចជាទឹក អនាម័យ និងអគ្គិសនីជាដើម»។
ខណៈជនជាតិប៉ាឡេស្ទីនគ្រប់រូបរងផលប៉ះពាល់ដោយសារជម្លោះ របាយការណ៍បានរកឃើញថា ប្រជាជនវណ្ណៈកណ្តាលរងផលប៉ះពាល់ច្រើនបំផុត។ ប្រសិនបើសង្រ្គាមនៅតែបន្តរហូតដល់ខែកក្កដា វានឹងនាំឱ្យប្រជាជនវណ្ណៈកណ្តាលមួយភាគធំស្ថិតនៅក្រោមខ្សែបន្ទាត់នៃភាពក្រីក្រ ដោយបង្កើនចំនួនប្រជាជនប៉ាឡេស្ទីនដែលធ្លាក់ចូលទៅក្នុងភាពក្រីក្រមានចំនួនសរុបដល់ទៅ ៣លាន ៣សែននាក់ ឬលើស ៦០% នៃចំនួនប្រជាជនទាំងអស់។
កំណើនផលិតផលសរុបរបស់ប៉ាឡេស្ទីនក៏បានរងការប៉ះពាល់ខ្លាំងដែរចាប់តាំងពីសង្រ្គាមបានចាប់ផ្តើម គឺបានធ្លាក់ចុះ ២៥% ឬជិត ៧ពាន់លានដុល្លារ។ លោក Dardari បាននិយាយថា ការខាតបង់អាចឈានដល់ ២៩% ប្រសិនបើសង្រ្គាមនៅតែបន្តរហូតដល់ខែកក្កដា៕
ប្រែសម្រួលដោយលោក ពិន ស៊ីសុវណ្ណ
