គណកម្មការសង្គមនិងសេដ្ឋកិច្ចរបស់អសប ប្រចាំតំបន់អាស៊ីនិងប៉ាស៊ីហ្វិក ព្រមានថាដំណើររើបឡើងវិញនៃសេដ្ឋកិច្ចនៅមិនទាន់រឹងមាំនៅឡើយ ដោយសារ ភាពមិនពិតប្រាកដនៃតម្លៃម្ហូបអាហារនិងប្រេងដែលឡើងខ្លាំង។ លោកស្រី Noeleen Heyzer អគ្គលេខាធិការនៃតំបន់របស់អសប មានប្រសាសន៍ថា រដ្ឋាភិបាលចាំបាច់ត្រូវតែយកចិត្តទុកដាក់ទៅលើសេចក្តីត្រូវការ របស់ក្រុមអ្នកមានប្រាក់ចំណូលទាប ព្រោះតម្លៃម្ហូបឡើងថ្លៃខ្លាំងជំរុញឲ្យមនុស្សជាច្រើនទៀតធ្លាក់ក្នុងភាពក្រីក្រ។
លោកស្រី Noeleen Heyzer អគ្គលេខាធិការរបស់ អសប ប្រចាំតំបន់អាស៊ីនិងប៉ាស៊ីហ្វិក ព្រមានអំពីអតិផរណាដែលកើនឡើងខ្លាំងនៅពាសពេញអាស៊ី បាននាំឲ្យមនុស្សច្រើនជាង៤០លាននាក់នៅក្នុងតំបន់អាស៊ី នៅឆ្នាំនេះ ធ្លាក់ក្នុងភាពក្រីក្រជាស្រេចទៅហើយ។
នៅពាសពេញតំបន់អាស៊ីនិងប៉ាស៊ីហ្វិក មនុស្សច្រើនជាង៦០០លាននាក់រស់នៅក្រោមបន្ទាត់នៃភាពក្រីក្រ ដោយមានប្រាក់ចំណូលតិចជាងមួយដុល្លារ២៥សេនក្នុងមួយថ្ងៃ។
តម្លៃម្ហូបអាហារនិងប្រេងឡើងខ្ពស់ខ្លាំង នឹងដំណើរទង្គិចទង្គើខាងក្រៅដទៃទៀតដូចជាការហូរចូលធនធានដ៏ជ្រួលច្រាល ពីទីកន្លែងមិនជាក់លាក់នៅក្នុងមជ្ឈិមបូព៌ាប្រទេសនោះ កំពុងធ្វើឲ្យទន់ខ្សោយដល់ទំនុកចិត្តសេដ្ឋកិច្ចនៅក្នុងតំបន់អាស៊ីប៉ាស៊ីហ្វិក។
«ការរើបឡើងវិញនៃសេដ្ឋកិច្ចនៅផុយស្រួយនិងរដិបរដុបណាស់ ហើយអ្វីដែលយើងចាំបាច់ត្រូវធ្វើ គឺត្រូវឲ្យប្រាកដថា យើងអភិវឌ្ឍយុទ្ធសាស្ត្រមួយ ទៅលើថាតើយើងទ្រទ្រង់ការរើបឡើងវិញនៃសេដ្ឋកិច្ចដោយវិធីណា ដើម្បីធានាថាការរើបឡើងវិញនោះមាននៅក្នុងគ្រប់វិស័យ»។
ការព្រមានរបស់លោកស្រី Heyzer មកដល់ចំពេលដែលសេចក្តីរាយការណ៍ទាំងឡាយ ដោយអង្គការស្បៀងអាហារនិងកសិកម្មរបស់អសប និងធនាគារពិភពលោក និយាយអំពីតម្លៃម្ហូបសាកលឡើងថ្លៃ ជាមួយនឹងការរំពឹងថាធញ្ញជាតិក្នុងពិភពលោក នឹងចុះថយចំនួនយ៉ាងខ្លាំង នៅក្នុងឆ្នាំនេះ។ លោកស្រីមានប្រសាសន៍ថា តំបន់អាស៊ីនិងប៉ាស៊ីហ្វិកត្រូវការប្រុងប្រៀបសម្រាប់ផលប៉ះពាល់ថ្មីទៅលើសេដ្ឋកិច្ច។
«ការឡើងថ្លៃម្ហូបអាហារនិងប្រេង និងបញ្ហាហិរញ្ញវត្ថុ ព្រមទាំងការបះបោរនៅមជ្ឈិមបូព៌ានាំឲ្យកម្មករចំណាកស្រុកជាច្រើនត្រូវគេបញ្ជូនត្រឡប់ទៅស្រុកវិញ។ ពួកគេភាគច្រើនគ្មានការងារធ្វើ ហើយគ្រួសារពឹងពាក់លើប្រាក់ខែផ្ញើទៅឲ្យ។ ដូច្នេះមនុស្សជាច្រើនអាចនឹងធ្លាក់ទៅក្នុងភាពក្រីក្រ»។
អង្គការទេសន្តរប្រវេសន៍ឲ្យដឹងថា ចាប់តាំងពីថ្ងៃទី២០ខែកុម្ភៈមកជនចំណាកស្រុកជាង២១ម៉ឺននាក់បានភៀសខ្លួនចេញពីតំបន់អសន្តិសុខនៅក្នុងប្រទេសលីប៊ីភាគច្រើននៃអ្នកទាំងនោះជាជនជាតិបង់ក្លាដេស្ហ។
លោកស្រី Heyzerមានប្រសាសន៍ថា ទៅជាមួយនឹងអតិផរណា គេឃើញតម្លៃផ្ទះសម្បែងឡើងថ្លៃយ៉ាងខ្លាំង ដោយសារតែប្រាក់ហូរចូល ពីមជ្ឈិមបូព៌ាប្រទេស។ នៅក្នុងទីផ្សារទាំងឡាយដូចជាប្រទេសចិននិងថៃ រដ្ឋាភិបាលបានទប់ការឲ្យខ្ចីប្រាក់ និងតម្លើងការប្រាក់ នៅក្នុងការប៉ុនប៉ងបន្ថយការឡើងថ្លៃទំនិញនៅក្នុងតំបន់ ដូចជាទីផ្សារផ្ទះសម្បែងជាដើម។
លោកស្រីនិយាយថា រដ្ឋាភិបាលត្រូវការធានាថា ការរើបឡើងវិញនៃសេដ្ឋកិច្ចនៅក្នុងវិស័យជាច្រើនដែលអាចធ្វើទៅបាន ហើយអំពាវនាវរដ្ឋាភិបាលទាំងឡាយឲ្យធ្វើការថ្លឹងថ្លែងឡើងវិញនូវយុទ្ធសាស្ត្រអភិវឌ្ឍន៍ ជាមួយនឹងគម្រោងទាំងឡាយដែលរៀបចំសម្រាប់កាត់បន្ថយភាពក្រីក្រ។
លោកស្រីនិយាយថា រដ្ឋាភិបាលចាំបាច់ផ្តល់ការយកចិត្តទុកដាក់លើសេចក្តីត្រូវការនៃក្រុមអ្នកមានប្រាក់ចំណូលទាប និងតម្លើងការធ្វើវិនិយោគនៅក្នុងគម្រោងអភិវឌ្ឍន៍សង្គម ដូចជាវិស័យសុខភាពជាដើម។
ប្រែសម្រួលដោយ នុច សារីតា
