ភ្ជាប់​ទៅ​គេហទំព័រ​ទាក់ទង

កុមារ​ជា​ច្រើន​​នៅ​​ទ្វីប​អាហ្រ្វិក​​​អាច​​ស្លាប់​​ដោយ​សារ​​​​តែ​កង្វះ​​​អាហារូបត្ថម្ភ


បុរសជាតិសូម៉ាលីម្នាក់ភៀសខ្លួនពីការរាំង​ស្ងួតនៅក្នុង​ប្រទេស​ជា​មួយ​​គ្រួសារ​ អង្គុយ​ផ្ទាល់ដី​នៅ​ខាងក្រៅ​កន្លែង​ចែក​អាហារ​ក្នុង​​​ជំរំជនភៀស​ខ្លួន Dadaab ក្នុង​តំបន់ឦសាននៃ​ប្រទេស​កេនយ៉ា​​ នៅថ្ងៃ​ទី​៥​ខែ​កក្កដា​ឆ្នាំ​២០១១។

មូលនិធិអង្គការ​សហប្រជាជាតិសម្រាប់កុមាររាយការណ៍ថា កុមារប្រមាណកន្លះលាននាក់នៅក្នុងតំបន់ស្នែងនៃ​ទ្វីប​អាហ្វ្រិក​អាច​ស្លាប់​ដោយសារតែ​គ្មានអាហារបរិភោគគ្រប់​គ្រាន់។ ទីភ្នាក់ងារនេះ​បញ្ជាក់​ថា កុមារ​១​លាន​៧​សែននាក់ទៀតក៏អាចមានគ្រោះ​ថ្នាក់បែប​នេះដែរ។ មន្ត្រី​ជាន់​ខ្ពស់ពីរ​រូប​នៃទី​ភ្នាក់ងារ​អង្គការសហប្រជាជាតិទទួលបន្ទុក​ជន​ភៀសខ្លួន ដែល​ទើប​វិល​ត្រទ្បប់មកពីប្រទេស​អេត្យូពី (Ethiopia)​ និង​កេនយ៉ា (Kenya)​ បាន​បញ្ជាក់អំពីភាព​ធ្ងន់​ធ្ងរនៃស្ថានការណ៍ដែលជន​រងគ្រោះរាប់​លាននាក់​ ជា​ពិសេស​កុមារ​ ដែល​កំពុង​ប្រឈម​នឹង​គ្រោះរាំង​ស្ងួត។ ក្រុម​មន្ត្រីអង្គការ​សហប្រជាជាតិបានទស្សនាជំរុំជនភៀស​ខ្លួននៅ​តំបន់​ដូឡូអាបូ (Dollo Abo)​ ដែល​ស្ថិត​នៅ​ភាគអាគ្នេយ៍នៃប្រទេស​អេត្យូពី ​និង​នៅតំបន់​ដាដាប​ (Dadaab) នៃ​ប្រទេស​កេនយ៉ា​ ដែលជាជំរុំជន​ភៀស​ខ្លួនធំ​បំផុតនិងមាន​មនុស្ស​កក​កុញ​បំផុត​នៅក្នុងពិភព​លោក។ ​លោក ផូល ស្ពីហ្គេល​ (Paul​ Spiegel)​ នាយកផ្នែកសុខភាពសាធារណៈនៃស្នងការជាន់​ខ្ពស់អង្គការសហប្រជាជាតិទទួល​បន្ទុកជនភៀសខ្លួន​ បាន​និយាយ​ថា​ ​លោក​មាន​ភាព​រន្ធត់​ចិត្ត​ដោយសារ​តែ​ស្ថានការណ៍ដ៏ធ្ងន់​ធ្ងរនៅ​តំបន់​ដូឡូ។

លោកថ្លែង​ថា លោកតក់​ស្លុត​ចំពោះ​អត្រា​មនុស្សស្លាប់ជាច្រើន កាលពីខែ​មិថុនា។ លោក​បាន​បញ្ជាក់ថា​ “មានការ​ស្លាប់មនុស្ស​៧,៤នាក់​ក្នុង​ចំណោម​មនុស្សចំនួន​១​ម៉ឺននាក់ក្នុងមួយ​ថ្ងៃ។ កម្រិត​មូលដ្ឋាន​សម្រាប់​តំបន់​ភាគ​ខាង​ត្បូង​នៃ​វាលខ្សាច់សាហារ៉ាក្នុងទ្វីប​អាហ្វ្រ៊ិកគឺ​មាន​ចំនួន​០,៥​នាក់​ប៉ុណ្ណោះ។ ​ភាពអាសន្នបានត្រូវប្រកាស​ជាទូទៅ​នៅ​ក្នុងកម្រិតច្រើនជាងការ​ស្លាប់មនុស្សម្នាក់ៗ។​ ដូច្នេះ​ ចំនួន​នេះ​មាន​១៥​ដង​ច្រើន​ជាង​កម្រិតមូលដ្ឋាន ហើយចំនួនច្រើនបំផុតនៃ​ការស្លាប់​កើត​ឡើងក្នុងចំណោមកុមារអាយុតិច​ជាង៥ឆ្នាំ។ អត្រា​នៃ​ការ​ខ្វះខាត​ម្ហូបអាហារ ដែល​ជា​បុព្វហេតុ​ចម្បង​មួយ​ចំពោះ​ការ​ស្លាប់នេះ ក៏​មាន​កម្រិត​ខ្ពស់​ដែរ»។

ទិន្នន័យ​របស់​អង្គការគ្រូ​ពេទ្យគ្មានព្រំដែនបង្ហាញថា ​អត្រានៃការ​ខ្វះខាតម្ហូប​អាហារយ៉ាង​ធ្ងន់ធ្ងរកាលពីខែមិថុនានៅ​ក្នុងជំរុំទាំង​នេះ មាន​ចំនួនជាង៥០ភាគរយ ​ហើយអត្រាខ្វះខាត​ម្ហូប​អាហាយ៉ាង​ធ្ងន់ធ្ងរដែល​អាចនាំឱ្យស្លាប់គឺ​មាន​ចំនួន២៦,៨​ភាគរយ។ លោកស្ពីហ្គេល បាន​ថ្លែង​ថា ការ​រក​ឃើញទាំង​នេះបានត្រូ​វចាត់ទុកថាមានកម្រិតខ្ពស់​ ​ហើយ​មិន​សូវមានពីពេល​មុន​ទេ។​ លោកកត់​សម្គាល់ថា​ អត្រានៃការ​ខ្វះ​ខាត​ម្ហូប​អាហារដ៏ធ្ងន់ធ្ងរក្នុងខែកក្កដា ហាក់ដូច​ជា​ថយ​ចុះដែល​ជាសញ្ញា​ដ៏ល្អ។

អង្គការ​សហប្រជាជាតិបាន​ប៉ាន់​ស្មានថា ​មនុស្សជាង១០​លាននាក់​នៅ​ក្នុងតំបន់​ស្នែងនៃទ្វីប​អាហ្វ្រ៊ិក​ទទួល​រងផលប៉ះពាល់ដោយសារតែ​គ្រោះ​រាំង​ស្ងួត។ ស្ថានភាព​នេះ​មានភាព​ធ្ងន់ធ្ងរ ​ជាពិសេស​នៅក្នុងប្រទេស​សូម៉ាលី ដែលបាន​បណ្តាលឱ្យជន​ភៀស​ខ្លួនថ្មីៗរាប់​ពាន់​នាក់ចាក​ចេញពី​គ្រោះរាំង​ស្ងួតនិងអំពើ​ហិង្សា៕

ប្រែ​សម្រួល​ដោយ​ ឈឹម​សុមេធ

XS
SM
MD
LG