រដ្ឋមន្ត្រីការបរទេសប្រទេសអ៊ុយក្រែនលោក Dmytro Kuleba បាននិយាយនៅថ្ងៃព្រហស្បតិ៍ម្សិលមិញថា ប្រទេសក្នុងទ្វីបអាហ្រ្វិកនិងប្រទេសអ៊ុយក្រែនកំពុងមានស្ថានភាពដូចគ្នាដោយចោទរដ្ឋាភិបាលក្រុងមូស្គូថាបានធ្វើឱ្យមានវិបត្តិជាសាកល ដោយធ្វើឱ្យទ្វីបអាហ្វ្រិករងផលប៉ះពាល់ដោយសារការខ្វះខាតស្បៀងអាហារ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
«កាំជ្រួចម៉ីស៊ីលរបស់រុស្ស៊ីមិនគ្រាន់តែវាយប្រហារទៅលើពលរដ្ឋអ៊ុយក្រែនប៉ុណ្ណោះទេ ប៉ុន្តែវាបានធ្វើឱ្យប៉ះពាល់ដល់ជីវភាពរបស់ពលរដ្ឋប្រទេសនានាក្នុងទ្វីបអាហ្វ្រិកផងដែរ។ នេះបើតាមការលើកឡើងរបស់រដ្ឋមន្ត្រីការបរទេសអ៊ុយក្រែនរូបនេះដែលបានថ្លែងក្នុងសន្និសីទសារព័ត៌មានតាមប្រព័ន្ធអនឡាញ បន្ទាប់ពីមានការវាយប្រហារថ្មីៗទៀតដោយកងទ័ពរុស្ស៊ីប្រឆាំងនឹងប្រទេសអ៊ុយក្រែនដែលបង្ខំលោកឱ្យកាត់បន្ថយដំណើរទស្សនកិច្ចនៅក្នុងទ្វីបអាហ្វ្រិក។
លោកក៏បានវាយបកទៅលើការចោទប្រកាន់ដោយប្រធានាធិបតីរុស្ស៊ីលោក Vladimir Putin ដែលបាននិយាយកាលពីខែមុនថា ការដឹកជញ្ជូនគ្រាប់ធញ្ញជាតិស្ទើរតែទាំងអស់របស់អ៊ុយក្រែនក្រោមកិច្ចព្រមព្រៀងជាមួយអង្គការសហប្រជាជាតិដើម្បីជួយសម្រួលដល់ការខ្វះខាតស្បៀងអាហារជាសាកលនោះ ត្រូវបានទៅដល់ប្រទេសអឺរ៉ុបដែលជាអ្នកមាន ហើយមិនបានទៅដល់ប្រទេសក្រីក្រនានានៅក្នុងទ្វីបអាហ្វ្រិកនោះទេ។ លោកKuleba និយាយថា «ចាប់តាំងពីខែកក្កដាមក គ្រាប់ធញ្ញជាតិប្រមាណ៨សែន ៣ម៉ឺនតោនត្រូវបានដឹកជញ្ជូនទៅកាន់ប្រទេសនានាក្នុងទ្វីបអាហ្រ្វិក។
ប្រមុខការទូតអ៊ុយក្រែនរូបនេះបានធ្វើដំណើរទស្សនកិច្ចទៅកាន់ទ្វីបអាហ្រ្វិកកាលពីសប្តាហ៍មុនដោយធ្វើទស្សនកិច្ចទៅកាន់ប្រទេសសេណាហ្កាល់ កូតឌីវ័រ ហ្កាណា និងប្រទេសកេនយ៉ា។
ប្រទេសទាំង៤នេះស្ថិតក្នុងចំណោមប្រទេស១៤៣នៅមហាសន្និបាតអង្គការសហប្រជាជាតិដែលបានបោះឆ្នោតគាំទ្រលើសេចក្តីសម្រេចចិត្តរបស់អង្គការសហប្រជាជាតិកាលពីថ្ងៃពុធដើម្បីថ្កោលទោសលើប្រទេសរុស្ស៊ី ដែលបានដាក់បញ្ចូលតំបន់៤នៃទឹកដីរបស់អ៊ុយក្រែនទៅក្នុងប្រទេសខ្លួននោះ។
លោក Kuleba បាននិយាយថា «ខ្ញុំមានការសប្បាយចិត្តជាពិសេស ដែលបានឃើញប្រទេសទាំង៤ដែលខ្ញុំទៅធ្វើទស្សនកិច្ចក្នុងទ្វីបអាហ្រ្វិកបានបោះឆ្នោតគាំទ្រសេចក្តីសម្រេចរបស់អង្គការសហប្រជាជាតិនេះ៕
រដ្ឋមន្ត្រីការបរទេសអ៊ុយក្រែនថា ទ្វីបអាហ្វ្រិកស្ថិតក្នុងស្ថានភាពតែមួយដូចរដ្ឋាភិបាលក្រុងកៀវដែរ
ទីក្រុងណៃរ៉ូប៊ី —
