តុលាការអ៊ូហ្គាន់ដា (Uganda) បានចោទប្រកាន់ថា លោក Robert Kyagulanyi ដែលគេស្គាល់ថា មានឈ្មោះ Bobi Wine ផងដែរ បានធ្វើសកម្មភាពដូចជាការចម្លងជំងឺកូវីដ១៩ ដោយលោក បានធ្វើការប្រមូលផ្តុំមហាជន។
តុលាការសង្កាត់ Iganga បានបញ្ជាឱ្យដោះលែងលោក រហូតដល់មានការកាត់ក្តីនេះជាថ្មីក្នុងខែធ្នូ។
លោក David Rubongoya អគ្គលេខាធិការគណបក្ស National Unity Platform របស់លោក Wine បានពិនិត្យមើលទម្រង់ការនេះ។ លោកបាននិយាយថា៖
«លោក Bobi បានត្រូវដោះលែងហើយដោយការធានានៅក្រៅឃុំ។ យើងនៅឯតុលាការរង់ចាំលោកចាកចេញពីតុលាការហើយប្រហែលទៅផ្ទះ។ មានការដាក់ពង្រាយកងកម្លាំងសន្តិសុខច្រើននាក់ យើងមិនដឹងថា នឹងមានអ្វីកើតឡើងទេ តែលោក Bobi មានសេរីភាពហើយ»។
ពួកប៉ូលិស បានចាប់ខ្លួនលោក Wine កាលពីថ្ងៃពុធ ទី១៨វិច្ឆិកា នៅពេលលោកឃោសនាបោះឆ្នោតនៅក្នុងប៉ែកខាងកើតប្រទេសអ៊ូហ្គាន់ដាសម្រាប់ការបោះឆ្នោតប្រធានាធិបតីក្នុងខែមករា។
ការចាប់លោក Wine បានបណ្តាលឱ្យមានបាតុកម្មដោយពួកអ្នកគាំទ្រលោក នៅទូទាំងប្រទេស នាំឱ្យមានការចាប់មនុស្សរាប់រយនាក់ ហើយមានកំណើនមនុស្សស្លាប់នៅក្នុងការប៉ះទង្គិចជាមួយកងកម្លាំងសន្តិសុខផងដែរ។
លោក Moses Byaruhanga អ្នករោគសាស្ត្ររបស់ប៉ូលិសអ៊ូហ្គាន់ដា និយាយថា មនុស្សស្លាប់ភាគច្រើនមានមុខរបួសដោយគ្រាប់កាំភ្លើង។ លោកបានថ្លែងថា៖
«យើងឃើញស្នាមរបួសគួរឲ្យស្លុត គ្រោះថ្នាក់ចរាចរណ៍។ យើងឃើញស្នាមដោយគ្រាប់កាំភ្លើង។ រហូតមកដល់ថ្ងៃនេះមានមនុស្សស្លាប់៣៧នាក់ គឺស្ត្រីបួននាក់ និងបុរស៣៣នាក់»។
រដ្ឋមន្ត្រីសន្តិសុខអ៊ូហ្គាន់ដា និងអ្នកនាំពាក្យម្នាក់របស់ប៉ូលិសបាននិយាយថា ក្រុមបាតុករ បានប្រព្រឹត្តអំពើហិង្សា វាយប្រហារលើពួកអ្នកគាំទ្ររដ្ឋាភិបាល ហើយគេមានជំនឿថា ពួកជនទាំងនេះ មានអាវុធថែមទៀតផង។
ពួកអ្នករិះគន់កត់សម្គាល់ថា ពួកប៉ូលិសអ៊ូហ្គាន់ដា និងកងសន្តិសុខមានស្លៀកពាក់ស៊ីវិលឆាប់ប្រើគ្រាប់កាំភ្លើងមែនទែនប្រឆាំងនឹងក្រុមបាតុករ។
អង្គការ Human Rights Watch បាននិយាយកាលពីថ្ងៃសុក្រ ទី២០ វិច្ឆិកាថា ការចាប់ខ្លួនលោក Wine បង្ហាញថា អាជ្ញាធរ អ៊ូហ្គាន់ដា ប្រើជំងឺកូវីដ១៩ជាលេស ដើម្បីបង្ក្រាបលើក្រុមប្រឆាំងនៅមុនការបោះឆ្នោតក្នុងខែមករា។
លោក Oryem Nyeko អ្នកស្រាវជ្រាវអង្គការ Human Rights Watch ប្រចាំទ្វីបអាហ្វ្រិកនិយាយថា ការឃោសនារបស់គណបក្សគ្រប់គ្រងប្រទេសឈ្មោះគណបក្ស Resistance Movement ហៅកាត់ថា NRM ក៏ទាក់ទាញហ្វូងមនុស្សច្រើននាក់ដែរដែលកងកម្លាំងសន្តិសុខអនុញ្ញាត។ Nyeko និយាយថា៖
«នេះជាលេសមួយ។ ពួកគេបានប្រើកូវីដ១៩ជាលេសដើម្បីបង្ក្រាបនិងរំលោភលើសិទ្ធិពលរដ្ឋ។ ជាពិសេស នៅពេលនេះ គឺរំលោភលើសិទ្ធិក្រុមប្រឆាំង។ បើមិនដូច្នេះទេ យើងឃើញឱ្យមានតុល្យភាពនៃការអនុវត្តបទបញ្ញត្តិទាំងនោះ។ យើងមិនបានឃើញការចាប់មនុស្សក្នុងការដង្ហែរក្បួនរបស់គណបក្សកាន់អំណាចទេ»។
នៅក្នុងការប្រមូលផ្តុំឃោសនាបោះឆ្នោតមួយកាលពីថ្ងៃព្រហស្បតិ៍ ទី១៩ វិច្ឆិកា លោកប្រធានាធិបតី Yoweri Museveni បាននិយាយថា ពួកអ្នកនៅក្រៅប្រទេសដែលប្រឆាំងនឹងស្ថិរភាពនិងឯករាជ្យនៃប្រទេសអ៊ូហ្គាន់ដាបានប្រើពួកបាតុករ។
លោក Museveni ដែលបានកាន់អំណាច៣៤ឆ្នាំមកហើយ មិនបាននិយាយឱ្យបានក្បោះក្បាយទេ ហើយក៏មិនបានផ្តល់ភស្តុតាងអ្វីឡើយ៕
ប្រែសម្រួលដោយលោក ឈឹម សុមេធ
