ក្រុមលួចចូលប្រព័ន្ធកុំព្យូទ័រឬ hackers ជាជនជាតិចិនដែលមានរដ្ឋនៅពីក្រោយ បានជ្រៀតចូលក្នុងបណ្តាញហេដ្ឋារចនាសម្ព័ន្ធសំខាន់ៗរបស់អាមេរិក។ នេះបើតាមប្រភពពីសហរដ្ឋអាមេរិក សម្ព័ន្ធមិត្តបស្ចិមប្រទេសរបស់ខ្លួន និងក្រុមហ៊ុន Microsoft ដែលបានព្រមានកាលពីថ្ងៃពុធថា ការវាយប្រហារចារកម្មស្រដៀងគ្នានេះ អាចកំពុងកើតឡើងនៅទូទាំងសកលលោក។ នេះបើយោងតាមទីភ្នាក់ងារសារព័ត៌មាន AFP។
ក្រុមហ៊ុន Microsoft បានគូសបញ្ជាក់ថាកោះ Guam ដែលជាដែនដីរបស់អាមេរិកក្នុងមហាសមុទ្រប៉ាស៊ីហ្វិកជិតទ្វីបអាស៊ី ដែលមានមូលដ្ឋានយោធាដ៏សំខាន់មួយផងនោះ គឺជាគោលដៅមួយនៃការវាយប្រហារនេះ ហើយថាខ្លួនក៏ចាប់បានសកម្មភាព«ដែលមានបំណងអាក្រក់»នេះនៅកន្លែងផ្សេងទៀតក្នុងសហរដ្ឋអាមេរិក។
ក្រុមហ៊ុន Microsoft និយាយថា ការវាយប្រហារដោយលាក់លៀម ដែលធ្វើឡើងដោយក្រុមមួយឈ្មោះ Volt Typhoon ដែលមានរដ្ឋចិននៅពីក្រោយ ចាប់តាំងពីពាក់កណ្តាលឆ្នាំ២០២១មក អនុញ្ញាតឲ្យមានចារកម្មរយៈពេលវែង ហើយទំនងជាមានគោលដៅរារាំងសហរដ្ឋអាមេរិក បើមានជម្លោះនៅក្នុងតំបន់។
សេចក្តីថ្លែងការណ៍របស់ក្រុមហ៊ុន Microsoft រៀបរាប់ថា៖ «ក្រុមហ៊ុន Microsoft វាយតម្លៃដោយមានកម្រិតជឿជាក់មធ្យមថា យុទ្ធនាការរបស់ក្រុម Volt Typhoon នេះ កំពុងព្យាយាមអភិវឌ្ឍសមត្ថភាពដែលអាចរារាំងហេដ្ឋារចនាសម្ព័ន្ធសារគមនាគមន៍សំខាន់រវាងសហរដ្ឋអាមេរិកនិងតំបន់អាស៊ីក្នុងគ្រាមានវិបត្តិនៅពេលអនាគត»។
សេចក្តីថ្លែងការណ៍បន្ថែមទៀតថា៖ «អង្គភាពដែលរងផលប៉ះពាល់រួមមានសារគមនាគមន៍ រោងចក្រ ដឹកជញ្ជូន សំណង់ លម្ហសមុទ្រ រដ្ឋាភិបាល បច្ចេកវិទ្យាព័ត៌មាននិងវិស័យអប់រំ»។
សេចក្តីថ្លែងការណ៍របស់ក្រុមហ៊ុន Microsoft នេះ ធ្វើឡើងចំពេលជាមួយសេចក្តីប្រកាសព័ត៌មានចេញផ្សាយដោយអាជ្ញាធរអាមេរិក អូស្ត្រាលី កាណាដា នូវែលសេឡង់ និងអង់គ្លេស ដែលព្រមានថា ការលួចចូលប្រព័ន្ធកុំព្យូទ័រនេះ ទំនងកំពុងកើតឡើងនៅទូទាំងសកលលោក៕
