ភ្ជាប់​ទៅ​គេហទំព័រ​ទាក់ទង

ស្រ្តី​​មាន​សកម្មភាព​ក្លៀវ​ក្លា​​ នៅ​ក្នុង​ការ​តវ៉ា​​នៅ​ទុយនីស៊ី និង​អេហ្ស៊ីប


ស្រ្តី​​ទុយនីស៊ី​ ចូលរួម​ធ្វើ​​បាតុកម្ម​​នៅ​ក្នុង​ទីក្រុង​ទុយនីស​ កាលពី​ថ្ងៃ​ទី​ ២៩​ ខែ​​មករា​ ឆ្នាំ​២០១១​នេះ។​

ទីក្រុង​ទុយនីស៖ ស្ត្រី​គឺជា​អ្នកចូល​រួម​យ៉ាងសកម្មនៅ​ក្នុង​ការតវ៉ា​ប្រឆាំងនឹង​រដ្ឋាភិបាល​ដែលបាន​ផ្តួល​រំលំមេដឹក​នាំ​របស់​ប្រទេស​ទុយនីស៊ីនិង​អេហ្ស៊ីប។ ឥឡូវនេះ ខណៈ​ពេល​ដែលទុយនីស៊ី​បិទទំព័រនៃ​របប​ផ្តាច់ការ​រួច​ហើយ​ស្រ្តី​កំពុងស្វែងរក​ឱកាស​របស់​ខ្លួន​នៅក្នុង​សមាសភាព​នយោបាយ​នា​ពេល​អនាគត​នៅ​ក្នុង​ប្រទេស​អាហ្វ្រិក​ខាង​ជើងមួយ​នេះ។

នេះ​ជា​សំឡេងស្រដៀង​គ្នា​នៅ​ក្នុង​ការតវ៉ា​កាលពី​ខែ​មករា ដែលបាន​បណ្តេញបុរស​ខ្លាំង​គឺលោក​ប្រធានា​ធិបតី ហ្ស៊ីន អេលអាប៊ីឌីន បិនអាលី (Zine el Abidine Ben Ali)​ ឲ្យ​ចេញ​ពី​មុខ​តំណែង។ សំឡេងរបស់​ស្ត្រី មាន​ដូច​ជាអ្នកគ្រូ ឡេឌៀ ណេប្លី (Ledia Nebli) ដែល​បាន​ចូល​រួម​ក្នុង​ការប្រមូល​ផ្តុំ​គ្នា​ប្រឆាំង​នឹង​របប​មួយ​នេះ​នៅ​ទីក្រុងទុយនីស​ជាមួយ​ស្វាមី​របស់លោកស្រី ​និង​កូនស្រី​ទាំង​បី​នាក់ផង។

លោកស្រី ណេប្លី មាន​ប្រសាសន៍​ថា​ជា​ការណ៍​ពិត​ណាស់​ស្រ្តី​បាន​ស្ថិត​នៅ​ក្បែរ​បុរស​ជានិច្ច​នៅ​ក្នុង​បាតុកម្ម​នោះ​ពួក​គេ​ចង់​បាន​សេរីភាព​ក្រោយ​របប​ផ្តាច់ការ​ដែល​មាន​រយៈពេល​ជាង​ពីរ​ទសវត្សរ៍។

ស្រ្តី​ទុយនីស៊ី បាន​ស្ថិត​នៅ​ក្បែរ​បុរស​តាម​របៀបផ្សេងទៀតជាច្រើន​ដោយ​ចាប់ផ្តើមពីការប្រយុទ្ធ​ដើម្បី​ឯករាជ្យភាព​ ពី​ប្រទេស​បារាំង កាលពី​ជាង​កន្លះ​សតវត្សរ៍​កន្លងទៅ។ មនុស្ស​ជា​ច្រើន​មាន​ដូចជា​អ្នក​រាយការណ៍​ព័ត៌មាន លោកស្រី សាម៉ា ណេហ្គីដា (Samar Neguida) មាន​មោទនភាព​ចំពោះ​តួនាទី​របស់ស្ត្រីទាំងនោះ។

«ស្រ្តីទុយនីស៊ី មាន​សិទ្ធិ​សេរីភាព​ច្រើន​ជាង​កន្លែង​ផ្សេងៗ​ទៀត​នៅ​ក្នុង​តំបន់​អារ៉ាប់​និង​តំបន់​មជ្ឈិម​បូព៌ា​ទាំងមូល។ ពួកគេ​មាន​សិទ្ធិ​បោះឆ្នោត ​ពួកគេ​ត្រូវ​បាន​អនុញ្ញាត​ឲ្យ​មាន​រថយន្ត​ដែល​មិន​ដូច​ស្ត្រី​នៅប្រទេស​អារ៉ាប៊ីសាអូឌី​ទេ។ ពួកគេ​មាន​សិទ្ធិនៅ​ក្នុង​រដ្ឋសភា​ដែល​មាន​សមាសភាព​ស្ត្រី​ជាង​២៥​ភាគរយ​នៅ​ក្នុងសភា​ជាន់​ទាប»។

ឥឡូវ​នេះ ស្រ្តី​ទុយនីស៊ី ​កំពុង​ស្វែងរក​ឱកាស​របស់​ខ្លួន​នៅ​ក្នុង​ទិដ្ឋភាព​ថ្មី​ក្រោយ​របប​បិន​អា​លី។ អ្នក​ខ្លះ​ព្រួយ​បារម្ភ​ពី​ការងើប​ឡើង​វិញ​នៃ​គណបក្ស​អ៊ីស្លាម​អេ​ណា​ដា (Ennadha Islamist party) ដែល​ធ្លាប់​ត្រូវ​បាន​ហាម​ឃាត់។

លោក រ៉ាឆីត ហ្គានូជី (Rachid Ghanouchi) ប្រធាន​គណបក្ស​នេះ​បាន​អះអាង​ថា លោក​គ្មាន​ចេតនាក្នុង​ការដាក់​បង្ខំ​ជំនឿ​ផ្ទាល់​ខ្លួនគាត់​ទៅ​លើជន​ជាតិ​ទុយនីស៊ី​ទេ។​ ប៉ុន្តែ ស្ត្រី​ទាំងឡាយ មាន​ដូចជា លោកស្រី ​ហ្វាតែន អាប់ដេលខេហ្វី (Faten Abdelkefi) ដែល​ជា​មាតា​ម្នាក់​មាន​អាយុ​៣៣​ឆ្នាំ និង​កូន​បី​នាក់ផង​ហើយ​ក៏​ជា​អ្នកចូលរួម​ដ៏សំខាន់​ក្នុង​ការក្រោក​ឡើង​ប្រឆាំងនៅ​តាម​ទំព័រ​ Facebook ដែល​បាន​បណ្តេញលោក​បិនអាលី​ឲ្យ​ចេញ​ពី​អំណាច​បាន​ចេញ​មុខ​ប្រើ​កម្លាំង​ដោយ​ធ្វើ​បាតុកម្ម​ប្រឆាំង​នឹង​ការវិល​ត្រឡប់របស់​លោក​កាល​ពី​ចុង​ខែ​មុន​នេះ។

លោកស្រីអាប់ដេលខេហ្វី ​ថ្លែង​ថា​ស្រ្តី​ទុយនីស៊ី ​មាន​ការព្រួយ​បារម្ភ​ថា​ពួកគេ​អាច​បាត់​បង់​សិទ្ធិ​ដែល​ពួកគេ​បានទទួល​ប្រសិនបើ​គណបក្ស​អេណាដា​ក្លាយ​ទៅ​ជា​កម្លាំង​នយោបាយ​ដ៏​សំខាន់មួយ​នោះ។

ប៉ុន្តែ អ្នកផ្សេងៗ​ទៀត​ដូចជា​លោកស្រី ​ណេហ្គីដា ​កត់សម្គាល់​ថា​ការគាំទ្រ​សិទ្ធិរបស់​ស្រ្តី​ក៏​ត្រូវ​បានប្រើ​ធ្វើ​ជាលេស​មួយ​ដើម្បី​ផ្តល់​ភាពស្រប​ច្បាប់ដល់​របប​មិន​ដឹក​នាំ​តាម​សាសនា​ជាប់​លាប់​និង​គ្មាន​លទ្ធិ​ប្រជា​ធិបតេយ្យ​របស់​លោក​បិន​អាលី​ផងដែរ។

«តាម​ទស្សនៈ​មួយ​ឬ​ផ្សេងៗ​ទៀត ការធ្វើ​បែប​នេះ​បាន​ជួយ​លោក​បិន​អាលី។ ឧទាហរណ៍ ដោយសារ​តែ​លោក​បានប្រយុទ្ធ​ប្រឆាំងនឹង​ពួកជនអ៊ីស្លាម​តាម​រយៈ​ការឱ្យ​ដោះ​ស្បៃបិទ​មុខចេញ​ពី​ស្ត្រី»។

ដោយ​ការបោះឆ្នោត​ត្រូវ​បាន​រំពឹង​ថា​នឹង​ធ្វើ​ឡើង​ក្នុង​រយៈ​ពេល​៦​ខែ​ទៀត​ឥឡូវនេះ ​ស្រ្តី​ទាំងឡាយ​ កំពុង​ពិចារណា​ថា​តើ​ពួកគេ​នឹង​មាន​តួនាទី​ណា​មួយ​នៅ​ក្នុង​ដំណើរការ​បោះឆ្នោត​នេះ។

លោកស្រី​អាប់ដេលខេហ្វី ​អ្នកសរសេរ​ប្លុក ឬ​គេហទំព័រ​ផ្ទាល់ខ្លួន​មាន​ប្រសាសន៍​ថាស្រ្តី​ទាំងឡាយ មាន​ការព្រួយ​បារម្ភយ៉ាងខ្លាំង​អំពី​ការវិល​ត្រឡប់​របស់​ពួកជនអ៊ីស្លាម ពួកគេបាន​ផ្តោត​ការយក​ចិត្ត​ទុក​ដាក់តិចតួចណាស់​ទៅ​លើ​ឱកាសរបស់ស្ត្រី​ នៅ​ក្នុងរដ្ឋាភិបាលបណ្តោះ​អាសន្ននា​ពេល​បច្ចុប្បន្ន​នេះ ដែល​មាន​ស្ត្រីកាន់​តំណែង​ជារដ្ឋមន្ត្រី​ពីររូប​ក្នុង​ចំណោម​រដ្ឋ​មន្ត្រី​២៣រូប។ គ្មាន​តំណែង​អភិបាល​ណា​មួយ​ក្នុង​ចំណោមតំណែង​អភិបាល​ទាំង​២៤ ជា​ស្ត្រី​ទេ។

លោកស្រីអាប់ដេលខេហ្វី បាន​ស្នើ​ឡើង​ថា ក្រុម​ដ៏​យូរ​អង្វែង​មួយ ឈ្មោះ សមាគមស្ត្រី​ប្រជា​ធិបតេយ្យ​ទុយនីស៊ី​ (Tunisian Association of Democratic Women)​ អាចត្រូវ​កែ​ប្រែ​ទៅ​ជា​គណបក្ស​នយោបាយ​មួយ​វិញ។

លោកស្រី ​អាប់ដេលខេហ្វី ​ក៏​កំពុង​សម្លឹង​មើល​ទៅ​លើ​ស្ត្រី​ នៅ​តាម​បណ្តា​ប្រទេស​អារ៉ាប់​ដទៃ​ទៀត ​ដែល​ឥឡូវ​នេះ​បាន​ចូល​ប្រឡូកក្នុង​ការតវ៉ា​ប្រឆាំង​រដ្ឋាភិបាល​របស់​ខ្លួន។​ លោក​ស្រី​បាន​ឲ្យ​ដឹង​ថា លោកស្រី​បាន​អប​អរ​សាទរ​ដល់​សមភាគីរបស់​លោក​ស្រី ​នៅ​អេហ្ស៊ីប​ដែល​បាន​ជួយ​បណ្តេញ​លោក​ប្រធានាធិបតី​ដ៏​យូរ​លង់ ហូស្នី មូបារ៉ាក់ (Hosni Mubarak) ឲ្យ​ចេញ​ពី​មុខ​តំណែង​កាល​ពី​ថ្ងៃសុក្រ​កន្លងមក​នេះ៕

ប្រែសម្រួលដោយ​លី សុខឃាង

XS
SM
MD
LG