ប្រទេសទុយនេស៊ីនៃទ្វីបអាហ្រ្វិកខាងជើងស្ថិតនៅក្នុងស្ថានភាពនាំមុខគេក្នុងការបះបោររបស់ប្រជាពលរដ្ឋប្រឆាំងទៅនឹងរដ្ឋាភិបាលដែលបានរាលដាលនៅទូទាំងពិភពអារ៉ាប់។ ឥឡូវនេះទុយនេស៊ីកំពុងតែឈានចូលទៅក្នុងដំណាក់កាលថ្មី ខណៈពេលដែលប្រទេសនេះស្វែងរកការកសាងលទ្ធិប្រជាធិបតេយ្យពីចំណុចសូន្យ។
សមាគមយុវជន ក្រុងហ្សាហ្សីស ពោរពេញទៅដោយមនុស្សជាច្រើន។ ប្រជាពលរដ្ឋនៅក្នុងមូលដ្ឋានកំពុងធ្វើនំសាន់វិចនិងសាឡាត់សម្រាប់ភ្ញៀវរបស់ពួកគេដែលជាកម្មករជនជាតិអេហ្ស៊ីបរាប់រយនាក់ដែលបានរត់ភៀសខ្លួនចេញពីអំពើហិង្សានៅក្នុងប្រទេសលីប៊ីហើយឆ្លងកាត់ចូលមកក្នុងព្រំដែននៃប្រទេសទុយនេស៊ីដែលស្ថិតនៅចម្ងាយប្រមាណ៦៥គីឡូម៉ែត្រ។
តើពួកគេបានមកដល់ទីនេះដោយរបៀបណាគឺជាឧទាហរណ៍មួយនៃប្រជាធិបតេយ្យពីថ្នាក់មូលដ្ឋាន ដែលបានចាក់ឫសសន្សឹមៗនៅក្នុងប្រទេសនេះមួយខែបន្ទាប់ពីក្រុមអ្នកតវ៉ាប្រឆាំងនឹងរដ្ឋាភិបាល បានបង្ខំអតីតប្រធានាធិបតីហ្សីន អាល់អាប៊ីឌីន បេនអាលី (Zine al-Abidine Ben Ali) ឲ្យចាកចេញពីអំណាច។ លោក ម៉ូហាមេដ ចេលូអាលី (Mohamed Jelouali) ដែលជាគ្រូបង្រៀននៅក្នុងទីក្រុង ហ្សាហ្សីស ពន្យល់អំពីរបៀបដែលប្រជាពលរដ្ឋក្នុងទីក្រុង គឺមិនមែនរដ្ឋាភិបាលចាំផ្ទះទេបានធ្វើការរៀបចំក្នុងការដឹកជញ្ជូនជនជាតិអេហ្ស៊ីបមកកាន់ទីនេះដើម្បីទទួលបានម្ហូបអាហារនិងជម្រកស្នាក់នៅ។
លោក ចេលូអាលី និយាយថា រដ្ឋាភិបាលទុយនេស៊ីមិនមានសកម្មភាពអ្វីទាំងអស់នៅក្នុងកិច្ចខិតខំប្រឹងប្រែងក្នុងការជួយជនជាតិអេហ្ស៊ីប។ តាមការពិត រដ្ឋាភិបាលគឺមិនមានសកម្មភាពអ្វីទាំងអស់ នៅក្នុងទីក្រុងនេះទាំងមូល។
ដូចនៅកន្លែងផ្សេងទៀតនៅក្នុងប្រទេសដែរ ទីក្រុង ហ្សាហ្សីស គឺពោរពេញទៅដោយការតវ៉ាប្រឆាំងទៅនឹងរដ្ឋាភិបាលនៅក្នុងខែមករា។ បន្ទាប់ពីលោក បេនអាលី បានរត់ភៀសខ្លួន ប្រជាពលរដ្ឋនៅទីនេះ បានធ្វើការបោះឆ្នោតជ្រើសរើសគណៈកម្មការប្រជាពលរដ្ឋមួយដែលមានសមាជិក៣០រូប ដើម្បីតំណាងឲ្យពួកគេ។ លោក ចេលូអាលី គឺជាសមាជិកម្នាក់នៃគណៈកម្មការនេះ។
លោកនិយាយថា គណៈកម្មការព្យាយាមដោះស្រាយបញ្ហាប្រចាំថ្ងៃនៅក្នុងទីក្រុង។ រដ្ឋនៅតែបើកប្រាក់បៀវត្សរ៍ឲ្យមន្រ្តីស៊ីវិល ប៉ុន្តែប្រជាពលរដ្ឋបានបណ្តេញអាជ្ញាធរមូលដ្ឋានទាំងអស់ចេញពីការងារ លើកលែងតែអភិបាលក្រុង។
ប្រជាពលរដ្ឋលោក អាលី ដារ៉ាក បានផ្តល់ការវាយតម្លៃល្អមួយដល់គណៈកម្មការប្រជាពលរដ្ឋ។
ដារ៉ាក និយាយថា ប្រជាពលរដ្ឋក្នុងទីក្រុងគិតថា គណៈកម្មការបានធ្វើកិច្ចការល្អ ក្នុងការគ្រប់គ្រងស្ថានភាពនៅក្នុងទីក្រុង ហ្សាហ្សីស។
ទីក្រុងហ្សាហ្សីសថែមទាំងមានការរៀបចំបណ្តាញសារព័ត៌មានផ្ទាល់ខ្លួនដូចជាទូរទស្សន៍ហ្សាហ្សីសផ្សាយតាមអ៊ីនថឺណិត។ លោក វ៉ាលីដ ហ្វែលឡោះ (Walid Fellah) ដែលមានអាយុ27ឆ្នាំគឺសមាជិកស្ថាបនិកមួយរូបនៃបណ្តាញសារព័ត៌មាននេះ។
លោក ហ្វែលឡោះ និយាយថា សមាជិកទាំងឡាយរបស់ទូរទស្សន៍ហ្សាហ្សីសបានចូលរួមនៅក្នុងការតវ៉ាប្រឆាំងនឹងរដ្ឋាភិបាលនៅក្នុងទីក្រុងហ្សាហ្សីស ប៉ុន្តែពួកគេក៏បានថតវីដេអូក្រុមអ្នកតវ៉ាទាំងនេះដែរ ហើយក្រុមប៉ូលីសបានធ្វើការវាយបង្រ្កាប។ ពួកគេបានបោះពុម្ពផ្សាយនូវរឿងរ៉ាវគ្រប់បែបយ៉ាងនៅក្នុងគេហទំព័រហ្វេសបុគ (Facebook) របស់ខ្លួន។ ឥឡូវនេះ ពួកគេកំពុងបោះពុម្ពផ្សាយព័ត៌មានក្នុងទីក្រុងដែលរួមទាំងព័ត៌មានដែលទាក់ទងនឹងក្រុមប្រជាពលរដ្ឋរាប់រយនាក់ដែលបានរត់ភៀសខ្លួនចេញពីប្រទេសទុយនេស៊ីទៅកាន់ទ្វីបអឺរ៉ុប។
លោក ហ្វែលឡោះ និយាយថា លោកជឿជាក់ថា ការផ្លាស់ប្តូរនយោបាយនៅក្នុងប្រទេសទុយនេស៊ី នឹងមកដល់ថ្នាក់មូលដ្ឋាន។ ទីក្រុងហ្សាហ្សីសកំពុងព្យាយាមកសាងរចនាសម្ព័ន្ធប្រជាធិបតេយ្យរបស់ខ្លួនដោយខ្លួនឯង។ លោក ហ្វែលឡោះ និយាយថា ប្រសិនបើតំបន់ផ្សេងៗទៀតធ្វើដូចគ្នា លទ្ធិប្រជាធិបតេយ្យនឹងចាក់ឫសនៅក្នុងប្រទេសទុយនេស៊ី៕
