ប្រធានាធិបតីសហរដ្ឋអាមេរិកលោក Donald Trumpបានប្រកាសកាលពីថ្ងៃពុធម្សិល
មិញថាលោកនិងមេដឹកនាំរុស្ស៊ីបានព្រមព្រៀងគ្នានៅក្នុងសន្ទនាតាមទូរសព្ទដើម្បីចាប់ផ្តើមការចរចា«ភ្លាមៗ»ជាមួយមេដឹកនាំអ៊ុយក្រែនដើម្បីបញ្ចប់សង្គ្រាមដែលមានរយៈពេលជិត៣ឆ្នាំនេះ។
លោកប្រធានាធិបតី Trumpបាននិយាយនៅលើបណ្តាញសង្គម Truth Social របស់លោកថា«យើង នឹងចាប់ផ្តើមដោយទូរសព្ទលោកប្រធានាធិបតី Zelenskyy នៃប្រទេសអ៊ុយក្រែនដើម្បីជូនដំណឹងលោកពីការសន្ទនានេះ ជាអ្វីដែលខ្ញុំនឹងត្រូវធ្វើនៅពេលឥឡូវនេះ។ ខ្ញុំបានសុំឱ្យលោករដ្ឋមន្ត្រីការបរទេស Marco Rubio លោក John Ratcliffe នាយកទីភ្នាក់ងារកណ្តាលស៊ើបការណ៍សម្ងាត់ CIA លោក Michael Waltz ទីប្រឹក្សាសន្តិសុខជាតិនិងលោក Steve Witkoff ជាឯកអគ្គរដ្ឋទូតនិងបេសកជនពិសេសដើម្បីដឹកនាំការចរចាដែលខ្ញុំមានអារម្មណ៍យ៉ាងខ្លាំងថានឹងទទួលបានជោគជ័យ»។
លោកប្រធានាធិបតី Trump មិនបាននិយាយជាក់លាក់អំពីលក្ខខណ្ឌអ្វីប្រហែលបញ្ចប់ជម្លោះរវាងរុស្ស៊ីនិងអ៊ុយក្រែន។ ក៏ប៉ុន្តែ រដ្ឋមន្ត្រីការពារជាតិលោក Pete Hegseth ដែលស្ថិតនៅក្នុងប្រទេសអាល្លឺម៉ង់កាលពីថ្ងៃពុធម្សិលមិញដើម្បីចូលរួមក្រុមទំនាក់ទំនងការពារប្រទេសជាមួយអ៊ុយក្រែនបានច្រានចោលការទាមទារសំខាន់ៗដោយប្រទេសអ៊ុយក្រែនអំពីសមាជិកភាពនៅក្នុងអង្គការអូតង់។
លោក Hegseth បាននិយាយទៀតថា«សហរដ្ឋអាមេរិកមិនជឿថាសមាជិកភាពអង្គការអូតង់សម្រាប់អ៊ុយក្រែនគឺលទ្ធផលប្រាកដប្រជានៃដំណោះស្រាយដោយការចរចា»។
អ្នកចរចាកំពូលសម្រាប់ការដោះលែងចំណាប់ខ្មាំងរបស់លោក Trump កាលពីថ្ងៃពុធម្សិលមិញបានទទួលការសរសើរអំពីមិត្តភាពដ៏អស្ចារ្យរបស់លោក Trump ជាមួយមេដឹកនាំរុស្ស៊ីនិងព្រះអង្គម្ចាស់នៃប្រទេសអារ៉ាប៊ី សាអូឌីតថាជាគន្លឹះមួយនៅក្នុងការដោះលែងលោក Marc Fogel គ្រូបង្រៀនអាមេរិកាំងចេញពីការឃុំឃាំងរបស់រុស្ស៊ីកាលពីយប់ថ្ងៃអង្គារ។
លោកប្រធានាធិបតី Trump បានស្វាគមន៍លោក Fogel នៅសេតវិមានកាលពីយប់ថ្ងៃអង្គារ។ លោក Fogel ត្រូវបានឃុំខ្លួនចាប់តាំងពីខែសីហា ឆ្នាំ២០២១មកចំពោះការយកកញ្ឆាសម្រាប់ធ្វើឱសថចូលក្នុងប្រទេសរុស្ស៊ី៕
វេទិកាបញ្ចេញមតិ