សមាជិកសភាសហរដ្ឋអាមេរិកខាងគណបក្សប្រជាធិបតេយ្យកំពុងធ្វើការស៊ើបអង្កេតលើករណីដែលលោកប្រធានាធិបតី Donald Trump បញ្ឈប់អគ្គអធិការកិច្ចនៃក្រសួងការបរទេសពីតំណែង។
លោក Trump បានបញ្ឈប់លោកអគ្គអធិការកិច្ច Steve Linick កាលពីល្ងាចថ្ងៃសុក្រ។ លោក Trump បានបញ្ឈប់តំណែងមនុស្ស ៣ នាក់រួចមកហើយ តាំងពីព្រឹទ្ធសភាបានសម្រេចកាលពីខែកុម្ភៈមកថាលោកគ្មានទោសពាក់ព័ន្ធនឹងការចោទប្រកាន់រឿងដកលោកពីតំណែងជាប្រធានាធិបតី និងតាំងពីពេលដែលលោកបានរិះគន់គេឯងមក។
លោក Linick ត្រូវបានគេរាយការណ៍ថាបានបើកការស៊ើបអង្កេតលើលោករដ្ឋមន្ត្រីការបរទេស Mike Pompeo។
សមាជិកព្រឹទ្ធសភាលោក Bob Menendez និងសមាជិករដ្ឋសភាលោក Eliot Engel បានបញ្ជាក់កាលពីថ្ងៃសៅរ៍ក្នុងលិខិតរួមគ្នាមួយផ្ញើទៅកាន់សេតវិមានថា៖ «សេចក្ដីរាយការណ៍នានាបានបង្ហាញថា លោករដ្ឋមន្ត្រី Mike Pompeo បានស្នើដោយផ្ទាល់ឲ្យមានការបញ្ឈប់លោក Linick ពីតំណែង ហើយពួកយើងយល់ថា លោក Pompeo ធ្វើដូច្នេះ ដោយសារតែលោកអគ្គអធិការកិច្ច Linick បានបើកការស៊ើបអង្កេតលើកំហុសផ្ទាល់ខ្លួនរបស់លោក Pompeo»។
លោក Menendez ដែលជាសមាជិកជាន់ខ្ពស់បំផុតនៃគណៈកម្មាធិការទំនាក់ទំនងបរទេសនៃព្រឹទ្ធសភា និងលោក Engle ដែលជាប្រធានគណៈកម្មាធិការកិច្ចការបរទេសនៃរដ្ឋសភា បានបន្ថែមដូច្នេះថា៖ «ទង្វើបែបនេះ... អាចជាទង្វើសងសឹកដោយខុសច្បាប់»។
សមាជិកសភាទាំងពីរបានស្នើសេតវិមានឲ្យប្រគល់ឯកសារពាក់ព័ន្ធនឹងការបញ្ឈប់លោក Linick ពីតំណែង ជូនដល់គណៈកម្មាធិការរបស់ពួកគេ។
លោក Linick ត្រូវបានតែងតាំងជាអគ្គអធិការកិច្ចនៃក្រសួងការបរទេស ដោយលោកអតីតប្រធានាធិបតី Barack Obama៕
