នៅក្នុងសេចក្តីប្រកាសដែលនាំឱ្យមានការភ្ញាក់ផ្អើលមួយកាលពីថ្ងៃព្រហស្បតិ៍ សេតវិមានបាននិយាយថាលោកប្រធានាធិបតី Donald Trump នឹងអញ្ជើញទៅបំពេញទស្សនកិច្ចទីមួយក្នុងប្រទេសអារ៉ាប៊ីសាអូឌីតដែលនៅទីនោះលោកនឹងជួបជាមួយពួកមេដឹកនាំនៃប្រទេសជាតិកាន់សាសនាឥស្លាមច្រើននាក់ដើម្បីពិភាក្សាគ្នាអំពីយុទ្ធនាការសម្របសម្រួលគ្នាមួយខាងមនោគមវិជ្ជាប្រឆាំងនឹងពួកអ្នកកាន់សាសនាឥស្លាមជ្រុលនិយម។ ការធ្វើដំណើរនេះគ្រោងនឹងប្រព្រឹត្តទៅនៅចុងខែឧសភា។
ផ្នែកផ្សេងទៀតនៃដំណើរទស្សនកិច្ចនេះក៏ទស្សនកិច្ចផ្នែកសាសនាផងដែរ ដោយលោកនឹងអញ្ជើញទៅដែនដីពិសិដ្ឋដើម្បីខិតខំព្យាយាមធ្វើឱ្យមានឡើងវិញនូវដំណើរការស្វែងរកសន្តិភាពឱ្យភូមិភាគមជ្ឈឹមបូព៌ា និងការជួបជាមួយសម្តេចប៉ាបនៅឯវិមានវ៉ាទីកង់ផងដែរ។
លោក Trump បាននិយាយប្រាប់ការប្រមូលផ្តុំគ្នាមួយនៅក្នុងទិវាជាតិនៃការបួងសួងដែលភាសាអង់គ្លេសហៅថា National Day of Prayer នៅក្នុងសួនផ្កាកុលាបសេតវិមានកាលពីថ្ងៃព្រហស្បតិ៍ថា ការធ្វើដំណើររបស់លោកទៅប្រទេសក្រៅក្នុងឋានៈជាប្រធានាធិបតី «នឹងចាប់ផ្តើមជាមួយការប្រជុំជាប្រវត្តិសាស្ត្រពិតប្រាកដមួយនៅក្នុងប្រទេសអារ៉ាប់សាអូឌីតជាមួយពួកមេដឹកនាំមកពីទូទាំងពិភពអ្នកគោរពសាសនាឥស្លាម»។
លោកប្រធានាធិបតីបាននិយាយថា ហេតុផលនៃការទៅទីនោះជាដំបូងពីព្រោះប្រទេសអារ៉ាប៊ីសាអូឌីតជា «អ្នកថែទាំកន្លែងពិសិដ្ឋបំផុតពីរនៃសាសនាឥស្លាម ហើយគឺនៅទីនោះហើយដែលយើងនឹងចាប់ផ្តើមកសាងគ្រឹះថ្មីមួយនៃកិច្ចសហប្រតិបត្តិការ និងការគាំទ្រជាមួយពួកសម្ព័ន្ធមិត្តកាន់សាសនាឥស្លាមរបស់យើងដើម្បីប្រយុទ្ធប្រឆាំងនឹងភាពជ្រុលនិយម ភេរវកម្ម និងអំពើហិង្សានិង
ឱបក្រសោបអនាគតមួយមានយុត្តិធម៌ និងសេចក្តីសង្ឃឹមច្រើនជាងមុនសម្រាប់ពួកអ្នកកាន់សាសនាឥស្លាមវ័យក្មេងនៅក្នុងប្រទេសរបស់ពួកគេ៕
