អតីតប្រធានាធិបតីអាមេរិក លោក Donald Trump បានធ្វើដំណើរទៅដល់តុលាការអាមេរិក Wilkie D. Ferguson Jr. ក្នុងទីក្រុង Miami រដ្ឋ Florida នៅម៉ោងប្រមាណ២ រសៀលកាលពីថ្ងៃអង្គារនេះ។
នេះជាការឡើងសវនាការលើកទីពីររបស់លោក Trump ចាប់តាំងពីខែមេសា នៅពេលលោកបានអះអាងថា មិនមានកំហុសចំពោះការចោទប្រកាន់នៅក្នុងទីក្រុង New York ទាក់ទងនឹងការបង់ប្រាក់បំបិទមាត់ដល់តារារឿងអាសអាភាស។
លោក Trump គឺជាអតីតប្រធានាធិបតីដំបូងគេដែលប្រឈមមុខនឹង ការចោទប្រកាន់ពីបទឧក្រិដ្ឋ ប៉ុន្តែគេមើលឃើញថា វាមិនបានប៉ះពាល់ជាអវិជ្ជមានដល់ក្តីសង្ឃឹមត្រឡប់ទៅកាន់សេតវិមានរបស់លោកនោះទេ។
យោងតាមការស្ទង់មតិរបស់ Reuters/Ipsos លោក Trump នាំមុខគូប្រជែងសម្រាប់ការតែងតាំងជាបេក្ខជនប្រធានាធិតីរបស់គណបក្សសាធារណរដ្ឋសម្រាប់ការបោះឆ្នោតឆ្នាំ២០២៤។ ហើយ ៨១% នៃអ្នកបោះឆ្នោតមកពីគណបក្សសាធារណរដ្ឋ ចាត់ទុកការចោទប្រកាន់ប្រឆាំង លោក Trump ថាជា ចេតនានយោបាយ។
គេរំពឹងថា លោក Trump នឹងឆ្លើយថា លោកមិនបានធ្វើអ្វីខុស ហើយថាបទចោទប្រកាន់ព្រហ្មទណ្ឌទំាង ៣៧ករណីនេះ ជាចេតនានយោបាយធ្វើឱ្យខូចដល់កិច្ចខិតខំប្រឹងប្រែងបោះឆ្នោតឡើងវិញរបស់លោក។
បន្ទាប់ពីចូលបំភ្លឺនៅតុលាការនៅម៉ោង ៣ រសៀល លោក Trump គ្រោងនឹងហោះត្រឡប់ទៅទីលានវាយកូនហ្គោលនៅរដ្ឋ New Jersey ជាកន្លែងដែលលោកគ្រោងឡើងថ្លែងសុន្ទរកថា នៅពេលល្ងាច ថ្ងៃអង្គារ នេះ៕
