ភ្ជាប់​ទៅ​គេហទំព័រ​ទាក់ទង

ជម្លោះ​នៅ​ប្រទេស​កូដ​ឌីវ័រ ​នៅ​តែ​គ្មាន​ច្រកចេញ

  • Scott Stearns

ទាហាន​អង្គការ​សហប្រជាជាតិ​ម្នាក់​ដើរ​នៅ​ក្នុង​បរិវេណ​របស់​សណ្ឋាគារ​ Golf Hotel ជា​កន្លែង​ដែល​​មេ​ដឹកនាំ​ប្រឆាំង​លោក​ Alassane Ouattara បាន​ជួប​ជាមួយ​មេដឹកនាំ​អាហ្វ្រិក​ក្នុង​ក្រុង Abidjan កាល​ពី​ថ្ងៃ​ទី​៣​ខែ​មករា​ឆ្នាំ​២០១១។

ការ​បោះឆ្នោត​ដែល​មាន​ជម្លោះ​ក្នុង​ប្រទេស​កូដឌីវ័រ ​(Cote d’Ivoire ) ​បាន​ធ្វើឲ្យ​មាន​ប្រធានាធិបតី​ប្រជែង​ពីរ​នាក់​ដែល​ដឹកនាំ​រដ្ឋាភិ​បាល​ប្រកួត​ប្រជែង​គ្នា។​ ​ក៏ប៉ុន្តែ​មាន​មេ​ដឹកនាំ​តែមួយ​គត់​នៃ​មេ​ដឹកនាំ​ទាំងពីរ​នោះ​ បាន​កាន់​កាប់​វិមាន​ប្រធានាធិបតី។ មេ​ដឹកនាំ​ម្នាក់​ទៀត​ស្ថិតនៅ​សណ្ឋាគារ​កន្លែង​កំសាន្ត​ដែល​ត្រូវបាន​ការពារ​ដោយ​កងថែ​រក្សា​សន្តិភាព​អង្គការ​សហ​ប្រជាជាតិ។ មេដឹកនាំ​ពិភព​លោក​ស្ទើរតែ​ទាំងអស់​ឥឡូវនេះ​ទទួល​ស្គាល់​ថា​ សណ្ឋាគារ​នេះ​ជា​ទីកន្លែង​កាន់​អំណាច​របស់ប្រទេស។

ដោយ​មាន​កងទ័ព​រដ្ឋាភិ​បាល​ព័ទ្ធ​ជុំវិញ​សណ្ឋាគារ​ Golf​ ​មធ្យោបាយ​តែ​មួយគត់ ​ដែល​ជន​ស៊ីវិល​ចេញចូល​បាន​គឺ​តាម​ឧទ្ធម្ភាគ​ចក្រ។

អ្នក​បើក​យន្តហោះ​ជាតិ​អ៊ុយក្រែន​ ដែល​បើក​យន្តហោះរយៈពេល​៥​នាទី​បាន​ដឹក​ជញ្ជូន​កាសែត​និង​របស់​ផ្ញើតាម​ប៉ុស្តិ៍​ប្រចាំ​ថ្ងៃ​ ​ទឹក​ដោះគោ​ប្រអប់​ ​ទឹកផឹក ​ទឹកខ្មៅ​សម្រាប់​ម៉ាស៊ីន​ថត​ចម្លង​ ​ហើយ​នឹង​ពួក​បុរស​និង​ស្រ្តី​ដែល​សម្អាតសណ្ឋាគារ​និង​បូម​ទឹក​សំអុយ។

ឧទ្ធម្ភាគ​ចក្រ​ធ្វើ​នៅ​ប្រទេស​រុស្ស៊ី ​ហោះ​ក្រឡឹង​បឹងទឹក​ប្រៃ​ក្បែរ​មាត់​សមុទ្រ​ដ៏​សំខាន់មួយ​របស់​ទីក្រុង​អាប៊ីចាន​ (Abidjan)​ ដើម្បី​ចុះចត​នៅ​ចំណត​បណ្តោះ​អាសន្ន​នៅ​ទីធ្លា​ខាង​ក្រោយ​សណ្ឋាគារ។

នេះ​ជា​មជ្ឈ​មណ្ឌល​រដ្ឋាភិ​បាល​របស់​លោក​ Alassane Ouattara ​ដែល​គណៈ​កម្មការ​រៀបចំ​ការ​បោះឆ្នោត​របស់​ប្រទេស​កូដ​ឌីវ័រ​ហើយនិង​សហគមន៍​អន្តរ​ជាតិ​ភាគច្រើន​ បាន​ទទួល​ស្គាល់​ថា​ជា​ប្រធានាធិបតី​ជាប់​ឆ្នោត​ត្រឹមត្រូវ​តាម​ច្បាប់។​ ក៏ប៉ុន្តែមេ​ដឹកនាំ​កំពុង​កាន់​អំណាច​ឡូរ៉ង់​បាបបូ ​(Laurent Gbagbo)​ មិន​បោះបង់​អំណាច​ទេ ​ ​ពីព្រោះ​សម្ព័ន្ធ​មិត្រ​របស់​លោក​នៅ​ក្រុម​ប្រឹក្សា​រដ្ឋ​ធម្មនុញ្ញ​មាន​សន្លឹក​ឆ្នោត​ល្មម​គ្រប់គ្រាន់​ដើម្បី​ធ្វើ​ឲ្យ​លោក​នាំមុខ​លោក​វ៉ាតា​រ៉ា។

បញ្ហានេះ បាននាំឲ្យមានភាពទាល់ច្រករវាងរដ្ឋាភិបាលប្រកួតប្រជែងរបស់​គណៈ​រដ្ឋមន្រ្តី​លោក​ Gbagbo​ ដែល​មាន​ក្រសួង​នៅក្នុង​ទីក្រុង​ហើយ​និង​គណៈ​រដ្ឋមន្រ្តី​របស់​លោក ​Outtara ​ដែល​ជាប់​នៅ​ក្នុង​សណ្ឋាគារ​ Golf។

អ្នក​សារ​ព័ត៌មាន​របស់​លោក​វ៉ាតារ៉ា​ធ្វើ​ការងារ​នៅ​ការិយាល័យ​របស់​អ្នក​ចាត់​ការ​ទូទៅ។​ ​ពួក​អ្នក​គាំទ្រ​ខាង​នយោបាយ​លេង​បៀ​នៅ​កន្លែង​ទទួល​ភ្ញៀវ​ដែលស្ទើរ​តែ​គ្មាន​អ្វីទាំង​អស់​ ​ដែល​មាន​ម៉ាស៊ីន​បើក​លុយ​គ្មាន​ប្រាក់​នៅ​ក្នុង​នោះ​ ទីភ្នាក់ងារ​ធ្វើ​ដំណើរ​បាន​បិទ​ទ្វារ​ ​ហើយ​ពួក​អ្នក​បម្រើ​សសេរ​ចំនួន​ទឹកប្រាក់​នៅ​លើ​ក្រដាស​កត់​សំគាល់​លុយ​ជំពាក់​ ​ពីព្រោះ​ខ្វះ​ក្រដាស​ប្រាក់​តូចៗ​សម្រាប់​ប្រើ​ប្រាស់។

លោក ឃីត អេដវឺដ (Keith Edward ) ជាទីប្រឹក្សាច្បាប់របស់លោកវ៉ាតារា។

“ទោះបី​លោកអ្នក​ស្ថិត​នៅ​ក្នុង​ទីក្រុង​នោះ​ក៏ដោយ​ ​ក៏​លោកអ្នក​នៅ​មិនទាន់​ដឹង​ថា​ ​មាន​អ្វីកំពុង​កើតមាន​ឡើង​ដែរ​នៅ​ក្នុង​បរិយាកាស​ដែល​លោក​អ្នកមាន​ព័ត៌មាន​យ៉ាង​ច្រើន​តែ​ពិបាក​ផ្ទៀងផ្ទាត់​ថា​ តើ​ព័ត៌មាន​នោះ​ពិត​ឬ​មិនពិត​នោះ“។

លោក​អេដវឺដ ​(Edward )​បាន​ចុះ​ឈ្មោះ​ចូល​សម្រាក​ក្នុង​សណ្ឋាគារ​ Golf មុន​ពេល​បោះឆ្នោត​ខែវិច្ឆិកា​នៅ​ពេល​ដែល​មនុស្ស​ធ្វើដំណើរ​ដោយសេរី។​ លោក​និយាយ​ថា​ ​ការ​បិទ​ផ្លូវ​ចេញចូល​របស់​កងទ័ព ​ធ្វើឲ្យ​ក្រុម​គ្រួសារ​ដែល​ស្ថិតនៅ​តំបន់​ផ្សេង​គ្នា​ ​មាន​ការ​ពិបាក​ខ្លាំង​បំផុត​ក្នុង​ការ​ធ្វើ​ទំនាក់​ទំនង។

“មនុស្ស​ស្ទើរតែ​ទាំងអស់​នៅ​ទីនេះរស់នៅ​ក្នុង​ទីក្រុង។​ ដូច្នេះ​ពួកគេ​មាន​សមាជិក​ក្រុមគ្រួសារ​ កូនចៅ ​ប្តី ​ប្រពន្ធ​នៅ​ម្ខាង​ទៀត​នៃ​ស្ពាន​នេះ​ ​ហើយ​ ព្រះ​អើយ​មិនមាន​ទំនាក់​ទំនង​ផ្ទាល់​ខ្លួន​ទេ​ ​មិនតែ​ទំនាក់​ទំនង​ប្រព័ន្ធទូរស័ព្ទ​ចល័ត​ល្អ​នៅ​ក្នុង​ប្រទេស​នេះ​តែ​ប៉ុណ្ណោះ“។

លោក ​Alcide Djedje ​រដ្ឋមន្រ្តី​ក្រសួង​ការ​បរទេស​របស់​លោក​បាបបូ ​និយាយ​ថា​ សណ្ឋាគារ ​Golf​ មិនមែន​ជា​គុក​ទេ។

“លោក​ Djedje ​និយាយ​ថា​ ​ការ​បិទផ្លូវ​ចេញចូល​នេះ​មាន​បំណង​ការពារ​ជន​ជាតិ​កូដដឺវ័រ​និង​អ្នក​ការទូត​ដែល​រស់នៅ​ជិត​សណ្ឋាគារ​នេះ“។

លោក ​Allomo Koussi​ ជា​អ្នក​គាំទ្រ​លោក​វ៉ាតតារា​ មិន​បាន​ចាកចេញ​ពី​សណ្ឋាគារ​ជាង​មួយខែ​ហើយ​ ​ក៏ប៉ុន្តែ​ លោក​យល់​ស្រប​ថា​ ​សណ្ឋាគារ​នេះ​មិនមែន​ជា​គុក​ទេ។​ លោក​និយាយ​ទៀត​ថា​ អ្នក​ទោស​ក្នុង​ប្រទេស​កូដដឺវ័រ​គឺ​លោក​ឡូរ៉ង់បាប​បូ​ទៅ​វិញ​ទេ។

លោក​គូសស៊ី​ ​និយាយ​ថា​ ​មនុស្ស​ទាំងអស់​នៅក្នុង​សណ្ឋាគារ​នេះ​មាន​គោលដៅ​មួយ​គឺ​ថា​ ​លោក​បាបូ​ត្រូវ​ចាកចេញ​ពី​អំណាច។​ ចំពោះ​ការ​ទទួល​ទាន​ឬ​ក៏​មិន​ទទួល​ទាន​ ​លោក​គូសស៊ី ​និយាយ​ថា​ ពួកគេ​នឹង​ទទួល​ទាន​អាហារ​ឆ្ងាញ់​នៅ​ថ្ងៃ​ស្អែក។​ គោលដៅ​របស់​ពួកគេ​នៅ​ពេល​ឥឡូវ​នេះ​ គឺ​ត្រូវ​ដកចេញ​របាំង​ទាំងអស់។​ លោក​និយាយ​ទៀត​ថា ​ចំពោះ​ពួកគេ​ ឧបសគ្គ​របស់​ប្រទេស​កូដដឺវ័រ​គឺ​លោក​ឡូរ៉ង់បាបូ។

លោក​ Djeje ​និយាយ​ទៀត​ថា​ ​ លោក​បាបូ​នឹង​មាន​ការ​រីករាយ​លើក​ចោល​របាំង​ ​ប្រសិន​បើ​មិនមាន​កងទ័ព​ប្រដាប់​ទៅ​ដោយ​អាវុធ​ធុនធ្ងន់​ជាង​៣រយ​នាក់​ដែល​កំពុង​នៅ​ក្នុង​សណ្ឋាគារ​ទេ​នោះ។

លោក ​Djeje ​និយាយ​ថា​ ​យោធា​មិនអាច​អនុញ្ញាត​ឲ្យ​ពួក​ឧទ្ទាម​ទាំងនោះ​ធ្វើ​ចលនា​ដោយ​សេរី​ទេ​ ​ ពីព្រោះ​ពួកគេ​នៅ​ក្បែរ​គេហដ្ឋាន​របស់​លោក​បាបូ​ ពីព្រោះ​ពួកគេ​ជិះទូក​តែ​៥នាទី​នឹង​ទៅ​ដល់​គេហដ្ឋាន​លោក​បាបូ។

ពួក​ឧទ្ទាម​២នាក់​បាន​លេង​អុក​នៅ​លើ​រាន​ហាល​ផ្ទាល់​នឹងដី​ដែល​មាន​ពួក​ស្រីៗ​លក់​កាត​ទូរស័ព្ទ​ ​ដោយមាន​ការឡើង​ថ្លៃ​១០​ភាគរយ។​ ពួក​កង​ថែ​រក្សា​សន្តិភាព​ជាតិ​សេណេហ្គាល់ ​(Senegal)​ បោកគក់​សម្លៀក​បំពាក់​នៅ​ជិត​អាង​ហែលទឹក​ សម្លៀក​បំពាក់​របស់​ពួកគេ​ដាក់​ហាល​ត្រដាង​លើ​កៅអី​ទម្រត​ដែល​ព័ទ្ធ​ជុំវិញ​បារនីយ​ដ្ឋាន​ដែល​ឥឡូវនេះ​គ្មាន​មនុស្ស។​ មន្រ្តី​ប៉ាគីស្ថាន​ម្នាក់​ដឹកនាំ​ពួក​ទាហាន​និង​ជន​ស៊ីវិល​ក្នុង​ការ​សូត្រ​ធ៌ម​នៅ​ជិត​តង់​ស្នាក់នៅ​ដ៏​វែង​ព៌ណស​របស់​អង្គការ​សហ​ប្រជាជាតិ។

ពួកអ្នក​បោស​សម្អាត​ដែល​មិនបាន​ស្លៀក​សម្លៀក​បំពាក់​ឯក​សណ្ឋាន​សណ្ឋាគារ​ បាន​កាត់​ស្មៅ​វែងៗ​នៅ​ជុំវិញ​តង់​ស្នាក់​នៅ​ព៌ណ​ខ្លាឃ្លោក​របស់​កង​ថែ​រក្សា​សន្តិភាព។​ ​រថពាស​ដែក​បាន​ខ្ទប់​ផ្លូវ​ចូលទ្វារ​មុខ។​ មាន​កាំភ្លើង​យន្តនៅលើ​បាវ​ខ្សាច់​ដាក់​នៅ​តម្រៀប​នៅ​មាត់​ជណ្តើរ។​ មាន​លួស​បន្លា​ព័ទ្ធ​ជុំវិញ​វាលភក់​នៅ​មាត់​បឹងទឹក​ប្រៃ​ក្បែរ​មាត់​សមុទ្រ។

ពួក​អ្នក​គាំទ្រ​លោក​បាបូ​និយាយ​ចម្អក​ដល់​សណ្ឋាគារ​ដែល​លោក​វ៉ាតារា​ស្នាក់នៅ​ថា​ ​ជា ​La Republique de Golf​ ដែល​មានន័យ​ថា​ ឥទ្ធិពល​របស់​លោក​មាន​នៅតែ​កន្លែង​ដែល​ពួក​ទាហាន​ព័ទ្ធ​ប៉ុណ្ណោះ។

ក៏ប៉ុន្តែ​ ​លោក​អេដ​វឺដ​ ​ទីប្រឹក្សា​ច្បាប់​ និយាយ​ថា​ ​ភាគី​ទាំងពីរ​ដែល​មាន​ការ​បែកបាក់​ខាង​នយោបាយ​ក្នុង​រដ្ឋធានី​អាប៊ីចាន​ មាន​ច្រើន​ជាង​មនុស្ស​ភាគច្រើន​បាន​គិត។

“ការ​ទាក់ទង​គ្នា​មិន​បាន​ល្អ​ជា​កត្តា​ដ៏​សំខាន់​មួយ ហើយ​ការប្រាស្រ័យ​ទាក់ទង​មិន​បាន​ល្អ​នេះ​ហើយ​ដែល​មាន​ឥទ្ធិពល​លើ​ឥរិយាបទ​របស់​មនុស្ស​នៃ​ភាគី​ទាំងពីរ។​ ខ្ញុំ​បាន​ឃើញ​ស្រ្តី​ជាច្រើន​ស្រែក​យំ​ ​ពីព្រោះ​ពួក​គាត់​គិត​ថា​ ​កូន​របស់​គាត់​បាន​បាត់​ខ្លួន​ ឬ​គ្រួសារ​ស្រែក​យំ​នៅ​ម្ខាង​ទៀត​ ​ពីព្រោះពួក​គេ​កំពុង​គិត​ថា​ គ្រាប់បែក​ទើប​តែ​ធ្លាក់​មក​លើ​ពួក​យើង“។​នៅពេល​ព្រលប់​នៅលើ​វា​ស្មៅ​ខាង​ក្រោយ​សណ្ឋាគារ​ ​មាន​ការ​ប្រកួត​បាល់ទាត់​រវាង​កង​ថែរក្សា​សន្តិភាព​ជាតិ​ហ្សកដានី​និង​ពួក​ឧទ្ទាម​កូដដឺវ័រ។

ពួក​គេ​ប្រហែល​កំពុង​ការពារ​បុរស​តែមួយ​ ​ក៏​ប៉ុន្តែ​នៅពេល​លេង​បាល់​ ​ពួក​គេ​កំពុង​រុញគ្នា​ទៅវិញ​ទៅមក​យ៉ាង​ពេញ​ទំហឹង។

ប្រធាន​ថែរក្សា​សន្តិភាព​របស់​អង្គការ​សហ​ប្រជាជាតិ​ចង់​ជួយ​ជ្រោម​ជ្រែង​កង​កម្លាំង​នេះ​ក្នុង​រយៈ​ពេល​៣-៤​សប្តាហ៍​ខាងមុខ​ទៀត​នេះ។​ ក៏ប៉ុន្តែ​ លោក​បាបូ​និយាយ​ថា​ ​មនុស្ស​ទាំងអស់ ​រួមទាំង​ទាហាន​ជិត​៨រយ​នាក់​ដែល​កំពុង​ការពារ​សណ្ឋាគារ​របស់​លោក​វ៉ាតារា​ផង​ដែរ​ ​ត្រូវតែ​ចាក​ចេញ​ពី​កូដ​ឌីវ័រ​ដោយសារ​លោក​លែង​មាន​ទំនុក​ចិត្ត​តទៅទៀត​លើ​អព្យាក្រិត្យ​ភាព​របស់​ពួក​គេ​ ពីព្រោះ​ពួកគេ​កំពុង​ការពារ​គូ​ប្រជែង​របស់​លោក៕

ប្រែ​សម្រួល​ដោយ​ ជឹង ប៉ូជីន

XS
SM
MD
LG