មុនពេលតុលាការបើកសវនាការលើបណ្តឹងទាស់ដែលនឹងចាប់ផ្តើមនៅសប្តាហ៍ក្រោយ កូនប្រុសរបស់លោក ខៀវ សំផន អតីតប្រមុខរដ្ឋក្នុងរបបខ្មែរក្រហម នៅថ្ងៃសុក្រនេះ បានទទូចឲ្យតុលាការខ្មែរក្រហមផ្តល់យុត្តិធម៌ដល់ឪពុករបស់លោក។
តុលាការខ្មែរក្រហមគ្រោងបើកសវនាការជំនុំជម្រះលើបណ្តឹងសាទុក្ខរបស់លោក ខៀវ សំផន ដែលត្រូវបានកាត់ទោសឲ្យជាប់ពន្ធនាគារមួយជីវិត កាលពីឆ្នាំ២០១៨ លើបទចោទឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ និងបទល្មើសធ្ងន់ធ្ងរផ្សេងៗទៀត។
កូនប្រុសរបស់លោក ខៀវ សំផន គឺលោក ខៀវ ឧត្តម អាយុ៤៧ឆ្នាំ ដែលកំពង់រស់នៅស្រុកអន្លង់វែង ខេត្តឧត្តរមានជ័យ បានប្រាប់វីអូអេថាលោកមិនអាចចូលរួមសវនាការនៅសប្តាហ៍ក្រោយបានទេ ប៉ុន្តែលោកបានជំរុញឲ្យតុលាការផ្តល់យុត្តិធម៌ដល់ឪពុក ដែលមានវ័យ៩០ឆ្នាំហើយ និងដោះលែងរូបលោកឲ្យបានជួបជុំគ្រួសារ មុនពេលលោកស្លាប់។
លោកថ្លែងថា៖ «ចង់ឲ្យតុលាការធ្វើតាមយុត្តិធម៌ កុំធ្វើតាមអ្វីដែលខ្លួនឯងគិតថាត្រូវតែមួយចំហៀង...បើថាអាក្រក់វាលទ្ធផលអាក្រក់ គឺវាចេញមកអាក្រក់ មិនល្អ។ តែកន្លងមក វាជិត១០ឆ្នាំហើយ ធ្វើអីនៅតែអញ្ចឹង។ គាត់ចាស់ជិតស្លាប់ទៅហើយ អត់ទាន់មានឃើញស្អី»។
លោកបន្ថែមថាលោក ខៀវ សំផន នៅមានកូន៤នាក់ ប្រុសពីរនាក់ និងស្រីពីរនាក់ ហើយលោកជាកូនប្រុសច្បង ដែលរស់នៅក្នុងស្រុកអន្លង់វែង ខេត្តឧត្តរមានជ័យតំបន់ផ្តាច់ខ្លួនចុងក្រោយរបស់ខ្មែរក្រហម។ លោក ខៀវ សំផន ក៏នៅមានភរិយារស់រានមានជីវិតផងដែរ។
នៅមុនពេលតុលាការបើកសវនាការដែលនឹងចាប់ផ្តើមពីថ្ងៃទី១៦ដល់ថ្ងៃទី១៩ ខែសីហា លោក ខៀវ ឧត្តម ដែលជាអ្នកចម្ការម្នាក់ និងមានមុខរបរលក់សាំងនៅក្នុងទីរួមស្រុកអន្លង់វែងផងដែរ ក៏បានផ្តាំផ្ញើទៅក្មេងៗជំនាន់ក្រោយ ឲ្យវិភាគមុននឹងយល់ថាអ្នកណាខុស អ្នកណាត្រូវ។
លោកបន្ថែមថា៖ «ហ្នឹងហើយខ្ញុំគ្រាន់តែសំណូមពរក្មេងៗជំនាន់ក្រោយរៀនសូត្រចេះដឹង យើងទាល់តែស្រាវជ្រាវរៀនសូត្របន្តិច កុំជឿថាប្រទេសជាតិយើងវាម៉េច ពីមុន ឥឡូវ។ ក្មេងៗចេះដឹងឥឡូវ តែងតែជឿ អត់វិភាគទេ។ ជាពិសេសគេនិយាយរឿងអាក្រក់ ខ្មែរគ្នាឯងយើងហ្នឹង។ ឲ្យតែខ្មែរគ្នាឯងថាអាក្រក់ហ្នឹង គឺអាក្រក់ហើយ អត់គិតថាទោះបីយ៉ាងម៉េច ក៏ជាខ្មែរ ជាជាតិសាសន៍ខ្មែរ ឈាមជ័រជាខ្មែរ ស្រឡាញ់ខ្មែរ»។
អតីតមេដឹកនាំខ្មែរក្រហមទទួលខុសត្រូវខ្ពស់បំផុតចំនួន៤នាក់ ដែលត្រូវបានតុលាការខ្មែរក្រហមនាំមកកាត់ទោស ប៉ុន្តែ៣នាក់បានស្លាប់ រួមទាំងបងធំទី២នៃរបបខ្មែរក្រហម គឺលោក នួន ជា ដែលត្រូវបានកាត់ទោសឲ្យជាប់ពន្ធនាគារមួយជីវិត ប៉ុន្តែលោកបានស្លាប់កាលពីឆ្នាំ២០១៩។
អ្នករស់រានពីរបបខ្មែរក្រហមម្នាក់ គឺលោក យន់ ប៊ីន អាយុ៦៦ឆ្នាំ រស់នៅក្នុងខេត្តត្បូងឃ្មុំ និងបានរួចផុតពីយកទៅវាយសម្លាប់ក្នុងរណ្តៅ បានថ្លែងថាលោកចង់ចូលរួមស្តាប់ការបកស្រាយរបស់លោក ខៀវ សំផន ខណៈលោកចង់ឲ្យតុលាការបន្តរក្សាបទចោទលើលោក ខៀវ សំផន និងកាត់ទោសដាក់ពន្ធនាគារអស់មួយជីវិតដដែល។
លោកបញ្ជាក់ថា៖ «ទោសទណ្ឌទាំងអស់ គេមើលឃើញតាំងពីសម្លាប់ ទាំងពីការដែលបង្ខំ ទាំងពីធ្វើទុក្ខបុកម្នេញមកលើប្រជាជន ទាំងពីបង្អត់អាហារ បង្អត់អី។ កុំថាវាមិនដឹង វាដឹងហើយ។ និយាយឲ្យចំទៅ ហ្នឹងវាក្រឡិចក្រឡុចអញ្ចឹង វាចេះតែពន្យារទៅ»។
លោក ខៀវ សំផន ត្រូវបានចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ ការរំលោភបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវឆ្នាំ១៩៤៩(ស្តីពីឧក្រិដ្ឋកម្មសង្រ្គាម) និងអំពើប្រល័យពូជសាសន៍ប្រឆាំងនឹងជនជាតិចាម និងជនជាតិវៀតណាម។ បទចោទប្រកាន់ផ្សេងទៀត មានដូចជាការផ្លាស់ទីលំនៅប្រជាជនដោយបង្ខំចេញពីទីក្រុងភ្នំពេញ ក្នុងខែមេសា ឆ្នាំ១៩៧៥ ការសម្លាប់ទាហានរបបសាធារណរដ្ឋខ្មែរ ការរៀបអាពាហ៍ពិពាហ៍ដោយបង្ខំ ការរំលោភសេពសន្ថវៈ ការបោសសម្អាតផ្ទៃក្នុង មន្ទីរសន្តិសុខស២១ ក្រាំងតាចាន់ អូរកន្សែង និងភ្នំក្រោល ការដ្ឋានទំនប់១មករា ការដ្ឋានសាងសង់ព្រលានយន្តហោះកំពង់ឆ្នាំង និងការដ្ឋានលើកទំនប់ត្រពាំងថ្មជាដើម។
ក្រៅពីស្នើសុំឲ្យតុលាការមោឃភាពសាលក្រម និងការចោទប្រកាន់នានា លោក ខៀវ សំផន ក៏បានស្នើឲ្យតុលាការកែប្រែការផ្តន្ទាទោសមួយជីវិត មកជាការដាក់ពន្ធនាគារក្នុងពេលកំណត់ណាមួយ។ នេះបើយោងតាមអ្នកនាំពាក្យរបស់តុលាការខ្មែរក្រហម។
នៅក្នុងសន្និសីទសារព័ត៌មានកាលពីថ្ងៃព្រហស្បតិ៍ លោក នេត្រ ភក្ត្រា អ្នកនាំពាក្យសាលាក្តីខ្មែរក្រហម បានថ្លែងថាក្រោយពីការសាកសួរដេញដោល តុលាការនឹងទុកឱកាសសម្រាប់លោក ខៀវ សំផន ថ្លែងទៅកាន់អង្គជំនុំជម្រះដោយផ្ទាល់។
ទាំងលោក នេត្រ ភក្រ្តា និងកូនប្រុសរបស់លោក ខៀវ សំផន បានឲ្យដឹងថាលោក ខៀវ សំផន មានសុខភាពល្អធម្មតា និងបានចាក់វ៉ាក់សាំងបង្ការជំងឺកូវីដ១៩រួចហើយ។
បើតាមអ្នកនាំពាក្យរបស់សាលាក្តីខ្មែរក្រហម អង្គជំនុំជម្រះក៏បានត្រៀមថ្ងៃបម្រុងទុកសម្រាប់សវនាការបន្ថែមក្នុងករណីចាំបាច់ គឺចាប់ពីថ្ងៃទី២០ ដល់ថ្ងៃទី២៧ ខែសីហា ឆ្នាំ២០២១។ បន្ទាប់ពីបញ្ចប់ការសួរដេញដោលសំណុំរឿងបណ្តឹងសាទុក្ខនេះ តុលាការអាចនឹងប្រកាសសាលាដីកាស្ថាពរនៅនៅចុងឆ្នាំ២០២២។
អ្នកនាំពាក្យបន្ថែមថាបន្ទាប់ពីបញ្ចប់សំណុំរឿងរបស់លោក ខៀវ សំផន ក៏នៅមានសំណុំរឿងសេសសល់ ក្នុងនោះមានសំណុំរឿងរបស់លោក យឹម ទិត្យ ដែលជាអតីតកម្មាភិបាលខ្មែរក្រហម និងលោក មាស មុត អតីតមេបញ្ជាការកងទ័ពជើងទឹករបស់របបខ្មែរក្រហម និងការងាររក្សាទុកកេរដំណែលរបស់តុលាការ ដូចជាការរក្សាទុកឯកសារផ្សេងៗ។
គួរបញ្ជាក់ថារហូតមកដល់ពេលនេះ តុលាការខ្មែរក្រហមកូនកាត់មួយនេះ បានចំណាយប្រាក់ប្រមាណ៣៣០លានដុល្លារអាមេរិក ចាប់តាំងពីបង្កើតឡើងកាលពីឆ្នាំ២០០៦។ នេះបើយោងតាមអ្នកនាំពាក្យរបស់សាលាក្តីខ្មែរក្រហម៕
