ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ទីក្រុងតូក្យូ រឹតបន្តឹង​វិធានការ​ទប់ស្កាត់​មេរោគ​រយៈពេល​ជិត​១០០​ថ្ងៃ មុន​កម្មវិធី​កីឡា​អូឡាំពិក


រូបឯកសារ៖ បុគ្គលិក​ពេទ្យ​ទទួល​ការចាក់​វ៉ាក់សាំង​បង្ការ​ជំងឺ​កូវីដ១៩ នៅ​ឯ​មជ្ឈមណ្ឌល​ជំងឺ​មហារីក​និង​ជំងឺ​ឆ្លង​ក្នុង​ទីក្រុង​តូក្យូ កាលពី​ថ្ងៃទី៥ ខែមីនា ឆ្នាំ២០២១។

រដ្ឋាភិបាល​ជប៉ុន​ នឹង​អនុម័ត​វិធាន​កាន់តែ​តឹងរ៉ឹង​ទប់ទល់នឹង​រីរុសកូរ៉ូណា​ក្នុង​រាជ​ធានី​នៅ​ថ្ងៃសុក្រ​ គឺ​ច្រើន​សប្តាហ៍​បន្ទាប់ពី​បញ្ចប់​ស្ថានភាព​អាសន្ន​ ហើយ​នៅ​សល់តែ​ជាង​១០០​ថ្ងៃ​ប៉ុណ្ណោះ​ មុន​កម្មវិធី​កីឡា​អូឡាំពិក​ទីក្រុង​តូក្យូ ​ត្រូវ​បាន​លើក​ពេល។ ការរឹត​បន្តឹង​ថ្មី​ គឺ​មិន​សូវ​តឺងតែង​ដូច​ការ​បិទ​ទាំស្រុងនៅក្នុង​ប្រទេស​ដទៃទៀត​ទេ​ ហើយភាគ​ច្រើន​អំពាវនាវ​ឱ្យ​ភោជនីយដ្ឋាន​និង​បារ​ បិទ​នៅ​ម៉ោង​៨​យប់ ​ដោយ​ព្រមាន​ដោយ​ផាក​ពិន័យ​ចំពោះ​អ្នកដែលមិន​ធ្វើ​តាម។ នេះ​តាម​សេចក្តី​រាយការណ៍​របស់​ទីភ្នាក់ងារ​ព័ត៌មាន AFP។

វិធានការ​នានា​បាន​ចូល​ជាធរមានរួចហើយ​នៅក្នុង​តំបន់​ដែល​ជា​ចំណុច​ក្តៅ​ រួមមាន​ទីក្រុង​អូសាកា​ ទីដែល​ការ​កើន​ឡើងវិញ​នៃ​ករណី​ឆ្លង​បាន​បង្ខំ​ឱ្យ​កម្ម​វិធី​ដុត​គប់ភ្លើង​អូឡាំពិកនៅតាម​ផ្លូវ​សាធារណៈ ត្រូវបាន​ត្រូវ​លើក​ពេល​។​ ការ​ប្រកួត​កីឡា​ឆ្នាំ​២០២០​ ដែល​ត្រូវ​ពន្យារ​ពេល​ដោយសារ​ជំងឺ​រាតត្បាត ​ត្រូវ​ចាប់​ផ្តើម​នៅ​ថ្ងៃទី​២៣​ ខែ​កក្កដា ​នៅ​ទីក្រុង​តូក្យូ​ ប៉ុន្តែ​ការ​កើន​ឡើង​នៃ​ករណី​ឆ្លង​វីរុស​នៅក្នុង​តំបន់​នានា​នៃ​ប្រទេស​កំពុង​បង្ក​ការ​ព្រួយ​បារម្ភ​ថ្មី។​

រដ្ឋាភិបាល​ជប៉ុន​ បាន​ប្រកាស​ស្ថានភាព​អាសន្ន​ដោយសារ​វីរុស​នៅតំបន់​ជាច្រើន​ ដោយ​ចាប់​ផ្តើម​ពី​ខែ​មករា​ ហើយ​លើក​ដក​ចេញ​បន្តិចម្តងៗ ​ហើយ​វិធាន​ការ ​បាន​ដកចេញ​នៅ​ទីក្រុង​តូក្យូ​ចុង​ក្រោយ​គេ។​ ប៉ុន្តែ​ករណី​ឆ្លង​នានា​បាន​ងើប​ឡើង​វិញ​យ៉ាង​ឆាប់​រហ័ស​នៅក្នុង​តំបន់​ខ្លះ​ ដែល​វិធានការ​នេះ​ ត្រូវបាន​លុបចោល​យ៉ាង​ឆាប់​ជាពិសេស​នៅ​ក្រុង​អូសាកា។​

អភិបាល​ក្រុង​តូក្យូ​លោក​ស្រី Yuriko Koike បាន​និយាយ​កាលពី​ថ្ងៃ​ព្រហស្បតិ៍​ថា​ «វា​ជា​ការ​បន្ទាន់​ដែល​យើង​ចាត់​វិធានការ​កាន់តែ​ខ្លាំង​ឡើងៗ ​ដូចជា​ការ​កាត់​បន្ថយ​លំហូរ​ប្រជាជន​រវាង​ទីក្រុង​ធំៗ បើមិន​ដូច្នេះ​ទេ​ យើង​នឹង​ឃើញ​មាន​ការឆ្លង​រាលដាល​ហើយ​កាន់​តែធ្ងន់ធ្ងរ»។

ប្រទេស​ជប៉ុន ​បាន​ចៀសផុត​ស្ថានភាព​ធ្ងន់ធ្ងរ​នៃ​ជំងឺកូវីដ១៩​ ដូច​នៅ​ប្រទេស​ផ្សេង​ទៀត​ ហើយ​មានមនុស្ស​ស្លាប់​សរុប​ប្រមាណ​ជា​៩៣០០​នាក់។​

ប៉ុន្តែ​ការ​ចាក់​វ៉ាក់សាំង​មាន​សភាព​យឺត​ ដោយ​មាន​តែ​ការ​អនុញ្ញាត​ឲ្យ​ចាក់​តែ​វ៉ាក់សាំង Pfizer- BioNTech ប៉ុណ្ណោះ​ ហើយ​គ្រូពេទ្យ ​បាន​រាយ​ការណ៍​ពី​ការ​រាលដាល​នៃ​សន្តាន​មេរោគ​ថ្មី​ ដែល​ឆ្លង​កាន់​តែ​ខ្លាំង។​ ការ​ចាក់​ថ្នាំបង្ការសម្រាប់​មនុស្ស​ចាស់គ្រោង​ចាប់ផ្តើម​នៅ​សប្តាហ៍​ក្រោយ​ ហើយ​គេមិន​រំពឹង​ថា​ នឹងមាន​ការ​អនុញ្ញាត​ឲ្យ​ចាក់​វ៉ាក់សាំង​របស់​ក្រុមហ៊ុន Moderna ​និង​ AstraZeneca មុន​ខែ​ឧសភា​ទេ។ វិធាន​ការ​ថ្មី​ គឺ​គ្រប​ដណ្តប់​តំបន់​កណ្តាល​ទីក្រុង​តូក្យូ​ ហើយ​តំបន់​ផ្សេង​ទៀត​ នឹងត្រូវ​ប្រកាស​នៅថ្ងៃសុក្រ​ ហើយនឹង​ត្រូវ​អនុវត្ត​ចាប់ពី​ថ្ងៃចន្ទ​ ដល់​ថ្ងៃទី​១១​ ខែ​ឧសភា៕

XS
SM
MD
LG