តុលាការក្រុងភ្នំពេញបានសម្រេចឃុំខ្លួនជនបីរូបជាបណ្តោះអាសន្ន ក្រោយពេលសាកសួរពេញមួយថ្ងៃ ក្នុងថ្ងៃពុធនេះ បន្ទាប់ពីបុរសទាំងបីនាក់ចេញមកសារភាពទទួលទោសថា ខ្លួនជាជនដៃដល់បើកការវាយប្រហារលើតំណាងរាស្ត្ររបស់គណបក្សជំទាស់។
កាលពីល្ងាចថ្ងៃអង្គារកន្លងទៅ ជនបីរូប ដែលមានឈ្មោះម៉ៅ ហឿន អាយុ៣៤ឆ្នាំ មកពីខេត្តព្រៃវែង ចាយ សារិទ្ធ អាយុ៣៣ឆ្នាំ និងសុត វណ្ណនី អាយុ៤៥ឆ្នាំ រស់នៅក្រុងតាខ្មៅ ខេត្តកណ្តាល បានស្ម័គប្រគល់ខ្លួនឱ្យអាជ្ញាធរមានសមត្ថកិច្ចនិងអះអាងថា ពួកខ្លួនជាអ្នកបង្ករបួសស្នាមដល់តំណាងរាស្ត្រពីររូបរបស់គណបក្សសង្គ្រោះជាតិ។ នេះបើតាមសេចក្តីប្រកាសព័ត៌មានរបស់ក្រសួងមហាផ្ទៃ។
ជនទាំងបីរូបត្រូវបានបញ្ជូនទៅសាកសួរនៅតុលាការក្រុងភ្នំពេញភ្លាមៗនាព្រឹកថ្ងៃពុធនេះ។ ព្រះរាជអាជ្ញារងនៃតុលាការក្រុងភ្នំពេញគឺលោក មាស ចាន់ពិសិដ្ឋ បានបញ្ជាក់ប្រាប់ VOA នារសៀលថ្ងៃពុធនេះថា លោកកំពុងសាកសួរជនទាំងបីរូបនិងកំណត់បទចោទប្រកាន់លើជនសង្ស័យទាំងបីនាក់នេះ។
មុនពេលបិទទូរស័ព្ទ លោកមាស ចាន់ពិសិដ្ឋបានថ្លែងដូច្នេះ៖
«ខ្ញុំកំពុងពិចារណាពីបទចោទ។ ឥឡូវខ្ញុំកំពុងពិនិត្យសិនណា។ សុំទោស ចាំខ្ញុំពិនិត្យហើយសិន ចាំសម្រេចពីបទចោទប្រកាន់»។
ក្រោយពេលចោទ និងបញ្ជូនជនទាំងបីរូបទៅកាន់ពន្ធនាគារ នាល្ងាចថ្ងៃពុធនេះ លោកមាស ចាន់ពិសិដ្ឋ បានបញ្ជាក់ប្រាប់ VOA ថា លោកបានចោទបុរសទាំងបីពីបទបង្ក«ហិង្សាដោយចេតនាមានស្ថានទម្ងន់ទោស និងធ្វើឲ្យខូចខាតទ្រព្យសម្បតិ្ត ដោយមានចេតនាមានស្ថានទម្ងន់ទោស» មុននឹងបញ្ជូនពួកគេទៅកាន់គុកព្រៃស នាល្ងាចថ្ងៃពុធ។
តាមច្បាប់ព្រហ្មទណ្ឌកម្ពុជា ជនទាំងបីរូបអាចត្រូវជាប់ទោសយ៉ាងហោចណាស់ ៧ឆ្នាំក្នុងពន្ធនាគារ បើសិនតុលាការរកឃើញថា មានទោសនោះ។
កាលពីថ្ងៃច័ន្ទសប្តាហ៍កន្លងទៅ តំណាងរាស្ត្រពីររូបរបស់គណបក្សជំទាស់គឺលោកគង់ សភា និងលោកញ៉យ ចំរើនត្រូវបានក្រុមជនបិទមុខស្ទាក់រថយន្ត និងទាញរូបលោកចេញពីរថយន្ត មុនពេលបើកការវាយទាត់ធាក់ ដោយមិនមានកិច្ចអន្តរាគមន៍ពីកម្លាំងមានសមត្ថកិច្ចនោះទេ។ គេជឿថា ក្រុមជនសង្ស័យទាំងនោះគឺជាបាតុករដែលនៅសេសសល់ពីការតវ៉ាឲ្យមានការដកលោកកឹម សុខា ចេញពីតំណែងអនុប្រធានទីមួយនៃរដ្ឋសភាជាតិ។ លោកគឺជាអនុប្រធានគណបក្សសង្គ្រោះជាតិ ដែលជាគណបក្សជំទាស់។ រូបភាពនៃការវាយប្រហារលើក្រុមតំណាងរាស្ត្ររបស់គណបក្សជំទាស់ត្រូវបានគេចែកចាយពេញបណ្តាញសង្គមហ្វេសប៊ុក។
យ៉ាងណាក៏ដោយ លោកយ៉ែម បុញ្ញាឫទ្ធិ អ្នកនាំពាក្យរបស់គណបក្សសង្គ្រោះជាតិ បានសាទរដោយប្រយ័ត្នប្រយែង ចំពោះការចេញមកសារភាពរបស់ជនទាំងបីរូបនេះ ក៏ប៉ុន្តែលោកបានបង្ហាញពីមន្ទិលថា ជនសង្ស័យដែលធ្វើការវាយប្រហារលើតំណាងរាស្ត្រនៅថ្ងៃច័ន្ទសប្តាហ៍កន្លងទៅនោះ អាចមានច្រើនជាងនេះទៀត។
«គណបក្សសង្គ្រោះជាតិយើងស្វាគមន៍ចំពោះការចេញមកបង្ហាញខ្លួន ហើយនិង ការងាររបស់សមត្ថកិច្ចដែលកំពុងអនុវត្ត ។ ក៏ប៉ុន្តែ ចំនួនបីរូប បើតាមមើលវីដេអូលើបណ្តាញសង្គមគឺវាមានច្រើនជាងនេះ។ យើងសង្ឃឹមថា អាជ្ញាធរមានសមត្ថកិច្ចលោកនឹងបន្តការងារនេះទៀត»។
ស្របគ្នានោះដែរ លោកអំ សំអាត ប្រធានក្រុមបច្ចេកទេសនៃអង្គការសិទ្ធិមនុស្ស លីកាដូ បានប្រាប់ VOA ថា ការចេញមុខសារភាពរបស់ក្រុមដៃដល់គឺវាហាក់ដូចជា«មានការចម្លែកបន្តិច» ដោយសារតែការចេញសារភាពនេះធ្វើឡើងក្រោយពេលដែលអាជ្ញាធរប៉ូលិសធ្វើការបញ្ជាក់ពីឧបសគ្គក្នុងការវែកមុខជនដៃដល់ និងប៉ុន្មានថ្ងៃក្រោយពេលលោកហ៊ុន សែនអំពាវនាវឲ្យមានការចូលសារភាពនោះ។
លោកអំ សំអាតបញ្ជាក់ទៀតថា៖
«តាមការណ៍ពិត ការចេញមកសារភាពនេះគឺវាជាការកាន់បន្ថយមួយសម្រាប់ការរិះគន់ និងការដាក់សម្ពាធសម្រាប់រាជរដ្ឋាភិបាលកម្ពុជា និងគណបក្សកាន់អំណាច។ អញ្ចឹងបើទោះជាយ៉ាងណាក៏ដោយ យើងជាសង្គមស៊ីវិល ទាំងជាតិនិងអន្តរជាតិ នៅតែបន្តរឃ្លាំមើលបន្តទៀតយ៉ាងយកចិត្តទុកដាក់»។
ការចេញមកសារភាពរបស់បុរសទាំងបីរូបគឺធ្វើឡើងបន្ទាប់ពីមានការថ្កោលទោស និងការរិះគន់យ៉ាងខ្លាំងជាបន្តបន្ទាប់ពីអង្គការសង្គមស៊ីវិលនានា ស្ថានទូតប្រចាំប្រទេសកម្ពុជា និងលោកនាយករដ្ឋមន្ត្រីហ៊ុន សែនដ៏មានឥទ្ធិពល ផងដែរ ចំពោះការវាយប្រហារយ៉ាងសាហាវលើតំណាងរាស្ត្រគណបក្សជំទាស់ក្នុងអភ័យឯកសិទ្ធិនោះ៕
