ប្រទេសថៃរំពឹងថា នឹងមានវ៉ាក់សាំងការពារជំងឺកូវីដ១៩ នៅឆ្នាំក្រោយ បន្ទាប់ពីបានលទ្ធផលល្អលើការសាកល្បងលើសត្វកណ្ដុរ។ នេះបើតាមការបញ្ជាក់របស់មន្ត្រីជាន់ខ្ពស់ថៃមួយរូប នៅថ្ងៃពុធនេះ។
ប្រទេសថៃនឹងចាប់ផ្ដើមធ្វើសាកល្បងវ៉ាក់សាំង mRNA នេះ លើសត្វស្វានៅសប្ដាហ៍ក្រោយ បន្ទាប់ពីបានទទួលជោគជ័យលើការពិសោធន៍លើសត្វកណ្ដុរមក។ នេះបើតាមការបញ្ជាក់របស់លោក Taweesin Wisanuyothin អ្នកនាំពាក្យមជ្ឈមណ្ឌលគ្រប់គ្រងស្ថានភាពជំងឺកូវីដ១៩ របស់រដ្ឋាភិបាលថៃ។
លោកនិយាយដូច្នេះថា៖ «គេរំពឹងថានឹងអាចប្រើវ៉ាក់សាំងនេះបាននៅឆ្នាំក្រោយ»។
នៅពេលបច្ចុប្បន្ននេះ នៅលើពិភពលោក វ៉ាក់សាំងជំងឺកូវីដ១៩ ជាង ១០០ ប្រភេទ កំពុងត្រូវបានបង្កើតឡើង ប៉ុន្តែអង្គការសុខភាពពិភពលោកបានព្រមានកាលពីខែមេសាថា ការបង្កើតវ៉ាក់សាំងមួយអាចត្រូវការពេលយ៉ាងតិចមួយឆ្នាំ។
វ៉ាក់សាំងរបស់ថៃនេះកំពុងត្រូវបានបង្កើតឡើងដោយវិទ្យាស្ថានវ៉ាក់សាំងជាតិ នាយកដ្ឋានវិទ្យាសាស្ត្រវេជ្ជសាស្ត្រនៃក្រសួងសុខាភិបាលថៃ និងមជ្ឈមណ្ឌលស្រាវជ្រាវវ៉ាក់សាំងនៃសាកលវិទ្យាល័យ Chulalongkorn។
វ៉ាក់សាំង mRNA នេះជំរុញកោសិកាក្នុងរាងកាយឲ្យផលិតអតិសុខុមប្រាណលើផ្ទៃវីរុស ដែលអាចជំរុញឲ្យប្រព័ន្ធភាពស៊ាំនៃរាងកាយធ្វើសកម្មភាព៕
