ប៉ូលិសថៃបាននិយាយថា នៅថ្ងៃព្រហស្បតិ៍នេះ មនុស្សយ៉ាងតិច ៣៧ នាក់បានស្លាប់នៅក្នុងការបាញ់ប្រហារទ្រង់ទ្រាយធំនៅឯមជ្ឈមណ្ឌលមើលថែកុមារមួយកន្លែងនៅក្នុងប្រទេសថៃដែលបង្កឡើងដោយខ្មាន់កាំភ្លើងជាអតីតមន្ត្រីប៉ូលិស។ ខ្មាន់កាំភ្លើងនេះបានសម្លាប់ប្រពន្ធនិងកូនរបស់ខ្លួន មុនពេលបាញ់សម្លាប់ខ្លួនឯង។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
កុមារ ២២ នាក់ស្ថិតក្នុងចំណោមជនរងគ្រោះទាំងនោះ។ ប៉ូលិសបានបញ្ជាក់ថា អតីតមន្ត្រីប៉ូលិសដែលជាខ្មាន់កាំភ្លើងនេះកន្លងមកត្រូវបានដកចេញពីតំណែងដោយហេតុផលទាក់ទិននឹងគ្រឿងញៀន។
អ្នកស្រី Jidapa Boonsom ដែលជាមន្ត្រីថ្នាក់ស្រុក បានប្រាប់ទីភ្នាក់ងារព័ត៌មាន Reuters ថា មានកុមារប្រមាណ ៣០ នាក់ស្ថិតនៅក្នុងមជ្ឈមណ្ឌលមើលថែកុមារនោះ នៅពេលដែលខ្មាន់កាំភ្លើងបានទៅដល់ទីនោះនៅវេលាប្រហែលជាថ្ងៃត្រង់។
អ្នកស្រី Jidapa បាននិយាយថា ដំបូង ជននេះបានបាញ់បុគ្គលិក ៤ ឬ ៥ នាក់ ដែលក្នុងនោះរួមមានទាំងគ្រូបង្រៀនម្នាក់ដែលមានផ្ទៃពោះ ៨ ខែផងដែរ។
អ្នកស្រីបានបន្ថែមថា៖ «ដំបូងឡើយ គេបានគិតថា [ស្នូរកាំភ្លើងនោះ] ជា [សម្លេង] កាំជ្រួច»។
វីដេអូមួយចំនួនដែលផ្សាយតាមបណ្តាញសង្គមអនឡាញបានបង្ហាញអំពីក្រណាត់គ្របពីលើអ្វីដែលមើលទៅហាក់ដូចជាសាកសពរបស់កុមារជាច្រើនដែលដេកស្តូកស្តឹងក្នុងថ្លុកឈាមនៅក្នុងមជ្ឈមណ្ឌលមើលថែកុមារនេះនៅក្នុងក្រុង Uthai Sawan ខេត្ត Nong Bua Lamphu នាភាគឦសានប្រទេសថៃ៕
