ភ្ជាប់​ទៅ​គេហទំព័រ​ទាក់ទង

កិច្ច​ខិត​ខំ​ប្រឹង​ប្រែង​របស់​​ថៃ​ដើម្បី​ផ្សះផ្សា​គ្នា​ក្រោយ​អំពើ​ហិង្សា​នយោបាយ​មាន​ការ​ជឿនលឿន​តែ​បន្តិច​បន្តួច


ចលនា​ប្រឆាំង​ដែល​គេ​ស្គាល់​ថា​ ​ពួក​អាវ​​ក្រហម​ប្រមូល​​ផ្តុំ​គ្នា​​ ដើម្បី​កំណត់​​ខួប​៦ខែ​ នៃ​ការ​បង្រ្កាប​ដោយ​កង​យោធា​ទៅ​លើ​ក្រុមបាតុករ​ ក្នុង​ទីក្រុង​​បាងកក។

បាងកក៖ កិច្ច​ខិតខំ​ប្រឹងប្រែង​ក្នុង​ប្រទេស​ថៃ​ ដើម្បី​ឧបត្ថម្ភ​ផ្ចុងផ្ដើម​ការ​ផ្សះផ្សា​មាន​ធ្វើ​ត​ទៅទៀត​ជា​ច្រើន​ខែ​ ក្រោយ​ពី​ក្រុម​យោធា បាន​បញ្ឈប់​បាតុកម្ម​ប្រឆាំង​រដ្ឋាភិបាល។​ ចលនា​ប្រឆាំង​ដែល​គេ​ស្គាល់​ថា​ជា ​ពួក​អាវ​ក្រហម​កំពុង​ប្រុងប្រៀប​សម្រាប់​ការ​បោះ​ឆ្នោត​ទូទៅ​នៅ​ឆ្នាំ​ក្រោយ​ ទោះណា​ជា​មាន​ការ​បែក​បាក់​គ្នា​ក្នុង​ចំណោមសមាជិក​របស់​ពួក​គេ​ក៏ដោយ។

សង្កាត់​ពាណិជ្ជ​កម្ម​ Rajaprasong​ នៃ​ក្រុង​បាងកក​ដែល​ជា​កន្លែង​ធ្វើ​បាតុកម្ម​ដ៏​ជូរ​ចត់​ប្រឆាំង​នឹង​រដ្ឋាភិបាល​នៅ​ឆ្នាំ​នេះ​ ​បាន​ត្រូវ​ប្រែប្រួល​កាល​ពី​ពេល​ថ្មីៗ​នេះ​ដោយសារ​ការ​ប្រគុំ​តន្ត្រី​ symphony​ មួយ។

លោក​ Somtow ​Sucharitkul​ ​ដែល​ជា​អ្នក​តាក់តែង​បទ​ភ្លេង​ថៃ​ ​បាន​ដឹកនាំ​ការ​ប្រគុំ​តន្ត្រី​ symphony​ “ព្រះមហាជនក” ​ដែល​បាន​ត្រូវ​ប្រគុំ​ជា​ដំបូង​ក្នុងមួយ​ទសវត្សរ៍​មុន​នេះ​ សម្រាប់​ព្រះ​មហា​ក្សត្រ​នៃ​ប្រទេស​ថៃ​ ជា​ជំហាន​មួយ​ទៀត​ក្នុង​កិច្ច​ខិតខំ​ប្រឹងប្រែង​របស់​សហគមន៍ ​ដើម្បី​ផ្សះ​ផ្សាការ​បែកបាក់​គ្នា​ខាង​នយោបាយ​យ៉ាង​ខ្លាំង​ ដែល​បាន​ត្រូវ​បន្សល់​ទុក​ដោយ​ការ​ដែល​ក្រុម​យោធា​បាន​បំផ្លាញ​ជំរុំ​មួយ​របស់​ពួក​បាតុករ​នៅ​ក្នុង​តំបន់​នោះ​កាល​ពី​ខែ​ឧសភា​មុន។

អំពើ​ហិង្សា​ខាង​នយោបាយ​នេះ​ ​ដែល​ជា​អំពើ​ឃោរឃៅ​ធ្ងន់ធ្ងរ​បំផុត​ដែល​ប្រទេស​ថៃ​បាន​ជួប​ប្រទះ​ក្នុង​រយៈពេល​២០​ឆ្នាំ​ បាន​បណ្តាល​ឱ្យ​មនុស្ស​៩០​នាក់​ស្លាប់​ និង​រាប់​រយ​នាក់​រងរបួស។

លោក​ Somtow ​បាន​រិះគន់​ភាគី​ទាំង​ពីរ​នៅ​ក្នុង​ការ​ជជែក​ដេញដោល​គ្នា​ខាង​នយោ​បាយ​ ​ដែល​មាន​ការ​ខ្វែង​គំនិត​គ្នា​នៃ​ប្រទេស​ថៃ​ ​ហើយ​លោក​និយាយ​ថា​ ​នៅ​មាន​កំហឹង​យ៉ាង​ខ្លាំង​ក្នុង​សហគមន៍។

«មាន​កំហឹង​យ៉ាង​ខ្លាំង​ ​ហើយ​គំនិត​ទាំង​ស្រុង​អំពី​ការ​ឈ្នះ​និង​ការ​ចាញ់ ​និង​ការ​វិល​ត្រទ្បប់​មក​វិញ​ ​មិនមែន​ចាក់​ ឫស​ជ្រៅ​ក្នុង​វប្បធ៌ម​របស់​យើង​ទេ។​ នេះ​ជា​វប្បធ៌ម​មួយ​ក្នុង​អតីត​កាល​ដែល​បាន​ត្រូវ​ជំរុញ​ដោយ​គំនិត​នៃ​ការ​សងសឹក​ ​ហើយ​នេះ​ជា​អ្វី​ដែល​យើង​ត្រូវ​តែ​ពុះពារ។​ ខ្ញុំ​មាន​អារម្មណ៍​ថា​ ​ប្រសិន​បើ​ខ្ញុំ​មិន​អាច​ធ្វើ​ការ​នេះ​បាន​ជា​មួយ​ពាក្យ​សំដី​ទេ​ ​ប្រហែល​ខ្ញុំ​ធ្វើ​បាន​ជា​មួយ​តន្ត្រី»។

ពួក​បាតុករ​ដែល​គេ​ស្គាល់​ថាជាពួក​អាវ​ក្រហម​ ​ភាគ​ច្រើន​ជា​អ្នក​គាំទ្រ​អតីត​នាយករដ្ឋមន្ត្រី​ Thaksin​ ​Shinawatra​ ដែល​បាន​ត្រូវ​បណ្តេញ​ចេញ​ពី​តំណែង​ក្នុង​រដ្ឋ​ប្រហារ​មួយ​កាល​ពី​ឆ្នាំ​២០០៦។​ ពួកគេ​បាន​ទាមទារ​ឱ្យ​មាន​ការ​បោះឆ្នោត​ជា​ថ្មី​ ដោយ​និយាយ​ថា​ ​រដ្ឋាភិបាល​បច្ចុប្បន្ន​ បាន​ត្រូវ​បន្តុប​ដោយ​ក្រុម​យោធា​ ​និង​ពួក​វរជន​ក្នុង​ក្រុង​បាងកក ​ក្រោយ​ពី​រដ្ឋាភិបាល​ជាប់​ឆ្នោត​បាន​ត្រូវ​បណ្តេញ​ចេញ​ដោយ​រដ្ឋប្រហារ។

ក្រោយ​ពី​បាតុកម្ម​ទាំង​នោះ​បាន​ត្រូវ​បង្ក្រាប​ ​ពួក​មេ​ដឹកនាំ​ភាគ​ច្រើន​នៃ​ពួក​អាវក្រហម​បាន​ត្រូវ​ចាប់​ខ្លួន​ ​ឬ​រត់គេច​ខ្លួន​ចេញ​ពី​ប្រទេស។​ ក៏​ប៉ុន្តែ​ ​ពួក​មេដឹកនាំ​ថ្មី​មួយ​ក្រុម​បាន​កាន់កាប់​ចលនា​នេះ​ ដែល​ដឹកនាំ​ដោយ​អ្នកស្រី ​Thida Thavornseth​ ដែល​ប្តី​អ្នកស្រី​គឺ​លោក​ Weng Tojirakan​ ឋិត​ក្នុង​ចំណោម​ពួក​អាវក្រហម​ដែល​ជាប់​គុក។

អ្នកស្រី ​Thida ​និយាយ​ថា​ ​ពួក​មេដឹកនាំ​ថ្មី​សង្ឃឹម​ថា​ ​ចលនា​នេះ​ នៅ​តែ​ជា​ចលនា​សន្តិវិធី​ត​ទៅទៀត។

«យើង​ជា​ប្រជារាស្ត្រ​ ​ហើយ​ជា​ពិសេស​ប្រជារាស្ត្រ​អាវក្រហម​ចង់​ថែ​រក្សា​ក្នុង​ក្រុម​មួយ ​និង​ចាត់​វិធានការ​ដែល​ល្អ​សម្រាប់​ពួក​អាវ​ក្រហម​ និង​សម្រាប់​ប្រទេស​ផង​ដែរ។​ យើង​ចង់​ថែរក្សា​ចលនា​នេះ​ដោយ​សន្តិវិធី​ ​បើ​មិន​ដូច្នេះ​ទេ​ ​ចលនា​ប្រជាធិប​តេយ្យ​របស់​យើង​ប្រហែល​អាច​ត្រូវ​បំផ្លាញ​ ​ពីព្រោះ​មាន​មនុស្ស​ខ្លះ​ចង់​បំផ្លាញ​ចលនា​សន្តិវិធី»។

ក៏​ប៉ុន្តែ​ ​អ្នកស្រី​ Thida ​មាន​ការ​សង្ស័យ​អំពី​ការ​ប៉ុនប៉ង​របស់​រដ្ឋាភិបាល​ក្នុង​ការ​ផ្សះផ្សា។​ រហូត​មក​ដល់​ពេល​នេះ​ ​ការ​ស៊ើប​អង្កេត​ជា​ផ្លូវការ​មិន​បាន​រក​ឃើញ​ប្រាកដ​ប្រជា​ថា​ ​តើ​នរណា​ជា​អ្នក​ទទួល​ខុស​ត្រូវ​អំពើ​ហិង្សា​នោះ​ទេ។

«ខ្ញុំ​ដឹង​មិន​ច្បាស់លាស់​ទេ​អំពី​ការផ្សះផ្សា។​ ខ្ញុំ​មិន​ច្បាស់លាស់​ទេ។​ ជា​ដំបូង​លោក​អ្នក​ត្រូវ​តែ​រក​ការណ៍ពិត​ និង​យុត្តិធម៌​សម្រាប់​ប្រជារាស្ត្រ។​ បន្ទាប់​មក​លោកអ្នក​អាច​ធ្វើការ​ផ្សះផ្សា»។

ជា​ទូទៅ​ ​ពួក​អាវក្រហម​គាំទ្រ​គណបក្ស​ Puea Thai​ ​ដែល​ជា​គណបក្ស​ប្រឆាំង​ ​ហើយ​ដែល​មាន​ Thaksin ​ជា​មេ​ដឹកនាំ​មិន​ផ្លូវការ។​ ក៏ប៉ុន្តែ​ ​អ្នកស្រី​ Thida​ សង្ឃឹម​ថា​ ​នឹង​ដាក់​ចលនា​អាវក្រហម​ឱ្យ​ឋិត​នៅ​លើ​ម៌ាគា​ឯករាជ្យ​ជាង​មុន។

លោក​ Chris Baker​ ​ជា​អ្នកនិពន្ធ​ម្នាក់ ​និង​ជា​អ្នក​ធ្វើ​អត្ថាធិប្បាយ​អំពី​នយោបាយ​និង​ជំនួញ​ក្នុង​ប្រទេស​ថៃ។​ លោក​និយាយ​ថា​ ​ចលនា​អាវក្រហម​ ដែល​ជា​ដំបូង​ទ្បើយ​បាន​ត្រូវ​រចនា​ទ្បើង​ដើម្បី​ឧបត្ថម្ភ​ផ្ចុងផ្តើម​ Thaksin ​និង​ធ្វើ​ឱ្យ​គាត់​វិលត្រទ្បប់​មក​កាន់​អំណាច​វិញ​ ​បាន​ខ្វែងគំនិត​គ្នា​ខ្លាំងទ្បើងៗ​ហើយ។

«មាន​ភាព​តានតឹង​ច្រើន​នៅ​ក្នុង​ក្រុម​នយោបាយ​ផ្សេងៗ​ នៅ​ក្នុង​ក្រុម​អាវក្រហម​ទាំងមូល។​ ក្រុម​នេះ​ជា​ក្រុម​ធំ​ណាស់​ដែល​មាន​របៀប​វារៈ​ផ្សេងៗ​ជា​ច្រើន​នៅ​ពេល​នេះ។​ ក៏​ប៉ុន្តែ​ចលនា​នយោបាយ​មាន​ភាព​ដូច្នេះ។​ ក៏​ប៉ុន្តែ​នេះ​ជា​ចលនា​ត្រឹមត្រូវ​មួយ មិន​ដូច​អ្វី​សឹង​តែ​ទាំងអស់​ដែល​លោកអ្នក​បាន​ឃើញ​កាល​ពី​ពេល​មុន​ទេ»។

ក៏ប៉ុន្តែ​លោក​ Baker​ និយាយ​ថា​ ​ការ​ផ្តោត​ការយក​ចិត្ត​ទុក​ដាក់​ធំ​បំផុត​របស់​ពួកអាវ​ក្រហម​ គឺ​ការ​បោះឆ្នោត​ទូទៅ​ដែល​កំណត់​នឹង​ធ្វើ​នៅ​ឆ្នាំ​ក្រោយ។​ កាល​ពី​ ២-៣ ​អាទិត្យ​មុន​នេះ​ ​ពួក​ប្រឆាំង​បាន​បាត់បង់​ឱកាស​ចុងក្រោយ​បង្អស់​របស់​ពួកគេ​ ក្នុង​ការ​បណ្តេញ​រដ្ឋាភិបាល​បច្ចុប្បន្ន​ឱ្យ​ចេញ​ពី​តំណែង​តាម​រយៈ​តុលាការ។​ ពួក​ចៅក្រម​ បាន​បដិសេធ​បណ្តឹង​ពីរ​ដែល​បាន​ចោទ​ប្រកាន់​អំពី​ការ​ខុសឆ្គង​ខាង​ការ​បោះឆ្នោត​ប្រឆាំង​នឹង​គណបក្ស​ប្រជាធិប​តេយ្យ​របស់​លោកនាយក​រដ្ឋមន្ត្រី ​Abhisit Vejjajiva។​ ប្រសិន​បើ​តុលាការ​សម្រេច​ថា​ គណបក្ស​ប្រជាធិប​តេយ្យ​មាន​ទោស​ គណបក្ស​នេះ​នឹង​ត្រូវ​រំលាយ​ ​ហើយ​ពួក​មេ​ដឹកនាំ​របស់​គណបក្ស​នេះ​នឹង​ត្រូវ​ហាមប្រាម​មិន​ឱ្យ​ធ្វើ​នយោបាយ​៥​ឆ្នាំ។

ប្រទេស​ថៃ​ នៅ​តែ​មាន​ស្ថានភាព​នយោបាយ​ងាយ​ប្រេះឆា​ ដោយ​ក្រុង​បាងកក​នៅ​តែ​ឋិត​នៅ​ក្រោម​ស្ថានភាព​មាន​អាសន្ន​៩​ខែ​ក្រោយ​ពី​បាន​ត្រូវ​ដាក់​កំហិត​ដោយ​ផ្តល់​ឱ្យ​ក្រុមយោធា​នូវ​អំណាច​ធំទូលាយ​ដើម្បី​ត្រួតត្រា​បណ្តាញ​ផ្សាយ​ព៌តមាន​និង​កម្រិត​ការប្រមូលផ្តុំ​គ្នា​ជា​សាធារណៈ​ផង​ដែរ។​ លោក​ Baker​ និ​ងជន​ឯទៀតៗ​និយាយ​ថា​ ​ការ​បែកបាក់​គ្នា​ក្នុង​ចំណោម​ពួក​អាវក្រហម​បាន​ធ្វើ​ឱ្យ​ការ​ប្រមើល​មើល​អំពី​អនាគត​មាន​ភាព​មិន​ប្រាកដ​ប្រជា​ខ្លាំង​ទ្បើងៗ។

ប្រែ​សម្រួល​ដោយ​ ឈឹម សុមេធ៕

XS
SM
MD
LG