ប្រជារាស្រ្តថៃ នឹងទៅបោះឆ្នោតនៅថ្ងៃអាទិត្យនេះដែលជាការបោះឆ្នោតលើកទី១ចាប់តាំងពីឆ្នាំ២០០៧មក។ សន្តិសុខនឹងត្រូវរឹតបន្តឹងដោយមានប៉ូលីស១០.០០០នាក់ដែលត្រូវបានដាក់នៅស្ថានីយបោះឆ្នោតដើម្បីធ្វើឲ្យប្រាកដថាការបោះឆ្នោតប្រព្រឹត្តទៅដោយរលូន។
ដាម៉ាសូ ម៉ាកប៊ូល (Damaso Magbual) ជាប្រធានអង្គការបណ្តាញការងារបោះឆ្នោតសេរីអាស៊ី ដែលជាក្រុមមួយឃ្លាំមើលការបោះឆ្នោត។ លោកបានឃ្លាំមើលការបោះឆ្នោតនៅប្រទេសថៃមួយចំនួនកន្លងមក ហើយនិយាយថា ការបោះឆ្នោតនេះជាការបែកបាក់ដ៏ខ្លាំងបំផុតដែលលោកមិនដែលបានឃើញ។ លោកថ្លែងថា៖
«ឧប្បត្តិហេតុនៃអំពើហិង្សាមានច្រើនជាងការបោះឆ្នោតកាលពីពេលមុនៗ។ ប៉ុន្តែ បើប្រៀបធៀបទៅនឹងការបោះឆ្នោតនៅប្រទេសហ្វ៊ីលីពីន និងស្រីលង្កា ប្រជារាស្រ្តថៃប្រហែលជាអាចទទួលយកបាន។ យើងអាចនិយាយដូចនេះ។ ប៉ុន្តែ អំពើហិង្សាអាចរីកកាន់តែធំនៅពេលដែលការបោះឆ្នោតខិតចូលកាន់តែជិត ហើយនឹងនៅក្រោយការបោះឆ្នោត»។
គណបក្សសំខាន់ៗដែលចូលរួមការប្រកួតប្រជែងមានគណបក្សប្រជាធិបតេយ្យដែលជាគណបក្សកំពុងកាន់អំណាចរបស់នាយករដ្ឋមន្រ្តីអាភីស៊ីត វិចាជីវ៉ា (Abhisit Vejjajiva) ហើយនឹងគណបក្សភឿថៃដែលជាគណបក្សប្រឆាំងរបស់លោកស្រីយីងឡាក ស្ស៊ីណាវ៉ាត(Yingluck Shinawatra)ដែលជាប្អូនស្រីរបស់អតីតនាយករដ្ឋមន្រ្តីថាក់ស៊ីន ស្ស៊ីណាវ៉ាត(Thaksin Shinawatra)។
ទោះបីត្រូវបានជាប់ឆ្នោតពីរដងដោយសារប្រជាប្រិយភាពក៏ដោយ ក៏លោកថាក់ស៊ីនត្រូវបានបណ្តេញចេញពីអំណាចដោយពួកយោធាក្នុងឆ្នាំ២០០៦ដោយសារមានការព្រួយកង្វល់ថាលោកនឹងមានអំណាចកាន់តែខ្លាំងឡើង។
ចាប់តាំងពីពេលនោះមក ថៃបានប្រឈមនឹងបាតុកម្មយូរៗម្តងហើយអំពើហិង្សានៅក្នុងការតស៊ូដណ្តើមអំណាចរវាងអ្នកគាំទ្រវណ្ណៈកម្មកររបស់លោកហើយនឹងឥស្សរជនដែលបានទទួលការគាំទ្រដោយពួកយោធា។ ក្រោយមករដ្ឋាភិបាល និងគណៈបក្សនានាដែលស្មោះត្រង់នឹងលោក ថាក់ស៊ីនត្រូវបានរំលាយចោលដោយសារតុលាការប្រកបដោយចម្រូងចម្រាសហើយអ្នកនយោបាយរបស់គណបក្សទាំងនោះ ត្រូវគេហាមឃាត់មិនឲ្យកាន់ធ្វើនយោបាយរយៈពេល៥ឆ្នាំ។
លោកអាភីស៊ីតនិយាយថា ការបោះឆ្នោតនៅថ្ងៃអាទិត្យនេះ អាចជួយធ្វើឲ្យមានស្ថិរភាពឡើងវិញដល់នយោបាយច្របូកច្របល់ ប៉ុន្តែករណីនេះកើតឡើងលុះត្រាតែប្រជារាស្រ្ត បោះឆ្នោតឲ្យគណបក្សប្រជាធិបតេយ្យរបស់លោក។ លោកនិយាយថា ក្នុងឋានៈជានាយករដ្ឋមន្រ្តី លោកបានតំណាងឲ្យប្រទេសថៃទាំងមូល ហើយបានច្រានចោលអ្នករិះគន់ដែលនិយាយថា លោកបានទទួលការគាំទ្រពីកងទ័ព ហើយនឹងពីវណ្ណៈខ្ពង់ខ្ពស់។ លោកនិយាយថា៖
«នេះជាការប៉ុនប៉ងដើម្បីបង្ខូចឈ្មោះគណបក្ស បង្ខូចដំណើរការនយោបាយ។ ឥឡូវនេះ យើងកំពុងធ្វើដំណើរទៅកាន់ការបោះឆ្នោតដោយសេរីនិងយុត្តិធម៌។ ខ្ញុំជាមនុស្សម្នាក់ដែលបានសម្រេចរំលាយសភាមុនអាណត្តិ ដើម្បីឲ្យប្រជារាស្រ្តអាចនិយាយអ្វីដែលពួកគេចង់និយាយ ហើយខ្ញុំប្រាកដថាប្រជារាស្រ្តគ្រប់គ្នានឹងគោរពលទ្ធផលនៃការបោះឆ្នោតនេះ»។
ទោះបីមានការធានាអះអាងរបស់នាយករដ្ឋមន្រ្តីក៏ដោយ អ្នកវិភាគនយោបាយមួយចំនួននិយាយថា ប្រសិនបើគណបក្សភឿថៃឈ្នះឆ្នោតហើយបង្កើតរដ្ឋាភិបាលថ្មី កម្លាំងដែលគាំទ្រគណបក្សប្រជា ធិបតេយ្យរបស់លោកភីស៊ីតនឹងមិនសុខចិត្តទទួលយកលទ្ធផលនៃការបោះឆ្នោតនោះដោយស្រួលៗទេ។
ទោះបី រត់គេចដោយការនិរទេសខ្លួនដើម្បីបញ្ចៀសការកាត់ទោសឲ្យជាប់ពន្ធនាគារនៅឆ្នាំ២០០៨លើបទពុករលួយក៏ដោយ ក៏លោកថាក់ស៊ីន ជាមេដឹកនាំគណបក្សភឿថៃតាមព្រិត្តន័យ។ គណបក្សភឿថៃកំពុងនាំមុខនៅក្នុងការស្ទង់មតិការបោះឆ្នោត។
លោកថាក់ស៊ីន បានត្រូវជំទាស់យ៉ាងខ្លាំងពីឥស្សរជនទីក្រុងបាងកកដែលនិយាយថា លោកជាជនផ្តាច់ការ ពុករលួយ ហើយមិនគោរពដល់ព្រះមហាក្សត្រជាទីគោរព។ លោកថាក់ស៊ីន បានច្រានចោលការចោទប្រកាន់ទាំងអស់នេះ។ អ្នករិះគន់លោកស្រីយីងឡាក និយាយថា លោកស្រីគ្រាន់តែឈរឈ្មោះឲ្យបងប្រុសរបស់លោកស្រី ហើយជាមធ្យោបាយមួយដើម្បីឲ្យលោកវិលត្រឡប់មកកាន់អំណាចវិញ។
លោកស្រីបានទទួលស្គាល់ថា គណបក្សរបស់លោកស្រីប្រហែលស្វះស្វែងរកការលើកលែងទោសឲ្យលោកថាក់ស៊ីនរួមជាមួយអ្នកនយោបាយផ្សេងៗទៀត ប៉ុន្តែលោកស្រីនិយាយថា លោកថាក់ស៊ីននឹងមិនមានតួនាទីធ្វើការសម្រេចអ្វីទេប្រសិនបើលោកស្រីបង្កើតរដ្ឋាភិបាលនោះ។ លោកស្រីថ្លែងដូច្នេះថា៖
«ខ្ញុំគិតថា លោកបានទទួលជោគជ័យណាស់ក្នុងការចាប់ផ្តើមយុទ្ធនាការបោះឆ្នោត ហើយនឹងជួយធ្វើឲ្យប្រទេសសម្បូរសប្បាយ។ ដូច្នេះ យើងអាចប្រើប្រាស់គំនិតរបស់លោក។ ប៉ុន្តែ នៅទីបញ្ចប់ វាគ្រាន់តែជាព័ត៌មាននៃគំនិតប៉ុណ្ណោះ។ ប៉ុន្តែ យើងមានគំនិតរបស់យើង យុទ្ធសាស្រ្ត និងការរៀបចាត់ចែងរបស់គណបក្សភឿថៃដើម្បីពិភាក្សាអំពីបញ្ហានោះ ហើយយើងធ្វើការសម្រេចចិត្តដោយខ្លួនឯងទៅតាមយុទ្ធនាការដែលធ្វើល្អសម្រាប់ប្រជារាស្រ្តថៃ»។
កាលពីឆ្នាំទៅ ទាហានថៃបានប្រយុទ្ធនៅតាមផ្លូវក្នុងទីក្រុងបាងកកជាមួយពួកជនប្រដាប់អាវុធដែលស្ថិតក្នុងចំណោមអ្នកគាំទ្រអាវក្រហមរបស់លោកថាក់ស៊ីន ដោយធ្វើឲ្យមនុស្ស៩០នាក់ស្លាប់ភាគច្រើនជាជនស៊ីវិល។
អ្នកវិភាគនិយាយថា វាជាលទ្ធភាពមួយដែលទាំងគណបក្សភឿថៃ និងគណបក្សប្រជាធិបតេយ្យមិនអាចឈ្នះឆ្នោតបានសំឡេងភាគច្រើន។ នៅក្នុងករណីនេះ គណបក្សដែលមានសន្លឹកឆ្នោតភាគច្រើន នឹងមានឱកាសមុនគេដើម្បីព្យាយាមបង្កើតរដ្ឋាភិបាលចម្រុះមួយជាមួយគណបក្សតូចៗ។ ការណ៍នេះនឹងធ្វើឲ្យមានកិច្ចព្រមព្រៀងមួយរយៈពេល និងភាពមិនប្រាកដប្រជាដែលអ្នកសង្កេត ការណ៍ព្រួយកង្វល់ថា យោធាមានលេសដើម្បីចាប់អំណាច។
ប្រែសម្រួលដោយ ជឹង ប៉ូជីន
