ភ្ជាប់​ទៅ​គេហទំព័រ​ទាក់ទង

ថៃ​សុំ​លើក​ពេល​ប្រជុំ​គណៈ​កម្មាធិការ​ព្រំដែន​កម្ពុជា-ថៃ


លោក​ទៀ បាញ់ ​រដ្ឋមន្ត្រី​ក្រសួង​ការពារ​ប្រទេស​កម្ពុជា​ (រូបកណ្តាល)។

ភ្នំពេញ៖ ​ភាគី​ថៃ​ បាន​ស្នើ​សុំ​ភាគី​កម្ពុជា​លើក​ពេល​ប្រជុំ​គណៈ​កម្មាធិការ​ព្រំដែន​ទូទៅ​ដែលដឹកនាំ​ដោយ​រដ្ឋ​មន្ត្រី​ក្រសួង​ការពារ​ប្រទេស​ទាំង​ពីរ​ផ្តោត​ទៅលើ​កិច្ច​សហ​ប្រតិបត្តិការ​សន្តិសុខ​និង​សន្តិភាព​ នៅ​តាម​បណ្តោយ​ព្រំដែន។ ​ការ​លើក​ពេល​នេះបាន​កើត​ឡើង​ ដោយសារ​ឯកសារ​របស់​ភាគីថៃសម្រាប់​កិច្ច​ប្រជុំ​នេះ​មិន​ទាន់​ត្រូវ​បាន​រៀបចំ​រួចរាល់​នៅ​ឡើយ។ ​ភាគី​កម្ពុជា​បាន​សម្តែង​ការ​សោក​ស្តាយ​ចំពោះ​ការ​ពន្យារ​ពេល​ប្រជុំ​នេះ​ ​ពីព្រោះ​ខ្លួន​បាន​ត្រៀម​រៀបចំ​ឯកសារ​រួចរាល់​អស់​ហើយ។

លោក​ទៀ បាញ់ ​រដ្ឋមន្ត្រី​ក្រសួង​ការពារ​ប្រទេស​កម្ពុជា​ ​បាន​ថ្លែង​នៅ​ថ្ងៃ​ព្រហស្បតិ៍​នេះ​ថា​ ​ប្រទេស​ថៃ​ បាន​ស្នើសុំ​ប្រទេស​កម្ពុជាលើក​ពេល​ប្រជុំ​គណៈ​កម្មាធិការ​ព្រំដែន​ទូទៅ​ដោយ​គ្មាន​ការ​កំណត់​ដោយ​ សារ​ការ​រៀបចំ​ឯកសារ​មិន​ទាន់។

កិច្ច​ប្រជុំ​គណៈ​កម្មាធិការ​ព្រំដែន​ទូទៅ​ ដែល​ត្រូវ​បាន​ធ្វើ​ជា​សហ​ប្រធាន​ដោយ​លោក​ទៀ បាញ់​ រដ្ឋ​មន្ត្រី​ក្រសួង​ការពារ​ប្រទេស​កម្ពុជា​ ​និង​លោក​ Prawit ​Wongsunwon ​រដ្ឋមន្ត្រី​ក្រសួង​ការពារ​ប្រទេស​ថៃ​នេះ​ ​គ្រោង​នឹង​ធ្វើឡើង​នៅ​ Pattaya​ ពីថ្ងៃ​ទី២៧​ដល់​ថ្ងៃ​ទី២៨ ​ខែ​សីហា​នេះ។

លោក​ទៀ បាញ់ ​រដ្ឋមន្ត្រី​ក្រសួង​ការពារ​ប្រទេស​កម្ពុជា ​បាន​ថ្លែង​ប្រាប់​ VOA ​ថា​ ​លោក​ Prawit Wongsunwon​ ​រដ្ឋ​មន្ត្រី​ក្រសួង​ការពារ​ប្រទេស​ថៃ​បាន​ទូរស័ព្ទ​មក​ជួប​លោក​ ​សុំ​លើក​ពេល​ប្រជុំ​គណៈ​កម្មាធិការ​ព្រំដែន​ទូទៅ​ដោយ​គ្មាន​ការ​កំណត់់។

«ខ្ញុំ​មិន​បាន​ដឹង​ច្បាស់​អំពី​មូលហេតុ​ទេ​ ​ដោយសារ​រដ្ឋមន្ត្រី​ការពារ​ជាតិ​ថៃ​បាន​ទូរស័ព្ទ​មក​ជួប​ខ្ញុំ​ ​សុំ​លើក​ពេល​ប្រជុំ​គណៈកម្មាធិការ​ព្រំដែន​ទូទៅ​ ដើម្បី​រៀបចំ​ឱ្យ​មាន​ភាព​សុក្រឹត្យ​សម្រាប់​ប្រជុំ​នៅ​ពេល​ក្រោយ»។

លោក​ឧត្តម​សេនីយ៍ឯក​ឈុំ សុជាតិ ​អនុរដ្ឋលេខាធិការ​ និង​ជា​អ្នកនាំពាក្យ​ក្រសួង​ការពារ​ប្រទេសកម្ពុជា​ បាន​ថ្លែង​ថា ភាគី​កម្ពុជា​បាន​ត្រៀម​រៀបចំ​ឯកសារ​រួច​ជាស្រេច​សម្រាប់​កិច្ច​ប្រជុំគណៈកម្មា ធិការ​ព្រំដែន​ទូទៅ​នេះ​ ប៉ុន្តែ​ភាគី​ថៃ បាន​ស្នើ​សុំ​ពន្យារពេល​កិច្ច​ប្រជុំ​នេះ។

ភ្នាក់ងារ​សារ​ព័ត៌មាន​ថៃ ​MCOT ​បាន​រាយ​ការណ៍​ថា​ ​ក្រសួង​ការពារ​ប្រទេស​ថៃ​ត្រូវ​បាន​គ្រោង​ធ្វើ​ជា​ម្ចាស់​នៃ​កិច្ច​ប្រជុំ​គណៈ​កម្មាធិការ​ព្រំដែន​ទូទៅ​លើក​ទី៧​ចាប់ពី​ថ្ងៃ​ទី២៧ ​ដល់​ថ្ងៃ​ទី២៨ ​ខែ​សីហា​ ​ប៉ុន្តែ ឯកសារ​សម្រាប់​កិច្ច​ប្រជុំ​មិន​ទាន់​ត្រូវ​បាន​រៀបចំ​នៅឡើយ​ ​ដែល​ក្រសួង​ការពារ​ប្រទេស​ទាំងពីរ​បាន ​យល់ព្រម​លើក​ពេល​ប្រជុំ​រហូត​ដល់​មាន​កាល​បរិច្ឆេទ​ថ្មី​ត្រូវ​បាន​ធ្វើ​ឡើង​នៅ​ពេល​ក្រោយ។

កិច្ច​ប្រជុំ​គណៈ​កម្មាធិការ​ព្រំដែន​ទូទៅត្រូវ​បាន​ធ្វើឡើង​សម្រាប់​ឱ្យ​ភាគី​ទាំង​ពីរ​ចុះ​ហត្ថលេខា​លើ​កិច្ចព្រមព្រៀង​ស្តីពី​កិច្ច​សហ​ប្រតិបត្តិការ​សន្តិសុខនៅតាម​បណ្តោយ​ព្រំដែន​លើ​បញ្ហា​គ្រាប់មីន​ការ​បង្ក្រាប​ ​ការរត់ពន្ធ​គ្រឿងញៀន​ ​ការ​ជួញដូរ​មនុស្ស​ ​សន្តិសុខ​តាម​សមុទ្រ ​និង​ប្រតិបត្តិការ​រួម​របស់​ប៉ូលិស​ និងយោធានៅតាម​បណ្តោយ​ព្រំដែន។

លោក​ឧត្តមសេនីយ៍​ឯក​ឈុំ ​សុជាតិ​បាន​បញ្ជាក់​ថា​ ​ភាគី​កម្ពុជា​គ្រោង​នឹង​លើក​យក​ឯកសារ​បី​ចំណុច​ ទៅ​ពិភាក្សា​ជាមួយ​ភាគី​ថៃ៖ ​ទីមួយបញ្ហា​ព្រំដែន​ និង​ការឆ្លងកាត់​ព្រំដែន​ ​ទី​ពីរបញ្ហា​ថែរក្សា​សន្តិសុខ​ និង​សន្តិភាព​តាម​បណ្តោយ​ព្រំដែន​ ​និង​ទីបី​បញ្ហា​កិច្ច​សហ​ប្រតិបត្តិការ​ ​និង​ការ​អភិវឌ្ឍ​ព្រំដែន​ព្រម​ទាំងការ​បង្ក្រាប​បទ​ល្មើស​ព្រំដែន​ ​ឧក្រិដ្ឋ​កម្ម​ឆ្លងដែន​ ​ការ​ជួញដូរ​មនុស្ស​ និង​គ្រឿងញៀន​ជាដើម។

«ប្រទេស​កម្ពុជា​មាន​ការ​សោក​ស្តាយ​ចំពោះ​ការ​ពន្យារពេល​ប្រជុំ​នេះ​ ​ពីព្រោះ​យើង​បាន​ត្រៀម​រៀប​ចំ​ ត្រៀម​ឯកសារ​អស់​ហើយ​ ​និង​មាន​ការ​ឯកភាព​គ្នា​អស់​ហើយ។​ គណៈ​កម្មាធិការ​ព្រំដែន​ទូទៅ​កម្ពុជា​ និង​ថៃ​ ដែល​ដឹកនាំ​ដោយរដ្ឋមន្ត្រី​ក្រសួង​ការពារ​ប្រទេស​កម្ពុជា​ និង​ថៃ​នេះ​ ​មាន​សារៈ​សំខាន់​ណាស់​ ក្នុង​ការ​ថែ​រក្សាសន្តិសុខ​ និង​សន្តិភាព​តាម​បណ្តោយ​ព្រំដែន»។

ក្រុម​មន្ត្រី​យោធា​កម្ពុជា​ និង​ថៃ​បាន​អះអាង​ថា​ ​ការពន្យារពេល​នេះ​មិន​ជាប់​ទាក់ទង​នឹង​ជម្លោះ​ចុង​ក្រោយ​រវាង​មេដឹកនាំ​នៃ​ប្រទេស​ទាំង​ពីរ​លើ​តំបន់​ជម្លោះ​ព្រំដែន​នៅក្បែរ​ប្រាសាទ​ព្រះវិហារ​ទេ។

លោក​ Kasit Piromya ​រដ្ឋ​មន្ត្រី​ការ​បរទេស​ថៃ​ ​បាន​ថ្លែង​កាល​ពី​ថ្ងៃពុធ​ថា​ ​កិច្ច​ប្រជុំ​គណៈ​កម្មាធិការ​ព្រំដែន​រួម​ ដែល​ដឹកនាំ​ដោយ​រដ្ឋមន្ត្រី​ការបរទេស​នៃ​ប្រទេស​ទាំងពីរ​ ​គួរតែ​ត្រូវ​បាន​ធ្វើឡើង​ឆាប់ៗ​នេះ ដើម្បី​ដាក់​បញ្ហា​នៅ​លើតុ​ចរចា។

លោក​នាយក​រដ្ឋមន្ត្រី​ហ៊ុន សែន​បាន​ថ្លែង​យ៉ាង​ដូច្នេះថា​៖

«ការ​ចរចា​ក្នុង​កម្រិត​រដ្ឋមន្ត្រី​ការ​បរទេស​ត្រូវ​ធ្វើ​ក្រោយ​ពេល​សភា​របស់​ថៃ​ឱ្យ​សច្ចាប័ន​លើ​កំណត់ហេតុ​បីសិន។ ​បើ​សភា​ថៃ​មិន​ទាន់​ឱ្យ​សច្ចាប័ន​លើ​កំណត់​ហេតុទាំង​បី​ទេ​ ​មិន​ចាំបាច់​ចរចា​ ​នាំ​ខាត​ពេល​វេលា»។

ប្រទេស​កម្ពុជា​និង​ប្រទេស​ថៃ​បាន​ឈ្លោះ​ដណ្តើម​ដី​ទំហំ​៤,៦​គីឡូម៉ែត្រ​ការ៉េ​នៅ​ក្បែរ​ប្រាសាទ​ព្រះ​វិហារ៕

XS
SM
MD
LG