មន្ត្រីរដ្ឋាភិបាលខ្មែរបដិសេធការអះអាងរបស់ថៃដែលថា ការបន្តផ្តល់ជំនួយឲ្យកម្ពុជា ធ្វើឲ្យទំនាក់ទំនងការទូតបានប្រក្រតីឡើងវិញ។ ការផ្តល់ជំនួយនេះជាការសម្រេចជាឯកតោភាគីដោយប្រទេសថៃ។ មន្ត្រីខ្មែរនិយាយថា កត្តាសំខាន់សម្រាប់ទំនាក់ទំនងប្រសើរឡើងវិញគឺថៃត្រូវដកកងទ័ពចេញពីវត្តកែវសិក្ខាគីរីស្វារៈ ឈប់បង្កការរំខានតាមព្រំដែន និងឈប់ប្រើផែនទីឯកតោភាគី។
មន្ត្រីក្រសួងការបរទេសកម្ពុជាបានថ្លែងនៅថ្ងៃសុក្រនេះថា ប្រទេសកម្ពុជាបានបដិសេធថា ការសន្យាបន្តផ្តល់ជំនួយចំនួន៤៥លានដុល្លារអាមេរិកដោយប្រទេសថៃដល់ប្រទេសកម្ពុជាសម្រាប់គម្រោងអភិវឌ្ឍន៍ផ្លូវនៅតំបន់ព្រំដែននេះ មិនមែនជាកត្តាធ្វើឱ្យមានភាពប្រក្រតីនៃទំនាក់ទំនងការទូតរវាងប្រទេសទាំងពីរនោះទេ។
ប្រទេសថៃបានបង្កកប្រាក់កម្ចីភ្លាមៗ បន្ទាប់ពីរដ្ឋាភិបាលទីក្រុងភ្នំពេញបានតែងតាំងលោកអតីតនាយករដ្ឋមន្ត្រីថៃ Thaksin Shinawatra ជាទីប្រឹក្សាសេដ្ឋកិច្ចរបស់រដ្ឋាភិបាលកម្ពុជានៅក្នុងខែវិច្ឆិកាឆ្នាំ២០០៩។
កម្ចីសម្បទាននេះនឹងត្រូវបានយកមកប្រើប្រាស់សម្រាប់ធ្វើឱ្យប្រសើរឡើងនូវផ្លូវលេខ៦៨ ចាប់ពីស្រុកក្រឡាញ់ដល់ស្រុកសំរោង និងអូរស្មាច់នៅក្នុងខេត្តឧត្តរមានជ័យ នេះបើយោងតាមកាសែត Bangkok Post។
លោកយឹម ទិន អភិបាលរងខេត្តឧត្តរមានជ័យ បានថ្លែងថា ផ្លូវនេះមានសារៈសំខាន់ណាស់សម្រាប់ ជំរុញសកម្មភាពសេដ្ឋកិច្ចឆ្លងកាត់ព្រំដែន ដូចជាការធ្វើពាណិជ្ជកម្ម ការដឹកជញ្ជូន ការផ្លាស់ប្តូរទំនិញ និងទេសចរណ៍ជាដើម។
កាសែត Bangkok Post បានរាយការណ៍នៅថ្ងៃសុក្រនេះថា ប្រទេសថៃបានសន្យាបន្តផ្តល់ជំនួយទឹកប្រាក់ចំនួន១.៤០០លានបាត (៤៥លានដុល្លារអាមេរិក) ដល់ប្រទេសកម្ពុជាឡើងវិញ សម្រាប់គម្រោងអភិវឌ្ឍន៍ផ្លូវ ជាសញ្ញាមួយបន្ថែមទៀត ដែលចំណងទាក់ទងរវាងប្រទេសជាតិទាំងពីរកំពុងវិលត្រឡប់មករកភាពធម្មតាឡើងវិញ។
លោកកុយ គួង អនុរដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជា បានថ្លែងប្រាប់ VOA ថា ប្រទេសកម្ពុជាមិនមានការទាមទារអ្វីពីប្រទេសថៃទេ ប៉ុន្តែការសន្យាបន្តផ្តល់ជំនួយឡើងវិញរបស់ប្រទេសថៃដល់កម្ពុជានេះ គឺអាស្រ័យនៅលើភាគីថៃតែប៉ុណ្ណោះ។
ប្រទេសកម្ពុជាមិនបានចាត់ទុកថា ការសន្យាបន្តផ្តល់ជំនួយរបស់ភាគីថៃនេះជាកត្តាដែលធ្វើឱ្យមានប្រក្រតីភាពនៃទំនាក់ទំនងការទូតរវាងប្រទេសទាំងពីរនោះទេ។ ប្រទេសកម្ពុជាតែងស្វាគមន៍ចំពោះជំនួយពីបណ្តាប្រទេសជាមិត្តដែលជំនួយនោះមិនបានដាក់លក្ខខណ្ឌអ្វីទេ»។
លោកឧបនាយករដ្ឋមន្ត្រីថៃ Suthep Thaugsuban បានថ្លែងកាលពីថ្ងៃព្រហស្បតិ៍ថា ជំនួយនេះនឹងត្រូវបានបន្តចាប់ដំណើរការឡើងវិញនៅពេលឆាប់ៗនេះ ហើយប្រជាពលរដ្ឋនៃប្រទេសទាំងពីរនឹងធ្វើដំណើរទៅមកនៅលើផ្លូវនេះ ដើម្បីធ្វើពាណិជ្ជកម្មទេសចរណ៍ និងវិនិយោគ។
លោកកុយ គួងបានថ្លែងបញ្ជាក់យ៉ាងដូច្នេះថា៖
«ថៃចង់បន្តផ្តល់ជំនួយក្នុងការអភិវឌ្ឍន៍នេះ។ សំខាន់គឺថៃត្រូវឈប់រករឿងខ្មែរ និងឈប់បង្កភាពតានតឹងនៅតាមតំបន់ព្រំដែន ហើយមានបីចំណុចសំខាន់ ដើម្បីធ្វើឱ្យតំបន់ព្រំដែនមានសុខសន្តិភាព ស្ថិរភាព និងការអភិវឌ្ឍន៍បាន។ ទីមួយថៃត្រូវតែដកកងទ័ពចេញពីទឹកដីកម្ពុជានៅម្តុំវត្តកែវសិក្ខាគីរីស្វារៈ។ ទីពីរ ថៃត្រូវឈប់ប្រើផែនទី ដែលថៃលួចគូរជាឯកតោភាគីដើម្បីយកតំបន់មួយចំនួនរបស់ប្រទេសកម្ពុជាថា ជារបស់ខ្លួន និងទីបី ថៃត្រូវតែឈប់ចល័តកងទ័ពនៅតាមតំបន់ព្រំដែន ដែលបង្កឱ្យមានការភ័យខ្លាចដល់ប្រជាពលរដ្ឋនៅតំបន់នោះ»។
ប្រទេសកម្ពុជានិងប្រទេសថៃបានធ្វើឱ្យចំណងការទូតធម្មតាឡើងវិញ នៅពេលដែលលោក Prasas Prasasvinitchai ឯកអគ្គរាជទូតថៃ បានវិលត្រឡប់មកកាន់ទីក្រុងភ្នំពេញ នៅថ្ងៃច័ន្ទ និងលោកស្រីយូ អយ ឯកអគ្គរាជទូតកម្ពុជា បានវិលត្រឡប់ទៅកាន់ទីក្រុងបាងកកវិញនៅថ្ងៃអង្គារ៕