ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ្នក​នយោបាយ​ថៃ​យក​ចិត្ដ​អ្នកកាន់​សន្លឹកឆ្នោត​ ដោយ​សន្យា​នឹង​ផ្ដល់​ជំនួយ​ឧបត្ថម្ភ​ដ៏​ល្អ​ដល់​កសិករ​ដាំស្រូវ


កសិករ កំពុងស្ទូងស្រូវ។
កសិករ កំពុងស្ទូងស្រូវ។

ឧស្សហកម្ម​ស្រូវ​អង្ករ​របស់​ប្រទេស​ថៃ ជា​ផ្នែក​ខ្លាំង​មួយ​នៃ​ ទំនិញ​នាំ​ចេញ​ទៅ​លក់​នៅ​បរទេស​ ដោយ​មាន​ការ​រំពឹង​ថា​អង្ករ​ប្រមាណ ​១០​ លាន​តោន​ នឹង​យក​ទៅ​លក់​នៅ​បរទេស​ក្នុង​ឆ្នាំ​នេះ។ ឧស្សហកម្ម​នោះ​ផ្ដល់​ការងារធ្វើ​ដល់​មនុស្ស​ច្រើន​លាន​នាក់​ ទូទាំង​ប្រទេស​ ហើយ​ គណបក្ស​ធំ​ៗ​ពីរ​ ប្រកួត​គ្នា​ដើម្បី​ទទួល​យក​សម្លេង​ឆ្នោត​របស់​ពួក​គេ។ តែ​លោក​ Ron​ Corben​ រាយការណ៍​ពី​ទី​ក្រុង​ បាងកក​ ថា​ ​អ្នក​វិភាគ​និយាយ​ថា​ ការ​ស្នើ​ផ្ដល់​ជំនួយ​ឧបត្ថម្ភ​ខ្លះ​ដ៏​ប្រសើរ​ដែល​ក្រុម​អ្នក​នយោបាយ​កំពុង​ពិចារណា​ អាច​នាំ​ឲ្យ​កាត់​បន្ថយ​ចំនួន​ដ៏​ច្រើន​សន្ធឹកនូវ​ស្រូវអង្ករ​លក់​ទៅ​បរទេស។

ខណៈ​ដែល​ក្រុម​អ្នក​នយោបាយ​ឃោសនា​សម្រាប់​ការ​បោះ​ឆ្នោត​ជាតិ​ នៅ​ថ្ងៃ​ទី ​៣​ខែ​ កក្កដា​ នៅ​ក្នុង​ប្រទេស​ថៃ​ គណបក្ស​ធំ​ៗ​ពីរ​បាន​ស្នើ​ផ្ដល់​ជំនួយ​ជា​ប្រាក់​ចំណូល​ធានា​នឺង​ធ្វើ​ឲ្យ​តម្លៃ​អង្ករ​ឡើង​ខ្ពស់​ ក្នុង​ការ​ប្រកួត​យក​សម្លេង​ឆ្នោត​នៅ​ក្នង​សហគមន៍​ជនបទ​ ដ៏​ធំ​របស់​ប្រទេស​ថៃ។

តំបន់​ដីរាប​កណ្ដាល និង​ខាង​ជើង​របស់​ប្រទេស​ថៃ​ ដាំ​ស្រូវ​ដ៏​ច្រើន​សន្ធឹក​ដើម្បី​លក់​ទៅ​បរទេស​រាល់​ៗ​ឆ្នាំ​ ដែល​មាន​ទឹក​ប្រាក់​ជាង ​៥​ ពាន់​ លាន​ដុល្លារ​រាល់​ៗ​ឆ្នាំ។

អ្នក​វិភាគ​នយោបាយ​និយាយ​ថា ​តំបន់​នោះ​ ក៏​មាន​សារៈសំខាន់​ខាង​នយោបាយ​ដែរ​ដោយ​សារ​តែ​កៅអី​ភាគ​ច្រើន​នៅ​ក្នុង​សភា​តំណាង​រាស្រ្ដ​ ស្ថិត​នៅ​តំបន់​ជនបទ​ជា​ពិសេសនៅ​តំបន់​កណ្ដាលនិង ​ឦសាន។

ក្នុង​ប៉ុន្មាន​ខែ​ថ្មី​ៗ​នេះ​ កសិករ​ដាំ​ស្រូវ​ខ្លះ​ បាន​បញ្ចុះ​បញ្ចូល​សុំ​ឲ្យ​រដ្ឋាភិបាល​ផ្ដល់​ការ​ជួយ​ឧបត្ថម្ភ​ច្រើន​ថែម​ទៀត។ ប្រព័ន្ធ​បច្ចុប្បន្ន​គ្រប់គ្រង​ដោយ​រដ្ឋាភិបាល​នៃ​គណបក្ស​ប្រជាធិបតេយ្យ ផ្ដល់​ការ​ធានា​ប្រាក់​ចំណូល​ប្រមាណ​១​ម៉ឺន​បាត​ឬ​៣៣០​ដុល្លារ​ ក្នុង​អង្ករ​មួយ​តោន​ យោង​ទៅ​តាម​ប្រភេទ​ស្រូវ​ដែល​គេ​ដាំ។ បើ​កាល​ណា​តម្លៃ​នៅ​ផ្សារ​ចុះ​ទាប​ក្រោម​តម្លៃ​ នោះ រួច​កសិករ​ ដែល​ចូល​រួម​ក្នុង​កម្មវិធី ​ធានា​នោះ នឹង​ត្រូវ​រដ្ឋាភិបាល ​សង​ប្រាក់​ដែល​ខ្លួន​ខាត​ ដាក់​ចូល​ទៅ​ក្នុង​កុង​ទិន្ន័យ​ធានាគារ​របស់​ខ្លួន។

សេដ្ឋវិទូ​ និយាយ​ថា​ប្រព័ន្ធ​ជួយ​ឧបត្ថម្ភ​ អាយុ​ ២ ​ឆ្នាំ​នោះ​ ជួយ​ដល់​កសិករ​ ជាង ៥ លាន​គ្រួសារ ជា​ពិសេស​សម្រាប់​កសិករ​តូចតាច​ នៅ​តបំន់​ក្រីក្រ។ កម្មវិធី​ផ្ដល់​ការ​ធានា​អង្ករ​ បាន​យក​ទៅ​ជំនួស​ផែនការ​ពី​លើក​មុន​ ដែល​រដ្ឋាភិបាល​ទិញ​អង្ករ​ផ្ទាល់​ពី​កសិករ​ ហើយ​យក​ទៅ​ទុក​ក្នុង​ជង្រុក​ធំ។ អ្នក​ទិតៀន​ មក​លើ​ប្រព័ន្ធ​ធានា​បច្ចុប្បន្ន​និយាយ​ថា​ ការ​ទុក​ស្ដុក​អង្ករ​ អនុញាត​ឲ្យ​រដ្ឋាភិបាល​គ្រប់គ្រង​មក​លើ​តម្លៃ​អង្ករ​លក់​នៅ​ទី​ផ្សារ។

គណបក្ស​ជំទាស់ ​ភឿថៃ​ សន្យា​ថា នឹង​ធ្វើ​ឲ្យ​ប្រព័ន្ធ​នោះ​ដំណើរ​ការ​ឡើង​វិញ ហើយ​នឹង​ទិញ​អង្ករ​ពី​កសិករ​ តាម​តម្លៃ​ ១៥ ០០០ បាត ​ក្នុង​មួយ​តោន ឬ ៤៩៦​ ដុល្លារ សរអ។លោក វីរូច​ ណា​ រាណុង អ្នក​វិភាគ ធ្វើ​ការ​ឲ្យ​វិជ្ជាស្ថាន ​អភិវឌ្ឈន៍​ស្រាវជ្រាវ និយាយ​ថា​កម្មវិធី​របស់​គណបក្ស​ ភឿ​ថៃ ដែល​សន្យា​តម្លៃ​អង្ករ ​អាច​នាំ​ឲ្យ​មាន​អំពើ​ពុក​រលួយ។

«បញ្ហា​ធំ​គឺ​រដ្ឋាភិបាល​ខ្លួន​ឯង​ មិនមាន​ថវិកា​ច្រើន​គ្រប់​គ្រាន់​ដើម្បី​ផ្ដល់​ទៅ​ឲ្យ​កសិករ​ទាំងអស់​ ដែល​ចង់​បាន​ការធានា​នោះ។ ដូច្នេះ​ ថវិកា​នោះ​ច្រើន​តែ​ទៅ​ដល់​ដៃ​ខេត្ដ​ណា​ដែល​មាន​ការ​ទំនាក់​ទំនង​ល្អ ជា​មួយ​អ្នក​នយោបាយ ​ដែល​កាន់​កាប់​ក្រសួង​កសិកម្ម។ វិធានការ​ដូច្នោះ​បាន​ប្រព្រឹត្ដ​ធ្វើ​ជា​យូរ​មក​ហើយ ​ហើយ​វា​អាច​នាំ​ឲ្យ​មាន​ការ​ប្រព្រឹត្ដ​អំពើ​ពុករលួយ»។

គណបក្ស​ភឿ​ថៃ​ បាន​ត្រូវ ​ដឹក​នាំ​ដោយ ​លោក​ស្រី​ យីងលិក​ ស៊ីនាវាត្រា ប្អូន​ស្រី របស់​លោក​ថាកស៊ីន​ សីនាវាត្រា​ ដែល​បាន​ត្រូវ​បណ្ដេញ​ចេញ​ពី​តំណែង​ ក្នុងរ​ដ្ឋប្រហារ​នៃ​ឆ្នាំ ​២០០៦។ អ្នក​វិភាគ​មើល​ឃើញ​ការ​បោះ​ឆ្នោត ​ជា​ឱកាស​សម្រាប់​លោក ​ថាកស៊ីន​ ដើម្បី​វិល​ត្រឡប់​មក​ប្រទេស​ថៃ​វិញ​ ហើយ​ខិតខំ​លាង​ឈ្មោះ​លោក ពី​ការ​ចោទ​ប្រកាន់​ពី​បទ​ប្រព្រឹត្ដ​អំពើ​ពុករលួយ។

នៅ​ពេល​ដែល​គេ​រំពឹង​ថា​ ការ​បោះ​ឆ្នោត​នោះ នឹង​បាន​ត្រូវ​ប្រកួត​កិត​ៗ​គ្នា ​គណបក្ស​របស់​លោក​ថាកស៊ីន បាន​ដឹក​មុខ​ ក្នុង​ការ​ស្ទង់​មតិ​ថ្មី​ៗ​នេះ ហើយ​ពាណិជ្ជករអង្ករ​និយាយ​ថា តម្លៃ​អង្ករ​នៅ​លើ​ទី​ផ្សារ​ចាប់​ផ្ដើម​ឡើង​ខ្ពស់ ដោយ​គេ​រំពឹង​ថា​ គណបក្ស​ភឿថៃ​ នឹង​ឈ្នះ​ឆ្នោត។

លោក​ វីចៃ​ ស្រិ​ប្រាសឺត ប្រធាន​ក្រុម​អ្នក​លក់​អង្ករ​ទៅ​បរទេស ​ហៅ ​Riceland ​International ហើយ​ជា​សមាជិក​របស់​ក្រុម​ទី​ប្រឹក្សា នៃ​សមាគមន៍​លក់​អង្ករ​ទៅ​បរទេស​ដ៏​មាន​ឥទ្ធពល គាំ​ទ្រ​កម្មវិធី​ការ​ធានា​ប្រាក់​ចំណូល​ របស់​រដ្ឋាភិបាល​ បច្ចុប្បន្ន។

«ខ្ញុំ​និយាយ​ថា កម្មវិធី​គំាទ្រ​ប្រាក់​ចំណូល​គួរ​តែ​ ប្រសើរ​ជាង​នេះ។ ​ខ្ញុំ​យល់​ថា​កសិករ​តូចតាច​ជា​ពិសេស​នៅ​តំបន់​ឦសាន​ប្រទេស​ពេល​នេះគេ​មាន​កុង​ទិន្នន័យ​ធានាគារ​របស់​គេ។ រដ្ឋាភិបាល​សង​ប្រាក់​ខាត​រវាង​តម្លៃ​ចង់​បាន និង​តម្លៃ​ពិត​ប្រាកដ នៅ​លើ​ទី​ផ្សារ ហើយ​កសិករ​ទទួល​ប្រាក់​ដែល​រដ្ឋាភិបាល​បញ្ចូល​ទៅ​ក្នុង​ធនាគារ។​ កសិករ​ជា​ច្រើន​បាន​ទទួល​ប្រយោជន៍​ពី​កម្មវិធី​នេះ»។

លោក​ វិចៃ​និយាយ​ថា​កម្មវិធី​កិច្ច​សន្យា​ របស់​គណបក្ស​ភឿថៃ​ ផ្ដល់​ប្រយោជន៍​ឲ្យ​កសិករ​ធំ​ៗនៃ​តំបន់​ដី​រាប​កណ្ដាល​ប្រទេស​ថៃ ដែល​ភាគ​ច្រើន​ដាំ​ស្រូវ​បី​ដង ក្នុង​មួយ​ឆ្នាំ។ ផែនការ​នោះ​អាច​ជំរុញ​ឲ្យ​តម្លៃ​អង្ករ​ឡើង​ថ្លៃ ធ្វើ​ឲ្យ​ខ្សោយ​ដល់​ការ​ប្រកួត​ជា​មួយ អង្កររបស់​ប្រទេស​វៀតណាមដែល​ជា​ប្រទេស​ជិត​ខាង។ សមាជិក​របស់​ សមាគមន៍​ លក់​អង្ករ​ទៅ​បរទេស និយាយថា​ វា​អាច​ធ្វើ​ឲ្យ​ការ​លក់​អង្ករ​ទៅ​បរទេស​ចុះ​ចំនួន​ដ៏​ខ្លាំង​ ហើយ​ធ្វើ​ឲ្យ​ជង្រុក​ស្ដុក​ដ៏​ធំ​ទុក​អង្ករ​ខូច​គុណភាព​ ដោយ​សារ​តែ​ប្រព័ន្ធ​ជង្រុក​អង្ករ​ របស់​រដ្ឋាភិបាលមិន​បាន​ត្រូវ​ចាត់ចែង​ប្រសើរ​ទេ។

ប្រែ​សម្រួល​ដោយ​ អ៊ូ​ ធួក

XS
SM
MD
LG