រដ្ឋាភិបាលយោធាថៃបានកំណត់យកថ្ងៃទី ៣១ ខែមីនា ឆ្នាំ ២០១៨ ជាឱសានវាទសម្រាប់ពលករខ្មែរ ដើម្បីចុះឈ្មោះបន្តសុពលភាពប័ណ្ណស្នាក់នៅ និងធ្វើការបណ្តោះអាសន្ននៅប្រទេសនេះ មុនពេលអាជ្ញាធរថៃចាត់វិធានការខាងច្បាប់«យ៉ាងតឹងរឹង»។ នេះបើយោងតាមសេចក្តីប្រកាសរបស់ស្ថានទូតប្រទេសកម្ពុជាប្រចាំប្រទេសថៃដែល VOA បានទទួលនៅថ្ងៃអង្គារ។
សេចក្តីប្រកាសរបស់ស្ថានបេសកកម្មការទូតប្រទេសកម្ពុជា ចុះថ្ងៃទី ១៩ ខែមីនា ឆ្នាំ ២០១៨ បានបញ្ជាក់ប្រាប់ពលករកម្ពុជាដែលស្ថិតនៅក្នុងប្រទេសថៃតាមន័យដើមថា៖
«ភាគីថៃនឹងបិទដំណើរការបន្តសុពលភាពប័ណ្ណស្នាក់នៅ និងធ្វើការបណ្តោះអាសន្ន (ប័ណ្ណស៊ីជំពូ និងលិខិតបញ្ជាក់ទំនាក់ទំនងរវាងថៅកែ និងពលករ) នៅថ្ងៃទី ៣១ ខែ មីនា ឆ្នាំ២០១៨ ជាកំហិត»។
សេចក្តីប្រកាសដដែលបានបន្តថា ផុតកំណត់បរិច្ឆេទថ្ងៃទី ៣១ ខែមីនា ឆ្នាំ ២០១៨ អាជ្ញាធរថៃនឹងចាត់វិធានការយ៉ាងតឹងរឹងតាមច្បាប់ ចំពោះពលករបរទេសទាំងអស់ដែលពុំមានច្បាប់អនុញ្ញាតឲ្យស្នាក់នៅ និងធ្វើការនៅក្នុងប្រទេសថៃ។
ស្ថានទូតកម្ពុជាប្រចាំប្រទេសថៃ បានអំពាវនាវតាមសេចក្តីប្រកាសរបស់ខ្លួនតាមន័យដើមថា៖
«ពលករកម្ពុជាទាំងអស់ដែលមិនទាន់បានបន្តសុពលភាពប័ណ្ណស្នាក់នៅ និងធ្វើការបណ្តោះអាសន្ន សូមមេត្តាប្រញាប់រួសរាន់ ទៅបន្តសុពលភាព នៅការិយាល័យច្រកចេញចូលតែមួយរបស់ភាគីថៃតាមបណ្តាខេត្ត-ក្រុង ដែលបងប្អូនរស់នៅ និងធ្វើការឲ្យបានរួចរាល់ត្រឹមថ្ងៃទី ៣១ ខែមីនា ឆ្នាំ ២០១៨»។
កាលពីខែកក្កដា ឆ្នាំ ២០១៧ ក្រសួងការងារថៃបានបើកការិយាល័យចំនួន៩៧កន្លែងរយៈពេល១៥ថ្ងៃ គិតចាប់ពីថ្ងៃទី២៤ ខែកក្កដា ឆ្នាំ២០១៧ ដល់ថ្ងៃទី៧ ខែសីហា ឆ្នាំ២០១៧ ដើម្បីជូនដំណឹងអំពីការធ្វើការរបស់ពលករបរទេសដែលមិនមានឯកសារ និងដើម្បីបញ្ជាក់ការធ្វើការដោយស្របច្បាប់។ ការបង្កើតការិយាល័យបញ្ជាក់ភាពស្របច្បាប់នៃការធ្វើការនៅប្រទេសថៃនាពេលនោះ បានធ្វើឡើង បន្ទាប់ពីពលករខ្មែររាប់ពាន់នាក់ ដែលភ័យខ្លាចការអនុវត្តច្បាប់ការងារថ្មីរបស់ថៃ បានធ្វើដំណើរ ឬត្រូវចាប់បញ្ជូនត្រឡប់មកប្រទេសកម្ពុជាវិញ នៅចុងខែមិថុនា ឆ្នាំ២០១៧។
ការចាកចេញរបស់ពលករខ្មែរពីប្រទេសថៃ និងការចាប់ខ្លួនពលករខ្មែរដោយភាគីថៃនេះ បានកើតមានឡើង បន្ទាប់ពីច្បាប់ការងារថ្មីរបស់ថៃចូលជាធរមាន។ ច្បាប់ថ្មី ដែលចងក្រងដោយរដ្ឋបាលយោធារបស់ថៃបានធ្វើការរឹតត្បិត និងដាក់ទោសទណ្ឌលើពលករខុសច្បាប់ពីប្រទេសនានាដូចជាឡាវ កម្ពុជា និងមីយ៉ាន់ម៉ាជាដើម។
ក៏ប៉ុន្តែ ភ្លាមៗក្រោយការចាកចេញរបស់ពលករខ្មែរជាច្រើនពាន់នាក់ពីប្រទេសថៃនោះ លោក អ៊ិត សំហេង រដ្ឋមន្ត្រីក្រសួងការងារកម្ពុជា បានឲ្យដឹងថា រដ្ឋាភិបាលថៃបានពន្យារពេលអនុវត្តច្បាប់ការងារថ្មីរយៈពេលប្រាំមួយខែ ដើម្បីអនុញ្ញាតឲ្យពលករខ្មែរមានពេលទទួលបានសិទ្ធិពេញច្បាប់ក្នុងការបំពេញការងារនៅទីនោះ។ តាមការបញ្ជាក់របស់លោក អ៊ិត សំហេង កាលគ្រានោះ ឲ្យដឹងថា ពលករខ្មែរចំនួនប្រមាណ១៦ម៉ឺននាក់បានទៅធ្វើការនៅប្រទេសថៃ។
លោក ឌី ថេហូយ៉ា មន្ត្រីកម្មវិធីនៃអង្គការការពារសិទ្ធិពលករ ហៅកាត់ថាសង់ត្រាល់បានប្រាប់ VOA នៅថ្ងៃអង្គារថា រដ្ឋាភិបាលថៃតែងតែធ្វើការពន្យារពេលដល់ពលករកម្ពុជាសម្រាប់ឲ្យពួកគេបានទទួលនូវភាពស្របច្បាប់នៃការងារនៅប្រទេសថៃ។ យ៉ាងណាក៏ដោយ លោកមានប្រសាសន៍ថា នៅលើកនេះមិនដឹងថាអាជ្ញាធរថៃអាចនឹងមានការពន្យារពេលឲ្យពលករទទួលបានការអនុញ្ញាតរស់នៅ និងធ្វើការនៅប្រទេសថៃបណ្តោះអាសន្នឬយ៉ាងណាទេ ប្រសិនបើឱសានវាទចូលមកដល់នោះ។
«កន្លងមកយើងឃើញថាមានការកែប្រែ មានការពន្យារឲ្យរហូតអីចឹង។ អីចឹងអាកន្លែងហ្នឹងខ្ញុំអត់អាចឆ្លើយបាន ថាតើវាយ៉ាងម៉េចទេ បើសិនអត់មានការកែប្រែគឺ ពួកគាត់ប្រឈមត្រូវបញ្ជូនត្រឡប់មកវិញ ឬមួយប្រឈមនឹងចំណាត់ការផ្លូវច្បាប់ស្រុកគេអីចឹងណ៎ា បាទ»។
លោកបានពន្យល់ថា ប្រសិនបើភាគីថៃអនុវត្តទៅតាមច្បាប់ការងារដែលត្រូវបានធ្វើវិសោធនកម្មកាលពីឆ្នាំ២០១៧ ឬហៅថា ច្បាប់ការងារថៃថ្មីនោះ កម្មករដែលធ្វើការមិនតាមប្រភេទការងារដែលត្រូវបានអនុញ្ញតឲ្យធ្វើ ឬក៏ពុំមានឯកសារត្រឹមត្រូវអាចប្រឈមនឹងការបណ្តេញចេញផាកពិន័យ និងជាប់ពន្ធនាគារមិនក្រោមពីប្រាំឆ្នាំទេ។
«គាត់ប្រឈមនឹងជាប់ពន្ធនាគារផង និងពិន័យជាប្រាក់ផង អានេះ បើថៃអនុវត្តទៅតាមច្បាប់ថៃ ពិតប្រាកដមែន បាទ។ គាត់ត្រូវប្រឈមពីរ ទីមួយគាត់ត្រូវប្រឈមនឹងការបង់ផាកពិន័យពី៥ពាន់បាតទៅប្រាំម៉ឺនបាត ទីពីរគាត់ត្រូវជាប់ពន្ធនាគារមួយលើកប្រាំឆ្នាំ»។
មន្ត្រីការពារសិទិ្ធពលកររូបនេះបានបញ្ជាក់ឲ្យដឹងទៀតថា ការសម្ភាសជាមួយពលករបានឲ្យដឹងថា ពួកគេមានការពិបាកក្នុងការស្នើសុំសិទ្ធិធ្វើការដោយស្របច្បាប់នៅប្រទេសថៃ ដោយខាងភាគីកម្ពុជាមិនមានភាពសុក្រឹត្យក្នុងការយកតម្លៃធ្វើលិខិតអន្តោប្រវេសន៍ និងមានការកើតឡើងនូវសកម្មភាពបក្ខពួកនិយម។
យ៉ាងណាក៏ដោយ លោក ឌី ថេហូយ៉ា សំដែងក្តីកោតសរសើរចំពោះការប្រឹងប្រែងរបស់រដ្ឋាភិបាលក្នុងការរៀបចំបង្កើតការិយាល័យធ្វើការនៅតាមខេត្តជាប់ព្រំដែនថៃ ក្នុងនោះមានខេត្តបាត់ដំបង និងបន្ទាយមានជ័យ ដើម្បីសម្រួលបំពេញភាពស្របច្បាប់ដល់ពលករខ្មែរដែលមានបំណងចូលទៅធ្វើការនៅទឹកដីថៃ។ លោកបានស្នើឲ្យរដ្ឋាភិបាលប្រទេសទាំងពីរមានការចរចា លើការអនុវត្តច្បាប់ការងារថៃដែលត្រូវបានវិសោធនកម្ម ដោយសន្សឹមៗ និងពន្យារពេលនៃការដាក់ទោសទណ្ឌលើពលករខ្មែរ ប្រសិនបើពួកគេមានភាពយឺតយ៉ាវក្នុងការទទួលបានឯកសារផ្សេងៗ សម្រាប់បញ្ជាក់ពីភាពស្របច្បាប់នៃការបំពេញការងារនៅប្រទេសថៃ។
មន្ត្រីនៅស្ថានទូតប្រទេសថៃប្រចាំកម្ពុជា មិនទាន់ឆ្លើយសំណួរដែល VOA ផ្ញើតាមសារ Email ទេ មកដល់ល្ងាចថ្ងៃអង្គារនេះ។ VOA ក៏មិនទាន់អាចទាក់ទងលោក ហេង សួ អ្នកនាំពាក្យក្រសួងការងារបានដែរ។
ការបង្រ្កាបរបស់រដ្ឋាភិបាលថៃលើពលករខ្មែរធ្លាប់បានធ្វើឡើងជាទ្រង់ទ្រាយធំ កាលពីបួនឆ្នាំមុន ពោលគឺកាលពីខែមិថុនា ឆ្នាំ២០១៤ ពលករខ្មែរជាង១៧ម៉ឺននាក់ត្រូវបានបង្ខំចិត្តចាកចេញពីប្រទេសថៃ ក្រោយពីរបបយោធាថៃបង្ក្រាបលើពលករខុសច្បាប់ក្នុងប្រទេសខ្លួន។ របាយការណ៍មួយរបស់អង្គការការពារសិទ្ធិពលករបង្ហាញថា យ៉ាងហោចណាស់មានពលករខ្មែរ១លាននាក់ធ្វើការនៅក្នុងប្រទេសថៃ ទាំងស្របច្បាប់ និងខុសច្បាប់៕
