ភ្ជាប់​ទៅ​គេហទំព័រ​ទាក់ទង

រដ្ឋាភិបាល​ថៃ​ផ្អាក​ការផ្ដល់​ស្វយ័តភាព​ដល់​តំបន់​ភាគ​ខាងត្បូង


​លោក​ស្រី ​យីងឡឹក​ ស្ហ៊ីណាវ៉ាត់ (Yingluck Shinawatra) ជា​នាយក​រដ្ឋមន្ដ្រី​​នៃ​ប្រទេស​ថៃ។

នាយក​រដ្ឋមន្ដ្រី​ថៃ ​លោក​ស្រី ​យីងឡឹក​ ស្ហ៊ីណាវ៉ាត់ ​បាន​ផ្អាក​កិច្ចសន្យា​ដែល​បាន​ធ្វើ​កាល​ពី​ពេល​ឃោសនា​រក​សម្លេង​ឆ្នោត ដែលថា​នឹង​បង្កើត​តំបន់​រដ្ឋបាល​ពិសេស​ដល់​ខេត្ដ​ភាគ​ខាង​ត្បូង​ប្រទេស​ដែល​មាន​ការ​រំជើប​រំជួល។ អ្នកវិភាគ​នយោបាយ​និយាយ​ថា​ ការ​បះបោរ​មិន​ឈប់ឈរ​នៅ​ក្នុង​តំបន់​ដែលមនុស្សភាគច្រើន​ជាជន​អ៊ីស្លាមម៉ាឡេ ​អាច​ដោះ​ស្រាយ​បាន ​លុះត្រា​តែ​មាន​ការ​អនុញាត​ឲ្យ​មាន​ទ្រង់ទ្រាយ​ណា​មួយ​នៃ​ការ​គ្រប់គ្រង​ដោយ​ខ្លួន​ឯង។​ ​រដ្ឋាភិបាល​នេះ មិនមាន​ការ​លើក​ទឹកចិត្ដ​ ដើម្បី​ផ្លាស់ប្ដូរ​ស្ថានការនៅ​ទី​នោះ​ទេ។

នៅ​ក្នុង​ការឃោសនា​រក​សំឡេង​ឆ្នោតរបស់​គណបក្ស ​ភឿ ថៃ​ កាល​ពី​ដើម​ឆ្នាំ គេ​ប្រឹង​ប្រែង​ស្វែង​រក​ការ​គាំ​ទ្រ​ពី​ជនជាតិ​ថៃ​នៅ​តំបន់​ភាគ​ខាងត្បូង​ប្រទេស​ ដែល​ជា​ប្រពៃណី ​មិន​ធ្លាប់​គាំ​ទ្រ​គណបក្ស​នេះ​ទេ។

គណបក្ស​ភឿថៃ ចង់​ប្រគល់ខេត្ដ​បីនៃភាគខាងត្បូង​ប្រទេសឲ្យទៅជា​តំបន់​រដ្ឋបាល​ពិសេស។ ខេត្ដ​ណារាធីវ៉ាត ប៉ាតានី ​និង​ខេត្ដ​យ៉ាឡា​ជា​ផ្នែក​មួយ​ដំបន់​ ស៊ូលតង់​ មូស្លិម ​ដែលត្រូវបាន​ប្រទេស​ថៃ​បញ្ចូល​ជា​ឧបសម្ពន្ធ ​កាល​ពី​ជាង​មួយ​សតវត្សរ៍មក​ហើយ។

ចាប់​តាំង​ពី​ឆ្នាំ​២០០៤​ មក​ ក្រុម​បះបោរ​បាន​បើក​យុទ្ធនាការ​ឃោរឃៅ​ប្រឆាំង​វប្បធម៌​ថៃ​និយម​សាសនា​ព្រះពុទ្ធ ​នៅ​ក្នុង​ចំណោម​ជនជាតិម៉ាឡេ​ម៊ូស្លីមភាគ​ច្រើន។ កាល​ពី​ដើម​ខែ​នេះ​ នាយក​រដ្ឋមន្ដ្រីលោក​ស្រី ​យីងឡាក់ ​ស្ហ៊ីណាវ៉ាត់ ​ថ្លែង​ថា រដ្ឋាភិបាល​របស់​លោក​ស្រីមិនមាន​ផែនការ​ផ្ដល់​ឋានៈ​ពិសេស​ដល់​ខេត្ដ​ទាំង​នោះ​ទេ។

អ្នកស្រី ​រុងក្រាវី ឆាឡឹម ​ស៊ីពិង​យ៉រ័ត្ន ជា​អ្នកវិភាគ​នយោបាយ​របស់​ប្រទេស​ថៃធ្វើ​ការ​ឲ្យ​អង្គការ​ក្រុម​ វិបត្ដ​អន្ដរជាតិ​ International​ Crisis Group។

«នេះ​ដោយ​សារ​តែមួយ​ផ្នែក​ មក​ពី​រដ្ឋាភិបាល​ដឹកនាំ​ដែល​ដោយគណបក្ស​ភឿថៃ ​មិន​បាន​ឈ្នះឆ្នោត ​ទទួល​យក​កៅ​អីណា​មួយ​ មក​ពី​តំបន់​ភាគ​ខាង​ត្បូង។​ ហើយ​គេ​មិន​ឃើញ​អ្វី ​ដែល​មាន​ចំណេញ​នយោបាយ​ពី​ដំបន់នោះទេ»។

គណបក្សរបស់​លោកស្រី​យីងឡាក់​ ស្ហ៊ីណាវ៉ាត់ ​មិនមាន​ប្រជាប្រិយភាពនៅ​តំបន់​ភាគ​ខាង​ត្បូង​ប្រទេស​ទេនៅ​ពេល​មុន​ការ​បោះឆ្នោត​ ដោយ​សារ​តែមាន​ការ​បង្រ្កាប​ដ៏​ឃោរឃៅ ​នៅ​ជំនាន់​របប​គ្រប់គ្រង​របស់​បង​ប្រុស ​របស់​លោក​ស្រី ​កាល​ពី​ប៉ុន្មាន​ឆ្នាំ​មុន។

តែ​ទោះ​ជា​ វា​មិន​ធ្វើ​ឲ្យ​មាន​ចំណេញ​នយោបាយ​ដល់​គណបក្ស​ភឿថៃ​ក៏ដោយ​ អ្នក​វិភាគ​និយាយ​ថា​ ការ​អនុញាត​ឲ្យ​តំបន់​ភាគ​ខាង​ត្បូង​គ្រប់គ្រង​ដោយ​ខ្លួន​ឯង ​អាច​ជួយ​កំចាត់​ការ​បះបោរ​ដែលមានរយៈពេល​ ៧ ឆ្នាំ​នៅ​ទី​នោះ ​ដែល​បានបំផ្លាញ​ជីវិត​មនុស្សជិត​ ៥.000 នាក់។

ទាហាន​រាប់​ពាន់ម៉ឺន​នាក់​ ស្ថិត​នៅ​តំបន់​ភាគ​ខាង​ត្បូង​ដើម្បី​រក្សា​សន្ដិសុខ ដោយ​គេ​ប្រើ​ច្បាប់​គ្រា​អាសន្ដ ​ដែល​ផ្ដល់​អភ័យឯកសិទ្ធិ​ដែលមិន​អាចកាត់​ទោស​បាន។

ក្រុម​ការពារ​សិទ្ធិមនុស្ស​និយាយ​ថា​ ច្បាប់​នោះ​បើក​ផ្លូវ​ឲ្យ​មាន​បទ​រំលោភ​តាម​ផ្លូវការ​ នៅ​ពេល​គេ​បង្រ្កាប​ការ​បះបោរ។

Donnal Guest ជា​នាយិកា​រង​នៃ​កម្មវិធី​ អាស៊ី​របស់​អង្គការAmnesty International។ អ្នកស្រីថ្លែង​នៅ​ក្លិប​អ្នក​យក​ព័ត៌មាន​បរទេស​ក្នុង​ប្រទេស​ថៃ នៅ​ថ្ងៃអង្គារ​នេះ​ថា​ កង​កម្លាំង​សន្ដិសុខ​នៅ​តែ​ប្រព្រឹត្ដ​ការ​ធ្វើ​ទារុណ្ឌកម្ម​ និងបទ​រំលោភលើ​សិទ្ធិ​មនុស្ស​ដទៃ​ទៀត។

«សេចក្ដីរាយការណ៍​របស់​អង្គការ​ Amnesty ​International​ កត់​សម្គាល់​ថា គ្មាន​នរណា​ម្នាក់​បាន​ត្រូវ​ចាប់​ឲ្យ​ទទួល​ខុស​ត្រូវ​ក្នុង​ការ​ធ្វើ​ទារុណកម្ម​មក​លើ​ជនសង្ស័យទេ។ ​ហើយ​ជាង​ពីរ​ឆ្នាំ​មក​ហើយ ​អំពើ​នោះ​នៅ​តែ​មាន​ជាបន្ដ»។

ក្នុង​សប្ដាហ៍​នេះ​ អង្គការ​ Amnesty International ​ឲ្យដឹង​ថា​ ជនរងគ្រោះពីរ​ភាគ​បី​ នៅ​តំបន់​ភាគ​ខាង​ត្បូង​ ជា​ជន​ស៊ីវិល ​ភាគ​ច្រើន​ជាក្រុម​អ៊ីស្លាម ​ដែល​គេ​មើល​ឃើញ​ថា ​ជា​អ្នក​ធ្វើការ​សហការ​ណ៍​ជា​មួយរដ្ឋាភិបាល ឬ ​មិន​បាន​គាំទ្រ​ការ​បះបោរ។

អ្នកស្រី​ Guess ​ថ្លែង​ថា​ កាល​ពី​ប្រាំ​ឆ្នាំកន្លង​ទៅ​នេះ​ ការ​វាយ​ប្រហារ​របស់ក្រុម​បះបោរ​ តម្រង់​ទៅ​រក​ទិសដៅ​ខ្សោយ​ ដូច​ជា​ កសិករ​ សាលារៀន ​អ្នក​រកស៊ី ​ព្រះសង្ឃ ​និងមន្ដ្រី​រាជការ។

«ខណៈ​ដែល​ក្រុម​បះបោរ ​មិនបាន​លាត​ត្រដាង​ឲ្យ​ឃើញ​មូលហេតុ​ច្បាស់លាស់​នៃ​ហិង្សា គោលការណ៍ ​ឬ ​ការ​ទាមទារ​ទិសដៅ​នេះ​ ការ​វាយ​ប្រហារ​ទាំងនោះ​ ច្រើន​តែ​តម្រង់​ទៅ​រកការ​រីក​សាយ​ភាយ​ភេរវកម្ម​ដល់​ជន​ស៊ីវិល។ ​ការវាយប្រហារ​ដូច្នោះ ​ជា​បទ​ឧក្រិដ្ឋ​សង្រ្គាម»។

អ្នក​វិភាគ​និយាយ​ថា​ មួយ​ផ្នែក​នៃ​បញ្ហានៃ​ការ​ឆ្លើយតប​របស់​រដ្ឋាភិបាល​ទៅនឹងអំពើ​ឃោរឃៅ​នៅ​ក្នុង​ខេត្ដ​ភាគ​ខាង​ត្បូង​ គឺការខ្វះ​កិច្ច​ប្រឹងប្រែង​ធ្វើការសម្រប​សម្រួល​គ្នាឲ្យ​បាន​សមរម្យ។

នៅ​ដើម​ខែ​នេះ​ ប៉ូលិស​បាន​ដាក់​កំហុស​មក​លើ​ការ​វាយ​ប្រហារ​ដាក់​គ្រាប់​បែក​ផ្ទុះ​ ​លើ​យុទ្ធនាការ​របស់​រដ្ឋាភិបាល​ប្រឆាំង​នឹង​ក្រុម​រត់​គ្រឿងញៀន ដែល​បាន​សម្លាប់​មនុស្ស ​៧ ​នាក់ ​រាប់​ទាំងជនជាតិម៉ាឡេ ​៥ ​នាក់​ផង។

តែ​ក្រសួង​មហា​ផ្ទៃ​ បាន​បដិសេធការ​ពាក់ព័ន្ធ​ដូច្នោះ​ ហើយ​និយាយ​ថា​ អំពើ​ឃោរឃៅ​នោះ​ទាក់ទង​ទៅ​នឹង​ការ​យល់ឃើញ​ថា​ មាន​អយុត្ដិធម៌ អសមភាព​ និង​ការ​លំបាក​សេដ្ឋកិច្ច។

ក្នុង​កិច្ចប្រឹងប្រែង​មួយ​ដើម្បី​ដោះស្រាយ​ការ​ខ្វែង​គំនិត​គ្នា​នោះ​ រដ្ឋាភិបាល​បាន​រៀប​ចំ​គម្រោងការ​បើក​ឲ្យ​មាន​មជ្ឈមណ្ឌល​ថ្មី​ សម្រាប់​ការ​សម្រប​សម្រួល​គ្នា​ និង​ការ​បញ្ចូល​នយោបាយ ​និង​កិច្ច​ប្រតិបត្ដិការ​ នៅ​ភូមិភាគ​ខាង​ត្បូង។

ស្រ្ដី​អ្នក​នាំ​ពាក្យ​របស់រដ្ឋាភិបាល Thitima Chaisang ​ថ្លែង​ថា​ ទីភ្នាក់ងារ​ពីរ​ទទួល​ខុស​ត្រូវ​ដល់​សន្ដិសុខ​ និងការអភិវឌ្ឍន៍​ គឺ​បញ្ជាការ​នៃកិច្ចប្រតិបត្ដិការសន្ដិសុខ​ផ្ទៃក្នុង​ និងមជ្ឈមណ្ឌល​រដ្ឋបាល​ខេត្ដ​នៅ​តាម​ព្រំ​ដែន​ខាង​ត្បូង​មិន​ដែល​និយាយ​រក​គ្នា​ទេ។ ​អ្នក​ស្រី​និយាយ​ថា​ មជ្ឈមណ្ឌល​នេះ​នឹង​លើក​តម្កើងឲ្យ​មាន​កិច្ចប្រតិបត្ដិការ​ប្រសើរ​ឡើង។

«រដ្ឋាភិបាល​មាន​ចិត្ដ​ព្រួយបារម្ភ​អំពី​សន្ដិសុខ ​ព្រម​ទាំង​ការ​អភិវឌ្ឍន៍​ ហើយ​នឹងយុត្ដិធម៌​ដល់​ជនរស់​នៅ​ក្នុង​ភូមិភាគ​ខាង​ត្បូង។ នេះហើយ​ជាមធ្យោបាយ​ដែល​រដ្ឋាភិបាល​ចង់​បាន»។

អាជ្ញាធរ​ថៃ​បាន​ចង្អុល​យ៉ាង​ឆាប់​រហ័ស​ថា​ ចំនួន​មនុស្ស​ស្លាប់​ប្រចាំ​ឆ្នាំ​បាន​ចុះ​ថយ ដោយ​បញ្ជាក់​ថា​ ទោះ​បី​ជា​មាន​អំពើ​ឃោរឃៅ​បន្ដ​ទៅ​ទៀត​ក៏​ដោយ ​ក៏ស្ថានការណ៍បាន​ប្រសើរ​ជាង​មុន​ដែរ។

តែ​អ្នកវិភាគ​ អ្នកស្រី រុងក្រវី​ ថ្លែង​ថា​ កិច្ចប្រឹងប្រែងធ្វើ​ឲ្យ​ប្រសើរ​ដល់​ការ​សម្រប​សម្រួល ​ក្នុង​ចំណោម​ទី​ភ្នាក់ងារ​ផ្សេង​ៗ​ មិន​បាន​នាំ​ឲ្យ​បញ្ចប់​អំពើ​ឃោរឃៅ​ទេ​ ដោយ​សារ​តែ​នយោបាយ​ទូទៅ​របស់​រដ្ឋាភិបាល​ នៅ​តែដដែល​គ្មាន​ការ​ផ្លាស់ប្ដូរ។

«បើ​រដ្ឋាភិបាល​នៅ​តែ​ប្រើ​មធ្យោបាយ​ដដែល ​ទោះ​ជា​គេ​រៀបចំ​រចនាសម្ព័ន្ត​នៃ​ប្រព័ន្ធ​ការិយាធិបតេយ្យ​បែប​ណា​ក៏​ដោយ បើ​គេ​មិន​ចាប់​ផ្ដើម​បង្កើត​នយោបាយ​ថ្មី​ទេ​ យើង​មិន​អាច​មើល​ឃើញ​ការ​បញ្ចប់​ជម្លោះ​នៅ​តំបន់​ភាគ​ខាង​ត្បូង​នោះ​ទេ»។

អ្នកស្រី ​រុងក្រវី ​ថ្លែង​ថា ​សេចក្ដី​សង្ឃឹម​ណា​មួយ​ដើម្បី​សន្ដិភាព ពឹងផ្អែក​លើទ្រង់ទ្រាយ​នៃ​វិមជ្ឈការ​អំណាច​ ហើយ​និង​ការ​បើក​ឲ្យ​មាន​ការចចារ​គ្នា​តាម​ផ្លូវការ​ជា​មួយ​ក្រុម​បះបោរ។

ប្រែ​សម្រួល​ដោយ​ អ៊ូ ធួក

XS
SM
MD
LG