ពីរឆ្នាំក្រោយពីនាយករដ្ឋមន្ដ្រី Abhisit Vejjajiva ឡើងកាន់អំណាច រដ្ឋាភិបាលរបស់លោក និងក្រុមជំទាស់ បានរៀបចំខ្លួនដើម្បីចូលរួមក្នុងការបោះឆ្នោតជាតិ ដែលនឹងប្រព្រឹត្ដធ្វើក្នុងរយៈពេល១៤ខែខាងមុខនេះ។ តែដំបូង រដ្ឋាភិបាលមានចិត្ដចង់ផ្សះផ្សារការបាក់បែកគ្នានៅក្នុងសង្គម ដើម្បីធានាថា ការបោះឆ្នោតនោះ នឹងមិននាំឲ្យមានអំពើហិង្សានយោបាយច្រើនឡើងថែមទៀតទេ។
នាយករដ្ឋមន្ដ្រី Abhisit Vejjajiva បានថ្លែងសង្កត់អំពីការចំណេញខ្លាំងមកលើសេដ្ឋកិច្ចកើតមានឡើងនៅក្នុងរដ្ឋបាលអាណត្ដិទីពីរហើយនិងកម្មវិធីកែទម្រង់សង្គម។
សេដ្ឋកិច្ចថៃបានលូតលាស់ជិត៨ភាគរយ ក្នុងឆ្នាំ២០១០ ដោយមានអត្រាគ្មានការងារធ្វើចុះទាប និង ការនាំទំនិញលក់ទៅបរទេសមានកម្រិតខ្ពស់។នៅក្នុងសន្ទរកថាថ្លែងពេលថ្មីៗអំពីកិច្ចការប្រចាំឆ្នាំ លោក Abhisitបានចង្អុលបង្ហាញកម្មវិធីជួយជនក្រីក្រ រាប់ទាំងការអប់រំជាមួលដ្ឋានដោយមិនបង់លុយ ជួយជនជរា និងគាំទ្រកសិករ។
អ្នកនាំពាក្យរបស់រដ្ឋាភិបាល លោក Panitan Wattanayagorn ថ្លែងថាសេដ្ឋកិច្ចប្រសើរគឺជាផ្នែកមួយនៃកិច្ចខិតខំរបស់រដ្ឋាភិបាល ក្នុងការរៀបចំការបោះឆ្នោត ដែលនឹងប្រព្រឹត្ដធ្វើនៅខែកុម្ភៈ ឆ្នាំ២០១២។
«ការបោះឆ្នោតនឹងប្រព្រឹត្ដធ្វើជាមិនខាន។ នាយករដ្ឋមន្ដ្រីបាននិយាយច្បាស់ហើយថា លោកនឹងបញ្ជូនសារប្រាប់ពលរដ្ឋថៃឲ្យប្រុងប្រៀបខ្លួន។ ការងើបសេដ្ឋកិច្ចឡើងវិញនេះបង្ហាញច្បាស់ថា យើងធ្វើបានសម្រេចដូច្នោះ។ ទីពីរ វាពិតហើយថា ច្បាប់បោះឆ្នោតថ្មីត្រូវសរសេរបញ្ចប់នៅក្នុងប៉ុន្មានសប្ដាហ៍ខាងមុខនេះ។ កិច្ចការចុងក្រោយ ដែលត្រូវបំពេញ គឺការធានាឲ្យមានការបោះឆ្នោតដោយសន្ដិវិធី និងស្ថេរភាព»។
លោក Abhisit បានដឹកនាំរដ្ឋាភិបាលចម្រុះ ដែលឡើងកាន់អំណាចកាលពីឆ្នាំ២០០៨ ក្រោយពីតុលាការបានសម្រេចបណ្ដេញ រដ្ឋាភិបាលពីរ ដែលគាំទ្រអតីតនាយករដ្ឋមន្ដ្រី Thaksin Shinawatra។ លោកថាក់ស៊ិន បានត្រូវបណ្ដេញចេញពីអំណាចក្នុងឆ្នាំ២០០៦ ដោយរដ្ឋប្រហារយោធា។ នៅថ្ងៃច័ន្ទ លោក Abhisitបានបដិសេធការសន្និដ្ឋាននៅក្នុងបណ្ដាញព័ត៌មានថា លោកនឹងស្នើឲ្យមានការបោះឆ្នោតឆាប់ មុនពេលកំណត់។សប្ដាហ៍នេះបញ្ចប់ឆ្នាំដ៏ឃោរឃៅបំផុតនៅក្នុងនយោបាយរបស់ប្រទេសថៃ កើតឡើងជិតពីរទសវត្សរ៍មកហើយ។ ការតវ៉ាប្រឆាំងដឹកនាំដោយ គណបក្សរណៈសិរ្សរួបរួមសម្រាប់លទ្ធិប្រជាធិបតេយ្យ បានធ្វើការកៀបសង្កត់ឲ្យរដ្ឋាភិបាលចុះចេញពីតំណែង ហើយរៀបចំឲ្យមានការបោះឆ្នោត។ ជាងពីរខែ ក្រុមបាតុកររាប់ពាន់នាក់ ដែលគេស្គាល់ថា ក្រុមអាវក្រហម បានចូលមកកាន់កាប់កណ្ដាលក្រុងបាងកក។
នៅចុងខែឧសភា យោធាបានវាយបំបែកក្រុមបាតុករ។ ការវាយបង្រ្កាបនោះ ព្រមទាំងបាតុកម្មច្រើនសប្ដាហ៍មុនពេលនេះ បានបណ្ដាលឲ្យមនុស្ស៩២នាក់ស្លាប់ និងជាង២ ពាន់នាក់របួស ទាំងជនសីវិល ទាំងទាហាន។
ក្រុមបាតុករអាវក្រហម៤រយនាក់ ព្រមទាំងមេដឹកនាំបានត្រូវចាប់ឃុំភាគច្រើនប្រឈមមុខនឹងការចោទប្រកាន់ពីបទភេរវកម្ម។ រួចប្រទេសថៃ នៅតែបាក់បែកយ៉ាងជ្រាលជ្រៅរវាងក្រុមអាវក្រហម និង ក្រុមតវ៉ាមួយទៀតគេស្គាល់ថា ក្រុមអាវលឿងដែលបណ្តេញលោក Thaksin និងក្រុមអ្នកស្នងតំណែងជំនួសលោក ធ្លាក់ចេញពីអំណាច។
លោក Kudeb Saikrajang សមាជិកម្នាក់របស់គណបក្សប្រឆាំង និយមលោកThaksin គឺគណបក្ស Puea Thai និយាយថា គណបក្សរបស់លោកប្រុងប្រៀបហើយដើម្បីចូលរួមក្នុងការបោះឆ្នោត។ តែលោកមិនសង្ឃឹមថា នឹងមានការបោះឆ្នោតឆាប់ទេ។
«យើងមិនមានជំនឿថា ការបោះឆ្នោតអាចធ្វើទៅបានមុនបញ្ចប់អាណត្ដិទេ ពីព្រោះគណបក្សចម្រុះចង់ឲ្យរដ្ឋាភិបាលបច្ចុប្បន្នកាន់អំណាចពេលមួយឆ្នាំទៀត»។
លោក Kudeb និយាយថា គណបក្សរបស់លោក រួបរួមគ្នា ហើយលោកThaksin នៅតែមានឥទ្ធិពលខ្លាំងមកលើមេដឹកនាំជាច្រើននាក់។
គណបក្សរណៈសិរ្សរួបរួមសម្រាប់លទ្ធិប្រជាធិបតេយ្យ ដែលនៅក្រោមការដឹកនាំរបស់ Thida Thavornseth នឹងគាំទ្រគណបក្ស Puea Thai ក្នុងការបោះឆ្នោត។ Thida និយាយថា គេនឹងសហការគ្នា ដើម្បីធានាថា ការប្រមូលផ្តុំរបស់គណបក្សរណៈសិរ្សរួបរួមគ្នា នឹងជាការប្រមូលផ្តុំដោយសន្ដិភាពជាមិនខាន។
«យើងមានយុទ្ធសាស្រ្ដមួយដែលយើងហៅថា ជើងពីរ។ ជើងមួយគឺចលនារបស់ក្រុមអាវក្រហម ហើយជើងមួយទៀតគឺគណបក្ស។ នៅក្នុងរដ្ឋសភា យើងប្រើជើងទាំងពីរ»។
សេចក្ដីព្រួយបារម្ភជាទូទៅអំពីអនាគតនយោបាយរបស់ប្រទេសថៃគឺ ថាតើការស៊ើបអង្កេតរបស់គណៈកម្មការរដ្ឋាភិបាលមកលើការបង្ហូរឈាមនៅឆ្នាំនេះ អាចបង្ករឲ្យសហគមន៍មានការទុកចិត្តមុនពេលបោះឆ្នោត ឬទេ?លោក Somchai Homla-or មេធាវីសិទ្ធិមនុស្ស និងជាសមាជិកនៅក្នុងគណៈកម្មការស៊ើបអង្កេតមានការទុកចិត្ដថា ការផ្សះផ្សាគ្នាអាចសម្រេចទៅបាន។
«ក្នុងចំណោមគណបក្សទាំងឡាយដែលប្រឆាំងគ្នា ខ្ញុំមានជំនឿថា ភាគច្រើននៃក្រុមទាំងនោះមិនជាអ្នកចង់ប្រើអំពើឃោរឃៅទេ ហើយគេជាមិត្ដភ័ក្ត្រគ្នា។ គេមានគោលការណ៍ដូចគ្នាក្នុងការពង្រឹងលទ្ធិប្រជាធិបតេយ្យ។ គេចង់ឃើញប្រទេសថៃរៀបចំឲ្យមាននិរន្ដរភាព។ គេចង់ឃើញប្រទេសថៃជាសង្គមយុត្ដិធម៌ ស្រឡាញ់គ្នា ហើយមានចិត្ដករុណា»។
លោក Somchai និយាយទៀតថា មេដឹកនាំរបស់គណបក្ស រណៈសិរ្សនិយមលទ្ធិប្រជាធិបតេយ្យបាននិយាយប្រាប់លោកថា គេប្រកាន់គោលជំហរតាមផែនការដើម្បីធានាឲ្យមានការបោះឆ្នោតដោយសន្ដិវិធី។តែលោក Chris Baker អ្នកនិពន្ធនិងអ្នកអធិប្បាយអំពីនយោបាយថៃមានការមន្ទិលសង្ស័យថា គណៈកម្មការនឹងមិនអាចបន្ធូរភាពតានតឹងមុនការបោះឆ្នោតបានទេ។
«មនុស្សក្នុងគណបក្សទាំងពីរបានសម្រេចចិត្ដរបស់គេរួចទៅហើយ ចំពោះមតិរបស់គេនោះ អំពីអ្វីដែលបានកើតមានឡើង។ មនុស្សភាគច្រើនមានការសង្ស័យធ្ងន់ធ្ងរថា គណៈកម្មការបែបនេះ នឹងមិនអាចនាំឲ្យមានអ្វីប្លែក ឬថ្មី ដែលគួរឲ្យទុកចិត្ដបានទេ។ វាជាការល្អបំផុត បើគេអាចធ្វើអ្វីដែលគ្រប់ៗគ្នា ឬមនុស្សជាច្រើន អាចយល់ស្របអំពីអ្វីមួយនោះ តែខ្ញុំយល់ថា វាមិនអាចកើតឡើងបានឡើយ»។
នៅក្នុងថ្ងៃទី១ខែមករា រដ្ឋាភិបាលនឹងរៀបចំឲ្យមានផែនការផ្សះផ្សារជាតិដើម្បីលើកតម្កើងសមភាព និងយុត្ដិធម៌។ តែមានអ្នកវិភាគ និង អ្នកនយោបាយខ្លះមានការភ័យខ្លាចថា លទ្ធផលមានសភាពស្ដួចស្ដើងពេកក្នុងការផ្សះផ្សារការខ្វែងគំនិតឲ្យបានមុនពេលដែលគណបក្សនយោបាយទាំងអស់ ចាប់ផ្ដើមធ្វើយុទ្ធនាការដើម្បីដណ្ដើមយកសិទ្ធិ គ្រប់គ្រងប្រទេសដែលបាក់បែកគ្នានោះ។
ប្រែសម្រួលដោយលោក អ៊ូ ធួក៕
