ភ្ជាប់​ទៅ​គេហទំព័រ​ទាក់ទង

អ្នក​ទទួល​ជ័យជំនះ​នៃ​ការបោះឆ្នោត​នៅ​ប្រទេស​ថៃ​ចាត់​វិធានការ​បង្កើត​រដ្ឋាភិបាល​ចម្រុះ


លោកស្រី​Yingluck ​Shinawatra​ មេដឹកនាំ​គណបក្ស​​ភឿថៃ​(រូបកណ្តាល)​ដែល​បាន​ទ​ទួល​​​ជ័យជំនះ​ក្នុង​ការបោះឆ្នោត​នៅ​ប្រទេស​​ថៃ​កាល​ពី​ថ្ងៃ​អាទិត្យ បាន​មក​ដល់​សណ្ឋាគារ​មួយ​នៅ​ទី​ក្រុង​​បាងកក​​ ជួប​ប្រជុំជា​មួយ​មេ​ដឹក​នាំ​គណបក្ស​៥ដើម្បិ​បង្កើត​​រដ្ឋាភិបាល​​ចម្រុះ

លោកស្រី​Yingluck ​Shinawatra​ មេដឹកនាំ​គណបក្សភឿថៃ​ដែល​បាន​ទ​ទួល​ជ័យជំនះ​ក្នុង​ការបោះឆ្នោត​នៅ​ប្រទេស​ថៃ​កាល​ពី​ថ្ងៃ​អាទិត្យ​ បាន​ប្រកាស​ផែនការ​បង្កើត​រដ្ឋាភិបាល​ចម្រុះ​សំឡេង​ភាគ​ច្រើន​ថ្មី​នៅ​ក្នុង​សភា។ ការប្រ​កាស​របស់​លោកស្រីបាន​កើត​មានឡើង​នៅពេល​ដែល​នាយក​រដ្ឋមន្រ្តី​ចេញ​ពី​តំណែង​Abhisit​ Vejjajiva​ មេដឹកនាំ​គណបក្ស​ប្រជា​ធិបតេយ្យបាន​ប្រកាស​ការលា​ចេញ​ពី​ដំណែង​របស់​លោក​ជា​មេដឹកនាំ​បន្ទាប់​ពី​ការទទួល​បរាជ័យ​របស់​គណបក្ស​នៅ​ក្នុង​ការ​បោះ​ឆ្នោត។

លោកស្រី​ Yingluck​ Shinawatra​ មេដឹកនាំ​គណបក្ស​ភឿថៃ​និយាយ​ថា​លោក​ស្រី​ត្រៀមខ្លួន​ជាស្រេច​ហើយ​ដើម្បី​បង្កើត​រដ្ឋាភិបាល​ចម្រុះ​ដែល​មាន​គណបក្ស​៥​ចូល​រួម។ ការប្រកាស​របស់​លោកស្រី​បាន​កើត​មានឡើង​មួយ​ថ្ងៃ​បន្ទាប់​ពី​គណ​បក្ស​របស់​លោក​ស្រី​បាន​ទទួលជ័យ​ជំនះ​ដ៏​ច្រើន​លើស​លុប​នៅក្នុង​ការ​បោះ​ឆ្នោត​ជាតិ​ដោយ​មាន​ការគាំទ្រ​យ៉ាងខ្លាំង​ពី​តំបន់​ខាងជើង​និង​ឦសាន​នៃ​ប្រ​ទេស​ថៃ។ លទ្ធផល​ក្រៅ​ផ្លូវការ​បង្ហាញ​ថា​គណបក្ស​របស់​លោកស្រី ​បាន​ទទួលអាសនៈ​២៦៤​ក្នុង​សភា​ដែល​មាន​សមាជិក​៥០០​នាក់។

លោក​ស្រី​ Yingluck​ ដែល​នឹង​ប្រុង​ប្រៀប​ក្លាយ​ជា​នាយក​រដ្ឋមន្រ្តី​ស្រ្តី​លើក​ដំបូង​របស់​ប្រទេស​ថៃ​បាន​ប្រាប់​សន្និសិទ​កាសែត​ក្នុង​ទីក្រុង​បាងកក​នៅ​ថ្ងៃ​ច័ន្ទ​នេះ​ថា​គោលដៅ​របស់​រដ្ឋា​ភិបាល​ថ្មី​ គឺ​ដោះស្រាយបញ្ហា​នានា​ដែល​ប្រជារាស្រ្តថៃ​ប្រឈម​មុខ។

លោក​ស្រី ​Yingluck​ មាន​ប្រសាសន៍​ថា​គណបក្ស​ភឿ​ថៃ​និង​គណបក្ស​៤​ផ្សេង​ ទៀត​មាន​គោលបំណងតែមួយ​គឺ​ធ្វើការ​គ្រប់​គ្រង​ប្រទេស​និង​ធ្វើ​ការ​ដោះ​ស្រាយ​ បញ្ហា​របស់​ប្រជា​រាស្រ្ត។ ប៉ុន្តែ ​លោក​ស្រី​មាន​ប្រសាសន៍​បន្ថែម​ទៀត​ថា​ ពួកគេ​ត្រូវ​រង់ចាំ​លទ្ធផល​បោះឆ្នោត​ផ្លូវការ​មកពី​គណៈ​កម្មការ​រៀបចំ​ការ​បោះ​ឆ្នោត។

លោកស្រី​មាន​ប្រសាសន៍​ទៀត​ថា​គោលដៅ​ជា​បន្ទាន់​ដែល​រដ្ឋាភិបាល​កំពុង​ប្រឈម​មុខ​រួមមាន​ការផ្សះ​ផ្សា​ជាតិ​ ការប្រុង​ប្រៀប​ធ្វើ​ពិធី​ចម្រើន​ព្រះជន្ម​៨៤​ព្រះវស្សា​របស់​ព្រះ​មហាក្សត្រ​ថៃ​ ការរើប​ឡើង​វិញ​នូវ​សេដ្ឋកិច្ច ​ការជួយ​បុគ្គលិក​ស៊ីវិល​ហើយ​នឹង​ដោះស្រាយ​អំពើ​ពុក​រលួយ។គណបក្ស​ចម្រុះ​ អាច​មាន​អាសនៈ​២៩៩​ក្នុង​សភា​ដែល​មាន​សមាជិក​៥០០។

នៅ​ព្រឹក​ថ្ងៃ​នេះ​ នាយក​រដ្ឋមន្រ្តី​និង​មេ​ដឹក​នាំ​គណបក្ស​ប្រជាធិបតេយ្យ​ចេញ​ពី​តំណែង​ Abhisit ​Vejjajiva​បាន​ប្រកាស​ការលា​ចេញ​ពីតំណែង​បន្ទាប់​ពី​គណ​បក្ស​បាន​ទទួល​បរា​ជ័យ​ក្នុង​ការបោះ​ឆ្នោត​នៅ​ចុង​សប្តាហ៍។

លោក​ Abhisit​ មាន​ប្រសាសន៍​ថា​លទ្ធផល​ក្រៅ​ផ្លូវការ​បង្ហាញ​ថា​គណបក្ស​មិន​បាន​ទទួល​អាសនៈ​ដូច​ការបោះ​ឆ្នោត​ឆ្នាំ​២០០៧​ទេ។ ជា​លទ្ធផល​ លោក​ត្រូវ​ទទួល​ខុស​ត្រូវ​ចំពោះ​ការបរាជ័យ​នេះ ​ហើយ​លោក​លាចេញ​ពីតំណែង​ជា​មេ​ដឹក​នាំ​របស់​គណបក្ស​ប្រជា​ធិបតេយ្យ។

ការ​លា​លែង​ពី​តំណែង​របស់​លោក​នឹង​តម្រូវ​ឲ្យ​សមាជិក​ទាំងអស់​របស់​គណៈ​កម្មការ​គណបក្ស​ក៏​ត្រូវ​លាលែង​ពី​តំណែង​ដែរ​រហូត​ដល់​មាន​គណៈ​កម្មការ​ថ្មី​មួយ​ត្រូវ​បាន​ជ្រើសរើស។

ផ្នែក​ទីផ្សារ​ហិរញ្ញវត្ថុ​មាន​ប្រតិកម្ម​ជា​វិជ្ជមាន​ចំពោះ​ជោគជ័យ​ក្នុង​ការ​បោះឆ្នោត​នេះ​ ដោយ​ហេតុ​ថា ​ប្រាក់បាត​ថៃ​ ហើយនឹង​ផ្សារ​ស្តុក​ក្នុង​ស្រុក​រឹងមាំ​ខ្លាំង​ឡើង។​ អ្នក​វិភាគ​និយាយ​ថា ​អ្នក​វិនិយោគទុន​បរទេស​កំពុង​វិលត្រឡប់​មក​រក​ទីផ្សារ​ក្នុង​ប្រទេស​ថៃ​វិញ​ ក្រោយពី​ស្ថានភាព​មិន​ច្បាស់លាស់​មុន​ការ​បោះឆ្នោត​បាន​កន្លង​ផុតទៅ។

លោក Supavud Saicheua​ នាយក​គ្រប់គ្រង​របស់​ក្រុមហ៊ុន​មូលបត្រ​មួយ​ឈ្មោះ ​Phatra Securities​ និយាយ​ថា ការ​ចាប់​ផ្តើម​បង្កើត​រដ្ឋាភិបាល​ចម្រុះ​ឲ្យ​បាន​ឆាប់ ​បាន​បង្ហាញ​ថា ​ស្ថិរភាព​នយោបាយ​នឹង​មាន​ក្នុង​ពេលឆាប់ៗ​ខាងមុខ​នេះ។

«ការ​ដែល​គណបក្ស ​Pheu Thai​ អាច​ឈ្នះ​ការ​បោះឆ្នោត​ដោយ​សំឡេង​ភាគ​ច្រើននេះ​ធ្វើ​ឲ្យ​ទីផ្សារ​មាន​ជំនឿ។​ ការ​បង្កើត​រដ្ឋាភិបាល​ថ្មីឆាប់ៗ​ប្រហែល​ជា​នឹង​មិនមាន​បញ្ហា​ទេ។ ​ មាន​ឱកាស​ច្រើន​ណាស់​ដែល​ថា ​គេ​អាច​បង្កើត​រដ្ឋាភិបាល​ក្នុង​ពេល​ដ៏ឆាប់។​ ដូច្នេះ​យើង​នឹង​មាន​រដ្ឋាភិបាល​ចម្រុះ ​របស់​អ្នកស្រី ​Yingluck​ ក្នុង​ពេល​៥ឬ៦​សប្តាហ៍»។

ប៉ុន្តែ​អ្នក​វិភាគ​និយាយ​ថា ​មាន​ការ​ប្រឈម​មុខ​ខ្លះៗ​សម្រាប់​រដ្ឋាភិបាល​ថ្មី ​ដូច​ជា​ការ​ភ័យខ្លាច​អំពី​អតិផរណា​ នៅ​ពេល​រដ្ឋាភិបាល​ថៃ​ដឹក​នាំ​ដោយ​គណបក្ស ​Pheu Thai​ចាប់​ផ្តើម​ធ្វើតាម​ពាក្យសន្យា​ក្នុង​ការ​បោះឆ្នោត​ដែល​ថា ​ខ្លួន​នឹង​បង្កើនប្រាក់​ឈ្នួល​ នឹង​ដំឡើង​ថ្លៃ​អង្ករ​ទ្វេដង។

លោកស្រី ​Yingluck ​គឺ​ជា​ប្អូនស្រី​របស់​លោក​ថាក់ស៊ីន ស៊ីណាវ៉ាត់​ អតីត​នាយករដ្ឋមន្ត្រី​ថៃ ​ដែល​ត្រូវ​បាន​ទម្លាក់ពី​តំណែង​ដោយសារ​រដ្ឋប្រហារ​មួយ​កាលពី​ឆ្នាំ​២០០៦​ ហើយ​លោក​បាន​ភៀសខ្លួន​ចេញពី​ប្រទេស​ថៃ​ក្នុង​ឆ្នាំ​២០០៨។​ លោក​នៅ​ប្រឈម​មុខ​នឹង​ទោស​ជាប់​ពន្ធនាគារ​រយៈពេល​២​ឆ្នាំ​ក្នុង​ប្រទេស​ថៃ​ពីបទ​ពុក​រលួយ។​ គណបក្ស​បាន​ពិភាក្សា​អំពី​លទ្ធភាព​លើកលែង​លោក​លោក​ថាក់ស៊ីន ​និង​អ្នក​ផ្សេង​ទៀត​ដែល​ជាប់​ទាក់ទង​នឹង​ព្រឹត្តិការណ៍​នានា​តាំង​ពី​មាន​រដ្ឋប្រហារ​នោះ​មក។​ ប៉ុន្តែ​អតីត​នាយក​រដ្ឋមន្ត្រី​នេះ​បាន​និយាយ​ថា ​ លោក​ចង់​វិល​ត្រឡប់​ទៅ​ប្រទេស​ថៃ​វិញ​ តែ​លោក​មិនមាន​ផែន​ការ​ទៅ​វិញ​ឆាប់ៗ​ទេ៕

ប្រែ​សម្រួល​ដោយ​ជឹង​ ប៉ូជីន​និង​ពិន​ ស៊ីសុវណ្ណ

XS
SM
MD
LG